Taro na Dauwiliwili

Na veidregati cava e dusia tiko na Vakatakila 7:3, VV?

E kaya na Vakatakila 7:​1-3, (VV): “Au sa qai raica e va na agilosi e ratou tu e na tutu i vuravura e va, e ratou sa tarova tu na cagi kei vuravura e va, me kakua ni liwava na vuravura, se wasawasa, se liwava e dua na vunikau. Au sa qai raica e dua tale na agilosi ni sa lako sobu mai na i cabecabe ni matanisiga, sa taura tu na i tuki ni drega i vakatakilakila ni Kalou bula. Sa qai kaci vakadomoilevu ko koya ka kaya vei iratou na agilosi e va, ko iratou e a sa soli tu vei iratou na kaukauwa me ratou vakacacana kina na vuravura kei na wasawasa, ka kaya, ‘Dou kakua mada ni vakacacana na vuravura se na wasawasa se na veivunikau me yacova ni keitou sa vakatakilakilataka [“dregata,” NW] na yadredra na bobula ni noda Kalou.’”

Ni sereki na ‘cagi e va,’ ena cabolo na “veivakararawataki levu,” na gauna ena vakarusai kina o lotu lasu kei na vo ni tuvaki ca kei vuravura. (Vakatakila 7:​14) O ira na “bobula ni noda Kalou,” era taci Karisito lumuti era tiko e vuravura. (1 Pita 2:​9, 16) O koya gona, na parofisai oqo e dusia nira sa na dregati oti na taci Karisito ena gauna e cabolo kina na veivakararawataki levu. Ia, e so tale na tikinivolatabu e dusia nira a dregati taumada na lumuti. Oya na vuna e dau cavuti ena so na gauna na nodra dregati taumada, kei na iotioti ni nodra dregati na lumuti. Na cava na kedrau duidui?

Meda dikeva mada na sala kei na vuna era dau dregati kina na ivola ena gauna makawa. E dau vakayagataki na ituki ni drega me dregati kina e dua na ivola. Dau kena ivalavala ena gauna oya, ni bera ni cevata na qele se kadrala, ena tuki na ivakatakilakila ena duatani tale na ka se ena ivola me kilai kina na dina ni lewenivola, se o koya na itaukei ni vola.​—1 Tui 21:8; Jope 14:17.

E vakamacalataka o Paula na veilumuti ena yalo tabu e vaka na nona veidregati na Kalou: “Sai koya na Kalou sa vakataudeitaki keitou kei kemudou me da tu vata kei Karisito, a sa lumuti keda; o koya talega sa dregati keda, a sa solia ki na lomada na Yalo Tabu me kenai sevu.” (2 Korinica 1:​21, 22) O koya gona, o Jiova e lumuti ira na lotu Vakarisito oqo ena yalo tabu me dusia ni taukeni ira.

Ia, e wasei rua na nodra dregati na lumuti. E duidui na nodra dregati taumada mai na iotioti ni nodra dregati ena (1) inaki kei na (2) gauna e caka kina. Na veidregati taumada e vakaraitaka ni sa digitaki vou e dua na lotu Vakarisito me lumuti. Na iotioti ni veidregati e vakadeitaka ni o koya e digitaki qai dregati oqo e sa vakaraitaka nona yalodina ena basoga kece ni nona bula. Ena iotioti gona ni veidregati, ena dregati kina vakadua e ‘yadrena’ na ivakatakilakila, me vakaraitaka ni sa vakatovolei vakaoti qai “bobula” yalodina “ni noda Kalou.” Na dregati e tukuni tiko ena Vakatakila wase 7 e dusia tiko na iotioti ni veidregati oqo.​—Vakatakila 7:​3, VV.

Me baleta na gauna ena vakayacori kina na veidregati taumada, a vola na yapositolo o Paula vei ira na lotu Vakarisito lumuti: “Koi kemudou talega, ni dou sa rogoca eliu na vosa ni vakavuvuli dina, nai tukutuku-vinaka ni nomudou bula, sai koya ni dou sa vakabauta dou sa dregati kina, e na Yalo Tabu ka yalataki.” (Efeso 1:​13, 14) Ena vuqa na ituvaki, e vakaraitaka na iVolatabu nira dregati na lotu Vakarisito ena imatai ni senitiuri ni oti ga vakalailai nodra rogoca na itukutuku vinaka ra qai vakabauti Karisito. (Cakacaka 8:​15-​17; 10:44) Nodra dregati oqo e vakaraitaka ni se vakadonui ira ga vakatikina na Kalou. E se sega ni vakadonui ira vakaoti. Na cava na vuna?

A vola na yapositolo o Paula ni o ira na lotu Vakarisito lumuti era “sa dregati kina me yaco mada na siga ni bula.” (Efeso 4:​30) E dusia oqo ni na taura toka e dua na gauna, rawa ni vica vata na yabaki, mai na gauna e dregati taumada kina e dua na lotu Vakarisito. Ena gadrevi mera yalodina tiko ga na lumuti mai na siga era dregati kina ena yalo tabu me yacova na “siga ni bula,” oqo nodra sereki mai na yagodra ena gauna era mate kina. (Roma 8:​23; Filipai 1:​23; 2 Pita 1:​10) O koya gona, ni sa voleka ni mate o Paula a rawa kina ni kaya : “Au sa ciciva oti na cere, au sa taura matua na vakabauta: emuri, sa maroroi me noqu nai sala vakaturaga ni valavala dodonu.” (2 Timoci 4:​6-8) Kuria, a kaya o Jisu vei ira e dua na ivavakoso lumuti: “Dou gumatua mo dou yacova na mate, au na qai solia vei kemudou nai sala ni bula.”​—Vakatakila 2:​10; 17:14.

Na vosa “[i]sala” e vakadinadinataka tale ga ni tiko na gauna me tekivu mai na veidregati taumada me yacova na iotioti ni veidregati. E dina vakacava na vakasama oqori? Ena gauna makawa, e dau kena ivalavala me soli na isala vei koya e qaqa ena veitaucici. Me nona na isala, ena sega wale ga ni gadrevi me curu ena veitaucici, e gadrevi tale ga vua me vakaotia na veitaucici. O koya gona, kevaka ga era vosota na lotu Vakarisito lumuti me yacova na ivakataotioti​—mai na gauna era dregati taumada kina me yacova na iotioti ni nodra dregati​—ena qai soli vei ira na isala, oya na bula tawamate e lomalagi.​—Maciu 10:22; Jemesa 1:​12.

Na gauna cava era na dregati oti kina na ivovo ni lotu Vakarisito lumuti? Era na vakatakilakilataki se dregati ‘na yadredra’ o ira na se bula tiko e vuravura ni bera ni tekivu na veivakararawataki levu. Ni sereki na cagi e va, sa ra na dregati oti na ivovo ni Isireli vakayalo, dina ga nira na se bula tiko e vica e vuravura mera vakacavara mada nodra veiqaravi.