iTalanoa ni Nona Bula

Yaco ‘na ka a Gadreva na Yaloqu’

TALANOATAKA O OMINIQUE MORGOU

Ena Tiseba 1998, au tokatu kina i Aferika! Sa mai vakavotukana e dua na ka au a gadreva voli niu se gone. Ena gauna sara au se lailai kina, e dau talei dina vei au na noqu vakananuma na veivanua talasiga mai Aferika, kei na kena veimataqali manumanu vakatubuqoroqoro. Au sega sara ga ni vakabauta niu sa butuki Aferika! Ena gauna vata oqori a yaco e dua tale na ka au a diva voli. Au sa tekivu cakacaka vakaitalatala vakatabakidua e vanuatani. Era na rairai nanuma e levu ni via dredre toka oqo vei au. Vakauasivi ni sa buawa vakalevu na mataqu,au qai taubaletaka na veitolonisala nuku ena veikoro e Aferika ena veivuke ni dua na koli vakavulici. Ia, na koli oqo e matau cake ena veisalatu ena veikorolelevu kei Urope. Meu talanoataka mada na vuna au rawa ni lai veiqaravi kina e Aferika kei na nona vakaceguya o Jiova ‘na ka a gadreva na yaloqu.’​—Same 37:4.

AU A sucu ena ceva kei Varanise ena ika9 ni June, 1966. Keitou lewe vitu na veitacini—e rua na tagane kei na lima na yalewa—au gone duadua,rau qai veisusu ena yalololoma o rau na neitou itubutubu. Ia, e tiko e dua na ka rarawataki a yaco ena noqu bula. E tauvi au na mate ni neitou kawa, oya na mataboko, me vakataki ratou ga o buqu, o tinaqu kei na dua na taciqu.

Ena gauna au yacova kina na bula vakaitabagone, au sotava na veivakaduiduitaki kei na veivakaisini, au cati tale ga ena vuku ni matatamata au lewena, e tuburi au sara ga kina na yalo ni vakaduiduile. Donuya na gauna dredre oqori keitou a toki ina yasayasa o Hérault. Ia, e dua na ka talei a yaco e kea.

Ena dua na mataka ni Sigatabu, rau a veisiko yani i vale e rua na marama iVakadinadina i Jiova. E kilai rau o tinaqu, qai sureti rau i vale. A tarogi tinaqu sara e dua vei rau se sa nanuma tiko na nona a yalataka ni dua na siga ena vinakata me vulica na iVolatabu. A nanuma rawa o tinaqu, mani taroga sara, “Siga cava me datou sa tekivu kina?” Ratou veivosakitaka sara me ratou na sota ena veimataka ni Sigatabu. Oqo sara ga na sala e tekivu vulica kina o tinaqu “na dina ni tukutuku-vinaka.”​—Kalatia 2:14.

Rawata na Kilaka

A saga vagumatua o Nau me kila qai nanuma na veika sa vulica. Ni mataboko, e gadrevi me wiligusutaka na veika kece e vulica. Dua na ka na nodrau vosota na iVakadinadina. Ia, ni rau dau lako mai na iVakadinadina, au na lai vuni ina noqu rumu, au na qai curu ga mai i tuba ni rau sa lesu. Ena dua gona na yakavi keirau sota kei Eugénie, e dua vei rau na iVakadinadina oya, a mani vakamacala vei au. E kaya ni Matanitu ni Kalou ena vakaotia na veivakaisini, veicati, kei na veivakaduiduitaki e vuravura. “Na Kalou ga e kila na kena iwali,” e kaya o Eugénie. Au vinakata sara ga meu kila! Ena siga e tarava au sa tekivu vulica na iVolatabu.

E vou vei au na ka kece au vulica. Au sa mai kila ni tiko na vuna e vakatara kina vakalekaleka na Kalou na kena yaco na veika ca e vuravura. (Vakatekivu 3:15; Joni 3:16; Roma 9:17) Au vulica tale ga ni tiko na inuinui e dulaka tu o Jiova. E yalataka vei keda na bula tawamudu ena vuravura parataisi. (Same 37:29; 96:11, 12; Aisea 35:1, 2; 45:18) Ena Parataisi oya sa na makare tale kina noqu rai, vakauasivi ni sa buawa tiko mai.​—Aisea 35:5.

Tekivu Cakacaka Vakaitalatala Vakatabakidua

Ena ika12 ni Tiseba, 1985, au papitaiso me ivakaraitaki ni noqu sa yalataka noqu bula vei Jiova. Au sa taura na ikalawa sa vavaca oti o Marie-Claire na taciqu, ni sa papitaiso oti tale ga. Sega ni dede sa papitaiso tale ga na ganequ o Jean-Pierre, vaka kina na tina i keitou lomani.

Ena ivavakoso au lewena, e vica toka na kena painia tudei se o ira era cakacaka vakaitalatala vakatabakidua. A vakayaloqaqataki au na nodra dau mamarau kei na nodra yalogu ena cakacaka vakavunau. O Marie-Claire sara mada ga e cakacaka vakaitalatala vakatabakidua, dina ga ni leqa na matana qai codo tu na kaukamea ena dua na yavana. Me yacova mai nikua e se dau vakayaloqaqataki au tiko ga vakayalo. Noqu dau veimaliwai kei ira na painia ena ivavakoso vaka kina e vale, e uqeti au sara ga meu vakaitavi ena cakacaka vakaitalatala vakatabakidua. Koya gona ena Noveba 1990, au sa tekivu veiqaravi vakapainia ena korolevu o Béziers.​—Same 94:17-19.

Au Vorata na Yalolailai

Era dau vukei au vakayalololoma na painia ena cakacaka vakavunau. Ia ena so na gauna au se yalolailai ga, ni lailai na ka au rawata, dina niu vinakata me levu cake. Ena gauna gona vaka oqori e dau vakacegui au o Jiova. Au dau vaqara ena Watch Tower Publications Index na nodra italanoa ni bula na painia e leqa na matadra. Au kurabui ena levu ni painia e vakataki au na kedra ituvaki! Na italanoa veivakayaloqaqataki qai yaga vaka oqo e vakavulici au meu marautaka na veika au rawa ni cakava, meu ciqoma tale ga na kequ ituvaki.

Me rawa niu qaravi au, au a lai cakacaka kei ira e so tale na iVakadinadina ena kena samaki na veisitoa lelevu. Dua na siga, au raica ni o ira na noqu itokani vakacakacaka era samaka tale na vanua au sa qai samaka oti ga. Macala gona ni levu na duka au a sega ni raica. Au mani lai raici Valérie, na painia e liutaka na neitou timi ni sasamaki, au qai tarogi koya me tukuna vakadodonu vei au seu sa rui vakalevu cakacaka vei ira na kena vo. A mani laiva o Valérie meu qai vakatulewataka ga na gauna meu na qai cegu kina. Ena Maji 1994, au sa vakacegu mai na noqu cakacaka ni dau sasamaki.

Se baci ologi au na vakasama niu tawayaga. Au masu vagumatua vei Jiova, ia au kila ni a rogoca na noqu masu. A vukei au tale vakalevu na noqu vulica na iVolatabu kei na kena veivolatabaki. Dina ni sa malumalumu sara noqu rai, ia sa qai kaukaua ga noqu vinakata meu qaravi Jiova. Na cava e rawa ni bau kequ yaga?

Tu Vakawawa Noqu Kerekere —Vakatulewa Totolo

Au a vakalewe fomu meu lai vuli ena koronivuli ni mataboko na Rehabilitation Center for the Blind and Visually Impaired e Nîmes, au mani lai vuli kina me vula tolu. E yaga dina na noqu a vuli e kea. Niu kila vinaka kina na noqu leqa au qai vulica tale ga na ka meu cakava meu qaravi au kina. Noqu veimaliwai kei ira e ca sara na kedra ituvaki e vukei au meu vakamareqeta na noqu inuinui vakarisito. Vakauasivi niu kalougata ni tiko na noqu isausau, au qai rawa ni cakava e dua na ka e yaga. Kena ikuri, au vulica tale ga kina na wili braille vakavaranise.

Niu sa lesu i vale, eratou raica rawa na wekaqu na yaga ni noqu vuli. Ia dua na ka au sega sara ni taleitaka, oya na ititoko vulavula e soli vei au meu na vakayagataka. Dredre dina meu ciqoma noqu na vakayagataka na ititoko me na vukei au ena noqu veitosoyaki. Au vinakata me duatani tale na ka me vukei au—de na vinaka cake me dua na koli e vakavulici.

Au mani vakalewe fomu me dua na noqu koli, ia e tukuni vei au ni dua na iwiliwili levu e se tu vakawawa na nodra kerekere. Kuria, eratou na dikeva tale ga na tabana oqori na noqu ivola ni kerekere. E sega ni dau soli vakaveitalia na koli e vakavulici, baleta e tiko na ivakatagedegede e vauca na kena rawa ni qai soli. Dua na siga, a kaya vei au na marama e dau veivuke ena kena cicivaki na isoqosoqo ni mataboko, ni dua na ilawalawa dauqito tenisi ena neitou yasayasa, era na solia vakailoloma e dua na koli vakavulici vua e dua na mataboko e vakaitikotiko ena neitou yalava, se vua sa buawa vakalevu na matana. E kaya ni a nanumi au sara kina. Au na taleitaka beka? Au siqema ni oqo e nona veivuke o Jiova ena vukuqu, au mani vakadonuya, e dina ga niu na wawa tale mada.

Au Dau Vakasamataki Aferika tu Ga

Niu se wawa voli, e gole noqu vakanananu ina dua tale na vanua. Me vaka ga a sa cavuti taumada mai, niu se gone sa dua na ka na noqu taleitaka na vanua o Aferika. Dina ni sa qai ca ga vakalevu na mataqu, ia e torocake tale ga na noqu taleitaka na vanua oya. Vakauasivi ena noqu kila ni levu vei ira na lewenivanua e kea era taleitaka na iVolatabu kei na qaravi Jiova. Ena dua na gauna e liu au a tukuna wale tu ga vei Valérie niu na via gade i Aferika. Au mani tarogi koya se vinakata me keirau lako vata. A vakadonuya, keirau qai volavola ina vica na valenivolavola ni tabana ni iVakadinadina i Jiova i Aferika era vosa vakavaranise.

A saumi mai Togo na neirau ivola. Sa dua na ka noqu marau au qai kerei Valérie me wilika vei au. E veiuqeti dina na lewenivola, e kaya o Valérie: “Ke sa vaka oqori, na cava tale daru waraka?” Ni keirau veitaratara oti kei ira na veitacini ena valenivolavola ni tabana, a tukuni me keirau veitaratara kei Sandra, e dua na painia ena korolevu o Lomé. Keirau tuvanaka me keirau biubiu ena 1 Tiseba, 1998.

Sa duidui dina na vanua oqo, ia keirau marautaka! Ni keirau sobu ena waqavuka e Lomé, keirau sa vakila sara na katakata e Aferika ni vaka ga me ologi keirau e dua na itutuvi. A waraki keirau o Sandra. Keitou se sega vakadua ni bau sota, ia e vaka ga keitou sa veikilai makawa. Ni bera toka ga ni keirau yaco yani, erau a lesi o Sandra kei na nona itokani o Christine me rau lai painia lavotaki i Tabligbo, e dua na tauni lailai e lomanivanua. Keirau kalougata ni keirau tomani rau ena nodrau ilesilesi vou. Keirau tiko e kea ni rauta e rua na vula. Ni keirau lesu i Varanise au kila niu na lesu tale i Aferika.

Au Marau Niu Lesu i Togo

Sega ni dede noqu sa tiko e Varanise, au sa tekivu vakavakarau tale ena ikarua ni noqu ilakolako i Togo. Ena nodratou veitokoni na noqu vuvale, a rawa vei au meu tuvanaka meu lai vula ono e kea. Koya gona ena Sepiteba 1999, au sa vuka tale i Togo. Ena ilakolako oqo au sa lako duadua kina. Ratou leqataki au na noqu vuvale ena vuku ni kequ ituvaki! Ia, e sega na vuna vinaka me ratou leqataki au kina. Au vakadeitaka vei rau na noqu itubutubu ni o ira na noqu itokani era vaka na noqu vuvale, era na waraki au mai Lomé.

Au marautaka dina niu lesu tale ena yalava era taleitaka kina na iVolatabu e lewe levu! Sega ni ka vou nida raici ira nira wili iVolatabu tu e salatu. O ira e Tabligbo era na kerea mo veivosakitaka kei ira na iVolatabu. E dina ni lailai toka ga na nodrau icili na tacida yalewa erau painia lavotaki, ia, e ka marautaki noqu mai tiko vei rau! Au mai vulica kina e duatani tale na itovo vakavanua, kei na duidui ni sala era raica kina na ka. Na imatai sara ga ni ka au dikeva, oya nira vakaliuca ena nodra bula na mataveitacini lotu Vakarisito e Aferika na Matanitu ni Kalou. Kena ivakaraitaki, dina ni gadrevi mera taubaletaka e vica vata na kilomita mera yaco ina Kingdom Hall, ia e sega ni tarova nodra dau tiko ena soqoni. Levu tale ga na ka au vulica ena nodra dau veinanumi kei na nodra veikauaitaki.

Dua na siga niu lesu mai ena cakacaka vakavunau, au tukuna sara vei Sandra niu sa rere na lesu i Varanise. E sa qai ca ga vakalevu na mataqu. Au vakasamataka na osooso kei na kosakosa ni veisalatu e Béziers, na ikabakaba ena veitabavale, kei na levu tale na ka e vakadredretaka na nona bula e dua e leqa na matana. Kena veibasai na veisalatu e Tabligbo, e dina ni sega ni simede, ia e sega ni kosakosa—sega soti ni levu na tamata qai lailai ga na motoka. Ena rawa vakacava meu lai bula tale i Varanise ni sa matau vei au na bula e Tabligbo?

Oti ga e rua na siga, a qiritaka mai o tinaqu ni ratou sa waraki au tiko na koronivuli era vakavulici kina na koli. Ena soli vei au na koli o Océane, e sa na vakarau “mataqu.” Sa mai yaco tale e dua na ka au gadreva voli qai vaka me seavu na noqu nuiqawaqawa. Ni mai cava e ono na vula noqu veiqaravi e Tabligbo, au sa lesu tale i Varanise meu lai sotavi Océane.

Ni oti e vica na vula ni veivakavulici, sa qai soli vei au o Océane. E sega ni rawarawa na kena itekivu. Keirau se vulica mada me keirau veikilai. Ia, ni toso na gauna au vakila ni na vukei au sara vakalevu o Océane. Ena gauna oqo sa tiki sara tu ga ni noqu bula o koya. Vakacava na nodra itovo mai Béziers nira dau raici au kei na noqu koli e nodra matanivale? Au vakila na nodra loloma kei na veidokai. E kilai levu o Océane ena noqu itikotiko. Me vaka ni levu era sega ni dau kila na ka mera tukuna nira raica e dua e vakaleqai tu na ituvaki ni nona bula, ni sa tiko na noqu koli, e rawarawa kina meu vakamacalataka ga vakavinaka na noqu leqa. Era lomavakacegu ra qai rogoci au. Io, e yaco o Océane me sala vinaka meu tekivutaka kina na veivosaki.

Neirau Tiko kei Océane Mai Aferika

Au sega ni guilecavi Aferika rawa, au sa mani tekivu vakavakarau tale ena ikatolu ni noqu ilakolako e kea. Gauna oqo sa lako tale ga o Océane. Erau tomani au tale ga e dua na veiwatini gone, o Anthony kei Aurore, vaka kina na noqu itokani o Caroline—eratou painia tale ga. Keitou a yaco i Lomé ena ika10 ni Sepiteba, 2000.

Taumada, e levu era rerevaki Océane. Ni so mada ga e Lomé sa qai imatai ni gauna mera raica kina e dua na koli levu, me vaka nira lalai ga e levu na koli e Togo. Nira raica ni tokara tu o Océane na nona beleti, so era nanuma ni manumanu vakarerevaki, oya na vuna e vauraki tu kina. Ia o Océane, e dau tu vakarau sara ga me taqomaki au ke vakila e dua na meca. Sega ni dede sa qai matau o Océane ena vanua vou. Gauna e vakabeleti kina e kila ni dodonu me cakava na itavi a vakavulici kina—ena toka dei e yasaqu, niu na nuitaki koya vakatabakidua me dusimaka vei au na neirau sala. Ia, ni sa sere e kila ni rawa ni qito, so na gauna e dau levu na nona ivukivuki. Dau lasa dina na gauna vaka oqori.

Keitou lai vakaicili kece vei Sandra kei Christine e Tabligbo. Me rawa nira matau vei Océane na mataveitacini e kea, keitou dau veisureti qai vakamacalataka vei ira na nona itavi na koli e vakavulici, na vuna au gadreva kina kei na veika mera cakava vua. Eratou vakadonuya na qase ni ivavakoso meu kauti Océane yani ina Kingdom Hall. Me vaka ni ka vou na ituvatuva oqo e Togo, a mani kacivaki qai vakamacalataki ena ivavakoso. Me baleta na cakacaka vakavunau, au na kauti Océane ga keu talevi ira lesu na tataleitaki se veivakavulici ena iVolatabu—nira sa bau matau toka ina noqu koli.

Au sa qai taleitaka ga vakalevu na vunau ena yalava oqo. E dau tarai au vakalevu na nodra veinanumi, qai laurai oqo ena nodra dau totolo ni vaqara mai e dua na noqu idabedabe. Ena ikava ni noqu ilakolako i Togo, ena Okotova 2001, a salavata kei au o tinaqu. A lesu tale i Varanise ena lomavakacegu kei na marau ni oti e tolu na macawa.

Au vakavinavinaka vakalevu vei Jiova niu a rawa ni lai veiqaravi e Togo. Au nuidei ni na vakaceguya o Jiova ‘na ka e gadreva na yaloqu,’ niu solia na ka kece au rawata meu qaravi koya tiko ga kina.a

[iVakamacala e ra]

[iYaloyalo ena tabana e 10]

E dau talei dina vei au na noqu vakananuma na veivanua talasiga mai Aferika, kei na kena veimataqali manumanu vakatubuqoroqoro

[iYaloyalo ena tabana e 10]

E dau lako kei au o Océane niu lesuvi ira na tataleitaki

[iYaloyalo ena tabana e 11]

Ratou vakadonuya na qase ni ivavakoso meu kauti Océane ena soqoni