Vakavulica na Luvemu
Vuna e Lomani Kina o Tokasa
EDA vinakata kece meda lomani. E va tale ga qori na nomu rai?—a E vakamacalataki ena iVolatabu o Tokasa, e dua na marama era dau lomana e levu.
E vakaitikotiko o Tokasa e Jopa, e dua na siti volekata na Wasa na Mediterranean. O Jerusalemi e tiko e lomanivanua, rauta ni 56 na kilomita mai Jopa. E dua vei ira na imuri taumada i Jisu o Tokasa.
Na cava o nanuma e lomani kina vakalevu o Tokasa?— E tukuni ena iVolatabu ni levu na ka vinaka e cakava, e dau solika tale ga. E dau cula eso na isulu totoka vei ira na yada se o ira na yalewa sa mate na watidra. E tukuna tale ga vei ira e levu na ka me baleta na Kalou dina o Jiova, me vaka a cakava o Jisu.
O kila na ka rarawataki a yaco vei Tokasa?— A tauvimate bibi mani mate sara. Era rarawataka kece qori na nona itokani, era mani tala eso mera lai raici Pita ena vanua e tiko kina, rauta ni 16 na kilomita na kena yawa. O ira na talai qori era kerei Pita me lako totolo i Jopa. Ni yaco yani o Pita, e gole sara ina tabavale e cake e davo tu kina o Tokasa. Era vakaraitaka tagitagi vei Pita na yalewa kece era tu e kea na isulu e cula vei ira o Tokasa.
E vakatalai ira kece na tiko e vale o Pita. Sa dau cakamana oti e liu o Pita kei ratou na vo ni yapositolo, ia eratou se sega ni bau vakabula e dua mai na mate. Na cava o nanuma ni na cakava o Pita?—
E tekiduru e yasa ni yagoi Tokasa qai masu vei Jiova. Oti, e tukuna vei Tokasa me duri. A cakava sara o Tokasa! E dodoka o Pita na ligana qai tauri koya cake, qai kacivi ira na yada kei na so tale me vakaraitaka vei ira ni sa bula tale o Tokasa. O rawa ni raitayaloyalotaka na levu ni nodra marau?—
Vakasamataka mada na ka o rawa ni vulica ena italanoa ni nona vakaturi o Tokasa. Dua na ka e laurai kina, era na lomani iko e levu ke o dau veivuke. Ia e bibi sara ni na nanumi iko qai lomani iko na Kalou. Ena sega ni guilecava na veika vinaka o cakava vei ira tale eso. Ena vakalougatataki iko tale ga mo marautaka tawamudu na bula ena nona vuravura vou ni yalododonu.
Wilika ena nomu iVolatabu
[iVakamacala e ra]
a Ke o wiliwili tiko kei na dua na gone, mo cegu ni o raica na itoqa balavu o qai uqeti gone me tukuna na nona nanuma.