Taro na Dauwiliwili
Na cava e okati kina ena Lawa i Mosese me “sega ni savasava” e so na ka e vauca na gacagaca ni vakatubukawa?
E isolisoli ni Kalou na veiyacovi, me rawa kina ni vakawa na tamata, me vakavumarau tale ga vei ira na veiwatini. (Vakatekivu 1:28; Vosa Vakaibalebale 5:15-18) Ia, ena Vunau ni Soro wase 12 kei na wase 15, eda raica ni lawa matailalai me baleta na veika e sega ni savasava, e okati tiko kina na bura ni nona wai e dua na tagane, na mate vakayalewa, kei na vakasucu. (Vunau ni Soro 12:1-6; 15:16-24) Na lawa e soli oqo vei Isireli makawa e itataqomaki vei ira mera bulabula kina vakayago, e tokona na ivakatagedegede ni itovo savasava, e vakabibitaka na rokovi ni dra vaka kina na kena gadrevi na isoro ni ivalavala ca.
Na veika e lavaka na Lawa i Mosese, e vauca na gacagaca ni vakatubukawa, e toroya cake na ivakatagedegede ni nodra tiko bulabula vakailawalawa na Isireli. E kaya na ivola na Bible and Modern Medicine: “A yaga na kena muri na lawa e vakatabuya na veiyacovi ena gauna ni tauvimate vakamarama, ni a yaco me itatarovi ni so na mate e rawa ni dewa ena veiyacovi . . . e vakadeitaki tale ga ni a tarova sara ga na tubu kei na tete ni kenisa ni katonigone.” Na lawa gona vaka oya, e taqomaki ira na tamata ni Kalou mai na mataqali mate era sega mada ga ni bau kila se kidava. Ni rokovi vaka oya na vakayagataki ni gacagaca ni vakatubukawa, e vakarawarawataka na nodra vakaluveni na Isireli, vakauasivi ni sa yalataka oti na Kalou nira na tubu me lewe vuqa, ra qai rawaka. (Vakatekivu 15:5; 22:17) E taqomaka tale ga na ivakarau ni yalodra na tamata ni Kalou. Na muri ni veilawa oqori, ena vakavulici rau na veiwatini me rau lewa vinaka na gauna me rau na tiko vata kina.
Ia, na ka e bibi duadua e semati tiko ena kena sega ni savasava e so na ka e vauca na gacagaca ni vakatubukawa, oya ni vauci kina na drodro se na vakayali ni dra. E sega wale ga nira vakadeitaka kina na Isireli ni ka rokovi na dra ena lawa i Jiova, ia, na dra e tiki bibi sara tale ga ni sokalou, me vaka na kena dau vakayagataki ena vakacaboisoro kei na sorovaki ni ivalavala ca.—Vunau ni Soro 17:11; Vakarua 12:23, 24, 27.
O koya gona, na matailalai ni Lawa e lavaki ena tikina oqo e sema vakavoleka kei na ivalavala ca ni kawatamata. Era kila na Isireli ni oti nodrau valavala ca o Atama kei Ivi, sa sega nira uasivi na luvedrau. O ira kece na nodrau kawa ena dewavi ira na revurevu ni ivalavala ca oya—ra na sega kina ni uasivi, era na mate. (Roma 5:12) Oqori na vuna era sa na vakadewa ga kina na itubutubu na bula tawasavasava kei na bula ivalavala ca, dina ga ni a buli na gacagaca ni vakatubukawa me vakadewa na bula uasivi ena ituvatuvanaki ni bula vakawati.
Na kena lavaki ena Lawa na veivakasavasavataki, e sega wale ga nira na vakasamataka tiko kina na Isireli na nodra sucu ivalavala ca, ia na kena gadrevi tale ga e dua na isoro ni veivoli me buluta na ivalavala ca qai vakasuka na tamata ina bula uasivi. Io, na isoro manumanu era dau vakacabora e sega ni kauta tani na ivalavala ca. (Iperiu 10:3, 4) O koya gona, na inaki ni Lawa i Mosese me tuberi ira na Isireli vei Karisito qai vukei ira mera kila ni isoro uasivi ga i Jisu ena rawa kina na veivosoti dina, e dolava tale ga na sala ina bula tawamudu vei ira era yalodina.—Kalatia 3:24; Iperiu 9:13, 14.