Qarai na iSaunitaro e Yaga
Au na qarauna vakacava na noqu bula?
Na cava meu cakava me marau kina noqu vuvale?
Na cava meu cakava me dei kina na noqu cakacaka saumi?
O SA bau taroga mada e dua na taro oqori? O sa kunea beka na kena isau e yaga? Ena veiyabaki e tabaki e rauta ni 2,000 na ivola era vakamacalataka na isau ni veitaro vaka oqori, vaka kina e so tale na ulutaga bibi. Mai Peritania mada ga era vakayagataka na dauwilivola e 80 na milioni na paodi (rauta ni $150 na milioni na ilavo ni Mereke) ena veiyabaki mera volia kina na ivola ni ivakasala me baleta na veika dredre era sotava ena nodra bula. Mai Mereke, e rawati ena loma ni dua na yabaki e $600 na milioni ena volitaki ni ivola ni ivakasala mera kila kina na iwali ni nodra leqa. Koya gona, sega ni o iko duadua ga o vaqara tiko na ivakasala yaga me baleta na qaravi ni bula e veisiga.
E kaya e dua na dauvolaivola me baleta na ivola ni ivakasala e sa binikasauru tu nikua: “Levu na ivola vovou oqo era tokaruataki ga kina na veika sa volai oti.” Io, e levu na ivola oqo era tukuna tiko ga na ivakasala vuku a lavetaki ena dua na ivola makawa sara e vuravura. Oqo na ivola e veisoliyaki vakalevu duadua e vuravura. Sa vakadewataki taucoko se vakatikina ena rauta ni 2,400 na vosa. Me kena isoqoni taucoko, sa tabaki rawa e sivia na 4.6 na bilioni na kena ilavelave e vuravura raraba. Oqo na iVolatabu.
E kaya vakamatata na iVolatabu: “Sai koya na Kalou sa vakavuna nai Vola Tabu kecega, a sa yaga oqo mei vakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu.” (2 Timoci 3:16) Ia, na iVolatabu a sega ni volai vakatabakidua me ivola ni ivakasala meda kila kina na iwali ni noda leqa. Na vu levu ni kena volai, oya me vakavotui kina na inaki ni Kalou me baleta na kawatamata. Ena gauna vata oqori, e vutucoqa tale tu ga kina na itukutuku me baleta na iwali ni leqa eda dau sotava vakalevu, e yalataka tale ga ni na yaga vei ira na bulataka na kena veidusimaki. (Aisea 48:17, 18) Ena yaga dina ena veigauna vua e muria na kena ivakasala, se mani matatamata cava e cavutu mai kina, ivakarau vakavanua e susugi kina, se nona ivakatagedegede ni vuli. Vakacava mo dikeva mada na ulutaga e tarava mo qai vakalewa, e yaga beka se sega na ka e tukuna na iVolatabu me baleta na qarauni ni bula, na vuvale se na cakacaka saumi?