Taro na Dauwiliwili

Na cava e vakaibalebaletaka na yapositolo o Paula ena nona kaya ni dodonu ‘mera galu na yalewa ena ivavakoso’?

A vola o Paula ina ivavakoso lotu Vakarisito mai Korinica: “E na vei i vavakoso kece ga ni tamata ni Kalou, me ra dau galu na yalewa ni sa sega ni dodonu me ra vosa.” (1 Korinica 14:​33, 34, VV) Me rawa nida kila na ibalebale dina ni ivakaro oqo i Paula, ena vinaka meda dikeva na veitikina yavolita.

Ena 1 Korinica wase 14, e tukuna kina o Paula na veika e baleta na soqoni ni ivavakoso lotu Vakarisito. E vakamacalataka o koya na veika e dodonu me veivosakitaki ena soqoni vaka oqo kei na sala me vakayacori kina. (1 Korinica 14:​1-6, 26-​34) Kuria, a vakabibitaka tale ga na inaki ni soqoni vakarisito, oya “me vakatataki cake kina na i vavakoso lewe ni lotu.”​​—1 Korinica 14:​4, 5, VV, 12, 26.

Na vosa “galu” ena ivakaro i Paula e kune vakatolu ena 1 Korinica wase 14. Ena gauna yadua oqori, e duidui na ilawalawa ena ivavakoso e vosa tiko vei ira o Paula, ia e tautauvata na vuna e veivakaroti kina, oya na “ka kece ga me caka sara vaka vinaka ka tuvalaki vakamatau.”​​—1 Korinica 14:​40, VV.

Na imatai ni ka e kaya o Paula e vaka oqo: “Kevaka e dua sa vosa e na vosa tani, me lewe rua, se lewe tolu ga, me ra veitaravi yadua ga; ia me dua e lave vosa. Ia kevaka sa sega e dua me lave vosa, me galu ga e nai soqosoqo lewe ni lotu; me vosa vei koya ga vakai koya, vua talega na Kalou.” (1 Korinica 14:​27, 28) Sega ni kena ibalebale oqo ni tamata oya ena sega vakadua ni vosa ena gauna ni soqoni, ia e vakaibalebaletaka ga ni na tiko na gauna ena dodonu me galu kina. Ni inaki ni soqoni meda veivakayaloqaqataki, ena sega ni rawati oqori ke dua e vosa ena vosa tani era sega ni kila na vakarorogo.

Kena ikarua, e kaya o Paula: “Me lewe rua se tolu na parofita me ratou vosa ka me ra qai vakarorogo na kena vo. Ia ke sa laurai na i vakatakilakila vua e dua e dabe tiko kina ni vakatakilai mai vua e dua na ka, ia me vosa mada ka me galu ko koya e vosa tiko.” Sega ni kena ibalebale oqo ni sa na sega tale ni qai vosa ena gauna ni soqoni na imatai ni parofita a vosa tiko, ia e vakaibalebaletaka ga ni na dodonu me galu ena so na gauna. O koya e vakatakilai vakacakamana vua e dua na ka e rawa ni tukuna ena ivavakoso, qai rawati tale ga kina na inaki ni soqoni​​—oya meda “vakayaloqaqataki kece kina.”​​—1 Korinica 14:​26, 29-​31, VV.

Kena ikatolu na nona vosa o Paula vei ira na yalewa lotu Vakarisito, e kaya: “Me ra galu ga ko ira na . . . yalewa e na veisoqosoqo lewe ni lotu: ni sa sega ni tara vei ira me ra vosa; ia me ra yalomalumalumu ga.” (1 Korinica 14:34) Na cava e cavuta kina o Paula na ivakaro oqo vei ira na yalewa lotu Vakarisito? Me taqomaka na ituvatuva ena ivavakoso. E kaya: “Kevaka era via kila e dua na ka, me ra dui taroga na watina mai nodratou; ni sa ka ni veivakamaduataki me ra vosa na yalewa e nai soqosoqo lewe ni lotu.”​​—1 Korinica 14:35.

De dua, e so na tacida yalewa era a saqata na veika e tukuni ena ivavakoso. E vukei ira gona na ivakasala i Paula mera cata na yalo ni vakaunodra ra qai ciqoma ena yalomalumalumu na nodra itutu ena ituvatuva ni veiliutaki i Jiova, vakauasivi me baleti ira na watidra tagane. (1 Korinica 11:3) Kena ikuri, na nodra galu na tacida yalewa era vakaraitaka nira sega ni saga mera veivakavulici ena loma ni ivavakoso. Ena ivola i Paula vei Timoci, e vakaraitaka kina ni na sega ni dodonu vua e dua na yalewa me nanuma ni nona itavi me veivakavulici ena ivavakoso: “Ka’u sa sega ni laiva na yalewa mei vakavuvuli, se viavialewa vei koya na tagane, ka me tiko lo ga.”​​—1 Timoci 2:​12.

Kena ibalebale beka oya me sa kua sara ga ni vosa na yalewa lotu Vakarisito ena gauna ni soqoni ena ivavakoso? Sega. Ena gauna i Paula, ena so na ituvaki ena rairai uqeti ira na yalewa lotu Vakarisito na yalo tabu mera masu se parofisai ena ivavakoso. Na gauna gona vaka oqori era na ubia kina na uludra me ivakaraitaki ni nodra doka na ituvatuva vakalou.a (1 Korinica 11:5) Kena ikuri, ena gauna i Paula kei na noda gauna era uqeti kece na tacida yalewa vaka kina na tacida tagane mera vakatusa e matanalevu na nodra inuinui. (Iperiu 10:​23-​25) Era cakava oqo na tacida yalewa ena nodra cakacaka vakavunau. Vaka kina nodra vakatusa nodra vakabauta ra qai vakauqeti ira tale e so ena soqoni vakaivavakoso ena nodra ivakamacala e vakasamataki vinaka ena gauna era kerei kina. Okati tale ga e ke na nodra ciqoma na itavi era lesi kina me vaka na vakatasuasua se ena koronivuli ni vuli vunau.

O koya gona, nodra “galu” na yalewa lotu Vakarisito era vakaraitaka nira sega ni suguta na nodra itavi na tagane mera veivakavulici ena ivavakoso. Era na sega ni taroga na taro e vakavu veileti ena rawa ni saqati kina na nodra vakatulewa o ira era veivakavulici ena ivavakoso. Nodra vakayacora vinaka nodra itavi ena ivavakoso na yalewa lotu Vakarisito, era sa veivuke vakalevu tiko ena kena rawati na vakacegu ni ‘caka na ka kecega [ena soqoni ena ivavakoso] meda vakatataki kina.’​​—1 Korinica 14:​26, 33.

[iVakamacala e ra]