Tukutuku Mai na Daukacivaka na Matanitu

Tavoya na Kalou na Wainimatana

ERA kalougata o ira era veisautaka nodra bula me salasalavata na lawa kei na ivakavuvuli i Jiova. E dina ni sega ni ka rawarawa na veisau, ia e tu vakarawarawa na veivuke kei na veivakaukauataki. (Same 84:11) E vakaraitaka vinaka oqo na veika a yaco mai na cevaicake kei Esia.

Donuya nona gauna ni gade e dua na iVakadinadina mai Varanise, e vosa rawa kina vua e dua na itaukeinisitoa, na yacana o Kitia, ena vuku ni inaki i Jiova me baleta na vuravura. E solia tale ga vei Kiti na ivola E Rawa Mo Bula Tawamudu Ena Parataisi e Vuravura. Ni vakawilika tiko na ivola, e raica sara o Kiti na vosa, “ena tavoya tani kecega na wai-ni-mata mai na matadra.” (Vakatakila 21:4) “A lauti au sara ga na tikina oqo,” e nanuma lesu o Kiti. “Ke laurai noqu mamarau ena loma kece ni siga ena sitoa, sega ni dua ena vakabauta niu dau tagi tu ga niu yaco e vale ena yakavi, me yacova noqu moce.” Ni vakaraitaka na vu ni nona dau rarawa, e kaya: “Sa 18 na yabaki neirau tiko vata kei na dua na turaga. Au sega ni mamarau ni sega ni via vakamautaki au. Au via muduka neirau veimaliwai, ia e sega vei au na kaukaua ni sa dede neirau tiko vata.”

Ni oti ga e dua na gauna lekaleka, e vakadonuya o Kiti me vuli iVolatabu kei na dua na marama iVakadinadina i Jiova na yacana o Lili. “Au saga sara meu bulataka na ivakavuvuli ena iVolatabu,” e kaya o Kiti. “Me kena ivakaraitaki, au sega tale ni qai qarava noqu vu, e dina ga ni ratou tusaqati au kina noqu vuvale. Kena ikuri, au saga me vakalawataki neirau tiko vakasuva, ia e bese na noqu itokani. Donuya na gauna dredre oya, e vakauta tiko ga mai na iVakadinadina mai Varanise na ivola vakaivolatabu, qai dau vakayaloqaqataki au o Lili. Nodrau vosovoso kei na veitokoni vakayalololoma na tacida yalewa oqo e vukei au meu vosota me yacova noqu sa qai ciqoma na ituvaki dina ni noqu itokani. Au mai kila ni sa 5 oti na ‘watina’ qai 25 na luvena! Na ka sara ga oqo e vakaukauataki au meu biuti koya.

“A via dredre meu biubiu mai ena dua na vale levu meu lai tiko ena dua na vale lailai ga. Dua tale, e saga vakaukaua o koya keirau a tiko vakasuva me keirau lai tiko vata tale, e bau vakarerei au ni na vakama na yagoqu ena waikama kevaka au bese. Ena veivuke i Jiova, au cakava rawa kina na ka e dodonu.” E toso tiko ga o Kiti me yacova sara nona papitaiso ena Epereli 1998. Kena ikuri, eratou sa vuli iVolatabu tiko kei ira na iVakadinadina i Jiova e rua na tacina kei na luvena cauravou.

E kaya o Kiti: “Au dau nanuma ni na ca tu ga noqu bula. Ia, nikua, au marau, au sa sega tale ni tagi ena bogi. E tavoya na wainimataqu o Jiova.”

[iVakamacala e ra]