Na iVakavuvuli Kilai Levu

“Au dau tadra na kama i eli! Au tadra niu kolotaki ina bukawaqa, au dau kaila ena gauna au yadra kina. Au dau saga vagumatua meu kua ni cala.”​—Arline.

O VAKABAUTA ni o eli na vanua era na vakararawataki kina na tamata ca? Levu era vakabauta qori. Kena ivakaraitaki ena vakadidike a caka ena 2005, a dikeva kina e dua na vuku ni Univesiti na St. Andrews mai Sikoteladi ni dua na ikatolu ni italatala e Sikoteladi era vakabauta ni o ira era yawaka na Kalou ena vakararawataki “tawamudu nodra vakasama e eli.” E dua na ikalima era vakabauta ni o ira na tu i eli ena tawamudu nodra vakararawataki vakayago.

E taka levu na ivakavuvuli me baleti eli ena levu na vanua. Kaya mada e Merika ena 2007, ena nodra vakatarogi na lewenivanua a laurai ni 70 na pasede era vakabauta na ivakavuvuli me baleti eli. E laurai tale ga qori ena vanua mada ga era sega ni guta kina na lotu na lewena. Ena vakatataro a caka e Kenada ena 2004, e 42 na pasede era vakabauta na ivakavuvuli ni eli. E vakadeitaki tale ga mai Peritania ni 32 na pasede era vakabauta ni dua dina na vanua o eli.

Ka era Vakavuvulitaka na iTalatala

E levu na italatala era sa sega ni vakavuvulitaka ni vanua ni veivakararawataki ena bukawaqa o eli. Era tokona ga na ivakamacala e tautauvata kei na kena e volai ena Catechism of the Catholic Church, a tabaki ena 1994. E tukuni kina, “Na itotogi levu duadua mai eli na nona tawasei tawamudu e dua mai vua na Kalou.”

Ia e so era se vakabauta tiko ga ni o eli e vanua ni veivakararawataki vakayago kei na vakasama. Era kaya na tokona na ivakavuvuli qo ni yavutaki ena iVolatabu. O Albert Mohler na peresitedi ni Southern Baptist Theological Seminary e vakamatatataka na ka e vakabauta ena nona tukuna: “E vakaivolatabu.”

Na Cava e Bibi Kina na Ka o Vakabauta?

E dodonu mo rere ke vanua dina ni veivakararawataki o eli. Ia ke lasu na ivakavuvuli qo, o ira na iliuliu ni lotu era vakavuvulitaka era vakavuna ga na veilecayaki kei na rere vakalialia vei ira na vakabauta. E beci tale ga kina na Kalou.

Na cava e kaya na Vosa ni Kalou? Ena vica na ulutaga e tarava, ena vakayagataki e so na vakadewa ni iVolatabu me saumi kina e tolu na taro qo: (1) Na cava na kena ituvaki e dua sa mate? (2) Na cava e vakavuvulitaka o Jisu me baleti eli? (3) Ena yaga vakacava vei iko na ka dina o vulica me baleti eli?