Taro na Dauwiliwili

E ibalebale beka ni ivakaro ni Kalou ena Jeremaia 7:16 ni na sega ni masulaka na lotu Vakarisito e dua sa vakasivoi ena ivavakoso vakarisito ni sega ni veivutunitaka nona cala?

Ni tauca oti nona lewa ina matanitu tawayalodina o Juta, sa qai kaya o Jiova vei Jeremaia: “Ia ko iko, mo kakua ni masulaki ira na tamata oqo, mo kakua talega ni ia e na vukudra na tagi se na masu, mo kakua talega ni ia na veimasulaki vei au: ni’u na sega ni rogoci iko.”​—Jeremaia 7:16.

Na cava e tarovi Jeremaia kina o Jiova me masulaki ira na Isireli? Era beca na Lawa. Era sega ni vunia se maduataka nodra “butako . . . ka laba, ka ia na veibutakoci, ka bubului vakailasu, ka vakama na ka boi vinaka vei Peali, ka muria na kalou tani.” E mani kaya o Jiova vei ira na Jiu tawavakabauta: “Ka’u na biuti kemudou tani talega e mataqu, me vaka ka’u a biuti ira tani na kai nomudou, io na kawa kecega i Ifireimi.” Sa macala ni na sega ni dodonu vei Jeremaia se dua tale me kerei Jiova me veisautaka nona lewa.​—Jeremaia 7:9, 15.

Salavata kei na tikina oqo, e vola na yapositolo o Joni na ivalavala dina ni masu vua na Kalou. Kena imatai, e vakadeitaka vei ira na lotu Vakarisito: “Kevaka eda sa kerea e dua na ka me vaka na lomana, sa rogoci keda ko koya.” (1 Joni 5:14) Ia, nida masulaka tale e dua, e tomana o Joni: “Kevaka e dua na tamata sa raica na wekana ni sa ia nai valavala ca sa sega ni yaco kina na mate, ena masulaka, ia na Kalou ena solia vua na bula me nodra era sa sega ni ia nai valavala ca sa yaco kina na mate. Sa tu nai valavala ca sa yaco kina na mate; au sa sega ni kaya me masu e na vuku ni ka ko ya.” (1 Joni 5:16) E kaya tale ga o Jisu na ivalavala ca ena “sega ga ni bokoci rawa,” ena noda valavala ca ina yalo tabu.​—Maciu 12:31, 32, VV.

Kena ibalebale beka oqo ni o ira kece era vakasivoi mai na ivavakoso vakarisito nira sega ni veivutunitaka nodra cala, era okati ena ivalavala ca e “yaco kina na mate” qai sega ni dodonu mera masulaki? Kena irairai ni na sega, ni so na cala e sega ni ivalavala ca e yaco kina na mate. E dredre me kilai vakamatata. Kena ivakaraitaki vinaka o Tui Manasa e Juta. E tara na icabocabonisoro vei ira na kalou lasu, cabori iratou na luvena, e vakatevoro, qai vakadaberi ira na matakau ceuceu ena valenisoro i Jiova. E kaya na iVolatabu ni cakava o Manasa kei ira na tamata na “ka ca e levu, ka lailai na ka ca era a cakava na veimatanitu ka vakarusa ko Jiova e matadra na Isireli.” Ena ka kece oqo, e totogitaki Manasa kina o Jiova ni vesu ena sinucodo qai kau vakavesu i Papiloni.​—2 Tui 21:1-9; 2 Veigauna 33:1-11.

E dina ni rui torosobu na ivalavala ca i Manasa, ia vakacava e cakava na cala e yaco kina na mate? Kena irairai ni sega, ni tomana na kena ivakamacala: “Ia ni sa rarawa ko koya, sa vakamasuti Jiova na nona Kalou, ka vakamalumalumutaki koya vakalevu e na mata ni nodra Kalou na nona qase. Ka sa masu kivei koya: ka sa yalovinaka vua ko koya, ka rogoca na nona vakamamasu, ka kauti koya tale ki Jerusalemi ki na nona matanitu. Sa qai kila ko Manasa ni sa Kalou ko Jiova.”​—2 Veigauna 33:12, 13.

Me kua gona ni lai totolo sara noda vakatulewataka ni dua e vakasivoi mai ena ivavakoso, sa wili me cakava na cala e yaco kina na mate. Ena rairai taura toka na gauna me qai laurai na ka e tiko e lomana. Oya na vuna e dau tukuni kina ni dua na inaki ni veivakasivoi, me kilai yalona tale o koya e cala, me veivutuni qai saumaki mai.

Ni sa sega ni lewe ni ivavakoso, o ira ga era veivolekati me vakataki watina se nona lewenivuvale era na kila na ivakarau ni lomana kei na nona rai. Era na rairai vakadeitaka ena nona ivalavala ni sega ni cakava na cala e yaco kina na mate. Era na rairai masulaka me vakaukauataki koya na Vosa uqeti ni Kalou qai dikevi koya o Jiova me salavata kei na lomana.​—Same 44:21; Dauvunau 12:14.

E so era na rairai raica na ivakadinadina era kila kina ni sa veivutuni o koya e cala, ia ena sega beka ni raica oqo na ivavakoso. Era na lomatarotaro, leqa na lomadra, se tarabe sara ke ra rogoca ni masulaki tu e matanalevu o koya e vakasivoi. Oya na vuna era na dui masulaki koya kina e cala o ira era via masulaki koya, ra qai biuta na vo ni itavi e ligadra na qase ni ivavakoso.

[iYaloyalo ena tabana e 31]

E vosoti na ivalavala ca torosobu i Manasa ni yalomalumalumu vei Jiova

[iTaba ni Credit Line ena tabana e 30]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s