Na Cava ena Tukuna o Luvemu?

ITUBUTUBU: Oni uqeti ena ilavelave ni Vale ni Vakatawa 15 Janueri, 2010, tabana e 16-​20, moni dau vakatovotovo kei ira na luvemuni. E yaga gona na ulutaga qo ena nomuni vukei ira na lalai ena ka mera cakava nira sotava na ituvaki dredre e koronivuli. De oni via cakava qo ena nomuni yakavi ni Sokalou Vakavuvale.

O IRA na gone iVakadinadina i Jiova era dau sotava e levu na ituvaki dredre. Era dau via kila na nodra icaba mai koronivuli se cava era sega ni vakaitavi kina ena so na solevu me vaka na vakarokorokotaki ni kuila, siganisucu, se so na ka e tuvanaki me baleta na olodei. Ke tarogi o luvemu me baleta na solevu va qori, na cava ena kaya?

Eso na gone lotu vaKarisito era dau kaya ga: “Au sega ni rawa ni cakava qori. Qori e tabu ena noqu lotu.” Era vakacaucautaki na gone qori nira dei ena nodra vakabauta. Na nodra isaunitaro oya sa na rairai muduka na nodra vakatataro na nodra icaba. Ia e veivakasalataki na iVolatabu meda ‘vakarau tu ena gauna kece meda vakamacalataka vei ira kece era taroga’ na ka eda vakabauta. (1 Pita 3:​15) Qori e sega ni okati ga kina na noda tukuna: “Au sega ni rawa ni cakava qori.” Ke ra sega mada ga ni duavata kei keda eso ena ka eda vakabauta, era tiko eso tale era na rairai via kila na vuna eda cakava kina se sega eso na ka.

E levu na itabagone iVakadinadina era dau vakamacalataka vei ira na nodra icaba na italanoa ena iVolatabu nira vakayagataka na ivola me vaka na Vuli Vua na Qasenivuli Levu. Qori ena rairai yaga ena kena kilai na vuna era cakava kina se sega na gone iVakadinadina eso na ka. Era dau vakarorogo vinaka eso na gonevuli ena italanoa vakaivolatabu, qai tekivu rawa ena iwalewale qori e levu na vuli iVolatabu. Ena rairai dredre vei ira eso tale na gonevuli mera rogoca e dua na italanoa taucoko ena iVolatabu. Ke sega ni vakamacalataki vinaka, ena rairai dredre tale ga na nodra kila na gonevuli eso na ivolatukutuku ena iVolatabu. Ni sureti ina dua na siganisucu o Minhee e yabaki 11, a tukuna sara vua na nona itokani: “E sega ni tukuna na iVolatabu meda solevutaka na siganisucu. O Joni na Dauveipapitaisotaki e cavuti ena iVolatabu a vakamatei ena dua na siganisucu.” Ia e qai tukuna o Minhee ni sega ni taura rawa o nona itokani na ka e vakamacalataka oya.

E vinaka ena so na gauna me vakaraitaki vei gonevuli e dua na iyaloyalo se italanoa ena noda ivola. Vakacava ke ra tukuna na vakailesilesi ni koronivuli me kua ni veisoliyaki e koronivuli na ivola ni lotu? E rawa nira vunau vinaka na gone ke sega ni vakayagataki mada ga na noda ivola? O na vukei luvemu vakacava me vakamacalataka na ka e vakabauta?

Vakatovotovo

Ena yaga na vakatovotovo e vale, qori ena nodra vakamacala vei ira na itubutubu na gone me vaka sara ga era sa vakamacala tiko vei ira na nodra icaba e koronivuli. Nira saga na gone mera vakamacalataka na ka era vakabauta, mera vakavinavinakataki ira na itubutubu, ra vukei ira mera vakavinakataka na nodra ivakamacala kei na vuna e yaga kina mera cakava oya. Kena ivakaraitaki, uqeti ira mera vakayagataka ga na vosa era kila na nodra icaba. E kaya o Joshua e yabaki ciwa, era sega ni kila na nona icaba na vosa me vaka na “lewaeloma” kei na “yalodina,” a vinakati gona me vakayagataka na vosa e kilai rawarawa ni veitalanoa kei ira.​​—1 Kor. 14:9.

Eso na gonevuli era na rairai taroga e dua na taro, ia ena rawa ni seavu na nodra tataleitaki ke balavu na ivakamacala. Nira veitalanoa kei ira qai veiuqeti na ka era tukuna na itabagone iVakadinadina, era na rawa ni tataleitaki tiko ga na nodra icaba. E kaya o Haneul, e dua na goneyalewa e yabaki tini: “Era taleitaka na noqu icaba na veitalanoa, sega ni ivakamacala.” Me tekivu rawa na veitalanoa, taroga eso na taro, qai vakarorogo vinaka nira tukuna na nodra rai.

E toka ena kato na ivakaraitaki ni veitalanoa era rawa ni cakava na gone lotu vaKarisito kei ira na nodra icaba e koronivuli. E sega ni tukuni mera wiligusutaka nira duidui kece na gone. Ni duidui na ituvaki, ena duidui tale ga na ka mera tukuna. Kena ibalebale, me kila rawa mada na gone iVakadinadina na ka me vakamacalataka, oti me biuta ena nona vosa ga, qai raica me ganita na ituvaki na nona ivakamacala, me ganiti ira tale ga na nona icaba. Ra itubutubu, ke sa vuli tiko o luvemu, drau vakatovotovotaka na ivakamacala ena kato.

E vinakati na gauna kei na sasaga ena nodra vakavulici na gone. Mera saga na itubutubu lotu vaKarisito mera vakavulici luvedra ena ivakavuvuli vakaivolatabu ra qai vukei ira mera muria sara.​​—Vkru. 6:7; 2 Tim. 3:​14.

Ena nomudou Sokalou Vakavuvale e tarava, saga mo dou vakatovotovotaka na ivakamacala ena kato, o na raica ni laulau dina. Nanuma tiko, e sega ni tukuni me wiligusutaki na ivakamacala se na vosa yadua. E rawa sara mada ga ni vakatasuasuataki vakavica e dua na ka e dau yaco dina, me qai duidui ga na ivakamacala e vakarautaki mo raica kina se na vakayagataka vakacava o luvemu na ivakamacala kece qori. Nira saga mera vakamacalataka na gone na yavu ni nodra vakabauta, vukei ira mera yalorawarawa ra qai maqosataka na nodra ivakamacala. Ni toso na gauna, ena rawa ni vakamacalataka o luvemu na ka e vakabauta vei ira na nona icaba, qasenivuli kei ira dou tiko veitikivi.

[Kato/​iYaloyalo ena tabana e 3, 4]

SIGANISUCU

Alisi: Bula, Vili. Au via sureti iko ina pati ni noqu siganisucu.

Vili: Isa vinaka na veinanumi Alisi. Na cava e caka kina na pati ni nomu siganisucu?

Alisi: Me marautaki kina noqu siganisucu. E sega ni dau caka na nomu?

Vili: Sega.

Alisi: Baleta? Kila, dua na ka na nodratou marau e vale ena siga au sucu kina. Vakacava o iko?

Vili: Io, ratou marau tale ga mai neitou. Ia e sega ni tukuni me sa marautaki tu ga e veiyabaki. Ena gauna e dau caka kina na nodra siganisucu, era dau nanuma e levu nira vinaka cake vei ira na kena vo. Ia na Kalou ga e vinaka duadua vei keda kece, qai dodonu meda vakavinavinaka vua ni buli keda.

Alisi: Kena ibalebale me kua ni caka na noqu pati?

Vili: Qori e vakatau sara ga vei iko. Ia vakasamataka mada qo. E levu era dau taleitaka na iloloma era taura ena nodra siganisucu, ia na iVolatabu e tukuna ni marau vakalevu o koya e solia na ka, vakalailai o koya e taura na ka. Na noda vakavinavinaka vua na Kalou, na noda veinanumi kei na noda caka vinaka vei ira tale na so e vinaka cake mai na noda nanumi keda ga ena noda pati.

Alisi: Au sega sara ga ni bau vakasamataka qori. Kena ibalebale, erau sega ni dau soli iloloma vei iko na nomu itubutubu?

Vili: Erau dau soli iloloma vei au, erau sega ga ni waraka sara me donuya na noqu siganisucu. Erau dau soli iloloma ena gauna ga erau via cakava kina. Vakacava Alisi, o via kila se tekivu vakacava na kena dau marautaki na siganisucu?

Alisi: O rawa ni vakamacalataka vei au?

Vili: Io, au na qai talanoataka vei iko nimataka na ka a yaco ena dua na siganisucu ena gauna makawa.

VAKAROKOROKOTAKI NI KUILA

Mere: Na cava o sega ni vakarokorokotaka kina na kuila?

Kelera: Vakacava o iko, na cava o vakarokorokotaka kina?

Mere: Baleta niu doka na noqu vanua.

Kelera: Au kila ni o dokai tinamu, ia o dau salututaki koya?

Mere: Sega. Au sa taura rawa na ka o tukuna tiko, ia au salututaka na kuila niu doka. Vakacava o iko, o doka na kuila?

Kelera: Io. Ia eda dau salututaka na ka kece se o ira kece eda doka?

Mere: Sega. Kaya mada o qasenivuli, au dokai koya ia au sega ni salututaki koya. E sega mada ga ni macala na vuna au salututaka kina na kuila.

Kelera: E levu era nanuma ni kuila e ivakatakilakila ni matanitu. Na salututaki ni kuila e kena ibalebale nira bolemate ena nodra vanua. Au sega ni duavata ena rai oya. Au sega ni rawa ni bolemate ena noqu vanua ni solia vei au na bula na Kalou. Au na bolemate ga ena vukuna. Au doka na kuila, ia au na sega ni salututaka.

Mere: Oi, sa dina.

Kelera: Au marau ni o kauta cake mai na tikina qo. Ke o via kila na vuna au dau cakava kina se sega eso na ka, tarogi au ga. E tukuni ena iVolatabu ni a vakarota ena dua na gauna na tui kei Papiloni mera cuva na tamata kece ina matakau. Ia era qai sega ni cuva eso, dina nira rawa ni mate kina.

Mere: E dina? Na cava a qai caka vei ratou?

Kelera: Au na qai talanoataka ena gauna ni vakasigalevu.

POLITIKI

Meli: Ke o rawa ni veidigidigi, o cei o na digitaka?

Timoci: Sega ni dua.

Meli: Baleta?

Timoci: Au sa digitaka oti e dua.

Meli: O se sega mada ga ni yacova na yabaki ni veidigidigi.

Timoci: E dina qori, ia au rawa ni vakaitavi ena kena qo, au digitaka kina na matanitu vinaka duadua.

Meli: Na matanitu cava qori?

Timoci: E kena iLiuliu o Jisu, au nanuma ni dodonu ga me lewa o koya. O via kila na vuna?

Meli: Sega.

Timoci: Ke o qai via kila, tukuna ga mai.

[iYaloyalo]

“Bula Vili. Au via sureti iko ina noqu pati ni siganisucu”

[iYaloyalo ena tabana e 3]

“Na cava o sega ni dau vakarokorokotaka kina na kuila?”