Mo Kaukaua Tiko Ga Vakayalo ni O Qarava Tiko e Dua na Wekamu Tauvimate

O KIM e dua na iVakadinadina, a kilai ni tauvi koya na kenisa ena gauna a laurai kina ni vuce tiko nona suitu.a E tukuna o Steve na watina,“Ena gauna sa sele kina na ka a vuce tiko ya, a caka sara vua na veiqaravi vakavuniwai na radiotherapy kei na chemotherapy. Na veiqaravi vakavuniwai qo e vakamalumalumutaki koya sara ga, a sega ni rawa kina ni veitosoyaki vakalevu.”

O rawa sara ga ni raitayaloyalotaka na mosi ni yalo i Steve ni raici nona daulomani ni qara bula ena vuku ni tauvimate veivakamalumalumutaki qo. De dua tale ga na lewe ni nomu vuvale e tauvimate bibi se sa qase. (Dauv. 12:1-7) Ke vaka kina, o kila vinaka ni bibi mo qarauna tale ga na nomu bula mo rawa ni qarava vinaka na wekamu qori. Ke o malumu vakayalo, e rawa ni vakaleqai na lomamu kei na nomu bula vakayago, qai sega ni o qarava rawa na ka ratou gadreva nomu vuvale. O na veiraurautaka vakacava nomu veika vakayalo kei na nomu qarava e dua na wekamu tauvimate se dua e sa qase? Ke rawa, e tiko beka eso na ka era rawa ni cakava na lewe ni ivavakoso vaKarisito mera kauaitaki koya kina e tauvimate?

Me Veiraurautaki Vakacava na Ka?

Me veiraurau nomu veika vakayalo kei na nomu bula vakayago ni o qaravi tauvimate tiko, ena vinakati mo yalorawarawa ni dau veisau, mo tuvanaka vinaka tale ga nomu gauna kei na ka o cakava. E volai ena Vosa Vakaibalebale 11:2 ni “tu vei ira na yalomalumalumu na vuku.” Na “yalomalumalumu” ena tikinivolatabu qo e kena ibalebale nona kila e dua ni vakaiyalayala ga na ka e rawa ni cakava. Mo kua ni sivita na iyalayala qori, ena vinaka mo dikeva tale mada nomu ituvatuva kei na nomu itavi.

O Steve a vakaraitaka na vuku kei na yalomalumalumu ena nona vakasamataka vinaka na nona itavi. E wili kina nona cakacaka saumi, e kodineita ni ilawalawa qase, ivakatawa ni cakacaka ena nona ivavakoso e Ailadi, a lewe tale ga ni Komiti ni Veitaratara kei na Valenibula ena nona yasayasa. E tukuna o Steve: “E sega vakadua ni dau vosavosa o Kim noqu dau biuti koya meu lai qarava na itavi qo. Ia au kila ni sa rui sivia tale na ka au cakava tiko.” Na cava a qai cakava o Steve? E tukuna, “ni oti noqu vakasamataka vakabibi au qai masulaka, au vakatulewataka meu sa cegu mai na itavi ni kodineita. Au se qase ni ivavakoso tiko ga, ia niu vakasuka eso na itavi, au rawa ni vakayagataka kina e levu na gauna vei Kim kei na veika e gadreva.”

Ni toso na gauna, sa via vinaka tale o Kim. Nirau railesuva kei Steve na kedrau ituvaki kei na veivuke i watina, a rawa kina vei Steve me qarava tale na nona itavi makawa ena ivavakoso. E vakamacalataka o Steve: “Keirau vulica me vakarauta ga na ka keirau cakava, me vakatau ena ituvaki keirau tiko kina. Au vakavinavinakataka nona veivuke o Jiova kei na nona sega ni dau vosavosa o watiqu ena gauna a tauvimate tu kina.”

Dua tale o Jerry, e dua na ivakatawa dauveilakoyaki kei na watina o Maria. Erau veisautaka nodrau isausau merau qarava kina nodrau itubutubu qase. E tukuna o Maria, “Neirau isausau vakaveiwatini me keirau lai veiqaravi vakadaukaulotu ena dua tale na vanua. Ia o Jerry e le dua ga ena nona matavuvale rau qai gadreva dina nona itubutubu merau qaravi. Keirau mani nanuma me keirau tiko ga e Ailadi me keirau qaravi rau. Neirau cakava qo, keirau qaravi tamai Jerry rawa kina me yacova sara nona curu e valenibula ni bera nona mate. Nikua, keirau veivosaki kei tinai Jerry e veisiga, e sega ni yawa tale ga neirau itikotiko ke vinakata na veivuke. Era veivuke tale ga vakalevu na lewe ni ivavakoso e tiko kina o tinai Jerry, rawa kina me keirau cakacaka tiko ga vakatabakidua.”

Nodra Veivuke Eso Tale

A vola na yapositolo o Paula ena gauna a vakamacalataka tiko kina na veika vakayago me vakarautaki vei ira na yada qase ena ivavakoso: “Ke dua e sega ni qaravi ira na kainona, vakabibi o ira na lewe ni nona vuvale, e sa cakitaka na vakabauta, ena ca sara o koya, e vinaka cake e dua e sega ni vakabauta.” E vakabibitaka o Paula vei ira na tacina lotu vaKarisito ke ra vinakata me “dodonu ena mata ni Kalou” na ka era cakava, e dodonu mera qaravi ira vakailavo nodra itubutubu, na tukadra, kei na budra era sa qase. (1 Tim. 5:4, 8) Ia o ira tale ga na lewe ni ivavakoso era rawa ni veivuke.

Vakasamataka mada na kedrau ituvaki o Hakan kei Inger, dua na veiwatini qase mai Suwiteni. E tukuna o Hakan, “Keirau kidacalataka kei watiqu ena gauna a tauvi koya kina na kenisa. A dau bulabula vinaka tu ga o Inger qai kaukaua. Ia qo keirau sa dau lako vakalevu e valenibula me lai qaravi, dau vakavuna tale ga nona malumalumu na wainimate e soli vua. E vakavuna me tiko kina e vale ena loma ni gauna qori, qai vinakati meu dau tiko vata kei koya meu veiqaravi.” Era veivuke vakacava na lewe ni ivavakoso?

Era tuvanaka na qase merau vakarogoca na soqoni ni vakayagataki na talevoni. Kuria qo, o ira na mataveitacini era dau veisiko se qiri. Era dau vakau ivola tale ga kei na kad (card). E tukuna o Hakan, “Keirau vakila sara ga na nodra veitokoni na mataveitacini vaka tale ga kina o Jiova. Na veikauaitaki va qo e yaga sara ga ena neirau kaukaua tiko ga vakayalo. E marautaki ni sa bula vinaka tale o Inger, keirau sa rawa ni lai soqoni tale ena Kingdom Hall.” Nira dau veivuke na lewe ni ivavakoso vei ira na tauvimate kei ira na itabaqase, era vakadinadinataka kina nira ‘wekadra dauloloma e veigauna, ra qai tacidra ena gauna ni rarawa.’—Vkai. 17:17.

Marautaka o Jiova Nomu Sasaga

E rawa ni dau veivakaocai dina na qaravi tauvimate. Ia e vola o Tui Tevita: “Sa kalougata ko koya sa nanuma na dravudravua,” me vakataki ira era gadreva na veivuke nira tauvimate.—Same 41:1.

Na cava mera marau kina o ira na qaravi ira na tauvimate se o ira na rarawa? E volai ena Vosa Vakaibalebale 19:17, “Sa ia na soli ka vei Jiova ko koya sa lomani ira na dravudravua; ia na ka sa solia ko koya ena saumi tale vua.” Na Kalou e dau kauaitaki ira dina nona dauveiqaravi yalodina era tauvimate tu, qai dau vakalougatataki ira era dau kauaitaki ira qori. E lagata na daunisame o Tevita: “Ena vakaukauwataki koya [e tauvimate] ko Jiova ni sa malumalumu koto: o na cakava me vinaka tiko na nonai mocemoce ni sa mate no.” (Same 41:3) Ke sotava na dredre se dua na leqa levu o koya e qarava tiko vakayalololoma e dua na tauvimate, eda nuidei ni na vukei koya o Jiova.

E marautaki dina noda kila ni o Jiova e kauaitaka, e marautaka tale ga na ka eda cakava meda qaravi ira kina na wekada tauvimate! E levu na ka me caka ena nodra qaravi o ira qori, ia na iVolatabu e vakadeitaka vei keda “ni taleitaka na Kalou na isoro va qori.”—Iper. 13:16.

[iVakamacala e ra]

[iYaloyalo ena tabana e 18]

Veiraurautaka tiko ga nomu veika vakayalo qai ciqoma nodra veivuke eso tale