Oti na Leqa Tubukoso!

KE TUKUNA vei iko e dua: “Sa vakarau oti na leqa tubukoso,” na cava o na kaya? De dua o na tukuna: “O tadra tiko? Sa isaluaki tu ni bula na leqa tubukoso.” Se o na nanuma: ‘Cava mada e vakasamataka tu o ka qo?’

Sa sega ni tarovi rawa na leqa tubukoso, ia meda nuidei ni na oti. Ia ena sega ni vakayacora qori na tamata. Eda sega ni kila vinaka mada ga na veika e dau yaco wavoliti keda kei na vuna e yaco kina, sa qai yawa sara meda tarova se vakaotia. E vola o Tui Solomoni e Isireli makawa me baleta na nona vuku kei na nona vakadidike: “Sa dredre vua na tamata me kila na cakacaka sa caka e ruku ni mata-ni-siga: ia ke sa gumatua na tamata ni qara, ena sega ga ni kunea; ia ke sa nanuma ko koya sa vuku me kila, ena sega ga ni kunea rawa.”—Dauvunau 8:17.

Ke sega ni rawa ni vakaotia na tamata na leqa tubukoso, o cei ga e rawa ni cakava qori? E tukuna na iVolatabu ni na vakaotia na Dauveibuli. A vakadavora na veika buli me vaka na italetale ni wai. (Dauvunau 1:7) E duidui sara na Kalou ni tawavakaiyalayala na nona kaukaua. A vakadinadinataka qori na parofita o Jeremaia ni tukuna: “Kemuni na Turaga ko Jiova! ko ni sa bulia na lomalagi kei vuravura e na nomuni kaukauwa levu kei na ligamuni e dodo yani, ka sa sega ni dredre vei kemuni e dua na ka.” (Jeremaia 32:17) Ni bulia na vuravura kei na veika era tu kina, e kila na Kalou na ka me cakava meda rawa ni bula vakacegu qai tiko vinaka.—Same 37:11; 115:16.

Ena cakava vakacava qori na Kalou? Eda raica ena ikarua ni ulutaga veitaravi ena Vale ni Vakatawa qo ni veika vakadomobula era yaco tu nikua era “ivakatakilakila” ni sa voleka “na ivakataotioti ni veika vakavuravura.” A tukuna o Jisu: “Ni dou raica ni sa yaco na ka kece qo, dou kila sara ni sa voleka na matanitu ni Kalou.” (Maciu 24:3; Luke 21:31) Na Matanitu ni Kalou a tauyavutaka na Kalou mai lomalagi ena veisautaka na ituvaki e vuravura, ena lewa tale ga na veika buli me vaka na wai, cagi kei na so tale. E tu vua na Kalou o Jiova na kaukaua me cakava qori, ia na itavi qori sa lesia vei Luvena. A tukuna na parofita o Taniela me baleti Jisu: “A sa soli vua na lewa, kei na vakarokoroko, kei na matanitu, me ra qaravi koya ko ira na tamata kece, kei na veivanua, kei na dui vosavosa.”—Taniela 7:14.

Sa soli na lewa vua na Luve ni Kalou o Jisu Karisito me vakayacora na veiveisau kece e gadrevi me vinaka kina na bula e vuravura. E dua na ivakaraitaki lailai sara a laurai ena rua na udolu na yabaki sa oti ni lewa rawa o Jisu na ivakarau ni draki. Ni ratou vodo toka ena waqa kei na nona tisaipeli ena Wasa o Kalili, “e qai tubu mai e dua na batinicagi kaukaua, e suaigelegele na waqa ena kaukaua ni ua ni roba mai na babana, e voleka sara kina ni luvu.” E vuka na yalodratou na tisaipeli, ratou mani kere veivuke vei Jisu. Na cava e cakava o Jisu? A “vunauca na cagi, e kaya ina wasawasa: ‘Mo maravu!’ Mai ruru yani na cagi, e maravu tale ga na wasawasa.” Eratou kurabui na nona tisaipeli ena ka e yaco, ratou taroga: “O cei mada qo, ni talairawarawa sara ga vua na cagi kei na wasawasa?”—Marika 4:37-41.

Sa lesu i lomalagi o Jisu qai soli vua e levu tale na lewa kei na kaukaua. Ni Tui ni Matanitu ni Kalou, e nona itavi me vakayacora na veiveisau kece e gadrevi e vuravura meda rawa ni bula vakacegu qai tiko vinaka.

Eda sa dikeva mai ni levu na leqa kei na leqa tubukoso e yaco tu nikua e vakavuna ga na tamata, sa qai ca ga na ituvaki ena vuku ni noda nanumi keda ga kei na kocokoco. Na cava ena cakava na Matanitu ni Kalou vei ira era cakava tiko ga qori ra qai sega ni veisau? E tukuna na iVolatabu ni na lako mai o Jisu qai “vakaraitaki mai lomalagi . . . vata kei ira na nona agilosi kaukaua ena yameyame ni bukawaqa, . . . ena qai totogitaki ira kina era sega ni kila na Kalou kei ira na beca na itukutuku vinaka ni noda Turaga o Jisu.” Ena “vakawabokotaki ira . . . na vakarusai vuravura tiko.”—2 Cesalonaika 1:7, 8; Vakatakila 11:18.

Ni oti oya, o Jisu Karisito na nodra “Tui na tui” ena lewa kece na veika buli e vuravura me vaka na wai, cagi kei na so tale. (Vakatakila 19:16) Ena raica mera kua tale ni vakaleqai o ira era na vakarurugi ena nona Matanitu. Ena lewa vakamatau na draki me rawa ni yaga vei keda. Na veika ena yaco qori ena vakadinadinataki kina na ka e yalataka makawa tu o Jiova vei ira na nona tamata: “Au na qai vakatauca vei kemudou na uca e na kena vula, ka na vuataka na kena vuata na vanua, ka vuataka na vuana na kau ni veiwere.” (Vunau ni Soro 26:4) Eda na tara vale da qai sega ni leqataka ni na vakacacani ena leqa tubukoso: “A ra na tara vale, ka tiko kina; era na tea eso na were-ni-vaini, ka kania na vuana.”—Aisea 65:21.

Na Cava mo Cakava?

Me vakataki ira ga e levu, o na vinakata tale ga mo bula ena dua na vuravura sa na oti kina na leqa tubukoso. Na cava gona mo cakava mo rawa ni bula kina e kea? Sa tukuna oti tu na Kalou ni o ira “era sega ni kila[i]” koya kei “ira na beca na itukutuku vinaka” era na sega ni bula ena vuravura sa na oti kina na leqa tubukoso. Ena vinakati gona mo vulica na veika me baleta na Kalou ena gauna qo qai tokona na nona veiliutaki e vuravura. E vinakata na Kalou meda kilai koya, da talairawarawa ena itukutuku vinaka ni Matanitu sa tauyavutaka oti ena vuku i Luvena.

Na sala vinaka duadua meda cakava kina qori noda vulica vinaka na iVolatabu. E tu kina na idusidusi matata ni ivakatagedegede e gadrevi meda bula kina ena vuravura ni vakacegu ena veiliutaki ni Matanitu ni Kalou. O rawa ni kerei ira na iVakadinadina i Jiova mera vukei iko mo vulica na iVolatabu. Era tu vakarau mera vukei iko. Dua na ka mo vakadeitaka, ke o saga mo kila na Kalou o qai talairawarawa ena itukutuku vinaka, o na vakadinadinataka na ka e tukuni ena Vosa Vakaibalebale 1:33: “Ia ko koya sa vakarorogo vei au ena tiko vinaka, ka na vakacegu ka sega ni rerevaka e dua na ka ca.”