E Tukuna Nona Vakabauta Vei Ira na Nona Lewenikalasi

O NA taleitaka mo vukei ira na lewe ni nomu kalasi mera kila vinaka na nomu vakabauta e yavutaki ena iVolatabu? O Magdalena e dua na iVakadinadina i Jiova, e gonevuli yabaki 18 ena dua na koronivuli torocake mai Poladi. E dau tukuna vei ira nona lewenikalasi na nona vakabauta. Oqo e vakavuna mera dau tarogi koya ena levu na taro, me vaka ‘Era vakacava sara tu mada na iVakadinadina i Jiova?’ se ‘Oni vakabauti Jisu Karisito?’ Ena vukei ira vakacava nona lewenikalasi o Magdalena? E kerea na veidusimaki i Jiova qai cakacakataka sara na ka e masulaka.​​—⁠Jemesa 1:⁠5.

Dua na siga e lai kerei nona qasenivuli o Magdalena kevaka e rawa ni vakaraitaka vei ira na lewenikalasi na vidio Jehovah’s Witnesses​​—⁠The Organization Behind the Name.a E dau dokai koya kei nona vakabauta na qasenivuli oqo. A mani vakadonui nona kerekere. Tukuna sara vei ira na lewe ni nona kalasi o Magdalena: “Au na kerea e dua noqu itokani me vosa vei kemuni ena loma ni 90 na miniti. Ena saravi kina e dua na tepi ni vidio qai dua na ivakamacala me baleti ira na iVakadinadina i Jiova. Oni na via tiko kina?” Era vakadonuya kece. Erau vakarau sara kina o Magdalena kei Wojciech, e dua sa matua ena cakacaka vakaitalatala vakatabakidua.

Rau lalawataka me tekivu na nodrau ivakamacala ena dua na vosa e yavutaki ena brochure na Jehovah’s Witnesses​​—⁠Who Are They? What Do They Believe?b me 20 na miniti. Tarava yani na saumi ni nodra taro na lewenikalasi. Oti oya sa na qai saravi na tepi ni vidio ena laibri. Ena soli e dua na iloloma vei ira na lewenikalasi yadudua​​—⁠ena tawani tiko ena dua na waqanivola levu e vica na brochure, na ivola Questions Young People Ask​​—⁠Answers That Work,c kei na so na ivoladraudrau.

Ena siga me rau vakamacala kina, a ra lako yani e 14 na lewe ni nona kalasi o Magdalena kei na nona qasenivuli, vaka kina e 4 na gonevuli eratou a tiko ena laibri ena gauna oya. E vakamacalataka taumada o Wojciech ni so na dauniserekali kei na dauvolaivola ni Poladi era vakayagataka ena nodra ivola na yaca ni Kalou, o Jiova. E tukuna tale ga ni a bau volai ena so na ivoladusidusi makawa ni lotu Katolika na yaca ni Kalou. Ni vakamacalataka na nodra cakacaka na iVakadinadina i Jiova ena gauna oqo, e vakaraitaka sara e so na brochure ni valenivolavola ni tabana kei na itaba ni vica na Assembly Hall.

A tarava yani e dua na veivosaki bulabula. Erau vakayagataka o Magdalena kei Wojciech na iVolatabu me rau sauma nodra taro na lewenikalasi. E tarai ira na tikina oqo, era vakadeitaka kina ni o ira na iVakadinadina i Jiova era sega ni vunautaka ga na nodra nanuma. Na taro cava soti era taroga? Era saumi vakacava?

Taro: E kilakilai dredre na iVolatabu. O cei e kila na ibalebale dina ni ka e tukuni kina? Ena rawa vakacava me salavata na noda bula kei na ka e kaya na iVolatabu?

Kena isau: Era kaya e so ni rawa ni vakayagataki na iVolatabu me tokona e dua ga na vakasama e tu vei iko. Ia vakasamataka mada oqo: Kevaka o via kila na ibalebale ni itukutuku e vola e dua na dauvolaivola, e sega li ni vinaka mo na tarogi koya ga? E bula tiko o koya e vakavuna me volai na iVolatabu, o Jiova na Kalou, e sega ni vakataki ira na tamata dauvolaivola era sa mate. (Roma 1:​20; 1 Korinica 8:​5, 6) Na veitikina wavolita ena vakarawarawataka na kena kilai na ibalebale dina ni dua na tikinivolatabu. Kena ikuri, ni vakamacalataki ena vica na vanua ena iVolatabu e dua na usutu, ena veivuke sara kevaka era raici vata na veitikina oqori. Na sala oqo eda sa vakalaivi Jiova tiko kina me vakamua na noda vakasama, me vaka sara ga e vakamacala tiko vei keda. Eda na mai kila tale ga kina na nona inaki da qai bulataka sara ga me vaka e tukuni tu ena iVolatabu.

Taro: Cava era duidui kina na iVakadinadina i Jiova ni vakatauvatani kei ira na veimatalotu Vakarisito?

Kena isau: Keimami lotu Vakarisito, ia e sega ni yacana wale ga! Era guta na iVakadinadina i Jiova mera bulataka na nodra vakabauta kei na veika yaga e vakavulica vei ira o Jiova. (Aisea 48:​17, 18) Era kila ni tiko vei ira na ka dina baleta ni yavutaki kece na nodra ivakavuvuli ena iVolatabu.​​—⁠Maciu 7:​13, 14, 21-​23.

Taro: Na cava na vuna oni dau vosa kina vei ira oni sega ni kila? Sega li ni oni suguraka tiko vei ira na nomuni vakabauta?

Kena isau: E dua beka na kena leqa kevaka e dua e torovi iko e salatu qai tarogi iko ena dua na taro? (Jeremaia 5:1; Sefanaia 2:​2, 3) (Rau vakatasuasuataka sara o Wojciech kei Magdalena na nodrau tarogi ira na lako tu ena salatu se cava na nodra nanuma baleta na nona veikauaitaki na Kalou ena vuku ni waluvu a sa qai yaco ga i Poladi.) Ni keimami rogoca oti na ka era nanuma, keimami sa qai vakamua na veivosaki ina iVolatabu. Kevaka e dua e sega ni via veivosaki, keimami vakamoce ga qai tomana tiko na neimami cakacaka. (Maciu 10:​11-​14) Oni na kaya beka ni veivakasaurarataki oqori? Se cava, meda sa kua sara ga ni qai veivosaki?

Taro: Na cava oni sega ni dau solevutaka kina na Siganisucu kei na soqo tale e so?

Kena isau: E dua ga na soqo e vakarota na iVolatabu me solevutaki​​—⁠oya na iVakananumi ni nona mate o Jisu Karisito. (1 Korinica 11:​23-​26) Ia me baleta na soqo tale e so, oni rawa ni kila na vanua era vu mai kina ena nomuni raica na encyclopedia kei na so tale na ivola nuitaki. Nomuni cakava oqori, oni na qai kila vinaka kina na vuna keimami sega ni dau solevutaka kina.​​—⁠2 Korinica 6:​14-​18.

Levu tale na nodra taro na lewenikalasi erau sauma o Magdalena kei Wojciech. A mani sega ni saravi na tepi ni vidio baleta ni sa rui balavu na veivosaki.

Cava e laurai vei ira na gonevuli? E tukuna o Magdalena: “Au kurabui ni vakavure vakasama na taro era taroga na gone era dau veivakanini qai dau veivakalialiai. Era dau kaya nira sega ni vakabauta ni bula tu na Kalou, ia ena gauna e caka tiko kina na veivosaki era vakaraitaka nira vakabauta na Kalou!” Era vakavinavinakataka na tiko ena siga oya na iloloma e soli vei ira​​—⁠e 35 na ivola, 63 na brochure, kei na 34 na ivoladraudrau.

Totoka dina nona sasaga o Magdalena me vukei ira nona icaba e koronivuli, se vakaevei? Era kilai ira vinaka kina na iVakadinadina i Jiova na lewe ni nona kalasi, e uqeti ira tale ga na itabagone mera vakasamataka na inaki ni bula. Vakacava mo saga mo vukei ira na lewe ni nomu kalasi mera kila vinaka na nomu vakabauta?

[iVakamacala e ra]

[iYaloyalo ena tabana e 31]

Vakarautaka tiko o Magdalena kei Wojciech na nodrau ivakamacala