Bibi na Vuli Vakataki Keda kei na Vuli Vakavuvale!
1. E vakaraitaka vakacava ena gauna qo na iLawalawa Dauvakatulewa ni kauaitaki keda, cava na vuna?
1 Me vaka ga ena imatai ni senitiuri, e dau kauaitaki ira na tamata i Jiova na iLawalawa Dauvakatulewa. (Caka. 15:6, 28) Ni sa roro voleka mai na rarawa levu, e rui bibi vei keda yadua na dautukutuku ni Matanitu ni Kalou meda vaqaqacotaka noda veiwekani kei Jiova. Meda vakayagataka vakacava na gauna a dau tuvanaki tu me caka kina na Vuli Vakaiwasewase Lalai? Eda uqeti kece meda vakayagataka na gauna qori ena noda vuli vakavuvale. Ena rawa meda vakekeli vakalevu ena Vosa ni Kalou da qai vakila na kena yaga ena noda bula nida vakayagataka vakavuku na gauna qori.—Same 1:1-3; Roma 11:33, 34.
2. Me tuvanaki vakacava noda vuli vakavuvale?
2 Vuli Vakavuvale: Era uqeti na ulunivuvale mera qarava na nodra itavi e lesi ira kina o Jiova ni muri e dua na ituvatuva dei ni vuli vakavuvale. (Vkru. 6:6, 7) O ira na sega ni vakawati e sega na nodra icolacola vakavuvale era rawa ni vakayagataka na gauna qori mera vuli qai vakekeli vakataki ira ena Vosa ni Kalou. E bibi vei keda kece ‘meda volia na gauna’ ni noda vuli da qai vakananuma vakatitobu me qaqaco vinaka kina noda veiwekani kei Jiova, dina ga nida bula tiko ena ‘veisiga ca qo.’—Efeso 5:15, 16.
3, 4. Na cava e rawa ni okati ena vuli, cava na ka bibi me nanumi tiko?
3 Ka me Okati ena Vuli: Ena rawa ni kunei ena Watch Tower Publications Index se Watchtower Library ena CD-ROM e so na itukutuku dou na marautaka kina vakavuvale na nomudou vulica na iVolatabu. Era rawa ni dikeva na lewenivuvale na ulutaga e dau tabaki wasoma ena Vale ni Vakatawa, me vaka na “Yavu ni Vuvale Mamarau,” “Vakavulica na Luvemu,” kei na “Ra iTabagone.” Vaka kina e so tale na ulutaga e tiko ena Yadra! me vaka na “Ra Taroga na iTabagone” kei na ulutaga totoka me baleta na veika buli.
4 Era na sega ni guilecava rawa ra qai bulataka na ivakavuvuli vakalou na lewenivuvale kece ke wiliki vakamalua qai vakamatata na iVolatabu. (Iper. 4:12) Ena so na gauna dou na rawa ni sarava vata na vidio ni isoqosoqo qai veitalanoataka. Dou na qai rawa ni kila se digitaka kina na ka mo dou vulica vata vakavuvale kei na kena iwalewale mo dou muria. Vakacava mera tarogi na lewenivuvale se cava era na marautaka mera vulica?
5. Na cava e bibi kina na vuli vakataki keda kei na vuli vakavuvale ena gauna qo?
5 Vuna e Bibi Kina ena Gauna Qo: Noda vaqaqacotaka noda veiwekani kei Jiova ena vakarautaki keda meda “tu vakadua, ka raica na veivakabulai i Jiova.” (Lako 14:13) Era gadreva na itubutubu nona veidusimaki na Kalou ena nodra susugi luvedra “e na kedra maliwa nai tabatamata takelo ka lomavakatani.” (Fpai. 2:15) O ira na gone era vinakata na veivuke ena gauna qo mera valuta kina na torosobu ni itovo e koronivuli. (Vkai. 22:3, 6) Ena dei me vaka na “dali e turai-tolu” nodra vakawati na veiwatini ke ra okati Jiova kina. (Dauv. 4:12) Meda vakayagataka vinaka mada ga na gauna sa vo ena noda taravaka cake na “vakabauta savasava sara”!—Juta 20.