O se Nanuma Tiko?

O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:

• Na sala cava ena ‘vakabulai ira kina na dravudravua’ o Jisu me vaka a parofisaitaki ena Same 72:⁠12?

Ni sa veiliutaki o Jisu, ena yaco na lewadodonu vei ira na tamata kece, sa na sega na veidabui. Levu na dravudravua e vu ga mai ena ivalu, o Karisito ga ena kauta mai na bula vakacegu dina. E lomani ira na tamata, ena vakaduavatataki ira, era na sega ni vakila na lailai ni kakana ni sa na sautu na vanua. (Same 72:​4-​16)​​—⁠5/1, tabana e 7.

• Na sala cava eda rawa kina ni ‘dauvosa doudou’ na lotu Vakarisito? (1 Timoci 3:​13; Filimoni 8, (VV); Iperiu 4:​16)

Oya ena noda gumatua ni vunau ena doudou vei ira tale e so, nida veivakavulici qai laulau noda ivakasala, vaka kina noda talaucaka na lomada vua na Kalou ena masu, da nuidei ni na rogoca qai sauma noda masu.​​—⁠5/15, tabana e 14-​16.

• Na cava e okati kina ena Lawa me “sega ni savasava” e so na ka e vauca na gacagaca ni vakatubukawa?

Na lawa me baleta na veika e sega ni savasava e okati tiko kina na bura ni nona wai e dua na tagane, na mate vakayalewa, kei na vakasucu, oqo e itataqomaki vei ira mera bulabula, e vakabibitaka na rokovi ni dra vaka kina na kena gadrevi na isoro ni ivalavala ca.​​—⁠6/1, tabana e 31.

• Kevaka e via vakila na marau e dua, na cava e ka vakavuku kina me dikeva na ivola na Same?

Era kila na vola na Same ni noda veiwekani vinaka kei na Kalou e kauta mai na marau. (Same 112:⁠1) Era vakabibitaka ni marau e kune ena noda veimaliwai kei ira noda itokani, na ka eda taukena, kei na veika eda dui rawata e sega ni vakatauvatani rawa kei na marau dina e vu mai na noda okati kei ira “sa nodra Kalou ko Jiova.” (Same 144:15)​​—⁠6/15, tabana e 12.

• Na veiwekani talei cava a tauyavutaka o Jiova kei ira na Isireli makawa?

Ena 1513 B.S.K., a tauyavutaka kina o Jiova e dua na veiwekani vou kei ira na Isireli. (Lako Yani 19:​5, 6; 24:⁠7) E dina nira sucu na Isireli ena matanitu sa yalayala oti vei Jiova, ia na nodra qarava na Kalou na Isireli yadua e vakatau sara ga vei ira.​—7/1, tabana e 21-2.

• Na cava meda kua kina ‘ni dau vosakudrukudru’? (Filipai 2:​14, VV)

E levu na ivakaraitaki era tu ena iVolatabu e dusia ni vosakudrukudru e dau vakaleqai ira na tamata ni Kalou ena gauna sa oti. O koya gona e dodonu meda vakasamataka sara vakabibi na leqa e rawa ni vakavuna ena gauna oqo. Nida tamata ivalavala ca e dau malele ga na lomada meda vosakudrukudru, e dodonu gona meda yadrayadravaki tiko da qai qarauna ke via kadre mai lomada.​​—⁠7/15, tabana e 16-17.

• Eda kila vakacava ni vuku e tukuni ena Vosa Vakaibalebale 8:​22-31 e sega ni vakasama?

Na vuku e vakamacalataki tiko e ke e “buli,” e ivakatekivu ni nona cakacaka o Jiova. E sega na nona itekitekivu na Kalou qai sega ni yalani na nona vuku; e sega ni buli na nona vuku. Na vuku e tukuni tiko ena Vosa Vakaibalebale 8:​22-​31 e tiko ena yasa i Jiova me nona “matai daucakacaka,” oqo e vakaibalebaletaki vua e dua na ka bula vakayalo a qai yaco me o Jisu, a cakacaka vakavoleka kei na Kalou ena buli ni veika tale e so. (Kolosa 1:​17; Vakatakila 3:​14)​​—8/1, tabana e 31.