Qarai ni iVakasala Yaga

O SEGA ni leqa ke o vinakata na ivakasala, e levu tu nikua. Dua na bisinisi tubu totolo nikua na kena vakarautaki na idusidusi mo cakava ga vakataki iko na ka. Ena veivanua me vakataki Igiladi, Sauca Amerika, Japani, kei Amerika, e voli vakalevu duadua na ivola e dusimaka e dua me cakava vakataki koya na ka. Sa takalevu tale ga na kena vidio, porokaramu ena retioyaloyalo, bau tuvanaki tale ga na kena porokaramu ni vuli. E taleitaki na veika qori nira kaya na kenadau ni sega ni yaga mo lai raica na vuniwai ni mona, daunivakasala ni vakawati, se talatala me dusimaki iko ena nomu leqa. O rawa ni walia ga vakataki iko ni o muria na ivakasala ena ivola se so tale na kena iwalewale. Na ulutaga cava e dau vakamacalataki kina?

Levu era dau taleitaka na ivakasala me baleta na vakacegui ni gagadre ni lomada, marautaki ni vakawati, kei na susu gone, iwali ni lomabibi, na lolosi, kei na rarawa e vakilai ena veisere. E wili tale ga kina na ivakasala ni kanamusu, muduki ni vakatavako, se gunuvi vakasivia ni alakaolo. Vakacava e yaga na ivakasala qori? Ena so ga na gauna. Meda vakasamataka gona vakabibi na ivakasala ena iVolatabu: “O koya sa yalowai sa vakabauta na vosa kecega: ia na tamata yalomatua sa daulewa vakavinaka na nonai lakolako.”​—Vosa Vakaibalebale 14:15.

Na ivola e veidusimaki ena ka mo cakava vakataki iko, e duidui sara mai na ivola e vakavulica e dua me kenadau ena veitaba, akaude, se vosa. Na ivola va qori e yaga, e sau lailai, e isosomi ni ka o lai vulica ena kena koronivuli. E duidui sara na idusidusi e vakarautaki vua e dua me cakava vakataki koya na ka​—se mani baleta na bisinisi, vakawati, susu gone, se na vakasama. E dau vakatututaki kina nona ivakarau ni bula e dua se nona nanuma. Meda taroga gona: ‘O cei e veivakasalataki? E yavutaki ena cava na nona ivakamacala?’

Na nodra nanuma na daunivakasala e sega ni dau yavutaki vinaka ena so na gauna, se me dua na kena ivakadinadina. Eso era na rairai vakarautaka na ivakasala era kila ni na voli vakalevu, ke tukuni vei ira na lewenivanua na ka era taleitaka. Ena dua mada ga na vanua, e sivia na walu na bilioni na dola e rawati e veiyabaki, ena idusidusi vua e dua me cakava vakataki koya na ka!

Vakacava Sara Mada na Kena Yaga?

Ni o volia na ivola se idusidusi tale eso mo cakava ga vakataki iko na ka, o namaka me yaga na kena ivakasala. Ia so na gauna, na ka e tukuni kina e sega ni dina. Kaya mada na ivakasala qo: ‘O na walia nomu leqa ke donu nomu rai. O na rawata na ka ga o vinakata ke o nuitaka tiko ga, se mani ilavo, mo bula vinaka, se marautaka nomu vakawati.’ E yaga dina na ivakasala qori ena wali ni nomu leqa? E yaga tale ga ena veika dredre se na veika rarawa o vakila?

Kaya mada na ivola e taleitaki sara vakalevu nikua me baleta na noda veimaliwai kei na vakawati. Vakacava e yaga, e dei qai marau kina na vuvale? So na gauna e sega ni yaga. E tukuna e dua na marama a dikeva na ivola ni ivakasala, ni o koya a vola na ivola ni veidomoni a rogo ena dua na gauna mai Sauca Amerika, e “vakavulici ira na dauwiliwili ena sala me marautaki kina nodra bula vakawati, mera kua tale ga ni beci ira.” Na turaga qori e tukuna ke dua e tiko ga kei watina ni leqa tu nodrau bula vakawati, e vakaisini koya tiko ga. E macala mai na ka e tukuna ya ni sega ni bibi vua e dua me kila na vu ni leqa qai saga me walia, ia me cakava ga na ka e vinakata.

E vinaka eso na idusidusi e vakarautaki, ia e rawa ni veivakaleqai tale ga. De na yaga na nona vakatutu na daunivakasala ena dua na ulutaga, ia nona vakatutu ena dua tale na ulutaga e rawa ni kuria ga na leqa. E levu na nodra nanuma na daunivakasala qai dau veisaqasaqa, ena sega ni rawa ni dikevi kece. O cei e nuitaki na nona ivakasala? E vinaka meda taroga: ‘A dikevi vinaka na ivakasala qo, se nona nanuma ga e dua na dauvolaivola e dau veivakaduiduitaki? E vakaleqa beka nona dina na nona via vutuniyau se rogo?’

E vakadinadinataki ni sa yaga voli mai vakadede na iVolatabu. Na kena ivakasala e yaga tale ga ena ka e vakamacalataki tu ena ivoladusidusi e tabaki nikua, kei na levu tale. Sa uqeti ira tale ga e levu mera muria na ivakasala: ‘Me vakavoui sara na nomuni vakasama, moni vakaisulu ena itovo vou.’ (Efeso 4:23, 24) E vakatakila vei keda na iVolatabu na vuna eda sotava tiko kina na leqa, e vakavulici keda tale ga ena kena iwali. Koya e bibi sara, e tukuna ni yaga noda cakava na ka e dodonu. Ena vakamacalataki qori ena ulutaga tarava.