“E Dua na Siga Vinaka Duadua ena Noqu Bula”

“NA LOMABIBI e dau ripotetaki vakalevu, e sega tale ga ni vakataratututaki ni oqo e dua na leqa ni vakasama e tarai ira vakalevu na itabagone,” e kaya e dua na tabana mai Ositerelia e vakatokai na Beyondblue, e vakailavotaka na matanitu mai kea. E laurai ena vakadidike e caka, ni rauta e 100,000 na itabagone mai Ositerelia era vakaleqai e veiyabaki ena lomabibi.

E rawa tale ga ni vakaleqai ira na itabagone lotu Vakarisito na lomabibi. Ia, e levu vei ira oqo e vukei ira na nodra vakabauti Jiova, mera valuta rawa kina na yaloca e dau tuburi ira, ra qai marautaka na nodra bula vakaitabagone. E uqeti ira tale e so na ka era cakava. Ena sala cava?

Dikeva mada na ivakaraitaki i Claire, e yabaki 18. Erau dau soqoni kei tinana ena dua na ivavakoso ni iVakadinadina i Jiova e Malevani. A lomabibi o Claire ena gauna a biuti rau kina vakaveitinani o tamana. Ia, a dei tiko ga na nona vakabauti Jiova, na Tamana vakalomalagi. Dua na siga a tauvimate na tina i Claire, a lai raici koya sara yani e vale o Lydia, na vuniwai e dau raici iratou vakavuvale. Ni oti oqori, a sureti Claire sara o Lydia me kauti koya ina dua na sitoa levu. Ena nodrau vodo tiko, a tarogi Claire sara ke tiko e dua na nona itau. E vakamacalataka o Claire ni sega, me vaka ni dua na iVakadinadina i Jiova e sega ni raica me ka ni qito na vakaitau. Kurabui sara ga o vuniwai. Sa qai vakamacalataka o Claire na sala e vukei koya kina na iVolatabu me dau vakatulewa vakayalomatua ena nona bula. Ni tini na nodrau veivosaki, a kaya o Claire ni na kauta mai e dua na ivola vakaivolatabu a vukei koya sara vakalevu. Na yaca ni ivola na Questions Young People Ask​—Answers That Work.

Ni oti e tolu na siga nona ciqoma o Lydia na ivola, a qiriti tina i Claire sara me tukuna ni a taleitaka vakalevu na wilika. E kerea tale e ono na ivola oya me solia vei ira nona itokani vuniwai. Ena gauna a kauta yani kina na ivola o Claire, a tukuna vua o Lydia ni vakadrukai sara ga ena nona vakabauta. E veisureti sara o Claire me rau vulica vata na iVolatabu, a mani vakadonuya o vuniwai.

E vica na vula nodrau vuli tiko ena gauna ni vakasigalevu o Claire kei vuniwai. Sa qai kerei Claire o Lydia kevaka e rawa ni vosa ena dua na bose me baleta na nodra vakaleqai na itabagone ena lomabibi. Dina ni a rere vakalailai o Claire ia a mani vakadonuya. Sivia e 60 era a tiko ena bose oya. Ratou vosa e va na vuniwai ni vakasama—⁠ratou uabula kece. Oti oya sa qai vosa o Claire. A vakamacalataka na kena bibi mera toro voleka na itabagone vua na Kalou. Vakamacalataka sara o koya ni Kalou o Jiova e lomani ira vakalevu na itabagone qai vukei ira era kerea nona veitokoni kei na nona veitaqomaki. E kuria, ni vakabauta dei ni na kauta laivi o Jiova na tauvimate kece vakayago, vaka kina na mate kece ni vakasama. (Aisea 33:24) A qai tini vakacava na ivakadinadina totoka oya?

“E levu era lako mai vei au ni oti na bose mera kaya nira qoroya dina nodra rogoca e dua na itabagone me vosa ena veika me baleta na Kalou,” e kaya o Claire. “Au solia e 23 na ivola na Young People Ask. E tolu na goneyalewa eratou solia vei au na nodratou naba ni talevoni. Dua vei iratou e sa vulica tiko ena gauna oqo na iVolatabu. Oya e dua na siga vinaka duadua ena noqu bula.”