Na Vakamau e Rakorako Vua na Kalou Kei na Tamata
“A qai caka e dua na vakamau mai na koro ko Kena . . . ratou a bau sureti tale ga ki na vakamau ko Jisu kei iratou na nona tisaipeli.”—JONI 2:1, 2, VV.
1. Na cava e vakaraitaka na itukutuku ni nona tiko mai Kena o Jisu?
E KILA o Jisu, o tinana, kei na so vei iratou na tisaipeli na marautaki ni vakamau e rakorako ena kedra maliwa na tamata ni Kalou. E vukea tale ga o Karisito me uasivi e dua na vakamau ni a vakayacora kina na imatai ni nona cakamana e volai, me marautaki kina na kena soqo. (Joni 2:1-11) O sa rairai tiko ena nodra vakamau na lotu Vakarisito era via qaravi Jiova vakaveiwatini ena marau. Se o sa vakanamata tiko beka me vaka oya na nomu vakamau se o vukea tiko e dua na nomu itokani me caka vinaka na nona vakamau. Na cava e rawa ni caka me marautaki kina na vakamau?
2. Na cava e kaya na iVolatabu me baleta na vakamau?
2 Era vakila na lotu Vakarisito ni yaga sara na ivakasala mai na Vosa ni Kalou vei rau na tagane kei na yalewa erau lalawataka tiko me rau vakamau. (2 Timoci 3:16, 17) E sega ni tukuni ena iVolatabu na icakacaka ni nodra vakamau na lotu Vakarisito. Oqo e baleta ni duidui na itovo vakavanua kei na ka e lavaki ena lawa ni duidui vanua qai duidui tale ga na gauna era bula kina. Me kena ivakaraitaki, a sega ni dau vakayacori e Isireli makawa na ka eda vakatoka me gauna ni vakamau. E dau kauti yalewa vou ga o tagane vou ina nona vale se vale nei tamana. (Vakatekivu 24:67; Aisea 61:10; Maciu 1:24) Na ka e laurai votu oya sa vakatokai sara ga me vakamau, e sega ni caka tale na icakacaka ni vakamau me vaka ena gauna oqo.
3. Na cava e caka e Kena e bau vakaitavi tale ga kina o Jisu?
3 Era ciqoma na Isireli na ka e caka oya me sa vakamau. Ni oti oya sa ra qai marautaka e dua na kena soqo, me vaka e vakamacalataki ena Joni 2:1. E levu na ivakadewa ni iVolatabu era vakadewataka vaka oqo na tikinivolatabu oqori: “Sa caka e dua na vakamau mai Kena.” Ia e tukuni ena vosa a volai taumada kina na iVolatabu ni a dau caka ga na kanavata ni vakamau se “magiti ni vakawati.”a (Maciu 22:2-10; 25:10; Luke 14:8) E vakamacalataka na iVolatabu ni a tiko qai vakaitavi tale ga o Jisu ena dua na nodra kanavata ni vakamau na Jiu. Na ka bibi ga me nanumi tiko oya ni ka e vakatokai me vakamau ena gauna makawa e duidui mai na ka eda vakatoka me vakamau ena gauna oqo.
4. Na ivakarau ni vakamau cava era digia e so na lotu Vakarisito, ena vuku ni cava?
4 Ena levu na vanua nikua, e vinakati vei ira na lotu Vakarisito era via vakamau mera muria e so na kena lawa. Nira muria na lawa oqori, sa na vakadonui vakalawa na nodra vakamau. Ena rawa ni veivakamautaki ena dua na soqo lailai na turaganilewa, na mea, se dua na italatala e lesia na matanitu. So era digia mera vakamau ga vaka oya ra qai kerei ira e vica na wekadra se itokani lotu Vakarisito mera vakadinadinataka na nodra vakamau se mera marautaka vata na gauna bibi oya. (Jeremaia 33:11; Joni 3:29) E so tale ga na lotu Vakarisito era na rairai sega ni vakarautaka e dua na kanavata ni vakamau levu e kania e levu na gauna na kena vakarautaki qai saulevu. Era na rairai vakarautaka ga e dua na kakana lailai mera vakayagataka vata kei ira na nodra itokani voleka. Se mani cava eda cakava, meda nanuma tiko nira tu na lotu Vakarisito matua e duidui na nodra rai.—Roma 14:3, 4.
5. Na cava era vinakata kina e levu na lotu Vakarisito me rogoci na ivunau ni vakamau, na cava e dau vakamacalataki kina?
5 E levu na lotu Vakarisito era dau vinakata me rogoci e dua na ivunau vakaivolatabu ena siga ni nodra vakamau.b Era kila ni a tauyavutaka o Jiova na vakamau qai vakarautaka tale ga ena nona Vosa na ivakasala yaga e marautaki kina na vakawati. (Vakatekivu 2:22-24; Marika 10:6-9; Efeso 5:22-33) E levu vei ira na vakawati vou era dau vinakata mera marautaka vata kei ira na nodra itokani lotu Vakarisito kei ira na wekadra na nodrau vakamau. Ia meda raica vakacava na duidui lawa kei na icakacaka ni vakamau era tu kei na kena ivakarau tudei ena duidui vanua? Na ulutaga oqo ena dikeva na ka e dau vakayacori ena so na yasa i vuravura. So ena duidui sara mai na kena icakacaka o kila e dau vakayacori ena vanua o vakaitikotiko kina. Ia e rawa mo vulica kina e so na ivakavuvuli e bibi vei ira na tamata ni Kalou.
Vakamau Rakorako e Vakadonui Vakalawa
6, 7. Na cava meda kauaitaka kina na kena vakamatanitutaki na vakamau, eda na cakava vakacava?
6 E tauyavutaka o Jiova na vakawati, ia na matanitu vakavuravura e lewa tale ga na ka me rau cakava o rau na via vakamau. Oqo e dodonu vinaka. A kaya o Jisu: “Dou solia vei Sisa na ka sa nei Sisa, vei koya talega na Kalou na ka sa nona na Kalou.” (Marika 12:17) E vakarota tale ga na yapositolo o Paula: “Me talairawarawa na tamata kece ga vei ira era veiliutaki e na matanitu, ni sega ni dua e veiliutaki rawa ke sega ni vakatara na Kalou. Ko ira sa veiliutaki tiko oqo sa lesi ira kina na Kalou.”—Roma 13:1, VV; Taito 3:1.
7 Ena levu na vanua o Sisa, se o ira na matanitu, era dau lewa se o cei e rawa ni vakamau. Oya na vuna erau muria kina na lawa ni matanitu me baleta na vakamau o rau na lotu Vakarisito e dodonu vakaivolatabu me rau vakamau. Ena rairai okati kina na kena tauri mai e dua na ivolatara ni vakamau, me veivakamautaki e dua e vakadonuya na matanitu, me qai rejisitataki tale ga na vakawati. Ni a vinakata o Sisa Akusito mera “rejisita” na lewenivanua, rau gole i Peceliema o Meri kei Josefa me rau lai “rejisita.”—Luke 2:1-5, NW.
8. E vakacava na dei ni vakawati, e laurai vakacava oqo ena ka era vakabauta na iVakadinadina i Jiova?
8 Ni sa vakamatanitutaki na nodrau vakamau e rua na lotu Vakarisito, sa dei na nodrau veiyalayalati oya ena mata ni Kalou. Oya na vuna era sega ni dau cakava vakarua kina na vakamau na iVakadinadina i Jiova, se me rau vosa ni bubului tale ena gauna e vakananumi kina na nodrau vakawati ena ika25 se ika50 ni yabaki. (Maciu 5:37) (So na lotu era sega ni vakadonuya na vakamatanitutaki ni vakamau, baleta nira kaya ni sega ni vakadonui me rau sa veiwatini e dua na tagane kei na dua na yalewa vakavo ga ke sa vakalotutaki.) Ena levu na vanua e lesia na matanitu e so na italatala ni iVakadinadina i Jiova mera veivakamautaki. Ke rawa, ena vinakata na italatala oqori me vakamatanitutaka na vakamau ena gauna e soli kina na ivunau ni vakamau ena Kingdom Hall. Ni vanua e vakayacori kina na sokalou dina, ena vanua uasivi me rogoci kina na ivunau ni vakamau e tauyavutaka na Kalou o Jiova.
9. (a) Na cava erau na rairai vinakata na lotu Vakarisito erau vakamau vakamatanitu? (b) Era na vakaitavi vakacava na qase ni ivavakoso ena vakarautaki ni vakamau?
9 Ena so na vanua, e vinakati vakalawa me cakava na vakamau e dua na vakailesilesi vakamatanitu, ena dua na valenivolavola ni matanitu. Era dau vinakata na lotu Vakarisito me veimuri na vakamau vakamatanitu oya kei na dua na ivunau ni vakamau ena Kingdom Hall ena siga vata ga oya se ena siga e tarava. (Era sega ni vinakata me sivi e vica na siga mai na gauna e vakamatanitutaki kina na vakamau kei na gauna e rogoci kina na vunau baleta nira vakamau ena mata ni Kalou kei na tamata, okati kina na ivavakoso vakarisito.) Ke rau vinakata o rau na vakamau vakamatanitu me rogoci na ivunau ni vakamau ena Kingdom Hall, rau na kerea na nodratou veivakadonui na qase ni ivavakoso era lewe ni Komiti ni Cakacaka ni iVavakoso. Eratou na sega wale ga ni vakadeitaka na qase oqo ni vinaka na kedrau irogorogo na vakawati vou, eratou na vakadeitaka tale ga ni sega ni veicoqacoqa na gauna erau kerea kei na gauna e caka kina e dua na soqoni ena Kingdom Hall. (1 Korinica 14:33, 40) Era na dikeva tale ga na ukutaki ni Kingdom Hall erau na rairai kerea o rau na vakamau, ratou qai vakatulewataka tale ga se me kacivaki se sega na kena vakayagataki na hall.
10. Ke gadrevi me caka na vakamau vakamatanitu, na cava me vakayacori ena gauna ni vunau ni vakamau?
10 Ena tovolea na qase ni ivavakoso me rau taleitaka, me vakauqeti rau vakayalo, qai rakorako tale ga na nona ivunau ni vakamau. Ke rau sa vakamau vakamatanitu o rau na veiwatini, me na vakamatatataka na tikina oqo o koya e vunau. Kevaka erau sega ni cavuta nodrau vosa ni bubului ena gauna erau vakamau kina vakamatanitu, e rawa vei rau na vakawati vou me rau cavuta oqori ena gauna e rogoci kina na ivunau.c Ke sa caka na vosa ni bubului ena gauna ni vakamau vakamatanitu de rau na vinakata na vakawati vou me rau vosa ni bubului tale vei Jiova kei na ivavakoso. Ke vaka kina, me rau cavuta na nodrau vosa ni bubului me vaka ga erau sa cavuta oti, me vakaraitaka ni rau sa ‘vauci’ oti.—Maciu 19:6; 22:21.
11. Ena so na vanua, era vakamau vakacava na veiwatini, na cava ena vakaraitaki ena ivunau ni vakamau?
11 Ena so na vanua, e sega ni vinakati me veivakamautaki tale vakamatanitu e dua na vakailesilesi vakamatanitu. Sa vakatokai sara ga me vakamau na nodrau sainitaka na ivola ni vakamau e matana na vakailesilesi. Sa rejisitataki sara ga e kea na vakamau. Rau sa vakatokai sara ga ena gauna oya me rau veiwatini, na siga tale ga oya e siga ni nodrau vakamau. Me vaka e tukuni mai cake, de rau na vinakata o rau na vakamautaki vaka oya me veimuri sara kei na ivunau vakaivolatabu ena Kingdom Hall. Na tacida matua vakayalo e lesi me vunau ena vakamacalataka ni rau se qai vakamau ga mai na veiwatini. Ke cavuti e dua na vosa ni bubului, me muri na veika e tukuni ena parakaravu 10 kei na kena ivakamacala e ra. Era na marau vata kei rau na vakawati vou o ira na tiko ena Kingdom Hall ni na yaga tale ga vei ira na ivakasala mai na Vosa ni Kalou.—Sere i Solomoni 3:11.
Vakamau Vakavanua kei na Vakamatanitu
12. Na cava na vakamau vakavanua, na cava e vinaka me caka ni oti na vakamau vaka oya?
12 Ena so na vanua, e dau vakayacori ga kina na ka e vakatokai me vakamau vakavanua. Oqo e sega ni vakaibalebaletaki ina nodrau tiko vakatevoro e lewe rua, na ka e vakadonui ena so na vanua, ia e sega ni vakadonui vakamatanitu.d E veivosakitaki tiko e ke na vakamau e kilai se vakadonui raraba ena so na yavusa se vanua. Oqo ena rairai okati kina na kena soli se ciqomi na iduguci me vakadinadinataki kina ni sa dodonu vakalawa, vakaivolatabu tale ga na nodrau veiwatini e lewe rua. E vakadonuya na matanitu na vakamau vakavanua oya me dodonu vakalawa qai dei tale ga. Ni oti oya sa rawa ni dau rejisitataki na vakamau vakavanua oya, me rau rawa ni taura kina na veiwatini e dua na sitivikiti mai na matanitu. Na rejisitataki ni vakamau ena itataqomaki, vakabibi vei yalewa ke sa na mani leqa o watina, e itataqomaki tale ga vei ira na luvedrau era na qai sucu. Na ivavakoso ena uqeti ira na vakamau vaka oya mera rejisitataka ena kena totolo duadua na nodra vakamau. E taleitaki sara na kena laurai ena Lawa e soli vei Mosese ni a dau volai na vakamau kei na sucu.—Maciu 1:1-16.
13. Ni oti na vakamau vakavanua, na cava e veiganiti me vakaraitaki ena ivunau ni vakamau?
13 Na tagane kei na yalewa erau vakamau vakavanua erau sa vauci me rau veiwatini. Me vaka e vakamacalataki mai cake, e rawa vei rau na lotu Vakarisito erau vakamau vaka oya me rau rogoca na ivunau ni vakamau rau qai vosa ni bubului tale ga ena Kingdom Hall. Ke vakayacori oqori, ena tukuna o koya e vunau ni rau sa vakamau oti na lewe rua me salavata kei na lawa i Sisa. Ena dua ga na kena ivunau. E dua ga na vakamau, na vakamau vakavanua e vakadonui vakamatanitu, qai dua ga na kena ivunau vakaivolatabu. Ke rau caka veitaravi ga na rua na ka oqori ena siga vata ga, ena veivuke sara ena kena rokovi na vakamau vakarisito ena itikotiko oya.
14. Na cava ena rairai cakava na lotu Vakarisito ke vakatarai ruarua na vakamau vakavanua kei na vakamau vakamatanitu?
14 Ena so na vanua e vakadonui kina vakalawa na vakamau vakavanua, e rawa tale ga ni vakayacori tarava oqori na vakamau vakamatanitu. E dau veivakamautaki ena vakamau vakamatanitu e dua na vakailesilesi vakamatanitu, e rawa ni caka ruarua kina na vosa ni bubului kei na sainitaki na kena rejisitataki na vakamau. So na lotu Vakarisito era taleitaka cake mera vakamau vakamatanitu mai na vakamau vakavanua. E sega ni gadrevi me rau caka ruarua, rau dodonu vakalawa ruarua. Ena taurivaki tale ga e ke na veika e tukuni ena parakaravu 9 kei na 10 me baleta na ivunau ni vakamau kei na vosa ni bubului. E ka bibi ga na nodrau sa vakamau na veiwatini ena sala e rakorako vua na Kalou kei na tamata.—Luke 20:25; 1 Pita 2:13, 14.
Me Dokai Tiko ga na Vakawati
15, 16. E laurai vakacava na veidokai ena vakamau?
15 Ni tubu na leqa ena nona vakawati e dua na tui Perisia, a solia o Memukani, e dua na nona daunivakasala na tui na ivakasala yaga, oya mera “doka na watidra ko ira na yalewa kecega.” (Esiteri 1:20) Ena nodra vakawati na lotu Vakarisito, e sega tale ni vinakati me solia na ivakaro vaka oya e dua na tui vakavuravura; nira dau dokai watidra na yalewa vakawati. O ira tale ga na tagane vakawati lotu Vakarisito era ‘dau dokai watidra’ ra qai vakacaucautaki ira. (Vosa Vakaibalebale 31:11, 30; 1 Pita 3:7) Me kua ni qai vakilai ga na veidokai oqo ni sa oti e vica vata na yabaki na vakawati. Me laurai sara ga ena gauna e se qai oti ga kina na vakamau.
16 Me na kua ni laurai ga vei rau na veiwatini na veidokai ena siga erau vakamau kina. Ke vunau e dua na qase ni ivavakoso vakarisito, me laurai tale ga vua na veidokai. Me vakamua vei rau na veiwatini na nona ivunau. Me ikuri ni nona dokai rau, me kua ni dau veiwali se vakasavuya e so na italanoa vakavanua. Me kua ni tukuna e dua na ka e baleti rau me rau madua kina se o ira na vakarorogo tiko vua. Ia ena loloma ga qai veivakauqeti ni vakabibitaki koya ga e vakavuna na vakawati kei na yaga ni nona ivakasala. Io, na rakorako ni nona ivunau na qase ni ivavakoso ena siga ni vakamau ena vukea vakalevu na vakawati qai rokovi tale ga kina na Kalou o Jiova.
17. Na cava me vakalawataki kina na nodra vakawati na lotu Vakarisito?
17 O raica ena ulutaga oqo e so na icakacaka ni kena vakalawataki na vakawati. E so vei ira e sega ni vakayagataki ena vanua o tiko kina. Ia, e dodonu meda kauaitaka kece na kena bibi na vakamau era cakava na iVakadinadina i Jiova me salavata kei na lawa ni vanua ni oqori na veika e vinakata o Sisa. (Luke 20:25) E tukuna vei keda o Paula: “Sauma kece na ka e dodonu me saumi vei ira na tamata, sauma na i vakacavacava vei ira e dodonu me saumi vei ira, na soli lavaki vei ira e dodonu me soli vei ira na soli lavaki, na vakarokoroko vua e dodonu me vakarokorokotaki.” (Roma 13:7, VV) Io, me tekivu mai na siga ni vakamau, e dodonu me rokovi na ituvatuva ni vakawati e vakarautaka na Kalou me baleta na gauna oqo ena nodra vakawati na lotu Vakarisito.
18. Na tiki ni vakamau cava e dodonu me kauaitaki tale ga, e kunei e vei na ivakamacala oqori?
18 E dau veitaravi kei na vakamau ni lotu Vakarisito e dua na kana magiti ni vakamau se kanavata. Nanuma ni a tiko tale ga o Jisu ena dua na soqo ni vakamau. Ke caka e dua na soqo vaka oqori, e veivukei vakacava na ivakasala ena iVolatabu me rawa ni vakarokorokotaki kina na Kalou, rau rogo vinaka kina na vakawati vou kei na ivavakoso vakarisito? Ena vakamacalataki oqori ena ulutaga e tarava.e
[iVakamacala e ra]
a E rawa ni vakayagataki na vosa oqori ina kanavata e sega ni vauca na vakamau.—Esiteri 9:22, Septuagint.
b Era vakayagataka na iVakadinadina i Jiova e dua na suinivosa e kena ulutaga: “Na Vakamau e Rakorako Vua na Kalou” e dau rogoci ena 30 na miniti. E vakamacalataki kina na ivakasala momona e yavutaki ena ivola Na Sala me Marau Kina na Vuvale kei na so tale na ivola e tabaka na iVakadinadina i Jiova. E yaga na ivunau oqori vei rau na vakamau kei ira na tiko ena vakamau.
c Vakavo ga ke vakatura na matanitu e dua tale na vosa ni bubului, me vakayagataki ga na vosa ni bubului oqo e vakacaucautaki kina na Kalou. Vei tagane: “O yau [yaca i tagane] au sa tauri iko [yaca i yalewa] mo watiqu ni vakamau, au na lomani iko, vakamareqeti iko me vaka e vakaraitaka na iVolatabu vei ira na tagane vakawati lotu Vakarisito, ena gauna taucoko daru bula tiko kina e vuravura me vaka na inaki ni Kalou me baleta na vakawati.” Vei yalewa: “O yau [yaca i yalewa] au sa tauri iko [yaca i tagane] mo watiqu ni vakamau, au na lomani iko, vakamareqeti iko, qai dokai iko tale ga vakalevu, me vaka e vakaraitaka na iVolatabu vei ira na yalewa vakawati lotu Vakarisito, ena gauna taucoko daru bula tiko kina e vuravura me vaka na inaki ni Kalou me baleta na vakawati.”
d E vakamacalataki na vakamau vakavanua ena Watchtower ni 1 Me, 1962, tabana e 287.
e Raica tale ga na ulutaga “Me Marautaki me Dokai Tale ga Nomu Siga ni Vakamau,” ena tabana e 28.
O se Nanuma Tiko?
• Na cava meda kauaitaka kina na veika vakayalo kei na kena vakamatanitutaki na vakamau?
• Ke rau vakamau vakamatanitu e rua na lotu Vakarisito, na cava e rawa ni rau nakita me vakayacori ni oti toka ga oya?
• Na cava me rogoci kina na ivunau ni vakamau ena Kingdom Hall?
[iYaloyalo ena tabana e 18]
Ena nodra vakamau na Isireli makawa, e dau kauti yalewa vou ga o tagane vou ina nona vale se vale nei tamana
[iYaloyalo ena tabana e 21]
Ni oti na vakamau vakavanua, era na rairai vinakata na lotu Vakarisito me rogoci e dua na ivunau ena Kingdom Hall