Me Kua ni Vakaseavutaka Nomu Marau na Tauvimate

KAYA mada o yadra ena dua na mataka o qai diva me oti totolo ga na siga oya. Ke sega, sa na baci dua tale na siga rarawa kei na mosi. De dua o na duavata kei na ka e tukuna o Jope: “E vinaka cake meu mate, meu kua ga ni rarawa.” (Jope 7:15, The New English Bible) Vakacava ke se sega ni oti na ituvaki rarawataki o sotava tiko me vica tale na yabaki?

Qori na ka e sotava o Mefiposece na luvei Jonacani, na itokani i Tui Tevita. Ni se yabaki lima o Mefiposece a ‘lutu, e vakavuna me lokiloki.’ (2 Sam. 4:4) A beitaki vakailasu ni liumuritaka na tui, mani kau tani vua na nona iyau, na ka vakamosiyalo qori e rairai vakavuna na nona lomaleqataka vakalevu o Mefiposece na nona lokiloki. Ia e ivakaraitaki vinaka ni a vosota na ituvaki a tu kina, nona vakaucacataki, kei na nona yalolailai. A sega tale ga ni vakalaiva qori me vakaseavutaka na nona marau.—2 Sam. 9:6-10; 16:1-4; 19:24-30.

Dua tale na ivakaraitaki na yapositolo o Paula. A vola ena dua na gauna ni vakararawataki koya tiko “e dua na votonikau.” (2 Kor. 12:7) A rairai vakaibalebaletaka qori ina dua na ka e vakaleqai koya tiko ena dua na gauna balavu, se rairai o ira era vakalewa na nona lesi me yapositolo. Se mani cava e yaco, a sotava tiko ga na leqa, qai vinakati me vosota na rarawa kei na mosi e vu mai na leqa qori.—2 Kor. 12:9, 10.

Eso tale ga na dauveiqaravi ni Kalou nikua e vakaleqai ira tu ena dua na gauna balavu na tauvimate bibi kei na lomabibi. Ni yabaki 18 o Magdalena, a laurai vua na matenikuli na systemic lupus erythematosus. Na mate qori e vakavuna mera kania kina na noda gacagaca na sotia ni yagoda. E kaya o Magdalena: “Au domobula sara ga. Ni toso na gauna sa qai bibi ga na kequ mate, qai kuria ga na leqa na mosi ni ketequ, tauvi au na alasa ni gusu kei na mate ni domo.” Ia e sega ni va qori na mate a tauvi Izabela, ni sega ni laurai levu. E kaya: “Au se tekivu lomabibi niu se gone. Au dau nuiqawaqawa kina qai taqaya, e dau leka noqu icegu qai mosi na ketequ. Qori e dau vakavuna sara ga na noqu wawale.”

Yalani na ka o Cakava

Na tauvimate kei na vakaleqai ni so na tikiniyago e rawa ni veisautaka na nomu bula. Ena gauna va qori, e vinaka mo vakasamataka vinaka sara na kemu ituvaki. Ena sega ni rawarawa mo ciqoma ni sa na yalani na ka o rawa ni cakava. E tukuna o Magdalena: “Ni toso na gauna sa qai ca ga vakalevu na mate e tauvi au tiko. Na levu ni noqu wawale e dau vakadredretaka noqu yadra ena mataka. E dredre meu vakatulewataka na ka meu cakava baleta ni dau veisau na mate e tauvi au tiko. Na ka ga au rarawataka vakalevu, niu sa sega ni cakava rawa e levu na ka ena noqu qaravi Jiova ni vakatauvatani e liu.”

E kaya o Zbigniew: “Ni oti e vica na yabaki, e vakamalumalumutaki au sara ga na sasala ni yago, e vakaleqa sara ga na isema ni yagoqu. Ena so na gauna e dau vuvuce vakalevu, au dau sega ni cakava rawa mada ga eso na ka lalai. Au dau yalolailai sara ga kina.”

Ena vica na yabaki sa oti, a laurai vei Barbara ni dua na ka e tubu tiko ena nona mona. E tukuna: “E veisau sara ga na ituvaki ni yagoqu. Au dau malumalumu, mosi vakalevu na uluqu, e sega ni dau dei tale ga noqu vakasama ena ka au cakava. Ni se qai tauvi au vakadua na mate qori, e vinakati kina meu dikeva tale na ka kece me baleta na noqu bula.”

O ira kece era sa vakamacalataki mai era tacida. Era dau vakaliuca na loma i Jiova. Era nuitaka vakatabakidua na Kalou ra qai vakila dina na nona veitokoni.—Vkai. 3:5, 6.

E Veivuke Vakacava o Jiova?

Meda kua sara ni nanuma ni veika rarawa eda sotava e vakaraitaka nona cudruvi keda na Kalou. (Lele 3:33) Vakasamataka mada na veika e sotava o Jope, e kilai ni “yalododonu ka daucaka dodonu.” (Jope 1:8) Na Kalou e sega ni dau vakatovolea e dua ena ka ca. (Jeme. 1:13) Na mate kece—wili kina na kena e tauvi keda ena dua na gauna balavu kei na kena eda lomabibitaka vakalevu—erau vakadewa na vuda o Atama kei Ivi.—Roma 5:12.

Ia o Jiova kei Jisu ena vukei ira na yalododonu. (Same 34:15) Eda vakavinavinaka ni ‘noda idrodro qai noda bainivalu’ na Kalou, vakabibi nida sotava na ituvaki dredre. (Same 91:2) Ni o sotava gona eso na leqa e dredre ni wali, na cava o rawa ni cakava mo marau tiko ga kina?

Masu: Vakatotomuri ira na tamata yalodina ni Kalou ena gauna makawa, biuta vua na Tamada vakalomalagi na nomu icolacola bibi. (Same 55:22) O na vakila kina na “vakacegu ni Kalou e uasivia na vakasama kece.” Na vakacegu qori ‘ena qai taqomaka na lomamu kei na nomu vakasama.’ (Fpai. 4:6, 7) E dau vakamalumalumutaki Magdalena na mate e tauvi koya tiko, ia e vosota rawa ni nuitaka na Kalou ena nona dau masu. E tukuna: “Niu talaucaka na lomaqu vei Jiova, au vakacegu sara ga, au qai marau tale. Au sa qai kila qo na ibalebale ni nuitaka na Kalou e veisiga.”—2 Kor. 1:3, 4.

E rawa ni sauma o Jiova na nomu masu ena nona vakayagataka na yalona tabu me vakaukauataki iko, nona Vosa, kei na mataveitacini e vuravura raraba. Kua ni nanuma ni na kauta laivi vakacakamana na Kalou na kemu mate. O rawa ga ni nuidei ni na vakavukui iko qai vakaukauataki iko mo vosota na veika dredre o sotava. (Vkai. 2:7) E rawa ni vakaukauataki iko ena “kaukaua e uasivia na kaukaua ni tamata.”—2 Kor. 4:7.

Vuvale: O rawa ni vosota na mate e tauvi iko ke ra dau yalololoma qai veikauaitaki o ratou e vale. Nanuma tiko, nira rarawa tale ga na wekamu. De dua ena so na gauna era na sega ni kila na ka mera cakava me vakataki iko. Ia era tu vakarau mera veivuke, ena gauna dredre mada ga. Na nomudou masu vata ena vukei iko mo dau lewa vinaka.—Vkai. 14:30.

E tukuna o Barbara me baleti rau na luvena yalewa kei ira na so tale na mataveitacini yalewa ena ivavakoso: “Erau dau tokoni au ena cakacaka vakaitalatala. E vakayaloqaqataki au, e vakamarautaki au tale ga na nodrau gugumatua.” O Zbigniew e marautaka tale ga vakalevu na veitokoni nei watina. “E qarava e levu na cakacaka e vale, e vukei au meu vakaisulu qai dau taura na noqu beki ni keirau gole ina soqoni kei na cakacaka vakaitalatala.”

Ira eda vakabauta vata: Eda vakayaloqaqataki qai vakacegui nida veimaliwai kei ira eda vakabauta vata. Vakacava ke o sega ni rawa ni tiko ena soqoni ni o tauvimate? E kaya o Magdalena: “E dau katoni na veika e vakayacori ena soqoni meu rawa ni vakila tale ga na kena yaga. Era dau qiriti au mai na taciqu vakayalo nira via kila ke gadrevi mera vukei au ena dua na ka. E dau veivakayaloqaqataki tale ga na nodra ivola. Na noqu kila niu nanumi qai kauaitaki e vukei au meu vosota.”

E dau lomabibi o Izabela, e kaya: “Era tu ena ivavakoso e levu na ‘tamaqu’ kei na ‘tinaqu,’ era dau vakarogoci au, era saga tale ga mera kila na kequ ituvaki. Sa noqu vuvale na ivavakoso—au vakila kina na vakacegu kei na marau.”

O ira na sotava tiko na ituvaki dredre, e vinaka mera kua ni ‘tawasei ira,’ mera vakamareqeta ga na nodra veimaliwai ena ivavakoso. (Vkai. 18:1) Na ka era sotava e vu ni veivakayaloqaqataki vei ira eso tale. De dua ena dredre mo tukuna vei ira na tacimu vakayalo na nomu leqa, ia era na marautaka ke o vosa vakadodonu. Era na rawa ni vakaraitaka ena gauna qori na ‘loloma vakaveitacini e sega ni veivakaisini.’ (1 Pita 1:22) Vakacava mo tukuna vei ira ni o vinakata na veivuke ena nomu ilakolako ena soqoni, tomani ira ena cakacaka vakaitalatala, se veitalanoa ga mo talaucaka kina na lomamu. E sega ni dodonu mo namaka vakasivia vei ira na ka, vakavinavinakataka ga na nodra veivuke.

Rai donu: E rawa ni o marau tiko ga ni o tauvimate bibi, ia qori e vakatau sara ga vei iko. Na vakavevekumata kei na yalolailai e rawa ni vakavuna na rai cala. E kaya na iVolatabu: “A yalo ni tamata sa vosota rawa ni sa tauvi mate; ia na yalo sa mavoa ko cei sa vosota rawa?”—Vkai. 18:14.

E tukuna o Magdalena: “Au dau saga meu kua ni vakasamataka tiko ga na noqu leqa, meu marautaka ga na gauna e dau vinaka kina na noqu bula. E dau vakayaloqaqataki au na kedra italanoa o ira era tauvimate bibi, ia era yalodina tiko ga.” E vakaukauataki Izabela na nona kila ni lomani koya o Jiova qai vakamareqeti koya. E kaya: “Au kila ni tiko na kequ yaga, e tiko tale e dua au na cakava na ka e vinakata. Au vakanamata tale tu ga ina veika totoka e yalataki me baleta na gauna se bera mai.”

E kaya o Zbigniew: “Au vulica ena mate e tauvi au meu dau yalomalumalumu qai talairawarawa. E vakavulici au meu yalomatua, lewa vinaka, meu veivosoti tale ga mai vu ni lomaqu. Au vulica tale ga meu marautaka na noqu qaravi Jiova, meu kua ni vakalomalomani au. E uqeti au qori meu toso tiko ga vakayalo.”

Nanuma tiko ni kila vinaka tu o Jiova na ituvaki rarawataki o vosota tiko. E lomani iko, e kauaitaki iko tale ga. Ena sega ni ‘guilecava na nomu cakacaka kei na nomu kauaitaka dina na yacana.’ (Iper. 6:10) Me vakanuideitaki iko mada ga na nona yalayala vei ira kece era rerevaki koya: “Au na sega sara ni biuti iko se vakanadakui iko.”—Iper. 13:5.

Ke o yalolailai ena so na gauna, vakasamataka na inuinui totoka ena vuravura vou. Sa voleka sara qo mo raica e vuravura na veivakalougatataki ni Matanitu ni Kalou!

[Kato/iYaloyalo ena tabana e 28, 29]

Era Vunau Tiko ga Nira Tauvimate Bibi

“Au sa sega ni rawa ni lako duadua, e dau tomani au kina ena cakacaka vakaitalatala o watiqu kei na so tale na mataveitacini. Au dau wiligusutaka na ka meu lai tukuna kei na tikinivolatabu.”—Jerzy, mataboko.

“Au dau volavola, au veitaratara wasoma tale ga kei na so na tataleitaki. Niu curu e valenibula, au dau biuta noqu iVolatabu kei na ivola ena yasa ni noqu idavodavo. E dau tekivu rawa kina na veitalanoa.”—Magdalena, e tauvi koya na matenikuli na systemic lupus erythematosus.

“Au dau taleitaka na vunau e veivale, ia au dau vunau ena talevoni ke sega ni vinaka noqu bula.”—Izabela, e dau lomabibi.

“Au dau marautaka meu veisikovi lesu, meu veivuke tale ga ena caka vuli iVolatabu. Ena gauna e vinaka kina na noqu bula, au dau lai vunau e veivale.”—Barbara, e tubu tiko e dua na ka ena nona mona.

“Au dau kauta ga e dua na beki mamada ni mekesini. Na balavu ni noqu cakacaka vakavunau, ena vakatau ke sega ni momosi na isema ni yagoqu.”—Zbigniew, e tauvi koya na sasala ni yago.

[iYaloyalo ena tabana e 30]

Era rawa ni veivakayaloqaqataki na gone kei na qase