Parofisai 6. Cakacaka Vakavunau e Vuravura

“Ena vunautaki mada na itukutuku vinaka ni matanitu ni Kalou ena veiyasa i vuravura.”—MACIU 24:14.

● E vakaitikotiko o Vaiatea ena dua na yanuyanu ribayawa ena Pasifika, ena yatuyanuyanu o Tuamotu. E rauta ni 80 na kena yanuyanu lalai lolovira qai laselase e robota e sivia na 802,900 na kilomita vakarivirivi na waitui, qai rauta ni 16,000 na lewenivanua. Ia sa sotavi ira na iVakadinadina i Jiova o Vaiatea kei na so tale ena yanuyanu e tiko kina. Na cava na vuna? Baleta era vinakata na iVakadinadina mera rogoca na tamata kece na itukutuku vinaka ni Matanitu ni Kalou se mani vanua cava era tiko kina.

KA E YACO DINA. Sa vunautaki tiko e veiyasa i vuravura na itukutuku me baleta na Matanitu ni Kalou. Ena yabaki 2010 wale ga, e sivia na 1.6 na bilioni na aua era vunautaka kina na iVakadinadina i Jiova na itukutuku vinaka ena 236 na vanua. Ena kena ivakatautauvata, e rauta ni 30 na miniti era vunau kina e veisiga na iVakadinadina kece. Ena tini na yabaki sa oti, e tabaki ra qai veisoliyaka e sivia na 20 na bilioni na ivola ni veivakavulici ena iVolatabu.

KA ERA TUKUNA E LEVU. Sa vunautaki voli mai me vica na udolu na yabaki na itukutuku ena iVolatabu.

E DINA OYA? Era sa vunautaka dina e levu na itukutuku ena iVolatabu. Ia e levu vei ira qori e vakalekaleka ga na nodra vunau qai kovuti ga kina e dua na vanua lailai. Ena yasana adua, e tuvanaki matau na nodra cakacaka vakavunau e vuravura na iVakadinadina i Jiova ra qai rogoca kina na itukutuku vinaka e vica vata na drau na milioni. Era veitusaqati eso na matanitu rogo ena itukutuku ni kawatamata kei na isoqosoqo era kilai nira dau veivakalolomataki, ia era sega ni soro na iVakadinadina ra qai vunau tiko ga.a (Marika 13:13) Era sega ni saumi na iVakadinadina i Jiova mera vunau. Ia era solia wale na nodra gauna, e sega ni saumi tale ga na ivola era veisoliyaka. Na nodra cakacaka e tokoni sara ga ena cau.

CAVA MADA O NANUMA? Sa vunautaki tiko beka e veiyasa i vuravura na “itukutuku vinaka ni matanitu ni Kalou”? E dusia beka na vakayacori ni parofisai qori ni sa tu qo e matada e dua na gauna totoka?

[iVakamacala e ra]

[Tikina bibi ena tabana e 9]

“Ke se vakatara tiko o Jiova, keimami na gumatua tiko ga na vunautaka na itukutuku vinaka ni Matanitu ni Kalou, qai vakayagataki na iwalewale cava ga e rawa mera rogoca kina na lewenivanua.”—2010 YEARBOOK OF JEHOVAH’S WITNESSES.