E Totogitaki Keda Tiko na Kalou?

“Era vakaloloma o ira era vakaleqai, ia au nanuma ni [qo] e itotogi ni kalou (tembatsu),” qori na ka e tukuna e dua na daunipolitiki rogo e Japani ni kurea na nona vanua ena Maji 2011 na uneune e 9.0 na kena kaukaua, e cabe tale ga na ualoka.

A tukuna e dua na daukakaburaki rogo ena porokaramu ni lotu ena tivi nira mate na sivia na le 220,000 ena uneune a kurei Haiti ena Janueri 2010, nira “veidinadinati kei na tevoro” qai gadrevi mera “qarava na kalou.”

“E vinakata na Kalou me vakayadrata na neimami lewaeloma sa sega [tu] ni cakacaka,” qori na ka e tukuna e dua na bete ni Katolika nira mate e le 79 ena nodra veisugusugu na lewenivanua mai Manila ena Yatu Filipaini. E tukuna e dua na niusipepa ni “ruasagavulukadua na pasede na uabula era vakabauta ni vakaraitaka na Kalou na nona cudru ena sisi ni qele, cagilaba kei na so tale na leqa tubukoso” e dau yaco ena nodra vanua.

E SEGA ni ka vou na vakasama ni Kalou e totogitaka na tamata ca ena leqa tubukoso. Nira mate ena 1755 e le 60,000 ena uneune, kama, kei na tsunami a yaco mai Lisbon, Potukali, a taroga na vuku rogo o Voltaire: “E dau vakasisila na nodra soqo ni marau mai Parisi, ia era sotava beka ga na leqa e Lisbon ni levu cake na nodra ivakarau ca?” Era nanuma e milioni ni dau vakatauitotogi na Kalou ena leqa tubukoso. Levu na vanua era tukuna ni vakavuna na Kalou na leqa tubukoso.

Nida vakasamataka tiko qori, ena vinaka meda taroga: E vakayagataka tiko beka na Kalou na leqa tubukoso e yaco veitaravi nikua me vakatauitotogi kina? E totogitaki keda tiko na Kalou ena yaco veitaravi ni leqa tubukoso nikua?

E volatukutukutaki ena iVolatabu ni vakayagataka na Kalou na veika e bulia me veivakarusai kina. Eso era yavutaka e keri na nodra veibeitaki ni vakavuna na Kalou na leqa tubukoso. (Vakatekivu 7:17-22; 18:20; 19:24, 25; Tiko Voli Mai na Lekutu 16:31-35) Nida dikeva na ivolatukutuku qori ena iVolatabu, eda na raica e tolu na duidui levu. Kena imatai, a veivakasalataki rawa na Kalou ena veivakarusai kece a yaco. Kena ikarua, na leqa tubukoso e yaco tu nikua e tarai keda kece, ia na Kalou e sega ni veivakarusai vakaveitalia, o ira ga na tamata ca se o ira na sega ni muria na ivakasala era vakarusai. Kena ikatolu, e dusimaki ira na talairawarawa na Kalou ena ka mera cakava mera rawa ni bula.—Vakatekivu 7:1, 23; 19:15-17; Tiko Voli Mai na Lekutu 16:23-27.

E sega ni dua na ivakadinadina ni vakavuna na Kalou na leqa tubukoso era vakaleqai kina e le milioni nikua. Na cava e levu tiko ga kina nikua na leqa tubukoso? Na cava meda cakava ni tarai keda na leqa tubukoso? Ena oti beka ena dua na gauna? Ena saumi qori ena vica na ulutaga tarava.