O Cei e Bulataka Tiko Nikua na iVakavuvuli i Karisito?

E DAU kilai raraba tu o Jisu Karisito me dua vei ira na tamata rogo a bau bula. Levu era okati koya me tamata rogo duadua. Sa voleka ni ruanaudolu na yabaki na kena sa tara voli mai na bula ni tamata na ivakavuvuli i Jisu​​—⁠e laurai oqo “ena veika vivinaka era cakava. Okati e ke na veika e sega ni laurai levu, vaka kina na vuqa na cakacaka ni veivuke raraba e laurai levu,” e vola na dauvolaivola ni Igiladi o Melvyn Bragg.

E Raici Vakacava na Lotu Vakarisito?

E raici vakacava na lotu Vakarisito? Tukuni ni oqo “e dua na toso vakayalo levu duadua e bau cakava na kawatamata.” A vakamacalataka na nona rai o David Kelso mai na Glasgow Caledonian University e Sikoteladi ena nona vola: “Laurai ena ruanaudolu na yabaki ni itukutuku ni lotu Vakarisito ni sega ni vakatauvatani rawa na toso sa rawata na lotu ena veika e vauca na cakacakaniliga, droini, filosofi, ivakatagi, kei na bula veimaliwai.”

Ia, e so tale e duidui na nodra rai. Era sega ni cata o ira oqori na lotu Vakarisito e cavuti ena dua na ivolavosa na kena ibalebale: “Na lotu e tauyavutaki ena ivakavuvuli i Jisu Karisito ra qai vakabauta tale ga ni o koya na luve ni Kalou.” (Collins Cobuild) Ia, era cata ga na nodra ivalavala o ira na veimatalotu era vakacavutaka voli nira lotu Vakarisito.

Me kena ivakaraitaki o Friedrich Nietzsche, e dua na vuku ni Jamani ena ika19 ni senitiuri, e vakatokai ira na veimatalotu era vakacavutaka voli nira lotu Vakarisito me “ka sara ga e vakacaraka na bula ni kawatamata me tawamudu.” Kuria ena nona vola ni o ira na lotu Vakarisito vaka oqori era “vakavurea sara tiko ga na leqa, ra dau veivakacalai levu duadua, . . . ra qai rawata na nodra inaki ena ilawaki, lasu, veicakacaka vuni, kei na lomaca.” Dina ni vaka sa sivia tale na nona rai o Nietzsche, ia e levu e rarama na nodra rai e via vakatale ga oqori na ka era nanuma. Na cava na vuna? Baleta ena veitabagauna sa sivi e vakadinadinataki ni o ira era vakacavutaka voli nira lotu Vakarisito era sega ni bulataka na ivakavuvuli i Jisu, ia era kilai nira vakavuna na tete ni “ivakarau lolovira, itovo kaukaua e vakadomobula qai veivakalolomataki, vaka kina na kena vosavakacacataki na Kalou.”

Ena Kune Beka na iVakavuvuli i Jisu ena Veimatalotu Vakarisito?

Sa rauta sara ga meda na taroga, “Ena kune beka na ivakavuvuli i Jisu ena veimatalotu vakarisito?” So era na sauma ena gauna vata oqori: “O io, e dodonu me kune kina!” “Sega li ni a yalataka vei ira na nona imuri ni na tiko vata kei ira me ‘yacova nai vakataotioti kei vuravura’?” (Maciu 28:​20) Io, o Jisu a kaya dina oqori. E vakaibalebaletaka beka o koya ni na tiko vata kei ira yadua era vakacavutaka voli nira nona imuri, se mani vakacava na nodra itovo ni bula?

Kua ni guilecava ni so na iliuliu ni lotu ena gauna a bula voli kina o Jisu e vuravura era nanuma ni na tiko vata kei ira na Kalou se mani cava e yaco. Me vaka ni a digitaka na Kalou na matanitu o Isireli me colata e dua na itavi lavotaki, era nanuma gona e so na iliuliu ni lotu ni na sega vakadua ni biuti ira na Kalou​​—⁠se mani cava era na cakava. (Maika 3:​11) Ia, yaco na gauna me sa sega ni vosoti ira rawa na Kalou ena vuku ni nodra talaidredre ina nona lawa, kei na nodra beca na nona ivakatagedegede savasava. Mani tukuna kina vakadodonu vei ira o Jisu Karisito: “Dou kila sa biu wale tu ka lala didi na nomudou vale ni soro.” (Maciu 23:​38, VV) Sa sega ni vakadonuya na Kalou na ituvatuva kece ni sokalou era cakava tiko na Isireli. A biuti ira gona qai vakalaiva na mataivalu ni Roma na Kalou me vakarusa na koroturaga, o Jerusalemi, kei na kena valenisoro ena 70 S.K.

Ena rawa beka ni yaco tale ga e dua na ka vaka oqori vei ira na veimatalotu vakarisito? Meda dikeva mada na veivakatagedegede e semata o Jisu ena nona yalataka me na tiko vata kei ira na nona imuri me “yacova nai vakataotioti kei vuravura.”

[iYaloyalo ena tabana e 3]

Na ivakavuvuli i Jisu Karisito e tara sara ga na nodra bula e le vica na milioni na tamata e vuravura raraba