Toro Voleka Vua na Kalou

“Na Kalou ni Veivakacegui Kecega”

2 Korinica 1:​3, 4

E LEVU na ka me vaka na leqa, yalolailai, kei na galili e rawa ni vakavurarawa kei na lomabibi. O na rairai veinanuyaka ena gauna va qori, ‘O cei e rawa ni vukei au?’ E vola na yapositolo o Paula ena 2 Korinica 1:​3, 4 ni Kalou o Jiova e ivurevure nuitaki ni vakacegu.

E vakatokai na Kalou ena tikina e 3 me “Tama ni loloma.” Na cava e kena ibalebale qori? Na vosa vaKirisi e vakadewataki me “loloma” e dusia na nodra lomani o ira era rarawa tu.a E kaya e dua na ivoladusidusi ni iVolatabu ni rawa ni vakadewataki tale ga me “lomana” se “kauaitaka vakalevu.” Na “loloma” e uqeta na Kalou me dau veivuke. Sega ni vakabekataki ni itovo qori ni Kalou e uqeti keda meda toro voleka vua.

A tukuna tale ga o Paula ni o Jiova e “Kalou ni veivakacegui kecega.” E dua na vosa a vakayagataka e rawa ni kena ibalebale “na nona vakacegui e dua ena nona leqa se rarawa vaka kina na nona vukei se vakayaloqaqataki.” E kaya na Interpreter’s Bible: “Eda vakacegui koya e rarawa ena noda vakayaloqaqataki koya me vosota.”

O na rairai taroga, ‘E vakacegui keda qai vakayaloqaqataki keda vakacava na Kalou meda vosota?’ E cakava vakalevu qori ena nona Vosa na iVolatabu kei na masu. Kaya o Paula ni vakarautaka ena vukuda na Kalou na nona Vosa me noda kina na ‘vakacegu mai na iVolatabu, me rawa kina na inuinui.’ Ni vu tale ga mai lomada na noda masu, eda na vakila “na vakacegu ni Kalou, sa uasivia na ka kecega e kilai rawa.”​—Roma 15:4; FIlipai 4:7.

Na cava soti e vakacegui keda kina o Jiova? Tukuna o Paula ni Kalou e ‘veivakacegui ena noda rarawa kece ga.’ (2 Korinica 1:4) Se mani vakacava na dredre ni veika e yaco, se rarawa eda na rairai vakila, ena vakayaloqaqataki keda na Kalou qai vakaukauataki keda meda vosota. Sega beka ni veivakacegui ya?

Na vakacegu ni Kalou e sega ni yala ga vei ira era vakacegui. E tomana o Paula ena nona tukuna ni vakacegui keda na Kalou me rawa nida ‘vakacegui ira era rarawa ena vakacegu eda vakacegui kina mai vua.’ Me uqeti keda gona na noda vakacegui meda kauaitaki ira e so tale, da vukei ira tale ga era gadreva na veivuke.

Na nona vakatokai o Jiova me “Kalou ni veivakacegui kecega” e sega ni kena ibalebale ni na kauta laivi na leqa se rarawa. Meda vakadeitaka ga qo: Eda na vakayaloqaqataki meda vosota na veika rarawa se walia na leqa ena rairai basika ke da nuitaka na veivakacegui ni Kalou. Sa dodonu ga meda qarava qai vakacaucautaka na Kalou yalololoma.

[iVakamacala e ra]