Kena iKaono: E Vakadonuya na Kalou me Vakayagataki na Matakau kei na iVakatakarakara ena Sokalou
Kena itekitekivu: “Era sega ni vakayagataka na matakau ena sokalou na lotu vaKarisito taumada . . . A vakadonui me vakayagataki na matakau ena lotu ena ikava kei na ikalima ni senitiuri, ni nanumi era na kila vinaka kina na ivakavuvuli vaKarisito o ira era lecaika, mai na nodra rogoca na ivunau se wilika ena ivola.”— Cyclopedia of Biblical, Theological, and Ecclesiastical Literature, rau vola o McClintock kei Strong, Volume 4, tabana e 503 kei na 504.
Ka e kaya na iVolatabu: “Mo kakua ni cakava vei iko e dua na matakau ceuceu; se dua nai vakatakarakara ni ka mai lomalagi ecake, se dua na ka e tu e vuravura era, se dua na ka e na wasawasa e na yasa i vuravura: mo kakua ni cuva vei ira, se qaravi ira.” (Lako Yani 20:4, 5) A vola na yapositolo o Joni vei ira na lotu vaKarisito ena imatai ni senitiuri: “Ragone, ni qarauna na qaravi matakau.”—1 Joni 5:21.
E dina beka na ka era tukuna eso na lotu, ni matakau e dua ga na sala me torovi qai dokai kina o koya e vakatakarakarataka? E kaya na Encyclopedia of Religion, “a dau vakayagataki e liu na matakau me ivukevuke ga ni veivakavulici, me iukuuku tale ga; qori na yavu e vakadonui kina na kena vakayagataki, ia sega ni dede sa sokaloutaki. E vakadinadinataki qori ena lotu na Eastern Orthodoxy, na ivakatakarakara e okati me dua na ka bibi.” Ia e veiganiti na nona taroga na parofita o Aisea: “Ia dou na qai vakatautauvatataka na Kalou kei cei? se dou na vakatauvatani koya kei na cava?”—Aisea 40:18.
Vakatauvatana na tikinivolatabu qo: Aisea 44:13-19; Cakacaka 10:25, 26; 17:29; 2 Korinica 5:7
KA DINA:
E sega ni vakadonuya na Kalou me vakayagataki na matakau kei na ivakatakarakara ena sokalou
VAKABAUTA GA NA KA DINA, SEGA NI IVAKAVUVULI LASU
Na cava eda vulica ena kena talevi vakalekaleka na ivakavuvuli lasu era se vakavulici tiko ga ena levu na lotu? Na ‘itukuni [kena vosa vaKirisi na myʹthos] e caka vakavuku,’ e veisaqasaqa kei na ka dina vakaivolatabu e kilai rawarawa qai veivakacegui.—2 Pita 1:16.
Yalovinaka, me kua ni qiqo nomu rai, veidutaitaka na ka o vakavulici kina kei na ka e tukuni ena Vosa ni Kalou—na ivurevure ni ka dina. (Joni 17:17) O na qai vakadinadinataka na yalayala qo: ‘O na kila na ka dina, na ka dina ena qai sereki iko.’—Joni 8:32.
[iYaloyalo ni Credit Line ena tabana e 27]
Pictorial Archive (Near Eastern History) Est.