Ka mo Cakava ni Yaco na Leqa Tubukoso
Ni wasoma qai vakacaca vakalevu na leqa tubukoso, na cava eda rawa ni cakava? Meda raica mada qo e vica na vakatutu.
Kua ni vakaitikotiko ena vanua o na vakaleqai kina. E kaya na iVolatabu: “O koya sa yalomatua sa kunea na ca, ka sa vunitaki koya: Ia ko ira sa sega ni vuku era sa lako tu yani, a ra sa kunea na rarawa.” (Vosa Vakaibalebale 22:3) E yaga sara ga na ivakasala vuku qo ena gauna ni leqa tubukoso. Nida vakasalataki ni sa vakarau kacabote na volukano, yaco na waluvu se cagilaba, e ka vakayalomatua meda dro ina vanua eda na taqomaki kina. Na noda bula e bibi cake mai na noda vale se na veika eda taukena.
Eso era na rawa ni vakatulewataka mera kua ni vakaitikotiko ena vanua e rawa ni yaco kina na leqa tubukoso. E tukuna e dua na vakailesilesi: “E dua ga na iwase lailai ni vuravura ena tara na leqa qori qai namaki ni na yaco ena veivanua qori na leqa tubukoso ena veigauna se bera mai.” Me kena ivakaraitaki, ena rairai yaco qo ena veivanua lolovira se na vanua e sotasota kina na peleti kei vuravura ni dau uneune vakalevu. Ena vinaka mo toki ina dua tale na vanua ke o vakaitikotiko ena vanua va qori, o na rairai sega ni vakaleqai vakalevu ni yaco na leqa tubukoso.
Vakavakarau rawa. Se o mani qaqarauni vakacava o se rawa ga ni sotava na leqa tawanamaki. Ia o na sega ni veilecayaki ke o vakavakarau rawa tu. Qo e salasalavata kei na ivakasala ena Vosa Vakaibalebale 22:3 sa cavuti oti mai. Sa vakarautaki tu na iyaya mo vakayagataka ni yaco na leqa tubukoso? E vakatututaki ena ivola na 1-2-3 of Disaster Education mo vakarautaka: Na iyaya ni veivuke taumada ni yaco na leqa (first-aid), wai, kakana ena sega ni bulagi totolo, kei na ivola ivakadinadina ni insua kei na so tale. E ka vakayalomatua mo dou veivosakitaka vakavuvale na leqa tubukoso e rawa ni yaco kei na ka mo dou cakava.
Veivolekati tiko ga kei na Kalou. E yaga vakalevu qori ena ituvaki cava ga o sotava. E tukuna na iVolatabu ni Kalou e “Tama ni yalololoma, na Kalou e dau vakacegui keda ena ka kece ga, e vakacegui keda ena noda rarawa kece.” E tukuni ena dua tale na tikinivolatabu ni Kalou “e dau vakacegui ira na rarawa.”—2 Korinica 1:3, 4; 7:6.
Io, e kila vinaka na Kalou na kedra ituvaki o ira era vakabauti koya. E dauloloma qai dauveivakacegui ena vuqa na sala. (1 Joni 4:8) Ena yaga ena ituvaki cava ga na noda masuta na veidusimaki ni yalo tabu ni Kalou, sega ni noda vakabulai vakacakamana. Na yalona tabu ena dusimaki ira era sotava na leqa mera vakasamataka na veitikinivolatabu ena vakacegui ira. Era na vakadinadinataka na tamata yalodina ni Kalou na ka vata ga a tukuna o Tui Tevita e Isireli makawa: “Kevaka ka’u sa lako e loma ni buca ni yaloyalo ni mate, ka’u na sega ni rerevaka na ca: ni kemuni sa tiko vata kei au; ena vakacegui au na nomuni titoko kei na nomuni matanakilagi.”—Same 23:4.
Era dau veivukei na lotu vaKarisito. A tukuna na parofita o Akapo ena imatai ni senitiuri ni “na vakarau yaco e dua na dausiga levu ena vanua kece e vuravura e tawani. E yaco dina qo ena gauna e veiliutaki tiko kina o Kilotiu.” Era vakaleqai e levu na tisaipeli i Jisu e Jutia ena dausiga. Na cava era cakava na tisaipeli ena so tale na vanua nira rogoca na leqa e tarai ira na tacidra lotu vaKarisito? E tukuni: “Era qai lomavata na tisaipeli me vaka na ka era dui rawata, mera dodoliga vei ira na veitacini era tiko mai Jutia.” (Cakacaka 11:28, 29) Era dodoliga mera vakarautaka na ka mera vukei kina.
Qori tale ga na ka era cakava na dauveiqaravi ni Kalou nikua ni yaco na leqa tubukoso. Era kilai na iVakadinadina i Jiova ena nodra dau vukei ira era vakabauta vata. Me kena ivakaraitaki, ni kurei Chile e dua na uneune kaukaua ena 27 Feperueri, 2010, era yavala totolo na iVakadinadina i Jiova mera vukei ira era vakaleqai. E tukuna o Karla a kuitaki na nona vale ena ualoka: “E veivakacegui qai veivakaukauataki nira mai veivuke ena siga tarava [na itokani iVakadinadina i Jiova] mai na so tale na vanua. E vakacegui keitou sara ga o Jiova ena veika vinaka era cakava na bolecakacaka. Au vakila niu lomani, au taqomaki.” E sega ni iVakadinadina o tukai Karla, a kaya ni raica na nodra veivuke: “Na ka era cakava e duidui sara mai na veika au raica vei ira na noqu lewenilotu ena dua na gauna balavu.” E uqeti koya sara ga na ka e raica me kerei ira na iVakadinadina i Jiova mera vakavulici koya ena iVolatabu.
E yaga sara vakalevu ena gauna e yaco kina na leqa na noda veimaliwai kei ira era lomana na Kalou. Ke dina mada ga qori, ena oti beka ena dua na gauna na leqa tubukoso? Meda raica mada na ka e tukuna na iVolatabu.
[iYaloyalo ena tabana e 6]
Sa vakarautaki tu na iyaya mo vakayagataka ni yaco na leqa tubukoso?
[iYaloyalo ena tabana e 7]
Ena yaga ena ituvaki cava ga na noda masuta na veidusimaki ni yalo tabu ni Kalou, sega ni noda vakabulai vakacakamana
[iYaloyalo ena tabana e 7]
Era dauveivukei na lotu vaKarisito ni yaco na leqa tubukoso
[iYaloyalo ena tabana e 7]
“Au vakila niu lomani, au taqomaki”