Taro na Dauwiliwili

iTotogi Beka ni Kalou na Leqa Tubukoso?

Na leqa tubukoso e sega ni itotogi ni Kalou vei keda. Sega ni se cakava e liu, ena sega tale ga ni cakava ena veigauna se bera mai. Na vuna? E tukuna na 1 Joni 4:8: “Sa loloma na Kalou.”

E dau yavutaki kece ena loloma na veika e cakava na Kalou. O koya e dauloloma ena sega ni vakararawataka e dua, ni kaya na iVolatabu o koya e ‘dauloloma e sega ni caka ca vua na kai nona.’ (Roma 13:10) E tukuni tale ga ena Jope 34:12: ‘E sega ni caka ca na Kalou.’

Sa tukuni tu mai ena iVolatabu ni na yaco ena noda gauna na leqa tubukoso me vaka na “uneune lelevu.” (Luke 21:​11, VV) Ia o Jiova e vakataki koya na daunidraki. Rau tukuna vakailiu na Ieqa tubukoso ena yaco, ia rau sega ni vakavuna na leqa kei na vakacaca e salavata mai. Ke sega ni vakavuna na Kalou na rarawa eda sotava ena vuku ni leqa tubukoso, o cei ga e vakavuna?

E tukuna na iVolatabu ni “koto ga vua na vu-ni-ca ko ira kecega na kai vuravura,” qori o Setani na Tevoro. (1 Joni 5:​19) A tekivu mai na ivakatekivu na nona veivakamatei, se tomana tiko ga qori me yacova mai nikua. (Joni 8:​44) O Setani e okata na noda bula me tawayaga. E dau nanumi koya ga, sa rauta me taka levu na kocokoco ena ituvaki ni bula qo e tu ena nona lewa. Ena rai ni vuravura, e sega ni cala na nodra vakalolomataki na tamata ke mani okati mada ga kina na nodra vakasaurarataki mera vakaitikotiko ena vanua e dau yaco kina na leqa tubukoso kei na leqa e vakavuna ga na tamata. (Efeso 2:2; 1 Joni 2:​16) E dodonu gona mera beitaki tale ga na tamata kocokoco nira vakavuna e so na leqa e yaco tu nikua. (Dauvunau 8:9) Ena sala cava?

E vakavuna na tamata e so na leqa e yaco tu qo. Kena ivakaraitaki, na waluvu kei na cagilaba era vakaleqai kina na lewenivanua e New Orleans, Mereke, kei na kena vakacacani ena sisi ni qele na nodra vale na vakaitikotiko ena baravi kei Venezuela. Ena ituvaki qori kei na so tale, e vuki me veivakaleqai na veika buli me vaka na cagi kei na uca nira sega ni kila vinaka na tamata na veika e vauca na draki kei na veika bula, sega ni vinaka na cakacaka vakaidinia, sega ni lalawataki vinaka na ka e caka, sega ni muri na ivakasala, kei na nodra vakasavuliga na veiliutaki.

E dua na leqa va qori a yaco ena gauna vakaivolatabu. A kasura vakasauri e dua na vale levu ena gauna i Jisu, ra qai mate kina e le 18. (Luke 13:4) De vu qori ena cala ni tamata, na “gauna kei na veika tawanamaki” se ruarua, ia e sega ni nona vakataulewa na Kalou.​—Dauvunau 9:​11, NW.

Sa bau vakavuna na leqa tubukoso na Kalou? Io, e duidui ga mai na kena e vakavuna na tamata. Na leqa tubukoso a vakavuna o Jiova a tiko na kena inaki, a digitaka o koya o ira mera bula kei ira na vakarusai, qai tu tu yadua tale ga na kena yaco. Rua na kena ivakaraitaki, na waluvu e vuravura ena gauna i Noa vaka kina nodrau vakarusai o Sotoma kei Komora ena gauna i Loti. (Vakatekivu 6:​7-9, 13; 18:​20-​32; 19:24) A donu na lewa a vakatauca ena gauna ruarua qori na Kalou nira vakarusai ga na tamata ca era sega ni veivutuni, ia ra vakabulai na yalododonu.

Ena muduka kece o Jiova na leqa tubukoso kei na rarawa e salavata mai ni tu vua na kaukaua qai vinakata dina me vakacegui keda. E kaya na Same 72:12 me baleti Jisu Karisito na Tui lumuti ni Kalou: “[E]na vakabula ko koya na dravudravua ni sa tagi; kei koya sa vakararawataki ka sa sega e dua me vukei koya.”