Nodra Tuvaitutu na iKa128 ni Kalasi e Kiliati

Era Talai na Daukaulotu Mera Veivakatisaipelitaki

“ME ROGOCI ena veivanua na itukutuku vinaka, era tu vakarau kina eso na lotu vaKarisito mera biuta na nodra vuvale kei na nodra itikotiko mera lai vunautaka na itukutuku vinaka e vanuatani.” Qori na ka e tukuna o David Splane e lewe ni iLawalawa Dauvakatulewa ni iVakadinadina i Jiova me tekivutaki kina na soqo marautaki vakayalo qo.

Ena 13 Maji, 2010, era tabili yani e voleka nira le 8,000 ina tuvaitutu ni ika128 ni kalasi ni Watchtower Bible School of Gilead. Era gole yani na nodra vuvale na gonevuli, nodra itokani, kei na so tale na vulagi mai na 27 vakacaca na matanitu mera tiko ena soqo.

“Era na Sega ni Tiko ga e Vale na Tisaipeli”

E tekivutaka na porokaramu na jeameni ni soqo o Brother Splane ni vakamacalataka na ivakaro i Jisu: “Ni lako moni vakavulici ira na lewe ni veivanua kece ga mera noqu tisaipeli.” (Maciu 28:​19, 20) A vakabibitaka ni a talai ira na nona tisaipeli o Jisu vei ira na lewenivanua. E macala nira rogoca na itukutuku vinaka ena Penitiko 33 S.K., eso mai Mesopotemia, Noca Aferika, kei na so tale ena yasayasa vakaRoma nira gole i Jerusalemi. E kaya o Brother Splane nira na “sega ni tiko ga e vale na tisaipeli mera waraki ira na lewe ni veimatanitu. E vinakati mera lakovi ira na tamata ena veivanua yawa sara kei vuravura.”​—Cakacaka 1:8.

E kaya o Brother Splane, “A sega ni tukuna ga vei ratou na nona tisaipeli o Jisu na ka me ratou cakava.” “E vakavulici ratou sara ga ena ka me ratou cakava. E sega ni tukuna wale ga me ratou masu; e vakavulici ratou ena masu. E sega ni tukuna wale ga me ratou vunau; e vakaraitaka vei ratou na iwalewale ni vunau. E sega ni tukuna wale ga me ratou qasenivuli vinaka; e vakavulici ratou ena iwalewale ni veivakavulici vinaka qai laulau.”

Ni vakamacala vei ira na nodra itubutubu na gonevuli era tuvaitutu, e cavuta tale o jeameni na ka e yalataka o Jisu vei ira na nona tisaipeli: “Raica! Au na tiko vata kei kemuni me yacova na ivakataotioti ni veika vakavuravura.” (Maciu 28:20) E vakadeitaka vei ira na vakarorogo o Brother Splane ni na tokoni ira tiko ga na gonevuli o Jisu ena vanua era lesi kina.

“Sakitaki Jiova Ga”

A uqeti ira na lewenikalasi o Anthony Morris e dua na lewe ni iLawalawa Dauvakatulewa mera “sakitaki Jiova ga.” E tukuna ni rua tiko na ibalebale ni vosa sakitaka, e dua e vinaka kei na kena ikarua e ca. Na sakitaki ni ka e ca e okati kina na nona vinakata e dua me qoroi. Ia na sakitaki ni ka e vinaka e tukuni ena 1 Korinica 1:31: “O koya e sakitaka e dua na ka, me sakitaki Jiova ga.” E tukuna o Brother Morris: “Na noda kila na veika titobu me baleti Jiova e dua na ka meda sakitaka. E rui ka dokai meda vakatokai ena yaca tabu​—Jiova, meda nona iVakadinadina.”​—Jeremaia 9:24.

Oti, e vakabibitaka na kena vakatakilai na yaca i Jiova ena nodrau italanoa e dua na veiwatini daukaulotu mai Aferika. Rau gole tiko na veiwatini ena dua na vanua me lai vunau kina o tagane. Ni rau yaco ena dua na vanua ni yadra, a dodoka vei tagane e dua na sotia na nona dakai qai taroga se o cei o koya. E nanuma lesu o watina na ka e vulica ena vuli mai Kiliati qai vakasolokakanataka vei watina, “Tukuna vua ni o iVakadinadina i Jiova, o lako tiko mo lai vunau.” A muria o tagane na ka e tukuna o watina rau mani biubiu kina mai na vanua ni yadra. Ena siga tarava, rau rogoca ena retio ni tukuna vei ira na nona sotia na peresitedi mera vaqara eso na dauveivakamatei era tukuna tiko nira daukaulotu! A bulati ni rau sega ni tukuna na veiwatini ni rau daukaulotu rau sega ni sotava kina na ka mosimosi. E mani kaya o Brother Morris ena itinitini ni nona ivakamacala: “Ni oni yaco ena vanua oni lesi kina, ni sakitaka na ka kece sa vakarau cakava o Jiova ni vakayagataki kemuni moni lagiti koya me tawamudu.”

“O na Vakayacora na Nomu iLesilesi?”

O Geoffrey Jackson e dua na lewe ni iLawalawa Dauvakatulewa a daukaulotu tu e liu, a vukei ira na gonevuli era vakarau tuvaitutu mera vakasamataka na taro e cake. A taroga, “Na cava na ibalebale ni daukaulotu?” E vakamacalataka ni vosa na “daukaulotu” e vu mai na dua na vosa vakaLatina e vakaibalebaletaki vua e dua se ilawalawa era lesi ena itavi lavotaki. Nida iVakadinadina i Jiova, e noda itavi meda vunautaka na itukutuku vinaka vei ira tale eso mera kilai Jiova ra veitokani voleka tale ga kei koya. Eda na vakatotomuri Jisu ena cakacaka qo ni kauaitaka vakabibi na nona ilesilesi e vuravura. E tukuna o Jisu vua na Kovana ni Roma o Ponitio Pailato: “Qo na vuna au sucu mai kina, qo tale ga na vuna au lako mai kina i vuravura meu tukuna na ka dina.”​—Joni 18:37.

A vukei ira na lewenikalasi o Brother Jackson mera vakasamataka na ka e tukuni ena iVolatabu me baleta na kena kabai o Jeriko. E ono na siga na nodra yadra vakamataka na tagane dauvala ni Isireli, ra dara na nodra isasabai, ra maji wavokiti Jeriko, oti era lesu tale ena nodra itikotiko. “Ena rai vakatamata, e ka vakalialia na ka era cakava qo ni sega ni kena ivakarau vei ira.” E tukuna nira rairai vakasamataka eso na sotia ni ‘sa rui vakalusi gauna.’ Ia ena ikavitu ni siga era vakaroti na Isireli mera wavokita vakavitu na siti, oti mera qai kaila vakadomoilevu. Na cava e yaco? E kasura na bai kei Jeriko!​—Josua 6:​13-15, 20.

E vakabibitaka ena itukutuku kei Jeriko o Brother Jackson e va na lesoni. (1) E bibi na talairawarawa. Meda cakava na ka e vinakata o Jiova, meda kua ni murilomada. (2) Meda vakabauti Jiova da nuitaki koya. “Ena vakabauta e bale kina na bai kei Jeriko,” e sega ni vakayagataki kina na itukinibai. (Iperiu 11:30) (3) Meda vosovoso. Ni toso na gauna ena ‘vakalougatataki kemuni’ o Jiova. (Vakarua 28:2) (4) Moni kua ni soro. Kua ni guilecava na nomuni ilesilesi. E tinia na nona ivakamacala o Brother Jackson ena nona kaya, “Ke oni vakasamataka tiko ga na va na lesoni qo, oni na vakayacora vinaka na nomuni ilesilesi me vakacerecerei qai vakalagilagi kina o Jiova.”

Eso Tale na Ka Talei ena Porokaramu

“Taleitaka na iVolatabu, Lomani Koya e Vakavuna na Kena Volai.” E vosa ena ulutaga qo o Maxwell Lloyd, e lewe ni Komiti ni Valenivolavola ni Tabana mai Merika. A tukuna vei ira na lewenikalasi, “Me bula na Vosa ni Kalou vei kemuni.” E uqeti ira na gonevuli: Me kua ni seavu na nomuni lomana na Kalou o Jiova. Moni kua ni nanuma nira kila kece na vakarorogo na ka oni vakatavulica. Saga moni vakarawarawataka na ivakavuvuli dina ena iVolatabu me uqeti ira na nomuni gonevuli. Moni yalomalumalumu. Kua ni vakaraitaka ni levu na ka oni kila. Moni ivakaraitaki ena nomuni veivakavulici. Mera raica na gonevuli ni oni taleitaka dina na iVolatabu.

“Raici Ira Vinaka Mada na Reveni.” E vosa ena ulutaga qo o Michael Burnett, e dua vei ira na qasenivuli e Kiliati a daukaulotu tu e liu. E tukuna ni so na gauna eda na nuiqawaqawa. Ia nanuma na ivakasala i Jisu: “Dou raici ira vinaka mada na reveni. Era sega ni kaburaka na sorenikau se tatamusuki, . . . ia e vakani ira na Kalou.” (Luke 12:24) Na reveni e okati ena Lawa ni veiyalayalati me manumanu tawasavasava, e sega ni dau laukana. Era manumanu lolovira tale ga. (Vunau ni Soro 11:​13, 15) Ia se vakani ira tiko ga o Jiova. “Koya gona ni oni nuiqawaqawataka e levu na ka ena veigauna mai muri,” e tukuna o Brother Burnett, nanuma “na reveni. Ke sa kauaitaka na Kalou e dua na manumanu tawasavasava se lolovira, sa na qai wacava sara na nona kauaitaki kemuni oni savasava e matana.”

“E Sega ni Dua na Noqu Cala.” O Mark Noumair e qasenivuli tale ga e Kiliati, a vukei ira na vakarorogo mera vakasamataka na vosa vakatautauvata i Jisu me baleti ira na dautatamusuki. Era cakacaka eso ena siga taucoko, eso tale era cakacaka me dua ga na aua. Ia e tautauvata ga na kedra isau! Era vosa kudrukudru eso era cakacaka ena siga taucoko. Ia e tukuna na turaga ni werenivaini vei ira qori: “E sega ni dua na noqu cala. Daru a sega beka ni veidinadinati me kemu isau e dua na dinari? Taura na kemu isau, lako.” (Maciu 20:​13, 14) Na cava eda vulica eke? Kua ni vakatauvatani iko kei ira tale eso. “O na yalolailai ke o kauaitaka vakalevu na ka era rawata eso tale, o sega ni rawata o iko” e kaya o Brother Noumair. “O rawa ni biuta kina na nomu ilesilesi kei na itavi dokai e lesi vei iko.” E vakadreti ira na lewe ni kalasi ni o Jisu e dusimaka tiko na tatamusuki vakayalo ena noda gauna, e lewa tale ga na ka e via cakava vei ira na nona imuri. Ke rau cakava o Jiova kei Jisu e levu na ka vei ira eso, e sega ni nodrau cala ya. Mo kauaitaka ga vakabibi na ka e soli vei iko, me kua ni vakaleqa na nomu cakacaka e lesia vei iko o Jiova na kedra “isau” eso tale.

iTalanoa kei na Veitarotarogi

Era dau tokona na cakacaka vakavunau ena ivavakoso ni iVakadinadina i Jiova era lewena na gonevuli e Kiliati nira sega ni kalasi se vakarautaka na nodra ka ni vuli. A vakataroga eso na gonevuli ena ka era sotava o Sam Roberson e qasenivuli e Kiliati. Kena ivakaraitaki o Sister Alessandra Kirchler a sotava e dua na marama e kauai vakalevu ena nona dauvakatavako o luvena. E lesuvi koya o Alessandra me solia vua e dua na Yadra! e vakamacalataka na ulutaga qo. A lala tu na vale, ia a biuta ga na ivola. Dua na siga a sotava tale na marama oya o Alessandra ena nona itikotiko, mani sureti koya sara i vale. A taleitaka na ka e wilika ena mekesini na marama oya, e kaya, “Au dau vakasamataka se cava e vinakata na Kalou meu vulica ena levu na leqa e vakavuna tiko meu sotava.” A vakaraitaka vakaivolatabu vua na marama oya o Alessandra ni sega ni vakavuna e dua na ka ca na Kalou. (Jemesa 1:13) Nikua, rau sa vuli iVolatabu tiko na veitinani.

E vakataroga e tolu eratou sa vuli oti e Kiliati o Melvin Jones, e veiqaravi tiko ena Tabana e Qarava na Cakacaka: o Jon Sommerud e veiqaravi tiko mai Albania; o Mark Anderson e veiqaravi tiko mai Kenya; kei James Hinderer e veiqaravi tiko ena tabana e qarava na vuli vakayalo (Theocratic Schools Department). Eratou kaya kece nira sega wale ga ni vakavulici na gonevuli e Kiliati ena yavu ni ivakavuvuli dina vakaivolatabu, ia era vakavulici tale ga mera vakayagataka na ivakavuvuli dina qori se mani vanua cava era veiqaravi kina se o cei era vakavulica.

Oti, e qai wilika e dua na gonevuli e dua na ivola vakaciriloloma ni vakavinavinaka era vola na lewenikalasi. E tinia na porokaramu ena masu o John Barr, sa yabaki 96, e qase duadua vei ratou na iLawalawa Dauvakatulewa, a kerei Jiova me vakalougatataka na nodra cakacaka na ika128 ni kalasi e Kiliati.

[Chart/Mape ena tabana e 31]

VEIKA ME BALETA NA KALASI

8 vanua era cavutu mai kina

54 gonevuli

27 veiwatini

35.2 ivakatautauvata ni yabaki

19.1 ivakatautauvata ni yabaki mai na gauna e papitaiso kina

13.8 ivakatautauvata ni yabaki ena cakacaka vakaitalatala vakatabakidua

[Mape]

(Raica tale na ivola)

Era lesi na lewenikalasi ina 25 na vanua e volai toka e ra:

NODRA ILESILESI NA DAUKAULOTU

ALBANIA

ARUBA

BOLIVIA

CAMBODIA

CÔTE D’IVOIRE

DOMINICAN REPUBLIC

ECUADOR

GHANA

GUATEMALA

GUINEA

GUYANA

HONDURAS

INDONESIA

KOSOVO

LATVIA

LIBERIA

MADAGASCAR

MONGOLIA

NAMIBIA

NICARAGUA

PARAGUAY

ROMANIA

RWANDA

SERBIA

TAIWAN

(ILESILESI E QARAVA NA VALENIVOLAVOLA NI TABANA E OSITERELIA)

E vakatasuasuataka tiko na gonevuli e Kiliati na ka a yaco ena cakacaka vakavunau

[iYaloyalo ena tabana e 31]

Nodra Tuvaitutu na Kalasi 128 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Keller, E.; Ostopowich, I.; Jacobsen, S.; Arias, M.; Dieckmann, Y.; Tanaka, J.; Harada, K.

(2) Camacho, L.; Kirchler, A.; Rodríguez, S.; Ward, B.; Trenalone, K.; Victoria, V.; Oxley, F.; Nguyen, K.

(3) Oxley, O.; De Dios, A.; Lindström, C.; Allen, J.; Meads, T.; Waddington, J.; Victoria, E.

(4) Harada, H.; Lindström, A.; Orsini, E.; Logue, D.; Missud, T.; Bergeron, S.; Camacho, G.; Ward, T.

(5) Kirchler, W.; Nguyen, H.; Kremer, E.; Burgaud, C.; Titmas, N.; De Dios, C.; Rodríguez, A.; Waddington, M.

(6) Dieckmann, J.; Allen, C.; Titmas, R.; Arias, J.; Bergeron, E.; Keller, J.; Ostopowich, F.; Burgaud, F.

(7) Tanaka, K.; Kremer, J.; Jacobsen, R.; Trenalone, J.; Logue, J.; Meads, D.; Missud, D.; Orsini, A.