Bula ena Gauna Vakaivolatabu​—Daunivakatagi kei na iYaya Era Vakayagataka

“Dou vakavinavinaka vua [na Kalou] e na domo ni davui: Dou vakavinavinaka vua ena soliteri kei na api. Dou vakavinavinaka vua e na tibereli kei na bitunivakatagi: Dou vakavinavinaka vua e nai qiriqiri vakawa kei na kove. Dou vakavinavinaka vua e na sibali rorogo: Dou vakavinavinaka vua e na sibali sa rorogo cake.”​—SAME 150:3-5.

NA IVAKATAGI kei ira na daunivakatagi sa tiki bibi voli mai ni nona qaravi na Kalou o Jiova ena dua na gauna balavu. Kena ivakaraitaki ni vakabulai ira vakacakamana o Jiova na Isireli ena Wasa Damudamu, o Miriama na ganei Mosese a liutaki ira na yalewa ena dua na sere ni qaqa kei na meke. Era vakayagataka na tibereli ena nodra meke. Qori e vakaraitaka ni bibi vei ira na Isireli na ivakatagi. Era se qai drovaki ira ga mai na mataivalu ni Ijipita, ia e levu na yalewa e toka voleka ga na nodra iyaya ni ivakatagi ra qai tu vakarau mera vakayagataka. (Lako Yani 15:20) A qai tuvanaka e muri o Tui Tevita me okati ena sokalou ena valeniveitavaki na ivakatagi era vakayagataka kina na iyaya ni qiriqiri e udolu vakacaca na daunivakatagi. A lai muri tale na ituvatuva qori ena valenisoro a tara na luvena o Solomoni.​—1 Veigauna 23:5.

E caka mai na cava na iyaya ni ivakatagi? E vakacava na kedra irairai kei na rorogo? Gauna cava e dau vakayagataki kina?

Veimataqali iYaya ni iVakatagi

Na iyaya ni ivakatagi e tukuni ena iVolatabu e caka mai na kau dredre, na kulinimanumanu, na kaukamea, na sui, kei na ileu. Eso era vonoti ena tabua. Na kena wa e caka mai na wavulovulo ni kau se na wawa ni manumanu. Sa sega ni tu nikua e dua na iyaya ni ivakatagi ni gauna makawa, eda rawa ga ni raica na kena itaba.

Na iyaya ni ivakatagi a vakayagataki ena gauna vakaivolatabu e rawa ni wasei vakatolu: iyaya ni ivakatagi vakawa, me vaka na api, kei na lyre e via vaka na api (1), kei na lute e tolu na kena wa (2); iyaya ni ivakatagi uvuci, me vaka na shofar se davui (3), na biukila (4), kei na bitunivakatagi se paipi e taleitaki vakalevu (5); iyaya ni ivakatagi e kureitaki se samuti, me vaka na tibereli (6), na kasitaneti (7), na sibali (8), kei na lali (9). Era dau vakayagataka na iyaya qori na daunivakatagi me lakovata kei na serekali, meke, kei na lagasere. (1 Samuela 18:6, 7) E bibi sara nira vakayagataka ena nodra qarava na Kalou a vakalougatataki ira ena isolisoli ni ivakatagi. (1 Veigauna 15:16) Meda vakadeuca yadudua mada na tolu na iwasewase ni iyaya ni ivakatagi e tukuni mai cake.

iYaya ni iVakatagi Vakawa Na api kei na lyre erau mamada qai rawa ni veikauyaki, e vakawa na dagona kau. A vakayagataka o Tevita e dua na iyaya ni ivakatagi vakawa me vakacegui Tui Saula ena gauna a rarawa tu kina. (1 Samuela 16:23) Era vakayagataka na mataivakatagi na iyaya ni ivakatagi ni vakatabui na valenisoro a tara o Solomoni kei na so tale na soqo ni marau.​—2 Veigauna 5:12; 9:11.

Na lute e dua na iyaya ni vakatagi e tolu na kena wa e vaka na api, ia e duatani na kena ibulibuli. E vica toka ga na kena wa ena dagona qai tiko na qara lalai me lako mai kina na kena rorogo. Na tatagi ni kena wa e dau memela kina na kena rorogo, e duidui qori mai na rorogo ni qita ena gauna qo. Na kena wa e caka mai na wavulovulo ni kakana draudrau se na wawa ni manumanu.

iYaya ni iVakatagi Uvuci E vakamacalataki vakalevu ena iVolatabu na iyaya ni ivakatagi uvuci. Na kena e makawa duadua na shofar, na davui era dau vakayagataka na Jiu. E caka mai na ileu ni sipi, e dau rogolevu qai karakaravisa. Era vakayagataka na Isireli na iyaya ni ivakatagi qori nira soqoni na mataivalu se ni vakasavui na itukutuku ni ivalu.​—Dauveilewai 3:27; 7:22.

Dua tale na iyaya ni ivakatagi uvuci na biukila kaukamea. E laurai ena dua na ivola e tu vata kei na ivolavivigi ni Waitui Mate ni kurabuitaki na veimataqali rorogo era rawa ni vakatagitaka na daunivakatagi ena iyaya ni ivakatagi qori. A vakaroti Mosese o Jiova me cakava e rua na biukila siliva me vakayagataki ena valeniveitavaki. (Tiko Voli Mai na Lekutu 10:2-7) Ni vakatabui na valenisoro a tara o Solomoni ena dua na gauna e muri, e vakatubuqoroqoro na rorogo ni 120 na biukila a uvuci ena solevu oya. (2 Veigauna 5:12, 13) E duidui na balavu ni biukila era cakava na matai. Eso e rauta na 91 na sedimita, me tekivu mai na vanua e biu kina na gusu ina muanailiu e vaka na ibulibuli ni lali.

Dua na iyaya ni ivakatagi uvuci e taleitaki vakalevu duadua na bitunivakatagi. Na totoka kei na memela ni kena rorogo e vakamarautaki ira na tiko ena soqo vakavuvale, kanamagiti, kei na vakamau. (1 Tui 1:40; Aisea 30:29) Na bitunivakatagi e vaka na rorogo ni serekali. E dau rogoci tale ga ena veibulu qai wili me dua na ivalavala ni vakaloloku na kena vakatagitaki na sere (raica na tabana e 14).—⁠Maciu 9:23.

iYaya ni iVakatagi e Kureitaki se Samuti Era vakayagataka ena soqo ni marau na Isireli na veimataqali iyaya ni ivakatagi e kureitaki se samuti. Ni vakatagitaki wasoma, e rawa sara ga ni uqeta na lomadra era rogoca. Na tibereli e caka mai na kulinimanumanu, e kau na dagona mokimokiti. Na kena rorogo e vaka na vadugu ni dramu ni tavia toka e ligana e dua na daunivakatagi se daumeke. Ni kurea na dagona na daunivakatagi, e tatamelamela na lali era lili tu kina.

E dua tale na iyaya ni ivakatagi e kureitaki na kasitaneti. E kaukamea na dagona mokimokiti, e vakadiana qai lili vakababa na disi kaukamea. E dau tataqiriqiri na kasitaneti ni kureitaki.

E rogolevu sara na sibali varasa qai dau vakayagataki e rua na mataqali disi. Na sibali lelevu e dau samuti vata, na ka lalai e dau vakatagitaki ga ena rua na iqaqalo. E tatamosamosa ruarua na kedrau rorogo, ia e dua e rogo bi, dua tale e mamada.​—Same 150:5.

Muri na Kena iVakarau

Nikua, e dau tekivu qai tini tale ga na nodra sokalou na iVakadinadina i Jiova ena ivakatagi kei na lagasere. Ni vakarautaki na ivakatagi katoni me baleta na nodra soqo lelevu, era dau vakayagataka na mataivakatagi na iyaya ni ivakatagi vakawa ni gauna qo, na kena e uvuci vaka kina na iyaya ni vakatagi e kureitaki se samuti.

Nira vakayagataka na ivakatagi kei na sere ena nodra sokalou, era muria kina na iVakadinadina na ivakarau era dau muria na Isireli ena gauna makawa kei ira na lotu vaKarisito ena imatai ni senitiuri. (Efeso 5:19) Me vakataki ira na tamata ni Kalou ena gauna vakaivolatabu, era marau tale ga na iVakadinadina i Jiova nikua mera lagasere qai muria na ivakatagi mera vakalagilagi Jiova kina.

[iYaloyalo ena tabana e 23]

(Sega ni kena levu dina)

(Raica na ivola)