Dusimaki Luvemu me Taleitaka na Wiliwili kei na Vuli

NA NOMU saga vagumatua mo dusimaki luvemu ena wiliwili kei na vuli, e sala vinaka duadua o rawa ni vakavinakataka kina nodra veigauna se bera mai. E ka marautaki dina qo! Eso era sega ni dau guilecava rawa nodra dau wiliwili vei ira nodra itubutubu nira se gone. E rawa ni marautaki na wiliwili, marautaki tale ga na ka e dau yaco kina. E dina qo vei ira na dauveiqaravi ni Kalou, baleta eda na veivolekati tiko ga kina kei Jiova nida vulica na iVolatabu. E tukuna e dua na itubutubu lotu vaKarisito, “E dua vei ira na ka keitou vakamareqeta duadua na wiliwili kei na vuli.”

Na iwalewale ni vuli vinaka e rawa ni uqeti ira na luvemu mera bucina na veiwekani voleka kei na Kalou. (Same 1:​1-3, 6) Na wiliwili e sega ni rawati kina na bula, ia e vakaraitaka na iVolatabu ni rawa nida vakalougatataki kina vakalevu. Me kena ivakaraitaki, e tukuna na Vakatakila 1:3: “E marau o koya e wilika i cake kei ira era rogoca na vosa ni parofisai qo.” E bibi tale ga me dei na noda vakasama na ka eda wilika ni yaga qo ena vuli. A vakamatatataka sara ga qo o Paula ena nona ivakaro veiuqeti vei Timoci: “Vakasamataka vakabibi na ka kece qo; me tara sara na lomamu.” Na vuna? ‘Me raici kina na nomu toso.’​—1 Tim. 4:15.

Na nona kila wale ga e dua na wiliwili kei na vuli, e sega ni vakadeitaka ni na yaga vua. Era dau taura vakamamada e levu nira kenadau ena wiliwili kei na vuli, ra qai vakaliuca eso tale na cakacaka e sega ni vakainaki. Era na dusimaki luvedra gona vakacava na itubutubu mera taleitaka na ivakavuvuli yaga?

Nomu Loloma kei na Nomu iVakaraitaki

Era na tekivu taleitaka na gone na gauna ni vuli ke ra vakila kina na loloma. Erau nanuma lesu o Owen kei Claudia, e dua na veiwatini lotu vaKarisito e rua na luvedrau: “Erau dau vakanamata ena gauna ni vuli, ni qo e gauna bibi vei rau​—erau vakila kina na veitaqomaki kei na vakacegu. Erau vakila kina na loloma.” Nira sa donuya na bula dredre vakaitabagone, ena vakadodonutaka tiko ga nodra rai na vuli a caka ena dela ni loloma. Ena gauna qo o rau na luvei Owen kei Claudia erau sa painia tiko qai yaga tiko ga na nodrau taleitaka na wiliwili kei na vuli a vakavulici vei rau.

E veiuqeti tale ga vakalevu na nomuni ivakaraitaki ni loloma na itubutubu. Nira raica na luvemuni nomuni wiliwili kei na nomuni dau vuli, era na vakadeitaka ni qo e tiki bibi tale ga ni nodra bula. Ia e rawa vakacava vei kemuni na itubutubu e dau dredre vei kemuni na wiliwili moni ivakaraitaki vinaka ena tikina qo? Qo nomu veisautaka na ka o dau vakabibitaka se nomu rai me baleta na wiliwili. (Roma 2:21) Ena uqeti luvemu ni o vakabibitaka e veisiga na wiliwili. Ni o gugumatua ena wili iVolatabu, vakavakarau ena soqoni kei na vuli vakavuvale, ena vakaraitaka vakamatata na bibi ni veika qori.

Koya gona, na loloma kei na ivakaraitaki e ka bibi duadua ena nodra vakavulici na gone mera taleitaka na wiliwili. Ia na ikalawa cava o na cakava mo uqeti ira kina?

Loloma e Tekivutaki ena Wiliwili

Na cava eso na ikalawa bibi me caka mera taleitaka kina na gone na wiliwili? Me tiko na ivola nira se gone. E tukuna e dua na qase ni ivavakoso lotu vaKarisito a vakavulici me taleitaka na wiliwili: “Vakamatauna vei luvemu me dau taura na ivola. Qo era na raica me nodra itokani na ivola qai tiki tale ga ni nodra bula.” Na ivola e yavutaki vakaivolatabu, me vaka na Vuli Vua na Qasenivuli Levu kei na iTalanoa mai na iVolatabu, ena vakavuna mera veitokani voleka kina na gone kei na ivola, dina ke ra se bera ni kila na wiliwili. Ni o dau wilika na ivola va qori vei luvemu, o sega ni vakarabailevutaka tiko ga na vosa, ia na “veika vakayalo” tale ga kei na “vosa vakayalo.”​—1 Kor. 2:13.

Wiliwili e cake. Me dua na nomu ituvatuva mo dau wiliwili kei luvemu ena veisiga. Ni caka qo ena vakavulici ira mera cavuta vakavinaka na vosa qai vakabibitaka mera dau wiliwili. E bibi tale ga na ivakarau ni nomu wiliwili. Nomu makututaka era na lai makutu tale ga kina na gone. Ena rairai kerei iko o luvemu mo wilika vakavica e dua tiko ga na italanoa. Ke yaco qori, cakava sara na ka e kerea! Ni toso na gauna era na via kila tale eso na ulutaga vou. Ia kua ni vakasaurarataka na wiliwili. E ivakaraitaki vinaka kina o Jisu nona vakavulici ira na vakarorogo me “vakatau ena ka era taura rawa.” (Mari. 4:33) Ke o sega ni vakasaurarataki luvemu, era na dau nanamaki ena gauna ni wiliwili tarava, qori na sala o sa vakavulici luvemu tiko kina me taleitaka na wiliwili.

Uqeta me vakaitavi, me veivosakitaki na ka o wilika. O na kidroataka ni rawa vei luvemu me kila, cavuta, qai kila na ibalebale ni levu na vosa. Na kena veivosakitaki na ka e wiliki e rawa ni vakavinakataka vakalevu na nodra wiliwili. Na veivosaki e dau vukei ira na gone mera “vulica na vosa era na qai lai kila emuri ena gauna era wiliwili kina,” e vakamacalataka qo e dua na ivola ena nodra vukei na gone mera dau wiliwili vinaka. “O ira na gone era sa via yalomatua toka ra qai saga mera kila na wilivola kei na volavola,” e tomana na ivola qo, “e bibi na veivosaki​—na levu ga ni kena veivosakitaki na ka e yaga, na kena vinaka tale ga.”

Me wiliwili vei iko o luvemu, uqeta me dau taro. O na taroga sara ga eso na taro qai vakatututaka na kena isau. Qo ena vulica kina o gone nira tu ena ivola na ka eda via kila qai tiko na ibalebale ni veivosa e wiliki. E veivuke sara vakalevu na iwalewale qo vakabibi ke o wilika tiko e dua na ka e yavutaki mai na Vosa ni Kalou, na ivola bibi duadua.​—Iper. 4:12.

Ia kua ni guilecava ni sega ni ka rawarawa na wiliwili, ni taura na gauna kei na vakatovotovo me rawa ni dua e kenadau kina.a Koya gona, uqeti ira na gone era sa taleitaka tiko na wiliwili ena nomu dau vakavinavinakataki ira. Nomu vakavinavinakataki luvemu ena uqeti koya me taleitaka na wiliwili.

Me Yaga Qai Marautaki na Wiliwili

Ena vakainaki na wiliwili ke o vakavulici luvemu me dau vuli. E okati ena vuli na vulici ni itukutuku dina kei na veisemati ni itukutuku. E vinakati kina na tuvatuvanaki, na nanumi vinaka ni ka, kei na vakayagataki vinaka ni itukutuku. Ni sa kila vinaka na vuli e dua na gone qai raica na kena yaga, ena yaga qai marautaki vua.​—Dauv. 10:10.

Vakavulica na bibi ni vuli. Na Sokalou Vakavuvale ena yakavi, na dikevi ni tikinivolatabu, kei na so tale na ka va qori ena yaga vakalevu ena nodra vakavulici na gone mera dau vuli. Nodra dabe vakamalua na gone, qai vakatabakidua nodra vakasamataka ena dua ga na gauna lekaleka e dua na ulutaga, qo ena vakavulici ira mera dau dei ena nodra vakasama, ni qo e bibi ena vuli. Ena rawa tale ga ni uqeti luvemu tagane me tukuna vei iko se sala cava e veisemati kina na ka e se qai vulica ga kei na ka sa kila rawa toka. Ena vakavulici koya me dau veidutaitaka na ka. Ia vakacava mo kerei luvemu yalewa me vakamacalataka vakalekaleka ena nona vosa ga na ka e sa wilika? Qo ena vukei koya me kila vinaka na kena ibalebale qai nanuma vinaka tale ga. Na railesuvi, oya na kena tokaruataki na veitikina bibi ena gauna sa wiliki oti kina e dua na ulutaga, e dua tale ga na ivukevuke o rawa ni vakarautaka vei ira mera nanuma vinaka kina na ka. E rawa nira vakavulici na gone mera dau vola eso na ka ena gauna e caka kina na vuli se ena soqoni ni ivavakoso. Qo ena yaga sara me dei ena nodra vakasama na ka era vulica! Ena bulabula kina na vuli qai yaga tale ga vei iko kei luvemu na iwalewale rawarawa qo.

Cakava eso na ka me uqeti kina na vuli. Ena rawa ni yaga na noda vakasama vakatitobu ke ramase vinaka na cina, cagi bulabula, vakanomodi qai vinaka na ituvaki ni vanua e caka kina na vuli. E bibi gona na nodra rai na itubutubu me baleta na vuli. E tukuna e dua na tina: “E bibi me wasoma qai dei nomu dau vakayagataka e dua na gauna ni wiliwili kei na vuli, ni na uqeti luvemu me dau tuvatuvanaki. Era vulica kina ni tiko na gauna me rawati kina e dua na ka.” Eso na itubutubu era dau vakatabuya me caka e dua na ka ena gauna ni vuli. E tukuna kina e dua, ni iwalewale qo e yaga sara ga vakalevu ena nodra vakavulici na gone mera dau vuli vinaka.

Vakabibitaka na bibi ni vuli. Me kena itinitini, vukei luvemu me raica na sala e rawa ni vakayagataka kina na ka e sa vulica. Nodra vakayagataka na itukutuku era vulica e vakabibitaka na inaki dina ni vuli. E tukuna e dua na tacida cauravou: “Keu raica ni sega ni dua na kena yaga na ka au vulica tiko, ena dredre dina vei au meu vulica. Ia keu vakayagataka sara ga, au na qai vinakata dina meu kila.” Nira raica ni vuli e dua na ka e rawati kina e dua na ka bibi, era na dei sara ga kina. Era na dau vakanamata kina ena vuli me vaka ga nodra vakanamata ena wiliwili.

Na iCovi Vinaka Duadua

E sega ni rawa ni vakaraitaki taucoko ena ulutaga qo na yaga ni nona vakavulici o luvemu me taleitaka na wiliwili. Qo eso ga na kena yaga, me vaka na rawaka e koronivuli, ena vanua ni cakacaka, na veimaliwai kei ira na so, na kilai ni vuravura eda bula tiko kina qo, kei na ivau ni loloma e veivolekati kina e dua na itubutubu kei na luvena, okati tale ga eke na vakacegu dina e kauta mai na wiliwili kei na vuli.

Ia o koya e bibi sara ni na taleitaka o luvemu na vuli, ena uqeti koya me dua ena qaravi Jiova. E bibi mera taleitaka na vuli nira na vakarabailevutaka kina nodra vakasama kei na lomadra mera kila kina “na raba, na balavu, na cere, kei na titobu” ni ka dina vakaivolatabu. (Efeso 3:18) Io, e sega ni vakabekataki ni vinakati vakalevu vei ira na itubutubu lotu vaKarisito mera vakavulici luvedra. Nodra vakayagataka na itubutubu nodra gauna kei na nodra vakasama vei luvedra, qai cakava na ka kece ena nodra bula mera vinaka kina, era nuitaka kina ni yaco na gauna era na digia ga vakataki ira na luvedra mera qaravi Jiova. Ni o vakavulici luvemu ena dua na ivakarau ni vuli vinaka, ena uqeti ira mera vakavinakataka tiko ga qai dei vinaka tiko ga kina nodra veiwekani kei na Kalou. O koya gona, masuta na veivakalougatataki i Jiova ena nomu saga mo vakavulici luvemu me taleitaka na wiliwili kei na vuli.​—Vkai. 22:6.

[iVakamacala e ra]

[Kato/​iYaloyalo ena tabana e 26]

Na Wiliwili . . .

• Me tu vakarawarawa na ivola

• Wiliwili e cake

• Uqeta mera vakaitavi

• Me veivosakitaki na ka o wilika

• Me wiliwili vei iko o luvemu

• Uqeti luvemu me dau taro

Na Vuli . . .

• Mo itubutubu ivakaraitaki vinaka

• Vakavulici luvemu me . . .

○ dei ena nodra vakasama

○ dau veidutaitaka na ka

○ vakamacalataka vakalekaleka

○ railesuvi

○ vakavola eso na ka

• Cakava eso na ka me uqeti kina na vuli

• Vakabibitaka na bibi ni vuli