Na Dina ena Veisautaka na Nomu Bula

DE DUA o sa rogoca se o vakavulici ena dua na ivakavuvuli lasu me baleta na Kalou e tukuni ena vica na ulutaga sa oti. Ia ena rairai dredre mo veisautaka na ka o vakabauta, vakabibi ke sa dede na nomu vakabauta voli mai e dua na ka e lasu.

E sega ni kurabuitaki qori. Era sega ni vinakata eso na lotu me veidutaitaki na nodra ivakavuvuli kei na ka e tukuna na iVolatabu. Eso tale era via tokona ga na nodra ivakavuvuli lasu nira kaya e vereverea na iVolatabu qai sega ni dodonu me kila na tamata kece. E levu mada ga na tisaipeli i Jisu era tauvanua ra qai sega ni vuli vinaka sara, ia era taura rawa na ka e vakavulica.—Cakacaka 4:13.

O na rairai nanuma ni lailai nomu vakabauta ke o vaqaqa e dina se lasu na ka o vakavulici kina. Ia ena cudru beka na Kalou ke o vulica na iVolatabu, na nona itukutuku vei keda kece mo kila kina na ka e vinakata mo cakava? Sega, eda uqeti meda vulica vakataki keda na iVolatabu: “Moni vakadinata . . . ni vinaka na inaki ni Kalou, e totoka, qai uasivi.”—Roma 12:2.

E bibi meda kila na ka dina me baleta na Kalou. Nida cakava qori, e levu na ka vovou eda na vulica, ena veisautaka tale ga na noda bula. (Joni 8:32) O Deanne e tukuni ena imatai ni ulutaga, sa yavutaka ena gauna qo na nona vakabauta ena iVolatabu. E kaya: “Au qai kila ga ni matata na ka e tukuna na iVolatabu niu sa vulica. Au sa qai kila niu rawa ni volekati Jiova, e Tamaqu vakalomalagi dauloloma tale ga o koya. Sa qai vakainaki na noqu bula.”

De dua o vulica tu e liu na iVolatabu, ia o sega ni vakila na kena yaga. Ke dina qori, kua ni yalolailai. Ni o sa vakavulici tu mai ena ivakavuvuli lasu me baleta na Kalou, na nomu sasaga mo kila na iVolatabu e vaka ga na nomu via ripeataka e dua na misini, ia e cala na ivola o raica tiko me nomu idusidusi. O ripeataka rawa eso na ka, ia o soro koso ni o sega ni ripeataka rawa na misini taucoko. Ia ke donu na ivola o raica tiko me nomu idusidusi, ena sega ni dredre na nomu ripeataka na misini qori.

O via kila na ka dina me baleta na Kalou? Kerea e dua na iVakadinadina i Jiova ena nomu itikotiko mo vulica wale na iVolatabu, se volavola ina dua na itikotiko veiganiti ena tabana e 4 ni mekesini qo.

[Tikina bibi ena tabana e 9]

“Moni vakadinata . . . ni vinaka na inaki ni Kalou, e totoka, qai uasivi.”—ROMA 12:2