‘A Vosa ni Veivakalougatataki ena Tau Vua e Yalododonu’

“AU A gone, ka’u sa qai qase mai; ia ka’u a sega ni raica na yalododonu ni sa biu laivi, se na nona kawa ni ra sa vosai kedra madrai,” e kaya na daunisame o Tevita ni sa kena qase sara. (Same 37:25) Na Kalou o Jiova e lomani ira qai taqomaki ira na yalododonu. Ena nona Vosa, na iVolatabu, e uqeti ira era sokaloutaki koya mera qara na yalododonu.​—Sefanaia 2:3.

Na yalododonu e kena ibalebale ni vakadonui iko na Kalou ni o muria tiko na nona ivakatagedegede ena ka e tukuna o koya ni vinaka kei na ka e ca. Ni uqeti keda meda muria na loma ni Kalou, na ika10 ni wase ni Vosa Vakaibalebale ena iVolatabu e dusia na veivakalougatataki vakayalo era na rekitaka o ira era cakava na loma ni Kalou. E wili kina na levu ni kakana bulabula vakayalo, na cakacaka yaga qai veivakacegui, vaka kina na veiwekani vinaka kei na Kalou kei ira na tamata. O koya gona, meda dikeva mada na Vosa Vakaibalebale 10:​1-​14.

Vuna Vinaka Eda Uqeti Kina

Na idola ni vosa ena wase oqo e dusia vakamatata o koya e vola na vica tale na wase e tarava ena ivola na Vosa Vakaibalebale. E kaya: “A vosa vakaibalebale i Solomoni.” Ni dusia tiko e dua na vuna vinaka eda uqeti kina meda muria na ka dodonu, e kaya o Tui Solomoni e Isireli makawa: “A gone vuku sa vu ni reki vei tamana: ia na gone lialia sa vu ni rarawa vei tinana.”​—Vosa Vakaibalebale 10:1.

Dua na ka nodra rarawa na itubutubu ni dua na luvedra e muduka nona qarava na Kalou dina! E kauta cake mai na tui vuku na rarawa i tinana, me vakaraitaka beka ni levu cake nona rarawa mai vei tamana. E yaco dina na ka oqo vei Daiana.a E kaya: “E mosi dina na loma i keirau vakaveiwatini ni biuta na dina na luve i keirau tagane yabaki 21. E mosi vakalevu cake na lomaqu mai vei Voreqe na watiqu. Sa sivi e 12 na yabaki, ia e sega ga ni se seavu noqu rarawa.”

E rawa nira vakavuna na gone na rarawa ni tamadra kei na mosi ni loma i tinadra. Meda vuku mada ga da qai vakamarautaki rau na noda itubutubu. Ia o koya e bibi sara noda vakamarautaka na loma i Tamada vakalomalagi, o Jiova.

‘Na Yalona na Yalododonu Ena Sega ni Viakana’

“Ai yau ni ca sa sega ni yaga: ia na caka dodonu sa ka ni veivakabulai mai na mate,” e kaya na tui. (Vosa Vakaibalebale 10:2) E bibi dina na vosa oqo vei ira na lotu Vakarisito era bula ena gauna sara ga ni ivakataotioti. (Taniela 12:9) Sa voleka ni vakarusai na vuravura tawavakalou. Na iyaya, ilavo, se mataivalu vakatamata ena sega ni yaga me veivakabulai ena “veivakararawataki levu” sa roro voleka mai oqo. (Vakatakila 7:​9, 10, 13, 14) Era na “tiko ga e na vanua na yalododonu, ka ra na tiko dei kina na yalodina.” (Vosa Vakaibalebale 2:​21) Me dua o keda eda “vakasaqara taumada na matanitu ni Kalou, kei na nona yalododonu.”​—Maciu 6:​33.

Era na sega ni waraka sara na dauveiqaravi i Jiova na vuravura vou mera vakila kina na veivakalougatataki ni Kalou. “Ko Jiova ena sega ni laiva na yalona na yalododonu me viakana: ia sa biuta tani na nodrai yau na tamata ca.” (Vosa Vakaibalebale 10:3) E vakarautaka mai vakayauyau na kakana vakayalo o Jiova ena nona vakayagataki koya na “dauveiqaravi yalo dina ka vuku.” (Maciu 24:​45, VV) Na tamata yalododonu e tiko na vuna vinaka mera “sere ni sa marau na lomadra.” (Aisea 65:14) E vinaka e lomadra na kilaka. Era taleitaka mera vakasaqara na iyau vakayalo. Na ka vaka oqo e sega tu ni kila na tamata ca.

‘Na Gugumatua e Veivakavutuniyautaki’

Dua tale na sala e kalougata kina na yalododonu. “Sa na dravudravua mai ko koya sa kuku ce: ia ko koya sa kuku matua [se, “gugumatua,” NW] sa na vutuniyau kina. Ko koya sa kumuna e na vula i katakata sa gone vuku: ia ko koya sa daumoce e na vula i mago sa gone e veivakamaduataki.”​—Vosa Vakaibalebale 10:​4, 5.

E vakaibalebale dina na vosa ni tui vei ira na dau tatamusuki ni sa matua na itei. Na vulaitatamusuki e sega ni gauna ni moce. E gauna ni cakacaka vakaukaua, qai vinakati na cakacaka vakadede. Io, e gauna e vinakati dina kina na cakacaka vakatotolo.

Ni vakasamataka tiko o Jisu na nodra tamusuki na tamata, sega ni sorenikau, e kaya kina vei ira na nona tisaipeli: “Sa levu dina tu na ka me tamusuki; ia, era sa lewe lailai ga na tamata cakacaka. O koya gona, mo dou masuti koya kina na i Taukei ni were [na Kalou o Jiova], me talai ira yani na tamata cakacaka me ra la’ki tatamusuki e na nona were.” (Maciu 9:​35-​38, VV) Ena iVakananumi ni mate i Jisu ena yabaki 2000, sivia na 14 na milioni era tiko kina mera vakananuma​—sivia ni vakaruataki na kedra iwiliwili na iVakadinadina i Jiova. E sega kina ni vakatitiqataki ni sa ‘matua mai na were qai waraka tu mera tamusuki.’ (Joni 4:​35, VV) O ira na sokalou dina era kerea na iTaukei ni were me tala mai e so tale na daucakacaka, ia ena gauna vata oya, era guraki ira ena cakacaka ni veivakatisaipelitaki me salavata ga kei na nodra qaqanimasu. (Maciu 28:​19, 20, VV) E vakalougatataki ira sara kina vakalevu o Jiova! Donuya na yabaki vakacakacaka ni 2000, era papitaiso e sivia na 280,000 na tisaipeli vou. Era saga tale ga o ira oqo mera qasenivuli ni Vosa ni Kalou. Meda vakaitavi mada ga ena kena levu eda rawata ena noda vukea e so mera tisaipeli ena gauna ni tatamusuki oqo me noda kina na reki kei na vakacegu.

‘Tau i Uluna na Vosa ni Veivakalougatataki’

“A vosa ni veivakalougatataki sa na tau ki na uluna na yalododonu: ia na gusudra na tamata ca ena tabonaki e nai valavala kaukauwa,” e kaya o Solomoni.​—Vosa Vakaibalebale 10:6.

Ena levu sara na sala ena vakaraitaka kina o koya e yalododonu qai yalosavasava na yalona. E dau vosa vakayalovinaka qai veitaraicake na ka e tukuna, na ka e cakava e dau vinaka qai caka ena dela ni lomasavu. Era dau taleitaka e so tale mera veilasamaki kei koya. Era marautaki koya​—era vosa vakalougatataki koya​—kena ibalebale nira tukuna na ka vinaka me baleti koya.

Na kena veibasai na tamata ca, ni dau veicati qai yaloca, e lomana tale ga me dau cakaca. De na kamikamica na nona vosa qai ‘tabonaka na ivalavala kaukaua’ e tu e lomana, ia sega ni dede, sa na kacabote mai gusuna na vosa kaukaua qai kaukaua na nona ivalavala. (Maciu 12:​34, 35) Se, ena dua tale na yasana, “na gusudra na tamata ca ena tabonaki [se na sogoti] e nai valavala kaukauwa.” (Vosa Vakaibalebale 10:6) E dusia tiko oqo ni ivalavala vata ga e vakaraitaka ena qai saumi tale vua, oya nira na cati koya na tamata. E vaka ga ni tabonaki se sogoti e ke na gusuna, e galu sara ga kina. Macala tu ga ni mataqali tamata vaka oqo ena sega sara ga ni dua ena via vosa vakalougatataki koya.

“A kedrai nanumi na yalododonu sa ka ni veivakalougatataki: ia na yacadra nai valavala ca ena rusa,” e vola na tui Isireli. (Vosa Vakaibalebale 10:7) Era dau nanumi koya e yalododonu na tani, vakauasivi na Kalou o Jiova. Ena nona yalodina me yacova na mate, a soli kina vei Jisu “na yaca sa uasivia na yacadra” na agilosi. (Iperiu 1:​3, 4) O ira na lotu Vakarisito dina nikua era nanuma ni yaga me vakatotomuri na nodra ivakaraitaki na turaga kei na marama yalodina era bula ni se bera na gauna vakarisito. (Iperiu 12:​1, 2) Sa bau duidui dina oqo ni raici vata kei na yacadra na tamata ca, ni rui vakasisila qai boi ca! Io, “a ka me digitaki na rogo vinaka [se, “na yaca rogo vinaka,” NW], ia nai yau levu e segai; a ka me digitaki na loloma, na siliva kei na koula e segai.” (Vosa Vakaibalebale 22:1) Me rogo vinaka mada ga na yacada vei Jiova kei ira na tamata.

“Ko Koya sa Lako Vakadodonu sa Lako Doudou”

A veidutaitaki rau na vuku kei na lialia o Solomoni, qai kaya: “Ko koya sa lomavuku ena vakabauta na vunau: ia na lialia dauvosa ena bale ga.” (Vosa Vakaibalebale 10:8) Na tamata vuku e kila vinaka ni “sa sega ni vu mai vua na tamata sa lako tu me lewa na nonai lakolako.” (Jeremaia 10:23) E kila ni dodonu vua me kere ivakasala vei Jiova qai totolo sara ni ciqoma na ivakaro ni Kalou. Ia ena yasana adua, o koya e dau vosa vakalialia e lecava sara tu ga na tikina bibi oqo. Na nona vosa vakasese e tini ga ina leqa.

Dua na mataqali yalodoudou e vakila tale ga na tamata yalododonu, e dredre ni vakila na tamata ca. “Ko koya sa lako vakadodonu sa lako doudou: ia ko koya sa vakavevetaka na nonai lakolako ena kilai. Ko koya sa katariva e na matana sa vakayaco ka rarawa: ia na lialia dauvosa ena bale ga.”​—Vosa Vakaibalebale 10:​9, 10.

Na tamata e lako vakadodonu e dau dina ena veika e cakava. E dokai qai nuitaki. Na tamata cakacaka e dau dina ena vakamareqeti, qai dau nuitaki ena levu tale na ka. Ke sa leqa mai na cakacaka, ena tauri tiko ga o koya baleta ni kilai ni dau dina. Ni tamata dau dina tale ga, ena vakilai ena nona itikotiko na bula vinaka kei na bula vakacegu. (Same 34:​13, 14) E vakila ni dei na nona bula vakavuvale. Io, o koya e lako vakadodonu, ena dau lako dina ena doudou.

E duatani o koya e lawaki me rawaka kina. Ena saga na dauveivakaisini me vunitaka nona lasu ena vosa e takelo se na nona ivukivuki beka. (Vosa Vakaibalebale 6:​12-​14) Na katariva ni matana se nona bobomataidua ni veivakaisini e rawa ni vakamosia sara ga na yalo i koya e lawakitaki. Ia sega ni dede, sa na votu mamaca na veivakaisini i koya na tamata vaka oqo. E vola na yapositolo o Paula: “Sa kune votu na nodra i valavala ca e so na tamata ka sa kauti ira ki na veilewai, ia na nodra i valavala ca e so e na qai kune vakamalua e muri. Sa vaka tale ga kina na kena kune votu na cakacaka vinaka; ia kevaka sara mada ga e sega, e na sega ni rawa ni vunitaki me tawa mudu.” (1 Timoci 5:​24, 25, VV) Ena qai vakavotui ga na lawakica, veitalia sara se o cei oya​—se itubutubu, itokani, tagane se yalewa vakawati, se dua na veikilai. Sa sega tu ga ni na nuitaki na tamata lawakica.

‘E Mataniwai Bula na Gusuna’

“A gusuna na yalododonu sa dua na mata-ni-wai bula: ia na gusudra na tamata ca ena tabonaki e nai valavala kaukauwa,” e kaya o Solomoni. (Vosa Vakaibalebale 10:11) Na vosa mai na gusuda e rawa ni veivakabulai se veivakamavoataki. E rawa ni vakabulabulataka e dua, se basuraki koya.

A vakavotuya na tui Isireli na ka e dau vakavuna me tau kina e so na vosa ena nona kaya: “A veicati sa ka e tubu kina na veileti: ia sa ubia nai valavala ca kecega na loloma.” (Vosa Vakaibalebale 10:12) Na veicati e vakatubura na veileti ena keda maliwa na tamata, e uqeta na tiko vakaca. Mera cavuraka na veicati mai lomadra o ira na lomani Jiova. Me caka vakacava? Ena nodra vakaisosomitaka yani ena loloma. “Ni sa dau ubia na i valavala ca e vuqa na loloma.” (1 Pita 4:​8, VV) “Sa ubia na ka kecega” na loloma. (1 Korinica 13:7) Ni tu vei keda na loloma vakalou, eda na sega kina ni namaka mera vinaka vakaoti na tamata ivalavala ca. Eda na sega ni kaburaka na nodra malumalumu e so, ia ena vuku ni noda loloma, eda na raibaleta na nodra malumalumu, vakavo ga ke cala bibi. Ena vuku ni loloma, eda na vosota tale ga nodra veivakacacani na tamata ena yalava ni noda vunau, ena noda vanua ni cakacaka, se e koronivuli.

E kaya tale na tui vuku: “E na tebenigusuna na yalomatua sa kune kina na vuku: ia ena tau na kuita ki na dakuna na yalowai.” (Vosa Vakaibalebale 10:13) Ena vuku ga e lewa vinaka kina na nona ilakolako na tamata yalomatua. Na vosa ni veivakauqeti ena tebenigusuna e dusimaki ira tale e so mera muria na ivalavala dodonu. Ena sega ni vakasaurarataki o koya se o ira na rogoci koya mera muri vakadodonu​—oya mera kuitataki.

“Maroroya na Kilaka”

E rawa vakacava me vure mai gusuda, me “vaka na uciwai drodro vakayauyau na vuku,” me kua ga ni vure mai gusuda na vosa sega na betena e vaka na wai lailai e sega ni yaga e drodro tu yani? (Vosa Vakaibalebale 18:​4, NW) E sauma o Solomoni: “Era kuria tiko na vuku [se, “maroroya na kilaka,” NW] ko ira na yalomatua: ia na gusuna na lialia sa volekata na rusa.”​—Vosa Vakaibalebale 10:14.

Na imatai ni ka e gadrevi oya me vakasinaiti na noda vakasama ena kilaka vakalou e veitaraicake. E dua ga na ivurevure ni kilaka oqori. E vola na yapositolo o Paula: “Sai koya na Kalou sa vakavuna nai Vola Tabu kecega, a sa yaga oqo mei vakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu: me yaco kina na tamata ni Kalou me vakarau tu, ni sa vakarautaki ki nai valavala vinaka kecega.” (2 Timoci 3:​16, 17) Meda maroroya na kilaka da qai kelia meda qara ena Vosa ni Kalou me vaka ga eda qara na iyau vuni. Na vakasaqaqara totoka oya eda na kalougata kina!

Ena kune ga na vuku ena tebenigusuda kevaka e tara na lomada na veika eda kila mai na iVolatabu. A kaya o Jisu vei ira na vakarorogo vua: “A tamata vinaka sa kauta mai na ka vinaka mai na lololo vinaka ni lomana: kei na tamata ca sa kauta mai na ka ca mai na lololo ca ni lomana: ni sa vosataka na gusuda na ka sa oso vakalevu kina na lomada.” (Luke 6:​45) E bibi gona meda dau vakananuma na veika eda sa vulica tiko. Io, e dina, ena vinakati na sasaga ena vuli kei na vakananumi ni ka e vulici, ia na vuli vaka oya e sa bau momona dina vakayalo! E sega ni dua na vuna vua e dua me lai muria wale tu na ilakolako ca ni dua e dau tukuna na ka e sega na betena.

Io na tamata vuku e cakava na ka e dodonu ena mata ni Kalou, ia o ira na veimaliwai kei koya era vakila na kena yaga. E levu sara tu na kakana vakayalo me vakayagataka qai levu tale ga na ka vinaka me vakaogai koya kina ena cakacaka ni Turaga. (1 Korinica 15:​58, VV) Ni tamata yalododonu, ena lako voli ena doudou qai vakadonui koya na Kalou. Io, e levu sara na ka e vakalougatataki kina na tamata yalododonu. Meda qara mada ga na yalododonu ena noda veisautaka na noda bula me salavata kei na veika e tukuna na Kalou ni vinaka se ca.

[iVakamacala e ra]

[iYaloyalo ena tabana e 25]

Ena marau noda bula vakavuvale kevaka eda dau dina

[iYaloyalo ena tabana e 26]

‘Era maroroya na kilaka na vuku’