Taro na Dauwiliwili
Na cava e dodonu me cakava na ivavakoso ke vakau lori e gaunisala e dua na lotu Vakarisito mani yaco kina na coqa vakacalaka, ra mate sara kina e so?
E dodonu me dikeva na ivavakoso se na beitaki se sega ena vakadavedra o koya na lotu Vakarisito oqo, baleta me kua ni okati tale ga ena vakadavedra o ira na vo ni lewe ni ivavakoso. (Vakarua 21:1-9; 22:8) Sa rawa ni okati me vakadavedra o draiva, kevaka e laurai ni leqa vakacalaka oya e vu mai na nona draiva vakalialia se a nakita me beca na lawa ni gaunisala e virikotora na matanitu. (Marika 12:14) Ia e tiko e so tale na ka me vakadeuci.
E Isireli makawa, e dau dro o koya e veivakamatei ina dua vei ira na koro ni idrodro, ia, ena veilewaitaki ga. Kevaka e laurai ni a sega ni nakita, ena vakatarai me tiko ena koro oya, me taqomaki kina mai vei koya e nona itavi me sauma na dra. (Tiko Voli mai na Lekutu 35:6-25) O koya gona, kevaka e dua na lotu Vakarisito e beitaki ena nona mate e dua ena coqa vakacalaka, e dodonu mera vaqaqa na qase ni ivavakoso, me vakadeitaki kina se me okati se sega ena cala ni vakadavedra. Na lewa e vakatauca na matanitu se na mataveilewai e rawa ni duidui sara mai na lewa e vakatauca na ivavakoso.
Me kena ivakaraitaki, ena vakatulewataka beka na mataveilewai ni a sega ni muria e so na lawa ni gaunisala o draiva, ia ratou dikeva na qase ni ivavakoso ni sega ni rawa ni beitaki o draiva ena vakadavedra ni sega ni bale vua na mate vakacalaka oya. Ena dua tale na yasana, e rawa ni lewa na mataveilewai me tababokoca na kisi oqo, ia ratou na rairai dikeva na qase ni ivavakoso ni sa dodonu ga me beitaki o draiva ena vakadavedra.
Na nodratou vakatulewa na qase eratou dikeva tiko na kisi e dodonu me yavutaki ena iVolatabu kei na ivakadinadina matata e tiko—oya nona vakatusa nona cala o draiva se na nodratou soli itukutuku e rua se tolu na ivakadinadina eratou nuitaki. (Vakarua 17:6; Maciu 18:15, 16) Ke vakadinadinataki ni beitaki o draiva ena vakadavedra, ena qai duri e dua na komiti ni veilewai. Ke raica na komiti ni sa veivutuni dina o koya e cala, ena vunauci ena kena vakayagataki e so na tikina bibi e veiganiti mai na iVolatabu, qai vakacegui ena so na itavi e dau qarava ena ivavakoso. Ena sega tale ni veiqaravi me qase ni ivavakoso se dauveiqaravi ni ivavakoso. Ena vakatabui mai na so tale na ka. Kena ikuri, ena saumitaro vei Jiova ena vuku ni nona sega ni qaqarauni, se vakawelewele me lai vakavuna kina na coqa kei na mate.—Kalatia 6:5, 7.
Me kena ivakaraitaki: Ke draki ca tiko qai yaco na coqa, a dodonu me qaqarauni sara o draiva. Ke sosovu, a dodonu me kele qai vakacegu mada me yacova ni sa seavu na nona via moce, se kerea e dua tale me draiva.
Vakacava ke a vakau lori vakalialia o draiva? Ke dua na lotu Vakarisito e vakau lori vakalialia, sa vakaraitaka tiko oya nona sega ni solia vei “Sisa na ka nei Sisa.” E vakaraitaka tale ga oya nona sega ni doka na bula, ni rawa ni lai tini sara ena vakacalaka bibi. (Maciu 22:21) Ena tikina oqo, e dua tale na ka me vakasamataki. Na ivakaraitaki cava e sa virikotora tiko e dua na qase ni ivavakoso vei ira na qelenisipi ke a sega ni qarauna me muria na lawa ni matanitu me baleta na vakau lori e gaunisala, se nona nakita sara ga me kua ni muria?—1 Pita 5:3.
Mera kua ni namaka na lotu Vakarisito mera vakatotolo yani na tacidra vakayalo ina dua na vanua ni sota kevaka era kila nira na beca kina na tacidra na lawa ni vakau lori e gaunisala. Levu ga na gauna na ka e gadrevi, oya me tekivu totolo o koya e vakau lori se me veisautaka na nona ituvatuva, me rawa ni veirauti vinaka na nona gauna ni cici e gaunisala. Ni vakayacori oqo, ena sega ni temaki na lotu Vakarisito me draiva vakatotolo, ia ena talairawarawa ga vei ira era “veiliutaki e na matanitu” ena kena muri na lawa ni gaunisala. (Roma 13:1, 5, VV) Na nona talairawarawa vei ira na iliuliu, ena vukei draiva me qaqarauni e gaunisala, me levea kina na coqa vakacalaka, e rawa ni lai tini ena nona beitaki ena vakadavedra. E rawa tale ga ni na ivakaraitaki vinaka kina qai savasava tiko ga na nona lewaeloma.—1 Pita 3:16.