Mo Vinakata na iValavala Dodonu ena Lomamu Taucoko

“Kemuni sa vinakata nai valavala dodonu.”—SAME 45:7.

1. Eda na muria vakacava “na sala dodonu”?

E VAKAYAGATAKA o Jiova na nona Vosa kei na yalona tabu me dusimaki ira kina na nona dauveiqaravi ena “sala dodonu.” (Same 23:3) Ia nida ivalavala ca, eda rawa ni gole tani mai na sala qori. E gadrevi na sasaga vagumatua me rawa nida caka dodonu tale. Eda na cakava rawa vakacava qori? Me vakataki Jisu ga, meda vinakata na caka dodonu.—Wilika Same 45:7.

2. Na cava “na sala dodonu”?

² Na cava “na sala dodonu”? Na sala e dua na vanua e dau muri, e qiqo se rabalailai. Na “sala” e tukuni ena Same e yavutaki ena ivakatagedegede dodonu i Jiova. Ena vosa vakaIperiu kei na vosa vaKirisi, na “ivalavala dodonu” e dusia na ka e “dodonu,” kena ibalebale me muri vinaka sara na ivakavuvuli dodonu. Ni “tikotiko ni lewa dodonu” o Jiova, era marau kina na nona dauveiqaravi mera nuitaki koya me lewa na sala dodonu mera muria.—Jere. 50:7.

3. Eda na kila vakacava e levu na ka me baleta na yalododonu ni Kalou?

³ Eda na vakamarautaki Jiova ga vakalevu ke da saga ena lomada taucoko meda muria na nona ivakatagedegede dodonu. (Vkru. 32:4) E tekivu qori ena noda vulica ena iVolatabu na veika me baleti Jiova ena kena levu ga e rawa. Na levu ga ni noda vulica na veika me baleti koya da qai toro voleka vua e veisiga, na levu tale ga ni noda vinakata na ivalavala dodonu. (Jeme. 4:8) E bibi tale ga meda muria na veidusimaki ni Vosa uqeti ni Kalou nida vakatulewataka eso na ka bibi ena noda bula.

Vakaliuca na Nona Yalododonu na Kalou

4. Na cava e okati ena noda vakaliuca na nona yalododonu na Kalou?

⁴ Wilika Maciu 6:33. Na noda vakaliuca na nona yalododonu na Kalou e sega ni okati ga kina na noda vunautaka na itukutuku vinaka ni nona Matanitu. Me vakadonuya o Jiova na noda veiqaravi tabu, e bibi me salavata kei na nona ivakatagedegede cecere na noda ivalavala e veisiga. Na cava meda cakava kece na vakaliuca tiko na yalododonu i Jiova? Meda “tokara na tamata vou e buli me salavata kei na loma ni Kalou e vauci kina na yalodina kei na yalododonu.”—Efeso 4:24.

5. Eda na valuta vakacava na yalolailai?

⁵ Nida saga tiko meda muria na ivakatagedegede dodonu ni Kalou, ena rawa ni vakayalolailaitaki keda ena so na gauna na noda malumalumu. Na cava eda rawa ni cakava ke vakamalumalumutaki keda na yalolailai? Eda rawa vakacava ni vinakata na ivalavala dodonu, da caka dodonu tale ga? (Vkai. 24:10) Meda masuti Jiova wasoma “ena lomada dina kei na vakabauta e dei.” (Iper. 10:19-22) Se mani noda inuinui na bula e lomalagi se vuravura, eda vakabauta na isoro ni veivoli i Jisu Karisito kei na nona itavi me noda Bete Levu. (Roma 5:8; Iper. 4:14-16) A vola na yapositolo o Joni: “E vakasavasavataki keda mai na noda ivalavala ca kece na dra i Jisu.” (1 Joni 1:6, 7) E tukuna na iVolatabu: “Ke sa vaka na ka kulakula na nomudoui valavala ca, sa na vulavula me vaka na uca-vulavula.” E talei dina na nona soli Luvena lomani o Jiova me mate vakaisoro me keda ivoli!—Aisea 1:18.

Dikeva na Nomu iYaragi Vakayalo

6. Na cava e bibi kina meda dau dikeva na noda iyaragi vakayalo?

⁶ Meda tokara e veigauna na ‘isasabai ni sereda na yalododonu,’ qori e dua na iyaragi vakayalo ni Kalou e bibi me tokari. (Efeso 6:11, 14) Se mani sagavulu na yabaki na noda veiqaravi tabu se da qai yalataki keda ga qo vei Jiova, e bibi meda dikeva tiko ga e veisiga na noda iyaragi vakayalo. Na cava na vuna? Sa kolotaki sobu mai vuravura na Tevoro kei ira na nona timoni. (Vkta. 12:7-12) E cudru o Setani, e kila ni sa lekaleka na nona gauna. Qori na vuna e sa qai kaukaua ga kina na nona saqati keda. E bibi gona meda tokara na ‘isasabai ni sereda na yalododonu.’

7. Me uqeti keda vakacava na noda kila ni bibi meda tokara na ‘isasabai ni sereda na yalododonu’?

⁷ Na isasabai ni sereda e taqomaka na uto, na ivalavala dodonu tale ga e taqomaka na lomada. E dau veivakaisini na lomada qai dredre ni vinaka nida ivalavala ca. (Jere. 17:9) E dau ca na ka e malele kina na lomada, e bibi gona meda vakavulica da qai lewa vinaka. (Vkte. 8:21) Ke da kila ni bibi meda tokara na ‘isasabai ni sereda na yalododonu,’ eda na sega mada ga ni via luvata vakalekaleka ena noda digia na ka ni veivakamarautaki e cata na Kalou; eda na sega tale ga ni tatadrataka meda cakava na ka ca. Eda na sega ni vakalusi gauna ena sara tivi. Ia eda na saga tiko ga meda cakava na ka e vakamarautaki Jiova. Ke da bale mada ga ena dua na gauna nida rawai ena vakasama vakayago e tawadodonu, ena vukei keda o Jiova meda tucake tale.—Wilika Vosa Vakaibalebale 24:16.

8. Na cava e bibi kina “na isasabai levu ni vakabauta”?

⁸ E dua tale na noda iyaragi vakayalo “na isasabai levu ni vakabauta.” Eda na rawa ni “bokoca kina na gasau waqa kece i koya na Vunica.” (Efeso 6:16) Na vakabauta kei na noda lomani Jiova ena lomada taucoko ena uqeti keda meda cakava na ka e dodonu da qai muria tiko ga na sala ina bula tawamudu. Na levu ga ni noda vulica meda lomani Jiova, na levu tale ga ni noda vakamareqeta na nona yalododonu. Ia vakacava na noda lewaeloma? E yaga vakacava qori ena noda sasaga meda vinakata na ivalavala dodonu?

Me Savasava Tiko ga na Lewaeloma

9. E yaga vakacava na lewaeloma e savasava tiko ga?

⁹ Ena gauna eda papitaiso kina, eda kerea vei Jiova me “savasava na noda lewaeloma.” (1 Pita 3:21) Nida vakabauta na ivoli, e vosoti kina na noda ivalavala ca ena dra i Jisu da qai veiwekani vinaka kei na Kalou. Ia me vakadonui keda tiko ga o Jiova, e bibi me savasava tiko ga na noda lewaeloma. Meda vakavinavinaka ke veibeitaki se veivakasalataki ena so na gauna na noda lewaeloma, ni vakaraitaka qori ni cakacaka vinaka tiko. Ke cakacaka tiko na nomu lewaeloma, kena ibalebale e se sega ni tavuni me vakalecalecava na sala dodonu i Jiova. (1 Tim. 4:2) Ia e dua tale na sala e yaga kina na lewaeloma vei keda na vinakata na ivalavala dodonu.

10, 11. (a) Tukuna e dua na irogo e vakaraitaki kina na vuna meda kauaitaka na ka e tukuna na noda lewaeloma e vakavulici ena iVolatabu. (b) Na cava ena vakavu marau vakalevu kina na noda vinakata na ivalavala dodonu?

¹⁰ E dau ca na noda lewaeloma se vakararawataki keda nida cakava e dua na cala. E dua na itabagone a gole tani mai “na sala dodonu.” A dau sarava vakalevu na iyaloyalo ca, sa tekivu kana mariwana tale ga. E dau ora na lomana ni tiko ena soqoni qai vaka e dua na dauveivakaisini ni gole ena cakacaka vakavunau, mani muduka na nona cakava na itavi vaKarisito. A tukuna: “Ia au sega ni liaca ni na beitaki au na noqu lewaeloma ena ka au cakava.” E tomana: “E rauta ni va na yabaki na noqu lakosese tu.” A qai nanuma me lesu tale vei Jiova. A nanuma ni na sega ni rogoci koya o Jiova, ia a masu ga qai kere veivosoti. Ni oti ga e vica na miniti, a sikovi koya yani o tinana qai uqeti koya me lai soqoni tale. A gole ena Kingdom Hall, a kerea e dua na qase ni ivavakoso me rau vuli. A papitaiso ni toso na gauna, qai vakavinavinaka vei Jiova ni vakabulai koya.

¹¹ Eda sa rairai vakadinadinataka ni vakavu marau vakalevu na noda cakava na ka e dodonu. Nida vulica tiko meda vinakata na ivalavala dodonu da qai caka dodonu, eda na qai marau ga vakalevu nida cakava na ka e vakamarautaka na Tamada vakalomalagi. Vakasamataka mada! Sa voleka na gauna meda sa na uasivi kina da qai ucuya vinaka na Kalou, sa na vinaka vakaoti gona na noda lewaeloma. Meda saga sara ga qo meda vinakata na ivalavala dodonu ena lomada taucoko da qai vakamarautaki Jiova.—Vkai. 23:15, 16.

12, 13. Eda na vakavulica vakacava na noda lewaeloma?

¹² Na cava meda cakava me vakavulici kina na noda lewaeloma? Nida vulica tiko na iVolatabu kei na ivola vakaivolatabu, e bibi meda nanuma tiko: “A lomana na yalododonu sa daunanuma na ka me kaya.” (Vkai. 15:28) Raica mada na sala ena yaga kina qori ni vinakati meda vakatulewa me baleta na cakacaka. Ke sa matata ga vakasigalevu ni veisaqasaqa kei na ivakatagedegede vakaivolatabu e dua na cakacaka, e levu ena totolo ga na nodra muria na veidusimaki ni dauveiqaravi yalodina e vuku. Ia ke sega ni matata, me vaqarai na ivakavuvuli vakaivolatabu e vauca na ituvaki qori, me vakasamataki qai masulaki.a E okati tale ga e keri na ivakavuvuli me baleta na noda sega ni cakava na ka ena vakaleqa na nodra lewaeloma eso tale. (1 Kor. 10:31-33) E bibi sara meda kauaitaka na ivakavuvuli e vauca na noda veiwekani kei na Kalou. Ke da vakabauta ni bula dina tiko o Jiova, eda na taroga, ‘Ena vakararawataki Jiova se vakacudrui koya na cakacaka qo?’—Same 78:40, 41.

¹³ Nida vakavakarau ena Vuli Vale ni Vakatawa se Vuli iVolatabu ni iVavakoso, meda nanuma tiko ni bibi meda vakasamataka vakatitobu na veika e talaucaki kina. E dau totolo beka ga na noda makataka na isaunitaro da toso sara ena parakaravu tarava? Na iwalewale va qori ena rairai sega ni vakalevutaka na noda vinakata na ivalavala dodonu, ena sega ni cakacaka vinaka tale ga kina na noda lewaeloma. E bibi meda vulica vagumatua na Vosa ni Kalou da qai vakasamataka vakatitobu na ka eda wilika kina me rawa nida vinakata na ivalavala dodonu. E vinakati na sasaga meda qai vinakata kina na ivalavala dodonu ena lomada taucoko!

Via Kania, Via Gunuva na iValavala Dodonu

14. Na cava erau vinakata na Kalou o Jiova kei Jisu Karisito meda vakila ena noda veiqaravi tabu?

¹⁴ Erau vinakata na Kalou o Jiova kei Jisu Karisito meda marautaka na noda veiqaravi tabu. Ena rawa vakacava nida marau? Io, na noda vinakata na ivalavala dodonu! A tukuna o Jisu ena iVunau ena Ulunivanua: “Era marau o ira era via kania era via gunuva na ivalavala dodonu, nira na vakamamautaki.” (Maciu 5:6) E bibi vakacava na vosa qori vei keda na vinakata na ivalavala dodonu?

15, 16. Era na vakamamautaki vakacava o ira na waloloi qai karamaca tu vakayalo?

¹⁵ E liutaka tiko na vuravura eda bula tu kina qo na vunica. (1 Joni 5:19) Se mani yasa i vuravura cava eda wilika kina na niusiveva, eda na raica kina ni veivakalolomataki kei na ivalavala voravora e sa tu ena dua na ivakatagedegede a se sega ni bau yaco e liu. Ena rarawataka o koya e yalododonu na veivakalolomataki e yaco tu nikua. (Dauv. 8:9) Eda kila na lomani Jiova ni o koya ga ena vakamamautaki ira era waloloi ra qai karamaca tu vakayalo, era via vulica na ivalavala dodonu. Era sa voleka ni vakarusai o ira na sega ni doka na Kalou, o ira na vinakata na ivalavala dodonu era na sega ni vakila tale na rarawa era vakavuna o ira na murilomadra kei na nodra ivakarau ca. (2 Pita 2:7, 8) E veivakacegui dina oya!

¹⁶ Nida dauveiqaravi i Jiova da qai imuri i Jisu Karisito, eda kila nira na “vakamamautaki” o ira na via kania ra qai via gunuva na ivalavala dodonu. Era na qai vakamamautaki ena lomalagi kei na vuravura vou e vakarautaka na Kalou mera “tiko kina na yalododonu.” (2 Pita 3:13) Meda kua gona ni yalolailai se kurabui ni sa kauta tani na ivalavala dodonu na veivakalolomataki kei na itovo voravora ena vuravura e lewa tu qo o Setani. (Dauv. 5:8) O Jiova, e Cecere duadua, e kila na veika e yaco tiko, sa vakarau vakabulai ira na vinakata na ivalavala dodonu.

Yaga na Nomu Vinakata na iValavala Dodonu

17. E yaga vakacava na noda vinakata na ivalavala dodonu?

¹⁷ E vakabibitaki ena Same 146:8 e dua na ka e vakasakiti kina na kena muri na sala dodonu. A lagata na daunisame: “Sa lomani ira na yalododonu ko Jiova.” Vakasamataka mada oya! E lomani keda na iliuliu Cecere ni lomalagi kei vuravura nida vinakata na ivalavala dodonu! Ni lomani keda o Jiova, eda nuidei ni na vakarautaka na veika vakayago meda bula kina ke da vakaliuca ena noda bula na Matanitu ni Kalou. (Wilika Same 37:25; Vosa Vakaibalebale 10:3.) Era na tawana na vuravura o ira era vinakata na ivalavala dodonu. (Vkai. 13:22) Era na vakaicovitaki ena bula tawamudu ena parataisi e vuravura e levu na dauveiqaravi ni Kalou era dau caka dodonu qai sega ni tukuni rawa na marau era na vakila. Ena gauna mada ga qo, o ira na vinakata na ivalavala dodonu ni Kalou era vakalougatataki tiko ena lomavakacegu e vakaduavatataki ira vakavuvale, vakaivavakoso tale ga.—Fpai. 4:6, 7.

18. Na cava meda cakava nida waraka tiko na siga i Jiova?

¹⁸ Nida waraka tiko na siga levu i Jiova, meda vakaliuca tiko ga na nona yalododonu. (Sefa. 2:2, 3) Koya gona, meda vakaraitaka nida taleitaka dina na sala dodonu ni Kalou o Jiova. Qori e okati kina na noda tokara vinaka sara na ‘isasabai ni sereda na yalododonu’ me taqomaka na lomada. E bibi tale ga me savasava tiko ga na noda lewaeloma—me vakamarautaki keda, me marau tale ga kina na Kalou.—Vkai. 27:11.

19. Na cava meda vakadeitaka meda cakava, na cava ena veivosakitaki ena ulutaga tarava?

¹⁹ E “veiraiyaki na mata i Jiova e vuravura taucoko, me totaki ira vakaidina sa dodonu na lomadra vua.” (2 Vei. 16:9) E veivakacegui dina qori nida cakava na ka e dodonu, vakabibi ni veilecayaki tiko ga na bula, e levu tiko ga na itovo voravora kei na veika ca e vuravura! E macala ga nira na rairai kurabuitaka na noda ivalavala dodonu e levu era yawaka na Kalou. Ia ena yaga ga vei keda na noda saga meda yalododonu me vakataki Jiova. (Aisea 48:17; 1 Pita 4:4) Meda vakadeitaka mada ga meda vinakata tiko ga na ivalavala dodonu ena lomada taucoko da qai caka dodonu, ni na vakamarautaki keda qori. Ia na noda yalodina e okati tale ga kina na noda cata na ivalavala e beci kina na lawa. Ena veivosakitaki ena ulutaga tarava na kena ibalebale qori.

[iVakamacala e ra]

O na Sauma Vakacava?

• Na cava e bibi kina meda kila na yaga ni ivoli meda qai vinakata na ivalavala dodonu?

• Na cava e bibi kina meda tokara na ‘isasabai ni sereda na yalododonu’?

• Eda rawa vakacava ni vakavulica na noda lewaeloma?

[iYaloyalo ena tabana e 26]

Ena yaga na lewaeloma e vakavulici nida vakatulewa me baleta na cakacaka