Vakaukauataki Au Noqu Vakabauta Meu Vosota na Veika Dredre

Talanoataka o Soledad Castillo

E voleka sara ga ni vakayalolailaitaki au e vica na ka e yaco ena noqu bula. A mate na watiqu lomani niu yabaki 34, qai takali o ta ena ono na yabaki e tarava. Oti e walu na vula nona takali o ta, a tukuni vei au ni tauvi luvequ duabau e dua na mate e sega na kena wai.

NA YACAQU o Soledad, e kena ibalebale “Galili.” Ena rairai rogorogo lasa, ia au sega sara ga ni bau galili. Niu sotava na leqa, au vakabauta ni Kalou o Jiova e ‘taura na ligaqu qai vukei au meu kua ni rere.’ (Aisea 41:13) Meu vakamacalataka mada seu vosota vakacava na veika dredre, e vakavolekati au tale ga vakacava vei Jiova.

Bula Marau Qai Lailai na Leqa

Au sucu e Barcelona, Sipeni, ena 3 Me, 1961, au luvedrau duadua ga o José kei Soledad. A vulica o tinaqu na ka dina ena Vosa ni Kalou niu se yabaki ciwa. A sega ni marau ena lotu e lewena ni sega ni sauma nona vakatataro vakalotu. Ia rau sauma vakaivolatabu na nona taro kece e rua na iVakadinadina i Jiova rau gole yani i vale. Mani vakadonuya sara me vulica na iVolatabu.

Sega ni dede sa papitaiso o nana me dua na iVakadinadina i Jiova, vaka kina o tata ena vica na yabaki e tarava. A raica o Eliana na marama a vakavulici nana ena iVolatabu, niu taleitaka tale ga na Vosa ni Kalou. Mani vakatura me dua ga na gauna ni noqu vuli, dina ga niu se gone. Ena nona veivuke na marama qori kei na veivakayaloqaqataki nei nana, au papitaiso kina niu yabaki 13.

Au dau masuti Jiova ena noqu bula vakaitabagone​—vakauasivi ni vinakati meu vakatulewa. E sega soti ni levu na leqa e yaco vei au donuya na gauna qori ni levu na noqu itokani ena ivavakoso, au voleka tale ga vei rau na noqu itubutubu. Ena 1982, keirau vakamau kei Felipe e dua na iVakadinadina e tautauvata na neirau isausau vakayalo.

Susugi na Luvei Keirau Me Lomani Jiova

Na luvei keirau tagane duabau a sucu ena lima na yabaki tarava, keirau vakayacani koya o Saúl. Keirau marautaka kei Felipe ni dua na luvei keirau, keirau nuitaka ni na gone bulabula, ena veiraurau na veika e cakava ena nona bula qai lomana na Kalou. Levu na gauna keirau vakayagataka vei Saúl, keirau tukuni Jiova vua, keitou kana vata, gole ina rara ni gade, se qito vata. E marautaka o Saúl nodrau dau veitomani kei Felipe ena vakarogoi ni ka dina vakaivolatabu vei ira e so tale, qai tekivu vukei koya ni se gone me vakaitavi ena cakacaka vakavunau ena nona tukia na katuba se soli ivolacebaceba.

E marautaka o Saúl na neirau loloma kei na veivakavulici. Ni yabaki ono keitou dau lako vata ena cakacaka vakavunau. E taleitaka na rogoca na italanoa ena iVolatabu, dau vakanamata tale ga ena vuli vakavuvale. Ni tekivu vuli, sa vakatulewa ena so na ka e yavutaka ena veika e vulica ena iVolatabu.

Ia e veisau vakalevu na neitou bula vakavuvale ni sa yabaki vitu o Saúl. E tauvi Felipe na mate ni yatevuso qai sega ni cakacaka rawa ni sa davo tu ga ena loma ni 11 na vula e saga voli kina me valuta na mate qori. A mai takali ni yabaki 36.

Au dau tagi niu nanuma lesu na veika dredre keitou sotava ena gauna ya. Sa torosobu tiko ga na bula i watiqu, au sega ni cakava rawa kina e dua na ka. Sega ni cegu noqu sasaga meu vakayaloqaqataki Felipe, ia au kila e lomaqu ni sa na sega ni rawa na ka au vakanuinuitaka kei na noqu lalawa me baleta na neitou vuvale. Ke keitou sega ni lako rawa ena soqoni vaKarisito, e veivakaukauataki noqu dau wilika vua na ulutaga vakaivolatabu. Dua na ka noqu galili ena gauna a takali kina.

Ia e vakaukauataki au o Jiova. Au dau masuta me sobuti au na yalona tabu, au vakavinavinakataka tale ga na gauna keirau marautaka vata kei Felipe kei na inuinui totoka ni veivakaturi. Au kerea na veivuke ni Kalou meu lomavakacegu ena veika totoka keirau marautaka vata, me solia tale ga vei au na vuku meu susuga na luvei keirau me dua na lotu vaKarisito dina. Au vakila na vakacegu, dina ga niu rarawa vakalevu.

Erau tokoni au vakalevu na noqu itubutubu kei ira na lewe ni ivavakoso. Ia au kila ni noqu itavi meu vakavulici Saúl ena iVolatabu, kei na sala me qaravi Jiova kina. A solia vei au e dua na cakacaka vinaka e valenivolavola na noqu boso makawa, ia au digia meu dausasamaki me rawa ni levu na gauna keirau tiko vata kina kei Saúl, meu tiko tale ga e vale ni suka mai na vuli.

Na tikinivolatabu qo e vakavotuya vei au ni bibi me vakavulici o Saúl ena sala vakalou: “Vakatavulica na gone e na sala e dodonu me lako kina: ia ni sa qase mai, ena sega ni lako tani maikina.” (Vosa Vakaibalebale 22:6) Au nuidei ni na vakalougatataki na noqu sasaga keu solia na noqu vinaka kece ena nona vakavulici o Saúl ena rai nei Jiova. Au vakuai au ena so na ka e yaga vakayago, ia e sega ni dua na ka vei au qori ni bibi cake meu tiko vata kei luvequ.

A takali o tata ni yabaki 14 o Saúl. Qori e tarai Saúl vakalevu ni lesu tale mai vua na rarawa a vakila ena gauna a takali kina o tamana. A ivakaraitaki vinaka tale ga o tata ena nona lomani Jiova. Ni sa sega tale ni dua na “tagane” e vo ena vuvale, a nanuma kina o Saúl ni nona itavi me qaravi au kei buna.

Vosota na Tauvimate

Ni oti e walu na vula nona takali o tata, a tukuna na vuniwai e dau raici keitou vakavuvale meu kauti Saúl i valenibula ni sa rui wawale. Ni caka oti e vica na vakadidike e tukuni vei au ni tauvi koya na leukemia.a

E curu suka e valenibula o Saúl ena rua veimama na yabaki e tarava, ena nona sasaga me vosota na kena mate kei na chemotherapy se veiqaravi vakavuniwai e caka vua. Ena imatai ni ono na vula e vakayacori kina vua na veiqaravi qori, a vinaka vakalailai na nona bula me rauta ni 18 na vula. Ia se tiko ga na kenisa, mani vakayacori vakalekaleka tale vua na chemotherapy e vakamalumalumutaki koya sara ga. A daumaka ga vakalekaleka na nona bula, ia a sega ni vosota rawa na ikatolu ni gauna e caka kina vua na chemotherapy. Sa yalataka o Saúl vua na Kalou na nona bula qai vinakata me papitaiso me dua na iVakadinadina i Jiova, ia a takali ni yabaki 17 oti ga.

Era dau vakatututaka na vuniwai me soli na dra ke sega ni mana na chemotherapy. Sa macala tu ga ni sega ni vakaotia na mate na soli ni dra. Ena gauna se qai kilai kina ni tauvi leukemia o Saúl, keirau sa vakamatatataka vakaveitinani vei ira na vuniwai me kua ni soli na dra ni keirau via talairawarawa ena lawa i Jiova “me tabu . . . na dra.” (Cakacaka 15:​19, 20) Ena gauna au sega ni tiko kina e yasa i Saúl, e dau vakadeitaka o koya vei ira na vuniwai ni oya e nona vakatulewa sara ga. (Raica na kato ena tabana e 16.)

Dina ni se gone qai se bera ni yacova na yabaki ni bula me vakatulewa kina, era vakadeitaka ga na vuniwai ni yalomatua o Saúl, e kila vinaka na tatara ni kena mate. Keirau temaki vakalevu me keirau veisautaka na neirau vakatulewa, ia ratou doka na vuniwai na neirau vakatulewa, ratou vakayacora na veiqaravi vakavuniwai e sega ni vakayagataki kina na dra. Dua na ka noqu marau niu rogoca na nona vakamacalataka o Saúl vei ira na vuniwai na nona rai me baleta na dra. Sega ni vakabekataki ni rau veivolekati kei Jiova.

Ena vulaikatakata a kilai kina na mate e tauvi Saúl, a soli tale ga ena soqo ni tikina e Barcelona na ivola Toro Voleka Vua na Kalou. E yaga sara na ivola qo baleta e veivakaukauataki me keirau tudei ni keirau sega ni kila se cava ena yaco ena gauna se bera mai. Keirau dau wilika vata na ivola ena vica vata na aua keirau tiko kina e valenibula, qai nanuma lesu e so na tikina ena gauna dredre a vinakati kina me keirau vosota. E vakaibalebale dina vei keirau ena gauna qori na Aisea 41:​13, e volai toka ena ivakamacala taumada ni ivola. E kaya: “Sai au ko Jiova na nomu Kalou, ka’u na taura na ligamu i matau, ka kaya vei iko, Mo kakua ni rere; ka’u na vukei iko.”

Tara na Lomadra e so Tale na Vakabauta i Saúl

Era qoroya na vuniwai kei na nasi ena valenibula e Vall d’Hebrón na yalomatua kei na nuidei nei Saúl, ra taleitaki koya kece na veiqaravi vua. Tekivu mai na gauna qori, na vuniwai liu e dau dikeva na dra vei ira na kenisa, e qaravi ira qai dokai ira vakalevu e so tale na gone iVakadinadina i Jiova era tauvi leukemia. E nanuma lesu na nona dei o Saúl ena ka e vakabauta, nona yaloqaqa ni kila sa voleka ni mate, kei na nona daumamarau. Era tukuna vei Saúl na nasi era veiqaravi ena vanua a curu tiko kina ni vinaka duadua o koya mai vei ira na kena vo. E sega ni dau vosa kudrukudru se me oti na nona veiwali​—ena gauna sara mada ga sa voleka kina ni mate.

A tukuna vei au e dua na vuniwai ni mona, ni levu na gone tauvimate bibi era tiko ena yabaki ni bula i Saúl, era dau saqati ira na vuniwai kei ira na nodra itubutubu nira vuturi se rarawataka vakalevu na kedra ituvaki. Ia e sega ni va ya o Saúl. E vakasakiti vua na dei ni yalo i Saúl kei na donu tu ga ni nona rai. Qori e gauna vinaka me keirau vakamacalataka kina vei vuniwai na ka keirau vakabauta.

Au nanuma lesu tale ga na nona vukea o Saúl e dua na iVakadinadina i Jiova ena neitou ivavakoso. E rauta ni ono na yabaki nona lomabibi voli qai tawayaga na wainimate e soli vua. E vakavica na nona lai qaravi Saúl e valenibula ena bogi qai tukuna ni tarai koya sara ga na ivakarau ni rai nei Saúl, dina ga ni kila ena rawai koya na kena mate. Dina ni dau wawale, e saga o Saúl me vakayaloqaqataki ira kece era sikovi koya yani. “E uqeti au sara ga na ivakaraitaki i Saúl meu valuta na noqu lomabibi,” e kaya na iVakadinadina ya.

Sa oti e tolu na yabaki na nona takali o Saúl, ia se sega ni seavu na noqu rarawa. Au sega ni kaukaua, e solia ga vei au na Kalou “na kaukauwa mana levu.” (2 Korinica 4:7) Au vulica ni yaga na veika dredre se mosimosi eda sotava. Noqu vulica meu vosota na takali nei watiqu, tamaqu, kei luvequ, e uqeti au meu kua ni dau nanumi au ga, ia meu kauaitaki ira e so tale era rarawa tu. E bibi sara ni vakavolekati au vei Jiova. Au sega ni lomaleqataka na veika ena yaco ena gauna se bera mai ni vukei au tiko ga na Tamaqu vakalomalagi, se taura tiko ga na ligaqu.

[iVakamacala e ra]

[Kato/iYaloyalo ena tabana e 16]

O Dau Vaqaqa Beka?

O sa na rairai rogoca nira sega ni tauri dra na iVakadinadina i Jiova. O bau vakasamataka se cava na vuna?

E dau tauri cala na nodra vakatulewa e yavutaki ena iVolatabu. So na gauna e nanumi nira cata na veiqaravi kece vakavuniwai se ra sega ni vakamareqeta na bula. E sega ni dina qori, nira dau qara vakavuvale na iVakadinadina i Jiova na veiqaravi vakavuniwai e vinaka duadua. Era qara tale ga na veiqaravi e sega ni vakayagataki kina na dra. Cava na vuna?

Na nodra vakatulewa e yavutaki ena dua na lawa bibi e kotora vei keda na Kalou. Ni oti na Waluvu ena siga i Noa, a vakadonuya na Kalou me ratou kania na lewenimanumanu o Noa kei na nona vuvale. Dua ga na vakatatabu: Me ratou kua ni kania na dra. (Vakatekivu 9:​3, 4) Eda vauci kece ena lawa ya nida kawa i Noa. Na lawa ya a sega vakadua ni bokoci. A vakabibitaka tale na lawa qori vei ira na Isireli na Kalou ni oti e walu na senitiuri ena nona tukuna ni dra e ka tabu, e vakatakarakarataka na bula. (Vunau ni Soro 17:14) Oti e 1,500 na yabaki, ratou vakarota na yapositolo vei ira na lotu vaKarisito kece me ‘tabu vei ira na dra.’​—Cakacaka 15:29.

Era kila na iVakadinadina i Jiova nira sega ni doka na ivakaro qori ke ra tauri dra. Qori na vuna era qara kina na veiqaravi vakavuniwai e sega ni vakayagataki kina na dra. Ena vuku ni nodra vakatulewa e yavutaki ena iVolatabu, era kunea kina na veiqaravi vakavuniwai e toka sara e cake na kena ivakatagedegede. E sega ni vakabekataki ni qori tale ga na vuna era qara kina e levu era sega ni iVakadinadina i Jiova, na veiqaravi vakavuniwai e sega ni vakayagataki kina na dra.

[iYaloyalo ena tabana e 14]

O yau, na watiqu o Felipe, kei Saúl na luvei keirau

[iYaloyalo ena tabana e 14]

Rau na noqu itubutubu o José kei Soledad

[iYaloyalo ena tabana e 15]

Ni vo e dua na vula me takali o Saúl