Nodra Tuvaitutu na iKa131 ni Kalasi e Kiliati

“Moni Vakamarautaki Jiova”

ENA 10 Seviteba, 2011, era soqo vata yani na vuvale, na itokani kei na levu tale mera lai marautaka na nodra tuvaitutu na ika131 ni kalasi ni Watchtower Bible School of Gilead. Era tavariri o ira era vunau kei ira na gonevuli ni tekivu na porokaramu. Ia na gauna e oti kina, era lomavakacegu ra qai matadredredre na le 9,063 era tiko ena soqo nira marautaka na ivunau, vakatasuasua, kei na veivakatarogi.

A jeameni ni soqo, a nona tale ga na imatai ni vunau o Stephen Lett e lewe ni iLawalawa Dauvakatulewa ni iVakadinadina i Jiova. A vakamacalataka na veitikinivolatabu e tukuni kina na yagona vakaivakatakarakara na Kalou o Jiova qai vakatabakidua na nona ivakamacala ena sala e vakayagataka kina vakaivakatakarakara na matana, daligana, kei na ligana.

A vakamacala e liu ena 2 Veigauna 16:9, e tukuni kina ni matai Jiova “e veiraiyaki . . . e vuravura taucoko, me totaki ira vakaidina sa dodonu na lomadra vua.” Era uqeti na gonevuli mera qaravi Jiova tiko ga mai vu ni lomadra. A tukuni tale ga mera vakatotomuria na Kalou ena nodra raica na ka era vinaka kina eso tale. Oti a vakamacala o Stephen Lett ena 1 Pita 3:12, e tukuni kina ni dau vagolea na daligana o Jiova ena nodra vakamamasu na yalododonu. A uqeti ira na gonevuli mera masu tiko ga vei Jiova, mera nanuma tiko ni via rogoca dina o Jiova na nodra masu.

A vakamacalataka tale ga na Aisea 41:13, e yalataka kina o Jiova: “Sai au ko Jiova na nomu Kalou, ka’u na taura na ligamu i matau, ka kaya vei iko, Mo kakua ni rere; ka’u na vukei iko.” Ena nona kauai dina, a tukuna o Stephen Lett: “Vakasamataka na vosa veivakacegui oya i Jiova. E dodoka na ligana me taura na ligada.” A tukuna vei ira na gonevuli mera kua ni saqata na veivuke i Jiova, mera dau yalorawarawa ga mera vukei. A tukuna tale ga ni rawa mera vakatotomuri Jiova ena nodra dau dodoliga mera veivuke.

Sa qai wilika o Stephen Lett na Aisea 40:11 qai sureti ira na vakarorogo mera raitayaloyalotaka na loloma e vakavotui ena tikinivolatabu ya. A kaya: “E keveti keda ena ligana o Jiova, e kauti keda voli ena lomaserena.” Me uqeti keda vakacava oya? Era uqeti na gonevuli mera dau yalomalua me vaka na lami me kauti ira tiko ga kina o Jiova e lomaserena.

“E Tiko ena Saqa Qele qo e Dua na iYau Talei”

A vosa ena usutu vakaivolatabu qori o David Splane e lewe ni iLawalawa Dauvakatulewa. (2 Korinica 4:7) Na cava na iyau talei? Na kilaka kei na vuku? A tukuna o David Splane: “Sega, na iyau talei a tukuna tiko na yapositolo o Paula na ‘cakacaka vakaitalatala’ e ‘vakavotui kina na dina.’” (2 Korinica 4:1, 2, 5) A vakadreta vei ira na gonevuli o David Splane ni lima na vula era vuli kina sa vakarautaki ira ena nodra ilesilesi dokai ena cakacaka vakaitalatala. Na ilesilesi qori e dodonu me vakamareqeti.

A tukuna ni “saqa qele” e dusia na yagoda. Sa qai veidutaitaka na saqa qele kei na saqa koula. E sega ni vakayagataki vakalevu na saqa koula. Ia na saqa qele e kena inaki sara ga me vakayagataki. Ke da biuta na iyau talei ena dua na saqa koula, ena qoroi ruarua na saqa kei na iyau talei e toka e loma. A tukuna o David Splane: “Oni sega ni via rogo na gonevuli. Ni oni daukaulotu, oni na vagolei ira na tamata vei Jiova. Oni saqa qele, e vakaiyalayala na ka oni rawata.”

Ni tomana na nona ivakamacala ena vosa vakatautauvata, a tukuna o David Splane ni so na saqa qele ena gauna vakaivolatabu e dredre na nodra kamayavu, eso tale era boro vavaku ena makadre me kua ni kadiri. Na cava a via vakabibitaka e keri? Ena imatai ni vica na vula, era na sotava na daukaulotu eso na ka dredre era na vulica kina na vosota. Era na sega soti ni kauai se cudru nira vakalewai. A tukuna o David Splane: “O na vakila ni o rawa ni vosota e levu tale na ka o sotava.” O Jiova e solia vei ira na saqa qele na cakacaka vakaitalatala e vaka na iyau talei, e sega ni solia vei ira na agilosi. Sa qai tinia na nona ivunau ni kaya: “Qori e vakaraitaka ni nuitaki kemuni o Jiova.”

“Dou sa Cici Vata kei Ira na Tamata . . . ko na Qai Veiqati Vakaevei kei na Ose?”

“E vakacava na dede kei na totolo ni nomu cici?” a taroga o Samuel Herd e lewe ni iLawalawa Dauvakatulewa. Na cava a taroga kina qori vei ira na gonevuli? A vakatauvatana na ka era na sotava na gonevuli kei na veika a sotava na parofita o Jeremaia. A dredre me vosota na turaga yalodina qori na veika a sotava tiko ena gauna oya. Ia ena qai sotava e levu tale na veivakatovolei. A mani tarogi koya o Jiova: “Kevaka dou sa cici vata kei ira na tamata, ka ra sa vakaocataki iko, ko na qai veiqati vakaevei kei na ose?”​—Jeremaia 12:5.

A vakaibalebaletaka qori vei ira na gonevuli o Samuel Herd qai tukuna: “De dua o nanuma ni o cici vata tiko kei ira na ose ena veitarogi o cakava. Ia o cici vata tiko ga kei ira na tamata, sega ni ose. O na qai cici vata kei ira na ose ena nomu ilesilesi vakadaukaulotu, se o na sotava e levu na veika dredre o sega ni vakasamataka rawa ena gauna qo. Na cava ena yaco? Na veika o vulica e Kiliati e sa vakarautaki iko mo kua ni oca ni o cici vata kei ira na ose.” A uqeti ira na gonevuli mera saga mera kaukaua tiko ga vakayalo, mera dei ena nodra ituvatuva ni vuli iVolatabu kei na masu.

A tukuna o Samuel Herd ni so na daukaulotu era na sotava eso na ituvaki ena veivakayalolailaitaki se ra na sega ni kauaitaki ena cakacaka vakavunau. Eso tale era na tauvimate se ra nanuma ni sega ni ganiti ira na nodra ilesilesi. Ia a vakadeitaka vei ira na gonevuli ni tiko e dua ena vakaukauataki ira mera valuta na veika dredre ra qai kua ni soro. “Se o mani cici vata kei ira na tamata se na ose, mo nuidei ni o na vakacavara vinaka na veitaucici ena veivakaukauataki ni ligana qaqa na Kalou. O na vakayacora vinaka na nomu ilesilesi vakadaukaulotu me rokovi qai lagiti kina o Jiova.”

So Tale na Tikina ena Porokaramu

“Me Kakua ni Vica Walega.” O John Ekrann e lewe ni Komiti ni Tabana mai Merika a vakamacala ena kedrau ivolatukutuku na parofita o Ilaisa kei na yada erau vakarau kau vakabobula na luvena tagane. (2 Tui 4:1-7) A tu ga vua na yada e dua na saqa lailai ni waiwai. A talai koya o Ilaisa me lai kauta tale mai eso na saqa vei ira era tiko volekati koya, qai kaya: “Me kakua ni vica walega.” A vakayagataki Ilaisa o Jiova me vakatawana vakacakamana na waiwai ena saqa kece a kauta mai na yada. A volitaka na yada na waiwai, qai veirauti na ilavo a rawata me sauma kina nona dinau ratou qai bula tiko kina vakavuvale ena loma ni dua na gauna.

Na cava mera vulica e keri na gonevuli era vakarau lesi mera daukaulotu? Kena irairai ni sega ni digidigi na yada ni lai vaqara mai eso tale na saqa. A tukuna o John Ekrann “ni rairai kumuna na yada na saqa cava ga e rawa ni tawa kina na waiwai, de dua na kena ka levu ga na kena vinaka.” A uqeti ira sara na gonevuli mera ciqoma na ilesilesi cava ga e soli vei ira se mani levu se lailai, qai kaya: “Kua ni digidigi.” A vakadreti ira tale ga na gonevuli ni nona vakalougatataki vakalevu na yada a vakatau ena nona muria vinaka na ivakasala i Ilaisa. Na cava mera vulica kina na gonevuli? Na noda vakalougatataki vakalevu ena vakatau ena noda gugumatua kei na noda vakabauta. A tukuna o John Ekrann: “Kua ni dau tu vakasuka.”

“[E]ra sa Keda Madrai.” Na usutu qori e yavutaki ena Tiko Voli Mai na Lekutu 14:9 qai vosa kina o William Samuelson mai na Tabana e Qarava na Vuli Vakayalo. A vakabibitaka na nodrau ivakaraitaki vinaka o Josua kei Kelepi. Na “madrai” e vakayagataki tiko eke e vakaibalebaletaka ni rawarawa sara na nodra vakavuai na kai Kenani, qori ena vukei ira na Isireli qai vakaukauataki ira. Na cava mera vulica kina na gonevuli? E kaya o koya e vunau: “Ni oni vakaitavi ena cakacaka vakaitalatala ena veigauna se bera mai, moni okata na veika dredre oni sotava me sala oni vukei qai vakaukauataki kina.”

“Ena Dei na Nomu Vakabauta ni o Vakatavolei?” Dua vei ira na dauveivakavulici e Kiliati o Sam Roberson a vakamacala ena nona ivakasala na yapositolo o Paula ni so e ‘voca na nodra vakabauta.’ (1 Timoci 1:19) A uqeti ira na gonevuli mera bucina e lomadra eso tale me dei na nodra vakabauta na Kalou o Jiova. A kaya: “Na nomuni cakacaka e rawa ni vakatauvatani kei na ka e cakava na daunikaukamea.” Ena sala cava? Na daunikaukamea e sema vata na sinucodo me vakelei vinaka kina na waqa. O ira tale ga na daukaulotu mera vukei ira na gonevuli mera bucina na itovo vakayalo ena rawati kina na bula.

A tuvana me vaka na sinucodo e walu na itovo e volai ena 2 Pita 1:5-8. A tukuna o Sam­uel Roberson ke ra vukei ira na nodra gonevuli na daukaulotu mera raica na sala e vakaraitaka kina o Jiova na itovo oya, kena irairai ni na uqeti ira na gonevuli mera kabiti Jiova dei. Era na vosota na veika dredre cava ga e rawa ni vakatovolei kina na nodra vakabauta.

iRogo, Veivakatarogi

Dua tale na dauveivakavulici o Michael Burnett a tarogi ira na gonevuli e Kiliati mera vakamacalataka qai vakatasuasuataka eso na ka marautaki era sotava ena nodra cakacaka vakavunau. Era marau na vakarorogo mera rogoca na sala era vunau kina na gonevuli ena vanua ni volivoli, raraniwaqavuka, veivale, kei na vunau ena talevoni vua e dua a qiri cala.

O Michael Hansen e lewenivuvale e Peceli mai Merika a vakataroga e tolu na turaga sa vakayabaki na nodratou cakacaka vakadaukaulotu​—o Stephen McDowell mai Panama, Mark Noumair mai Kenya, kei William Yasovsky mai Paraguay. Eratou vakamacala ena usutu: “Marau ni Cakava na Lomai Jiova.” (Same 40:8) Me kena ivakaraitaki, a vakamacalataka o Mark Noumair eso na ka a vakamarautaki rau vakaveiwatini ena nodrau ilesilesi. Na nodrau veitokani kei ira na iVakadinadina i Jiova ena vanua erau veiqaravi kina e dua na ka erau marautaka dina. Erau marautaka tale ga na nodrau raica nira muria na veidusimaki na mataveitacini, na veisau lelevu era vakayacora ena nodra bula, kei na nona vakalougatataka o Jiova na nodra sasaga. A vakadeitaka vei ira na gonevuli ni levu na ka era na marautaka ena veigauna se bera mai.

Ni wilika oti e dua na lewe ni ika131 ni kalasi na nodra ivola totoka ni vakavinavinaka na gonevuli, a tinia na porokaramu o Stephen Lett ena nona uqeti ira na gonevuli mera vuku. A tukuna ni na “marau sara ga o Jiova” ke ra cakava oya. O ira na daukaulotu qo era na vakamarautaki Jiova dina nira qaravi koya ena yalodina ena vanua era lesi kina.​—Aisea 65:19.

[Mape ena tabana e 31]

VEIKA ME BALETA NA KALASI

10 vanua era cavutu mai kina

34.7 ivakatautauvata ni yabaki

19.0 ivakatautauvata ni yabaki mai na gauna e papitaiso kina

13.5 ivakatautauvata ni yabaki ena cakacaka vakaitalatala vakatabakidua

[Mape]

(Raica tale na ivola)

Era lesi na lewenikalasi ina vanua e volai toka e ra

NODRA ILESILESI NA LEWENIKALASI

BENIN

BRAZIL

BULGARIA

BURUNDI

CAMEROON

KENADA

CENTRAL AFRICAN REPUBLIC

JAMANI

GHANA

HONG KONG

IDONISIA

KENYA

LIBERIA

LITHUANIA

MALESIA

MOZAMBIQUE

NEPAL

PANAMA

PARAGUAY

SIERRA LEONE

SLOVAKIA

SAUCA AFERIKA

MERIKA

VENEZUELA

[iYaloyalo ena tabana e 30]

Era vakatasuasuataka tiko na gonevuli e Kiliati na ka e yaco ena cakacaka vakavunau

[iYaloyalo ena tabana e 31]

Nodra Tuvaitutu na Kalasi 131 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.