O Marautaka Dina na Vosa ni Kalou?

“NIU tekivu wilika wasoma na iVolatabu au raica me ka ni oca qai sega ni taleitaki,” e kaya o Lorraine. “E dredre meu kila na ka e volai tu kina, e levu na gauna e dau veiciriyaki tu na noqu vakasama.”

Era vakadinata tale ga eso ni vakavucesa na imatai ni gauna era wili iVolatabu kina. Ia era tomana tiko ga nira kila ni dodonu ga mera cakava qori. E tukuna o Marc: “E dau rawarawa me vakawelei keda eso na ka ena gauna ni wili iVolatabu se na noda vuli vakataki keda. E vinakati meu masu wasoma kei na sasaga meu raica kina vakabibi na noqu ituvatuva ni wili iVolatabu e veisiga.”

Na cava mo cakava mo raica kina vakabibi na Vosa volai ni Kalou, na iVolatabu? O na marautaka vakacava na kena wiliki? Dikeva mada e vica na vakatutu qo.

Na iNaki kei na Sala me Caka Kina

Me tekivu ena masu na nomu wili iVolatabu, mo kua ni vakasamataka tale e dua na ka. Kerei Jiova me vukei iko mo guta na vulici ni nona Vosa. Kerea vua me dolava na nomu vakasama kei na lomamu mo kila vinaka kina na ka o wilika tiko. (Same 119:34) Ke da sega ni cakava qo, ena caka tu ga me rawa na vuli iVolatabu, o na sega tale ga ni via tomana. E kaya o Lynn: “Ena so na gauna au wiliwili tu ga vakatotolo qai sega niu raica rawa eso na tikina bibi. Levu na gauna au sega ni dau taura vinaka na ka e tukuni tiko. Ia au dau masulaka meu lewai au vinaka, e dau vukei au qo me kua ni dau veiciriyaki na noqu vakasama.”

Vakamareqeta na ka o vulica. Nanuma tiko na nomu kila kei na nomu muria na ka dina vakaivolatabu o na rawata kina na bula. O koya gona, saga mo raica eso na tikina bibi mo qai muria sara. E kaya o Chris: “Au dau vakadikeva eso na tikina meu vakavinakataka kina na noqu itovo kei na ka au via cakava. E dau veivakabulabulataki dina niu raica ni tiko ena iVolatabu kei na levu tale na noda ivola na itukutuku ena yaga vakalevu vei au, dina niu sega ni sotavi ira mada ga era vola.”

Tekia na isausau o na rawa ni sauva. Tovolea mo vulica eso na ka vou me baleti ira na talanoataki tu ena iVolatabu. O na kunea e vuqa na kedra itukutuku dina e vakatubuqoroqoro ena nomu raica na Insight on the Scriptures se na Watch Tower Publications Index. Ni toso tiko na nomu kilai ira na tagane kei na yalewa era talanoataki tu ena iVolatabu me vaka era bula dina tiko, qo ena uqeti iko sara ga.

Raica eso na iwalewale vou ena kena veivosakitaki na iVolatabu. (Caka. 17:2, 3) Qo sara ga na nona isausau o Sophia. E tukuna kina: “E noqu isausau meu vulica qai kila eso na ivakamacala vovou meu vakayagataka ena cakacaka vakavunau kei na so tale na gauna, meu tukuna kina vakamatata na ka dina vakaivolatabu. Na Vale ni Vakatawa e dua na ivukevuke yaga duadua meda cakava vinaka kina qori.”—2 Tim. 2:15.

Raitayaloyalotaka na ka o wilika. E tukuna na Iperiu 4:12: “E bula na vosa ni Kalou.” Ni o wilika tiko na iVolatabu, me dina vei iko na itukutuku ni Kalou ena nomu vakasamataka na ka era raica o ira na talanoataki tiko ena iVolatabu. Tovolea mo rogoca sara ga na ka era rogoca, qai vakila na ka era vakila. Veidutaitaka na ka era sotava kei na ituvaki sara ga o sotava tiko. Vulica tale ga na ka ra qai cakava ena ituvaki qori. Qo ena vakalevutaka na nomu kilaka, ena kasa tale ga vei iko na itukutuku ena iVolatabu.

Mo vakayagataka e levu na gauna ena tikinivolatabu e dredre kei na kedra ivakamacala, me matata sara vei iko. Vakayagataka vinaka na nomu gauna kece ni vuli. Mo vakadidike tale ke o lomatarotarotaka eso na ka o wilika. Vaqara eso na vosa e vou vei iko, raica na ivakamacala e ra, qai raica tale ga na idusidusi (reference) ena iVolatabu. Na levu ga ni nomu kila o qai vakayagataka na ka o wilika, o na marautaka tale ga vakalevu na Vosa volai ni Kalou. O na rawa ni tukuna kina na vosa vata ga e cavuta na daunisame: “Au sa taura na nomuni tukutuku [Jiova] me noqui votavota ka sega ni mudu: ni ra sa ka ni reki ki na lomaqu.”—Same 119:111.

Kua ni vuli ga vakatotolo. Mo lewa vinaka na levu ni gauna o vakayagataka ena nomu ituvatuva ni vuli vakataki iko. Me veiraurau vinaka qo kei na gauna o vakayagataka ena vakavakarau ena soqoni vakaivavakoso. E tukuna o Raquel: “Levu na gauna au dau wawale qai sega ni dau vakasama vinaka. Koya gona au raica ni yaga meu dau vuli ga vakalekaleka. Na noqu cakava qo au vakila ni yaga vakalevu na noqu vuli.” E vakadinata o Chris: “Niu dau raica ga vakatotolo na ka au vulica tiko, e sega ni vinaka na noqu lewaeloma ni sega soti ni levu na ka au katona. E sega ni tara na lomaqu na ka au vulica tiko.” Mo kua gona ni vakatotolotaka na ka o vulica tiko.

Mo vinakata tiko ga na Vosa ni Kalou. E tukuna na yapositolo o Pita: “Me vaka na gone dramidrami, moni saga moni vinakata na wainisucu dina e tiko ena vosa ni Kalou, ni oni na tubu kina moni rawata na bula.” (1 Pita 2:2) E sega ni dua na ka ena uqeti ira na gone dramidrami mera vinakata na wainisucu. Baleta ni sa kena ivakarau ga vei ira na gone mera gunu wainisucu. Ia e tukuna na iVolatabu meda vinakata tiko ga na Vosa ni Kalou. Ke o wilika mada ga e veisiga e dua na tabana, ena yaco ga na gauna o na vinakata mo wilika tiko ga kina. Ena imatai ni gauna ena rairai dredre na nomu wiliwili, lakolako ga o sa na marautaka.

Vakasamataka vakabibi na tikinivolatabu o wilika. Ena yaga vakalevu na nomu wiliwili ke o dau vakasamataka vakabibi na ka o wilika. Qo ena vukei iko mo sema eso na ulutaga vakaivolatabu o sa vaqaqa oti mai. Ni toso na gauna sa na levu tiko ga na nomu kilaka vakayalo—qo e dua na ka totoka dina meda rawata.—Same 19:14; Vkai. 3:3.

Vakayagataki Vinaka ni Gauna

E ka ni sasaga toka meda dei ena noda ituvatuva, ia e sega ni katumi rawa na kena veivakalougatataki. Ena torocake kina na nomu kila na iVolatabu. (Iper. 5:12-14) Na nomu yalomatua kei na vuku o rawata ena vakavu marau, o na yalovinaka qai dau lomavakacegu. Na vuku e kunei ena Vosa volai ni Kalou e “kau ni bula” vei ira na saga mera kila ra qai vakayagataka.—Vkai. 3:13-18.

Na nomu vulica vakatitobu na Vosa ni Kalou ena vakavuna mo yalomatua kina. (Vkai. 15:14) Qori ena vukei iko me vu mai lomamu na nomu veivakasalataki e yavutaki dei ena iVolatabu. Ke yavutaki na nomu vakatulewa ena ka o wilika ena iVolatabu kei na ivola e tabaka “na dauveiqaravi e yalodina e vuku,” o na vakila ni veivakabulabulataki qai vakataudeitaki iko tiko na Vosa volai i Jiova. (Maciu 24:45) Ena donu tiko ga na nomu rai, o na nuidei qai yavutaki ena Vosa ni Kalou na ka o vakasamataka, na ka o cakava kei na ka o tukuna. Qai kuria qori ni na rawa vinaka na ka kece e baleta na nomu veiwekani kei na Kalou.—Same 1:2, 3.

Na noda lomana na Kalou ena lomada taucoko ena uqeti keda meda tukuna yani na noda vakabauta. Eda na vakalougatataki tale ga kina. E saga vakaukaua o Sophia me dau nanuma qai vakayagataka eso na tikinivolatabu mera vakarorogo kina na itaukeinivale, me laulau kina na nona cakacaka vakavunau, me marautaka tale ga. E kaya: “E vakavu marau dina ni uqeti ira na tamata na itukutuku ena iVolatabu.”

Ia e yaga duadua ena noda vinakata na Vosa ni Kalou na noda veiwekani voleka kei Jiova. Na noda vulica na iVolatabu eda kila kina na nona ivakatagedegede, da qai marautaka na nona loloma, na nona lomasoli kei na nona lewadodonu. E sega tale ni dua na sasaga e yaga qai veivakalougatataki. Vulica vagumatua na Vosa ni Kalou. Ni o cakava qori e sa vakayagataki vinaka tiko kina na gauna.—Same 19:7-11.

[Kato/iYaloyalo ena tabana e 5]

WILIKA NA VOSA NI KALOU: NA INAKI KEI NA SALA ME CAKA KINA

▪ Me tekivu ena masu na nomu wili iVolatabu, mo kua ni vakasamataka tale e dua na ka.

▪ Vakamareqeta na ka o vulica.

▪ Tekia na isausau o na rawa ni sauva.

▪ Raica eso na iwalewale vou ena kena veivosakitaki na iVolatabu.

▪ Raitayaloyalotaka na ka o wilika.

▪ Mo vakayagataka e levu na gauna ena tikinivolatabu e dredre kei na kedra ivakamacala, me matata sara vei iko.

▪ Kua ni vuli ga vakatotolo.

▪ Mo vinakata tiko ga na Vosa ni Kalou.

▪ Vakasamataka vakabibi na tikinivolatabu o wilika.

[iYaloyalo ena tabana e 4]

Mo biuti iko sara ga ena ituvaki o wilika tiko ena iVolatabu