Ena Vakaotia Beka na Dravudravua na Matanitu Vakatamata?

E VICA VATA na milioni na tamata era sega ni susu ena bula dravudravua. Era sega vakadua ni lai moce waloloi se ra moce vakaca ena levu ni liliwa. Ia, e levu vei ira oqori era dau lomani ira na dravudravua ra qai sasagataka ena nodra igu mera vukei ira.

Na dravudravua e tiki sara tu ga ni nodra bula na lewe vuqa, vakauasivi o ira era sotava na veivaluvaluti, waluvu, lauqa, kei na so tale na leqa. Na veituvaki tale ga oqori e dau vakaleqai ira vakalevu na dauteitei ni Aferika. E so era tini biuta voraki kina na nodra vale mera gole ina veikorolelevu, se ra lai bula vakaisenivalu ena dua tale na matanitu vou. E so era vakaitikotiko ena veikorolalai era rawai ena vosa ni yalayala ni na vinaka cake na nodra bula ke ra toki ina veikorolelevu.

Na bula veiosoosoti ena veikorolelevu e dau vakavuna tale ga na bula dravudravua. Kevaka mada ga e tu na qele, ena sega ni veirauti me teivaki kina na kakana. Sa qai kunekunei dredre sara na cakacaka saumi. Ena nodra qara gona na ka mera bula kina, e levu era lai tini basulawa. Era kere veivuke na vakaitikotiko ena veikorolelevu, ia e sega ga ni tarova rawa na matanitu vakatamata na tete ni leqa ni bula dravudravua. Ni cavuta lesu tiko e dua na ripote a vakarautaka na Matabose kei Vuravura ena Noveba 2003, a kaya na niusiveva ni Lodoni na Independent: “Sa qai tubu tiko ga na iwiliwili ni tamata era waloloi e vuravura.” E tomana: “E kunei ni rauta e 842 na milioni na lewe i vuravura nikua era vakaleqai tu ena kana vakaca​—ia e tubu tale na iwiliwili oqori ena 5 na milioni era waloloi e veiyabaki.”

So na gauna ena taura na valenivolavola ni tabana ni iVakadinadina i Jiova e Sauca Aferika na nodra ivola na dravudravua. Me kena ivakaraitaki, a vola e dua na turaga mai Bloemfontein: “Au sega ni cakacaka, au dau butako ena lomanikoro oqo ena gauna kece au rawa ni vakayacora kina. Keu sega ni butako, sa macala ga ni keitou na waloloi​—qai kuria oya neitou na vakila na liliwa taratarasui. E sega sara ga na cakacaka. Levu era vaqara cakacaka tu, vaka kina na ka mera kania. So mada ga au kila era lai tini vakatotomi kakana ena kavanibenu. Ra lai kukuna sara e so. E levu era vakataki au ga ena nodra yalolailai, e sega na yalodei. Kena irairai ni sega ni dua na ka vinaka e rawa nida nuitaka me baleta na gauna se bera mai. E raica tiko beka na Kalou na leqa oqo, ni o koya ga a buli keda qai nakita meda kana, da vakaisulu tale ga?”

E tiko na isau veivakacegui ni nona taro na turaga oqori. Me vaka ena vakamacalataka na ulutaga e tarava, ena kune ga na veisaunitaro oqori ena Vosa ni Kalou, na iVolatabu.