Ena Sega ni Yaco na iYaragi Kece e Caka Baleti Keda

“Nai yaragi kecega sa caka me kemu ena sega ga ni yaco.”​—AISEA 54:17.

1, 2. E dina vakacava na Aisea 54:17 ena vuku ni ka e yacovi ira na iVakadinadina i Jiova e Albania?

ENA vica vata na yabaki sa oti, dua na ilawalawa lotu Vakarisito doudou era a vakaitikotiko ena dua na vanua lailai mai Urope e veidelana. Saga sara vakaukaua e dua na matanitu vakominisi e sega ni tokona na veika vakalotu mera vakawabokotaki. Ia, era sega sara ga ni bau soro nira vakatotogani, ra vakacakacakataki vakasaurara, ra qai tukuni vakaca ena tabana ni itukutuku. Na ilawalawa cava mada oqo? Oqo o ira na iVakadinadina i Jiova e Albania. Dau dredre sara na nodra sota kei na nodra cakacaka vakavunau, ia na nodra vosota me sagavulu na yabaki, e vakacerecerei qai dokai kina na lotu Vakarisito, vakalagilagi tale ga na yaca i Jiova. Na gauna e dola kina nodra valenitabana vou e kea ena yabaki 2006, e kaya e dua na iVakadinadina sa dede nona veiqaravi voli ena yalodina: “Se mani vakacava na sasaga i Setani, ena sega na ka e rawata, ena qaqa tiko ga o Jiova!”

² E vakadinadinataka oqori na dina ni yalayala ni Kalou vei ira na sokaloutaki koya, me vaka e volai ena Aisea 54:17: “Nai yaragi kecega sa caka me kemu ena sega ga ni yaco; kei na yame kecega ena mai veilewai kei iko ko na vakacala ga.” Dikevi ena itukutuku makawa ni sega sara ga ni dua na ka e bau cakava na vuravura i Setani me tarova nodra sokalou na sa yalataki ira oti vei Jiova.

Guce na Sasaga i Setani

3, 4. (a) Na cava soti era okati ena iyaragi i Setani? (b) Era sega ni yaco vakacava na iyaragi ni Tevoro?

³ Era okati ena iyaragi mera vakacacani kina na dausokalou dina na kena vakatabui na nodra cakacaka vakalotu, nodra buturaki, bala e valeniveivesu, ra qai ‘dabuitaki ena lawa.’ (Same 94:20) Ena so sara mada ga na vanua era vulica tiko kina na iVakadinadina i Jiova na ulutaga oqo, e “vakatovolei” sara tiko ga na nodra yalodina vua na Kalou.​—Vakatakila 2:​10.

⁴ Me kena ivakaraitaki, e volaitukutukutaka e dua na valenivolavola ni tabana ni iVakadinadina i Jiova, ni volai yani vei ratou ena loma tiko ga ni dua na yabaki e 32 na ripote ni nodra mokulaki na tacida era cakacaka tiko vakavunau. Kena ikuri, e 59 tale na ripote e baleta nodra totogitaki ira na iVakadinadina na ovisa nira cakacaka tiko vakavunau. Oqo era wili kina na gone, qase, tagane kei na yalewa. So e tauri na mawe ni ligadra, ra taba, ra qai vesu me vaka na daubasulawa. So tale era vakarerei ni caka vei ira na ivalavala kaukaua. Ena dua tale na vanua, e volaitukutukutaki kina e sivia na 1,100 na ripote me baleti ira na iVakadinadina i Jiova era vesu, ra totogi ilavo, se mokulaki. Sivia na 200 na ripote oqo era yaco sara ga ena siga era soqoni kina mera vakananuma na mate i Jisu! Ia na yalo tabu ga i Jiova e vakabulai ira na nona tamata, dina ni ca sara na veika e yacovi ira, se mani vanua cava era tiko kina. (Sakaraia 4:6) Ena sega ga ni vagalui ira na vakalagilagi Jiova tiko na nodra cudru katakata na meca. Eda nuidei gona ni sega ni dua na iyaragi ena vakadaroya na inaki ni Kalou.

Vakacalai na iTukutuku Lasu

5. Na itukutuku lasu cava era vakacacani kina na dausokaloutaki Jiova ena imatai ni senitiuri?

⁵ E parofisaitaka o Aisea nira na vakacala na dausokaloutaki Jiova na itukutuku lasu kece e nakiti mera vakacacani kina. Ena imatai ni senitiuri, a dau vakatanitaki na kedra itukutuku na lotu Vakarisito, e tukuni nira daucaka ca. Vakadinadinataki oqori ena Cakacaka 16:​20, 21: “Oi rau na tamata la oqo . . . erau sa vakidroataka na noda koro, ka vakarota nai valavala eso sa sega ni dodonu vei keda me da vakabauta, se muria ni da sa kai Roma.” Dua tale na gauna era uqeti ira na iliuliu ni koro na dauveitusaqati mera vakacacani ira na imuri i Karisito, ra qai tukuna: “O iratou oqo eratou sa vukici vuravura me ca, eratou sa tadu talega mai kike; . . . ka ra sa talaidredre ko ira kecega oqo ki na vunau i Sisa.” (Cakacaka 17:​6, 7) A tukuni vei Paula ni “dauveivakacalai” qai iliuliu ni dua na isoqosoqo dau muri tamata, e uqeta na veitusaqati “vei ira kecega . . . e vuravura.”​—Cakacaka 24:​2-5.

6, 7. Era na vakacala vakacava na lotu Vakarisito dina na itukutuku ni veivakacacani baleti ira?

⁶ Me vaka ga na gauna oya, e sega ni kurabuitaki nira dau vakaucacataki, ra kaseti, qai vakatanitaki na kedra itukutuku na lotu Vakarisito dina nikua. Eda na vakacala vakacava na veivakacacani vaka oqori?​—Aisea 54:17.

⁷ Na noda itovo vinaka ga na iVakadinadina i Jiova ena vakalasui kina na veibeitaki se na veivakacacani oqori. (1 Pita 2:​12) Ena qai vakavotui ga na lasu ni veika eda beitaki kina na lotu Vakarisito ni laurai votu na noda dau muria na lawa ni vanua, ni kilikili noda itovo, da qai kauaitaka dina na nodra bula e so tale. Ena tukuni keda ga na noda itovo. Nira raica e so na noda caka vinaka tiko ga ena vosota, ena uqeti ira mera vakalagilagia na Tamada vakalomalagi, ra qai kila na ivakatagedegede cecere ni bula era muria tiko na nona dausokalou.​—Aisea 60:14; Maciu 5:​14-​16.

8. (a) Na cava ena rairai gadrevi ena so na gauna meda vakamacalataka kina na noda vakabauta vakaivolatabu? (b) Me vakataki Jisu eda na vakalasuya vakacava na itukutuku lasu?

⁸ Me salavata kei na noda itovo vakarisito, ena gadrevi tale ga ena so na gauna meda vakamacalataka ena doudou na noda vakabauta vakaivolatabu. De dua eda na kerea na matanitu se mataveilewai me vakatulewa ena dokai ni noda dodonu. (Esiteri 8:3; Cakacaka 22:​25-​29; 25:​10-​12) Ni bula voli e vuravura o Jisu, so na gauna e dau sabai ira sara ga na vakalewai koya, qai vakacala na nona beitaki vakailasu. (Maciu 12:​34-​37; 15:​1-​11) Eda na vakatotomuri Jisu tale ga ena noda tu vakarau meda vakamacalataka vakamatata na ka eda vakabauta dei. (1 Pita 3:​15) Me kua tale ga ni tarova na noda tukuna na dina ni Vosa ni Kalou na nodra veivakalialiai e koronivuli, valenicakacaka se o ira na wekada tawavakabauta.​—2 Pita 3:​3, 4.

Jerusalemi​—“Na Vatu Dauveibitaki”

9. O Jerusalemi cava e vakatakarakarataki ena “vatu dauveibitaki” ena Sakaraia 12:3? Na ilawalawa cava e vuravura e vakatakarakarataka?

⁹ E vakavotui ena parofisai i Sakaraia na vu ni nodra saqati ira na lotu Vakarisito dina na veimatanitu. Dikeva mada na Sakaraia 12:​3, e kaya: “E na gauna ko ya ka’u na lewai Jerusalemi me vatu dauveibitaki vei ira kecega na veimatanitu.” O Jerusalemi cava e tukuni tiko ena parofisai oqo? E vakaibalebaletaki tiko vei “Jerusalemi vakalomalagi,” na matanitu vakalomalagi era sureti kina na lotu Vakarisito lumuti. (Iperiu 12:22) Era se bula tiko e vuravura e dua ga na iwase lailai ni lumuti mera na lewena na Matanitu ena veiliutaki kina na Mesaia. Era cakacaka vata kei ira na nodra itokani ‘so tani tale na sipi’ mera sureti ira na tamata mera nuitaka na Matanitu ni Kalou ni se vo na gauna. (Joni 10:16; Vakatakila 11:15) Cava era cakava na veimatanitu ena veisureti oqo? Tokoni keda vakacava na dausokalou dina ena gauna oqo o Jiova? Meda tomana sara noda dikeva na ibalebale ni veika e tukuni ena Sakaraia wase 12. Eda na vakadeitaka kina ni ‘na sega ni yaco na iyaragi kece e buli’ mera saqati kina na lumuti ni Kalou kei na nodra itokani yalayala.

10. (a) Na cava era vakacacani tiko kina na dausokaloutaki Jiova? (b) Na cava e yacovi ira na via kauta laivi na “vatu dauveibitaki”?

¹⁰ E tukuni ena Sakaraia 12:3 nira “mavoa vakaca” na veimatanitu. Yaco vakacava oqo? Vakarota na Kalou ni dodonu me vunautaki na itukutuku vinaka ni Matanitu ni Kalou. E bibi dina vei ira na iVakadinadina i Jiova na cakacaka vakavunau. Ia, na nodra kacivaka tiko ni Matanitu ni Kalou duadua ga e inuinui ni kawatamata, e sa mai “vatu dauveibitaki” kina vei ira na veimatanitu. Era via kauta laivi na vatu oqori ena nodra saga mera tarovi na dauvunautaka na Matanitu ni Kalou. Era tini “mavoa vakaca kina” na veimatanitu era veivakacacani tiko nira tavatavalaki. E vakamadua na kedra irogorogo nira druka vakaloloma. Era sega ni vagalui ira rawa na dausokalou dina era mareqeta na nodra itavi dokai ni kacivaka na “itukutuku-vinaka e sega ni oti rawa” me baleta na Matanitu ni Kalou ena veiliutaki kina na Mesaia, ni bera ni tini na veika ca era yaco tu e vuravura. (Vakatakila 14:6) E kaya na yadra ni dua na valeniveivesu e Aferika ena nona raica tiko na ivalavala voravora e dau caka vei ira na dausokalou i Jiova: ‘Oni sa vakaoti gauna sara ga na vakacacani ira tiko na tamata oqo. Era na sega vakadua ni cakitaka nodra vakabauta. Ena tubu tiko ga na kedra iwiliwili.’

11. E dina vakacava na Kalou ina nona yalayala ena Sakaraia 12:4?

¹¹ Wilika na Sakaraia 12:4. E yalataka o Jiova ni na vakamatabokotaki ira vakaivakatakarakara qai ‘vakidroataki’ ira na dau saqati ira tiko nona dautukutuku yaloqaqa ni Matanitu ni Kalou. E dina tiko ga ina nona vosa. Kena ivakaraitaki, a vakatabui tu na sokalou dina ena dua na vanua, ia ra sega ga ni tarova kina na dauveitusaqati nodra vakani vakayalo na tamata ni Kalou. Bau tabaki sara ena dua na niusiveva nira a vakayagataka na baluni na iVakadinadina i Jiova me vakau kina na ivola vakaivolatabu ina nodra vanua! E yaco dina ga na ka e yalataka na Kalou vei ira na nona dausokalou yalodina: ‘Au na yadrava . . . , au na vakamatabokotaka na nodra ose kece na veimatanitu.’ Nira mataboko, salavata kei na nodra cudru, era sega kina ni kila na ka mera cakava na meca ni Matanitu ni Kalou. Ia eda nuidei ga ni na taqomaki ira vakailawalawa nona tamata o Jiova qai kauaitaka na nodra bula.​—2 Tui 6:​15-​19.

12. (a) E tekivuna vakacava o Jisu na bukawaqa ena nona bula tiko e vuravura? (b) Vakayalo, era caudre tale tiko ga vakacava na ivovo ni lumuti, na cava e yaco kina?

¹² Wilika na Sakaraia 12:​5, 6. “[O ira] na turaga ni Juta” e vakaibalebaletaki ira na qaravi ira tiko na dausokaloutaki Jiova. E uqeti ira sara tiko ga o Jiova ena nodra cuqena ni qarava nodra itavi me baleta na Matanitu ni Kalou. A tukuna o Jisu vei ira nona tisaipeli ena dua na gauna: “Au sa lako mai me’u biuta na buka waqa ki vuravura.” (Luke 12:49) E vaka dina na bukawaqa na nona cakacaka. E laurai oqo ena nona gumatua ena cakacaka vakavunau qai nona usutu bibi na Matanitu ni Kalou. Ia, e vu ni veileti kaukaua vei ira na tiko e Juta na itukutuku ni Matanitu. (Maciu 4:​17, 25; 10:​5-7, 17-​20) Vakayalo, era caudre tale tiko ga na imuri i Jisu ena gauna oqo ra qai vaka na “miqa bukawaqa e na loma ni buka droka.” Tabaki ena 1917 e dua na ivola, The Finished Mystery,a qai sega tale ni wereubiubi ni vakavotuya nodra veidabui na lotu ni Veivanua Vakarisito. E vakacudrui ira sara ga na bete. Dua na gauna wale tiko ga oqo a veisoliyaki kina na iTukutuku ni Matanitu Naba 37, e kena ulutaga “Sa Voleka na iTinitini ni Lotu Lasu!” Levu na wilika era sa vakaraitaka sara ga nodra tokona se sega na Matanitu ni Kalou.

Vakabulai na “Nodra Vale Laca na Juta”

13. Na cava e vakaibalebaletaki ena matavosa “nodra vale laca na Juta,” cava tale ga e vakabulai ira kina na vakacacani o Jiova?

¹³ Wilika na Sakaraia 12:​7, 8. E levu na valelaca e Isireli makawa, ni so na gauna era dau vakavale kina na ivakatawanisipi kei ira na dauteitei. Nira kabakoro yani na meca e Jerusalemi era na ravuti sara ga e liu na tiko ena valelaca. Macala ga nira na gadreva na veitaqomaki. Na matavosa “nodra vale laca na Juta” e dusi ira tiko na ivovo ni lumuti ena noda gauna kei na nodra tiko ena vanua e sega ni taqomaki tu, me vaka sara ga era sega ni vakarurugi tu ena koro vakabai. Ia, na vanua sara ga oqori era qarava kina ena doudou na itavi me baleta na Matanitu ni Kalou ena liutaka na Mesaia. O Jiova ni lewe vuqa ena “vakabula taumada na nodra vale laca na Juta” baleta ni na taketetaki ira sara ga e liu o Setani.

14. E taqomaki ira vakacava na tiko ena “nodra vale laca na Juta” o Jiova, mera kua tale ga ni malumalumu?

¹⁴ Era matataka na Matanitu i Jiova na lumuti qai vakadinadinataki ena kedra volaitukutuku makawa ni taqomaki ira tiko na Kalou ena nodra “vale laca” e sega ni taqomaki.b E vakaukauataki ira mera kua ni “malumalumu,” ra qai yaloqaqa tiko ga vakataki Tevita, na tui qaqa.

15. Na cava e “segata” kina me “vakarusa na veimatanitu kecega” o Jiova, gauna cava ena cakava kina?

¹⁵ Wilika na Sakaraia 12:9. Na cava e “segata” kina me “vakarusa na veimatanitu kecega” o Jiova? Nira saqata tiko ga na Matanitu ena veiliutaki kina na Mesaia. Era na lewai nira dau veivakasosataki ra qai vakacacani ira na dau qarava na Kalou. Sa voleka oqo na iotioti ni nodra ravuti ira na dauqaravi Kalou na mata i Setani e vuravura, ena tini sara ena ivalu e vakatoka na iVolatabu me Amaketoni. (Vakatakila 16:​13-​16) Ena qai vala na Dauveilewai Levu me vueti ira na dausokaloutaki koya, qai vakalagilagia na yacana ena veimatanitu.​—Isikeli 38:​14-​18, 22, 23.

16, 17. (a) Na cava na “nodrai votavota na tamata i Jiova”? (b) Dina ni vakacacani keda o Setani, ia na cava e vakadinadinataki ena noda vosota tiko ena yalodina?

¹⁶ E sega vei Setani na iyaragi me vakamalumalumutaka na nodra vakabauta se gumatua na dausokaloutaki Jiova e vuravura raraba. Koya gona e “nodrai votavota na tamata i Jiova” na sautu vakayalo e vu mai na nona veivakabulai. (Aisea 54:17) Sega ni dua ena kauta laivi na vakacegu kei na vutuniyau vakayalo eda sa vakila tiko na dausokaloutaki Jiova. (Same 118:6) Ena yasana adua, ena sega ni cegu o Setani ena nona uqeta na veitusaqati kei na veivakacacani. Ia, na noda yalodina tiko ga ena vosota e vakadinadinataka ni tokoni keda tiko na yalo tabu ni Kalou. (1 Pita 4:​14) Sa kacivaki tiko e vuravura raraba na itukutuku vinaka ni Matanitu i Jiova. E vakayagataki e levu na “vatu” vakaivakatakarakara “e rabotaki” mera saqati kina na tamata ni Kalou me vaka ga na kena dau vakayagataki na iyaragi mera bololaki kina e so. Ia, era vosota ga ena kaukaua i Jiova, nira sega sara ga ni vakila kina e dua na mosi. (Sakaraia 9:​15) Era na sega sara ga ni vakayavalati na ivovo ni lumuti kei ira na nodra itokani yalodina!

¹⁷ Dina ni vakacacani keda tiko na Tevoro ia eda sa vakanamata tu ina noda vakabulai. Eda lomavakacegu dina ena veivakadeitaki ni ‘yaragi kece ga e caka me baleti keda ena sega ni yaco, kei na yame kece ga e veilewai kei keda ena vakacalai’!

[iVakamacala e ra]

O na Sauma Vakacava?

• Cava e vakaraitaka na kena sega ni yaco na iyaragi kece i Setani?

• E “vatu dauveibitaki” vakacava o Jerusalemi vakalomalagi?

• E vakabula vakacava o Jiova na “nodra vale laca na Juta”?

• Cava eda vakadeitaka nida sa volekata yani na Amaketoni?

[iYaloyalo ena tabana e 21]

Era a yalodina tiko ga na tamata i Jiova mai Albania dina ni vakacacani ira o Setani

[iYaloyalo ena tabana e 23]

Sabaya o Jisu na nona beitaki vakailasu

[iYaloyalo ena tabana e 24]

Sega ni yaco na iyaragi kece e caka me baleti ira na kacivaka tiko na itukutuku vinaka