Leqa Tubukoso—E Vakaraitaka ni Dau Veivakalolomataki na Kalou?

KA ERA TUKUNA ESO: “E liutaka na vuravura na Kalou, kena ibalebale ni vakavuna na leqa tubukoso, qori e vakaraitaka ni dau veivakalolomataki.”

KA E KAYA NA IVOLATABU: “E lewa tiko na Vunica na vuravura taucoko.” (1 Joni 5:19) O cei na “Vunica”? Na iVolatabu e vakatokai koya me o Setani. (Maciu 13:19; Marika 4:15) Vakacava e dina qori? Vakasamataka mada qo: Ke lewa tiko na vuravura o Setani, e macala ga ni na vakamuai ira na tamata mera nanumi ira ga qai kocokoco me vakataki koya. Qori na vuna era vakacacana kina na tamata na vuravura. Era tukuna na kenadau ni vuna levu e yaco kina na leqa tubukoso, oya na kena sega ni qarauni na noda vuravura.

Ia na cava ga e vakalaiva kina na Kalou me lewa tiko na vuravura o Setani? Ena saumi qori nida dikeva na itekitekivu ni bula ni kawatamata, ena gauna rau talaidredre kina na vuda ina veiliutaki ni Kalou. E levu tale ga vei ira na kawatamata era muria na ivakarau qori. Nira nakita mera talaidredre ina veiliutaki ni Kalou, e sa lewai ira kina na kawatamata o Setani na meca ni Kalou. Sa rauta me vakatokai Setani o Jisu me “turaga ni vuravura qo.” (Joni 14:30) Vakacava ena veiliutaki o Setani me tawamudu? Sega!

E sega ni marautaka o Jiovaa na veika rarawa e vakavuna o Setani, e kauaitaka ga na nodra rarawa na kawatamata. Kena ivakaraitaki, ena gauna a sotava kina na ituvaki dredre na matanitu o Isireli, e kaya na iVolatabu me baleta na Kalou: “E na nodra rarawa kecega sa rarawa kina ko koya.” (Aisea 63:9) Sa voleka gona ni vakarusa na veiliutaki ca i Setani na Kalou, ni lomani keda! Sa digitaki Luvena, o Jisu Karisito, me Tui lewadodonu me tawamudu.

VUNA MO KAUAI KINA: Era sega ni taqomaki na tamata mai na leqa tubukoso ena veiliutaki i Setani, ia era na taqomaki ni sa veiliutaki o Jisu. Ni a taqomaki ratou mada ga na nona tisaipeli mai na dua na draki ca. E kaya na iVolatabu: “E . . . vunauca na cagi, e kaya ina wasawasa: ‘Mo maravu!’ Mai ruru yani na cagi, e maravu tale ga na wasawasa.” Eratou kaya na nona tisaipeli: “O cei mada qo, ni talairawarawa sara ga vua na cagi kei na wasawasa?” (Marika 4:​37-41) Na ituvaki qori e vakadeitaka vei keda ni o Jisu ena taqomaki ira kece na kawatamata talairawarawa ena gauna sa na veiliutaki kina.​—Taniela 7:​13, 14.