Era Taleitaka na sa “Vakarau Tu” na iTukutuku ni Matanitu ni Kalou
“Sa vakabauta ko ira kece era sa vakarau tu me vinakata na bula tawa mudu.”—CAKA. 13:48.
1, 2. Era vakayacora vakacava na lotu Vakarisito taumada na parofisai i Jisu ni na vunautaki e vuravura taucoko na itukutuku ni Matanitu ni Kalou?
E VOLAITUKUTUKUTAKI ena ivola na Cakacaka na veika vakasakiti era cakava na lotu Vakarisito taumada me baleta na parofisai i Jisu ni na vunautaki e vuravura taucoko na itukutuku ni Matanitu ni Kalou. (Maciu 24:14) Era ivakaraitaki vinaka vei keda ena nodra gugumatua na vunau. Ena vuku ni nodra vunau vagumatua e Jerusalemi na tisaipeli i Jisu ena imatai ni senitiuri, era tabili yani ina ivavakoso e vica vata na udolu okati kina e “lewe vuqa talega na bete.”—Caka. 2:41; 4:4; 6:7.
2 Ena imatai ni senitiuri, era veivakavulici na daukaulotu mera lotu Vakarisito dina e levu tale. Dua o Filipi, a lai vunau i Samaria, ra qai vakarogoci koya vinaka e lewe vuqa. (Caka. 8:5-8) A lai vunau o Paula kei ira na nona itokani ena levu sara na vanua—me vakataki Saipurusi, so na vanua e Esia Lailai, Masitonia, Kirisi kei Itali. Era qai lotu Vakarisito e levu na Jiu kei na kai Kirisi era vakaitikotiko ena veikoro a vunau kina. (Caka. 14:1; 16:5; 17:4) A cakacaka vakavunau tiko e Kiriti o Taito. (Taito 1:5) A ogaoga tale tiko ga vakalevu ena vunau o Pita e Papiloni. Na gauna e qai vola kina na imatai ni nona ivola ena rauta na 62-64 S.K., sa kilai levu tu na nodra cakacaka vakavunau na lotu Vakarisito e Ponito, Kalatia, Kapatosia, Esia, kei Picinia. (1 Pita 1:1; 5:13) E gauna vakasakiti dina oya! Ena levu ni nodra gugumatua na lotu Vakarisito ena imatai ni senitiuri, ra tukuna kina na meca nira sa “vukici vuravura.”—Caka. 17:6; 28:22.
3. Na cava e yaco tiko ena vuku ni nodra gumatua ena vunau o ira na kacivaka na itukutuku ni Matanitu ni Kalou, na cava na nomu rai?
3 E vakatubuqoroqoro tale ga na tubu e laurai ena ivavakoso vakarisito ena gauna oqo. Sega li ni vakayaloqaqataki iko na ripote ni yabaki vakacakacaka ni iVakadinadina i Jiova kei na vuavuaivinaka ni cakacaka vakavunau ena vuravura raraba? O marautaka beka na nodra vakavulici ira e sivia na ononamilioni na vuli iVolatabu na dau kacivaka na itukutuku ni Matanitu ni Kalou ena yabaki vakacakacaka ni 2007? Kena ikuri, e vakaraitaka na iwiliwili levu era tiko ena iVakananumi ni mate i Jisu Karisito ena yabaki sa oti—rauta ni tini na milioni era sega ni dautukutuku—nira taleitaka na soqo oqo. E se vo levu dina na cakacaka.
4. O cei era taleitaka tiko na itukutuku vinaka ni Matanitu ni Kalou?
4 Me vaka ga a yaco ena imatai ni senitiuri, era “sa vakabauta ko ira kece era sa vakarau tu me vinakata na bula tawa mudu” ena gauna oqo nira taleitaka na ka dina ena iVolatabu. (Caka. 13:48) E vakayarayarataki ira mai o Jiova ina nona isoqosoqo. (Wilika Akeai 2:7.) Cava gona e dodonu me noda rai me baleta na cakacaka vakavunau, meda tokona kina na cakacaka ni kumukumuni?
Vunau Vei Ira Kece
5. O cei ena vakadonuya o Jiova?
5 Era kila na lotu Vakarisito ena imatai ni senitiuri “ni sega ni dau vakaduiduitaka na tamata na Kalou. Ia sa dau vinakati ira kece ga era dau vakarokorokotaki koya ka dau cakava na ka e dodonu, veitalia ga se mataqali kawa tamata cava era lewena.” (Caka. 10:34, 35, VV) Ena vinaka ga na nona veiwekani kei na Kalou e dua, ke vakabauta na isoro ni veivoli i Jisu. (Joni 3:16, 36) E vinakata gona o Jiova “me[ra] bula na tamata kecega, ka mai kila sara nai vakavuvuli dina.”—1 Tim. 2:3, 4.
6. Na cava meda kua ni cakava nida kacivaka na itukutuku vinaka? Na vuna?
6 Meda kua ni veivakaduiduitaki nida kacivaka na itukutuku vinaka—meda kua ni vakilakila se ra na vakarorogo se sega o ira eda via vunau kina. E vinaka meda tukuna na itukutuku vinaka vei ira na tamata kece ga, dina ni duidui na vanua era cavutu mai kina, ra sucu turaga se tauvanua, kedra irairai, nodra rai vakalotu kei na so tale na ka era duidui kina. Vakasamataka mada: Sega li ni o marau ni a sega ni veivakaduiduitaki o koya a vunautaka taumada vei iko na veika dina ena iVolatabu? Koya gona kua ni tu vakasuka mo vunautaka na itukutuku vinaka e veivakabulai, vei ira kece o sotava.—Wilika Maciu 7:12.
7. Na cava meda kua ni vakalewai ira kina eda dau vunau vei ira?
7 Sa digitaki Jisu o Jiova me Turaganilewa; e sega gona ni dodonu meda vakalewa e dua. E veiganiti dina me Turaganilewa o Jisu baleta ni kila na ivakarau ni noda vakasama kei na lomada. Ena yasana adua, e sega ni ganiti keda na ilesilesi oqori baleta ni dau yavutaki na noda vakatulewa ena ‘ka eda raica wale ga’ se ‘ka sa rogoca na daligada.’—Aisea 11:1-5; 2 Tim. 4:1.
8, 9. (a) Na cava a dau cakava o Saula ni bera ni lotu Vakarisito? (b) Na cava eda vulica ena ka a yaco ena bula ni yapositolo o Paula?
8 Era qaravi Jiova na veimataqali tamata kece. Dua na kena ivakaraitaki kilai levu o Saula mai Tarisu—sa qai yapositolo o Paula e muri. A dua na Farisi, qai dau vakacacani ira na lotu Vakarisito ena ivavakoso baleta ni vakabauta dei nira sega ni lotu Vakarisito dina. (Kala. 1:13) Ena rai vakatamata, eda sega tu ga ni vakabauta ni na veisau me lotu Vakarisito. Ia, a dikeva o Jisu ni vinaka na loma i Saula, qai vakacolati koya ena dua na ilesilesi dokai. A mani lotu Vakarisito gugumatua kina o Saula ena imatai ni senitiuri.
9 Na cava eda vulica ena ka a yaco ena bula ni yapositolo o Paula? Era tiko ena noda yalava e so era rairai sega sara ga ni taleitaka na itukutuku vinaka eda kacivaka tiko. Dina nida nanuma nira na sega ni veisau mera lotu Vakarisito dina, ia meda vakamacala tiko ga vei ira baleta ni so era na rawa ni qai tataleitaki e muri. E noda ilesilesi ga meda vunau tiko me “sega ni mudu” vei ira kece na tamata.—Wilika Cakacaka 5:42.
Vakalougatataki O Ira na “Sega ni Mudu” na Vunau
10. Na cava meda kua ni tu vakasuka kina ni vunau vei ira na tamata voravora? Tukuna e so na ivakaraitaki ena noda yalava.
10 E so na gauna e dau cala na ka e nanumi taumada ena vuku ni ka e kilai me baleta e so. Dua na kena ivakaraitaki o Ignacio.a A tekivu vuli iVolatabu ena gauna a curu tu kina ena dua na valeniveivesu e Sauca Amerika. Era rerevaki koya e levu baleta ni itovo voravora. E so na kaivesu era dau caka iyaya era qai volitaka vei ira e so tale na kaivesu, ia ni berabera na sausaumi dau vakayagataki ga o Ignacio me lai qaqai ira mera sauma. Ia, ni toso nona vuli qai bulataka na ka e vulica, a veisau vakadua na turaga ivalavala voravora e dau veivakasaurarataki oqo me yalovinaka. Sa sega tale ni qai dau vakayagataki o Ignacio me lai taroga na dinau, ia e marau ga ni sa veisautaka na nona itovo na ka dina ena iVolatabu kei na yalo tabu ni Kalou. E marau tale ga nira a sega ni veivakaduiduitaki na iVakadinadina era vakavulici koya ena iVolatabu.
11. Na cava eda vunau tiko ga kina vei ira sa rogoca oti na itukutuku vinaka?
11 E dua na vuna eda vunau tiko ga kina vei ira sa rogoca oti na itukutuku vinaka oya ni dau veisau na ituvaki kei na rai ni tamata. De a sega ni tataleitaki se a tusaqati keda ena noda veisiko e liu, ia oqo sa tauvimate bibi tu beka, sa sega beka ni cakacaka saumi se takali beka e dua rau dau veivolekati. (Wilika Dauvunau 9:11.) De dua, era sa kauaitaka vakalevu na veisiga se bera mai ena vuku ni veika e yaco tu e vuravura. Na veiveisau e yaco oqori ena nodra bula sa vakavuna beka mera tataleitaki. Eda na sega gona ni tu vakasuka meda vunautaka na itukutuku vinaka ena veigauna.
12. Meda dau raici ira vakacava eda dau vunau vei ira? Na vuna?
12 E dau noda ivakarau ga na tamata meda vakalewai ira tale e so, da qai raici ira vakatani se wasei ira vakailawalawa. Ia o Jiova e kauaitaki keda yadudua. E kauaitaka na ka eda vinaka kina. (Wilika 1 Samuela 16:7.) Me vinaka tale ga na noda rai baleti ira eda vosa kina ena cakacaka vakavunau. Vakadinadinataki ena levu na ivakaraitaki ni yaga noda sega ni dau vakalewai ira oqori.
13, 14. (a) Na cava e nanuma cala kina e dua na painia me baleta e dua na marama a sotava ena cakacaka vakavunau? (b) Cava eda vulica e ke?
13 A cakacaka vakavunau tiko o Sandra ena dua na yanuyanu ena Caribbean, qai sotavi Ruth, e dua e dau vakaitavi ena soqo ni marau. Sa rawata vakarua o Ruth na icovi ni ranadi ni soqo oqori. Ia a kurabuitaki nona vakarogoca vinaka na ivakamacala i Sandra, mani tuvanaki sara me sa tekivu vuli iVolatabu. Nanuma lesu o Sandra: “Na imatai ni ka au raica niu curu yani ena nona rumu ni gade, oya na kena itaba ni tokara tu na isulu ni soqo oya kei na kena isasauni, vaka kina na icovi kece a rawata. Ena vuku ni ka oqori, au nanuma cala ni na sega ni taleitaka na vuli iVolatabu ni marama rogo qai ogaoga vakalevu ena veika me baleta na soqo ni marau. Au sa sega ni mani tomana na neirau vuli.”
14 A lai soqoni yani ena Kingdom Hall o Ruth ena dua na siga, qai tarogi Sandra ena gauna sa oti kina, “Cava o sa sega ni lai vuli iVolatabu tiko yani kina kei au?” A kere veivosoti o Sandra, rau qai tuvanaka me sa tomani tale na vuli. Totolo sara na toso vakayalo i Ruth—sa biuta laivi na kena itaba ni soqo ni marau, sa dau tiko ena soqoni qai vakaitavi ena cakacaka vakavunau, e yalataki koya tale ga vei Jiova. E muri sa qai vakadinadinataka o Sandra ni a cala na ka a nanuma taumada baleti Ruth.
15, 16. (a) E yaga vakacava na nona vunau e dua na dautukutuku vua na wekana? (b) Na cava meda kua ni tu suka kina na vunau vei ira na wekada se mani vakacava nodra ivakarau ni bula?
15 Levu tale ga e dau vuavuaivinaka nodra vunau vei ira na wekadra tawavakabauta, dina ni dau nanumi taumada nira sega ni tataleitaki. Dikeva mada na ka a cakava o Joyce, e dua na lotu Vakarisito yalewa e Mereke. E curu suka i valeniveivesu nona daku, tekivu mai na gauna se cauravou kina. “Era tukuna e so ni sega ni yaga nona bula,” e kaya o Joyce, “ni dau volitaka na wainimate gaga, e daubutako, qai dau cakava e so tale na ka ca vaka oya. Ia, e 37 na yabaki noqu a tukuna tiko ga vua na ka dina ena iVolatabu.” A vakalougatataki vakalevu sara na nona yalovosovoso baleta ni a qai vulica na iVolatabu kei ira na iVakadinadina i Jiova na nona daku, e levu tale ga na veiveisau a cakava. Ena dua na gauna lekaleka sa oti, a papitaiso na daku i Joyce ni sa yabaki 50, ena dua na soqo ni tikina e Kalifonia, Mereke. Tomana o Joyce: “Tuturu sara ga na wainimataqu ena levu ni noqu marau. Au marautaka dina niu a vunau tiko ga vua!”
16 Ena rairai dredre moni tukuna na ka dina ena iVolatabu vei so na wekamuni ena vuku ni nodra ivakarau ni bula. Ia a sega ni tu suka o Joyce me vunau vua na nona daku. Meda nanuma tiko nida sega ni kila na loma ni tamata yadua. De dua e vakasaqara tiko na lotu dina. Meda kua gona ni tu vakasuka ni vunau vei ira kece era via kila tu na ka dina.—Wilika Vosa Vakaibalebale 3:27.
iVoladusidusi Yaga ni Vuli iVolatabu
17, 18. (a) Era vakaraitaka vakacava na itukutuku mai na veiyasa i vuravura na yaga ni ivola Na Cava Sara Mada e Kaya na iVolatabu? (b) Na cava e so na ka vivinaka o sotava ni o vakayagataka na ivola oqo?
17 E laurai ena itukutuku mai na veiyasa i vuravura nira taleitaka o ira na via kila na ka dina mera vulica na ivola Na Cava Sara Mada e Kaya na iVolatabu? A tekivutaka e so na vuli iVolatabu ena ivola oqori o Penni, e dua na painia yalewa e Mereke. Erau qase cake vua e rua na vuli iVolatabu oqori, rau qai dei ena nodrau dui lotu. A sega ni kila o Penni se rau na ciqoma vakacava na ivakavuvuli vakaivolatabu e tiko ena ivola Kaya na iVolatabu. Ia a qai vola, “Ni matata, veisemati vinaka, qai kilai rawarawa na ivakamacala ena ivola, rau ciqoma ni dina taucoko na ka rau vulica tiko, rau sega tale ni qai vakacala se vakabekataka.”
18 A tekivu vuli iVolatabu kei na dua na marama e isenivalu o Pat, e dua na dautukutuku e Igiladi. A dro mai na nona vanua mai Esia na marama isenivalu oqo nira kauta vakavesu na watina kei ira na luvenatagane e so na sotia era saqata na matanitu. A sega ni raici ratou tale. A leqataki nona bula, vakamai na nona vale, qai kucuvi koya e dua na ilawalawa. Na veika oqori e vakavuna me sega ni vakainaki vua na bula, qai vakasamataka vakavica me vakamatei koya sara ga. Ia e vakayaloqaqataki koya na nona vulica na iVolatabu. “E uqeti koya sara ga na kilai rawarawa ni ivakamacala kei na vosa vakatautauvata ena ivola Kaya na iVolatabu,” e vola o Pat. E totolo nona toso vakayalo na vuli iVolatabu oqori, e sa dautukutuku bera ni papitaiso, sa vakaraitaka tale ga ni via papitaiso ena soqo ni tabacakacaka e tarava. E marautaki dina na noda tuberi ira na yalomalumalumu mera kila ra qai taleitaka na inuinui e vakamacalataki ena iVolatabu!
‘Meda Kua ni Oca ena Caka Vinaka’
19. Na cava e sa qai bibi ga kina na noda cakacaka vakavunau?
19 Sa lekaleka na gauna, sa qai bibi ga na noda cakacaka vakavunau kei na noda tubera e so tale mera tisaipeli i Jisu. E laurai ena veiyabaki ni yaga na noda vunau vei ira na vica na udolu era vinakata mera kila na Kalou. Ia, “sa voleka mai na siga i Jiova na siga ka uasivi.” Kena ibalebale nira “sa voleka me ra moku” o ira na ologi tu ena butobuto vakayalo.—Sefa. 1:14; Vkai. 24:11.
20. Na cava me noda inakinaki?
20 E rawa tiko ga nida tuberi ira na vaka oqori. Ia, e gadrevi meda vakatotomuri ira na lotu Vakarisito ena imatai ni senitiuri era “sega ni mudu ni vakatavuvuli ka vunautaki Jisu ni sai koya na Karisito.” (Caka. 5:42) Meda muria na nodra ivakaraitaki ena noda vosota na veivakacacani, noda kauaitaka na iwalewale ni noda “veivakavulici,” kei na noda sega ni veivakaduiduitaki nida vunau! “Me da kakua kina ni oca e na caka vinaka,” ni na vakadonui keda o Jiova ke da cakava vaka kina ena vosota.—2 Tim. 4:2, VV; wilika Kalatia 6:9, VV.
[iVakamacala e ra]
a So na yaca sa veisau.
O na Sauma Vakacava?
• O cei era sa taleitaka tiko na itukutuku vinaka ni Matanitu ni Kalou?
• Na cava meda kua ni vakaduiduitaki ira eda vunau kina?
• E yaga tiko vakacava na ivola Na Cava Sara Mada e Kaya na iVolatabu?
[iYaloyalo ena tabana e 13]
Era sa vulica tiko na ka dina e vica vata na udolu na yalomalumalumu
[iYaloyalo ena tabana e 15]
Na cava eda vulica ena nona veisau na yapositolo o Paula?
[iYaloyalo ena tabana e 16]
Eda sega ni veivakaduiduitaki nida vunautaka na itukutuku vinaka