E Tara na Bula ni Lewe i Vuravura na iVakavuvuli i Jisu

“NA KA kece a kaya o Jisu e matanalevu se vei ira na lewe vica, e volaitukutukutaki tu ena kosipeli, e rawa ni a vakamacalataka ga ena loma ni rua na aua,” e vola na dauvakadewa ni iVolatabu, o Edgar Goodspeed. “Io, e lekaleka ga na nona itukutuku, ia e sega ni tukuni rawa na kena lutubi, e veiuqeti qai cakayaco ena nodra bula na rogoci koya. Rawa gona ni kainaki ni sega tale ni dua e bau cakayaco vaka oya na nona ivakavuvuli.”

Ni qai cava na cakacaka vakaitalatala i Jisu Karisito e vuravura ena yabaki 33 S.K., sa rauta nira le 120 na tagane kei na yalewa era nona imuri. (Cakacaka 1:​15) Ia nikua, e sa sivia e ruanabilioni na tamata era vakacavutaki ira nira lotu Vakarisito. Ra qai vica na drau tale na milioni era ciqoma ni o Jisu e dua na parofita. E vakasakiti dina na kena cakayaco na ivakavuvuli i Jisu ena nodra bula na kawatamata.

Era vakadinata sara mada ga na tikina oqo na iliuliu era sega ni lotu Vakarisito. Me kena ivakaraitaki, a vola na turaga Jiu o Rapai Hyman Enelow: “Sa yaco o Jisu me taleitaki duadua, ra vulici koya e dua na iwase levu ni tamata, e turaga kilailevu duadua ena itukutuku vakalotu ni kawatamata.” A tomana: “E sega ni vakamacalataki rawa na yaga ni ivakavuvuli i Jisu ena bula ni kawatamata. Na nona bucina na veilomani, na nona veivakacegui, na veika vinaka e cakava, na inuinui e dulaka kei na nona uqeta na marau​—e sega ni dua e se bau bula me volekati koya ena tikina oqo. Vei ira gona na turaga vinaka ra qai rogo ena noda bula na kawatamata, e sega ni dua e yacova na nona taleitaki o Jisu kei na cakayaco ni nona ivakavuvuli ena nodra bula na lewe i vuravura. E turaga qoroi duadua ena itukutuku ni kawatamata.” Ni bau kaya mada ga na iliuliu o Mohandas K. Gandhi, e lotu Idu: “Au rawa ni tukuna ni sega ni dua e uasiviti Jisu ena yaga ni ka sa cakava ena noda bula na tamata. Au sega gona ni rawa ni vakacala na lotu Vakarisito.” Ia, a qai tomana: “O kemuni ga na lewenilotu Vakarisito oni leqa tiko. Ni oni sega ni bulataka na nomuni ivakavuvuli.”

Sa dede sara na kena kilai tu mai ni o Veivanua lotu Vakarisito e sega ni muria na ivakavuvuli i Jisu. Me vaka ga na ka e kaya e dua na daunitukutuku makawa ni lotu Vakarisito o Cecil John Cadoux, ni “oqori na ka a sa vakilai tiko mai vakamalua ena loma ni Lotu, qai toso na gauna ena luluqa na kena muri na itovo savasava,” ia na ka oqo “era sa siqema makawa na iliuliu ni lotu Vakarisito, rauta na yabaki . . . 140 S.K.” A tomana: “E macala vakasigalevu ni luluqa na kena muri na itovo savasava era a bulataka na lotu Vakarisito taumada, e dolava kina na katuba ni kena muri na ivalavala vakavuravura.”

Sa qai vakilai levu ga ena ikava ni senitiuri na kasura ni itovo savasava ena loma ni lotu, na gauna a tavuki kina me lotu Vakarisito na turaga ni Roma, o Empara Constantine. “Era vakadinata na leqa oqori na daunitukutuku makawa, qai so vei ira era cata sara ga na nona vakawaicalataka vakalevu na dina o Lotu, ni a bukia na veiwekani kei Constantine,” e vola o Cadoux. Me tekivu mai na veisenitiuri oya, e levu na itovo lolovira era cakava o ira era vakacavutaki ira nira lotu Vakarisito, e vakamadualaka na yaca i Karisito.

O koya gona, na taro bibi e votu: Na cava sara mada a vakavuvulitaka o Jisu? E tara vakacava na noda bula na nona ivakavuvuli?

[iYaloyalo ena tabana e 3]

“Au rawa ni tukuna ni sega ni dua e uasiviti Jisu ena yaga ni ka sa cakava ena noda bula na tamata.”​—Mohandas K. Gandhi

[iYaloyalo ena tabana e 3]

“Sega tale ni dua e bau cakayaco vaka oya na nona ivakavuvuli.”​—Edgar Goodspeed

[Credit Line]

Culver Pictures