Nodra Tuvaitutu na ika129 ni Kalasi e Kiliati

“Qo na Nomuni Siga”

ENA 11 Seviteba, 2010, era tabili yani e rauta nira le 8,000 ena dua na soqo namaki​—oya na nodra tuvaitutu na gonevuli ni ika129 ni kalasi ni Watchtower Bible School of Gilead. E kaya vei ira na gonevuli o Samuel Herd e lewe ni iLawalawa Dauvakatulewa ni iVakadinadina i Jiova, “Qo na nomuni siga. E siga marautaki qai guilecavi dredre!”

Na “Daliga Rogo”

A vakadreta o Brother Herd ena itekivu ni porokaramu ni gadrevi vei ira na lotu vaKarisito kece mera ‘vakatudaliga’ ena Vosa ni Kalou. (Vosa Vakaibalebale 20:12) E tukuna o koya vei ira na lewenikalasi, “ena vica na vula sa oti oni a vakarorogo tiko vei Jiova, moni cakava tiko qori me tawamudu.”

Era na vakayagataka vinaka vakacava na daligadra na daukaulotu vou? “Ke ra vakatudaliga ena Vosa ni Kalou,” e kaya o Brother Herd. Qai tomana: “Levu na usutu ena talaucaki ena porokaramu qo ena yaga ena nomuni cakacaka vakaulotu ena veiyabaki mai qo.”

“Nuitaki Jiova ena Lomamu Taucoko”

A vosa ena ulutaga vakavure vakasama qo o Gerrit Lösch e lewe tale ga ni iLawalawa Dauvakatulewa. A sereka e levu na ivakaraitaki ni nodra nuitaki Jiova na tamata ni Kalou ena gauna makawa kei na gauna qo.

E vakabibitaka mera vakaraitaka tale ga “na daukaulotu na mataqali vakabauta va qori ena nodra ilesilesi.” E tomana: “De dua oni na vakasamataka, ‘ena rawa beka meu kila na nodra vosa? Au na matau beka ena ivakarau ni nodra bula? Au na vakanananu vakalevu i vale?’ ” Na cava oni nanuma? E vakadreti ira na lewenikalasi mera “nuitaki Jiova.”

A wilika tale ga na Vosa Vakaibalebale 14:​26, e kaya: “Sa tu vata kei na rerevaki Jiova na vakararavi matua.” Eda na nuitaki Jiova tiko ga nida vakasamataka e levu na sala e vakalougatataki keda kina.

Na iVolatabu e tukuna ni o koya e nuitaki Jiova ena vaka “na kau sa tei e na bati ni wai, . . . sa vakateteva na wakana ki na bati ni uciwai, ena sega ni kila ni sa yaco mai na katakata, a drauna talega ena drokadroka.”​—Jeremaia 17:​7, 8.

E macala gona, “se mani cava oni na sotava,” E kaya o Brother Lösch, “moni nuitaki Jiova tiko ga.”

“Vakatotomuri Ira na Agilosi Yalodina”

O Stephen Lett e lewe tale ga ni iLawalawa Dauvakatulewa a vakamacala ena ulutaga qo. Era ivakaraitaki vinaka vei keda na agilosi yalodina. E kaya, “ena vinaka meda vakatotomuria na ka kece e tukuna na iVolatabu me baleti ira.” Oti e qai vakaraitaka e va na nodra itovo na agilosi yalodina meda vakatotomuria​—nodra vosota, yalomalumalumu, nodra dauveivuke, kei na nodra yalodina.

E tukuna na iVolatabu ni dua na agilosi a vorata na ‘turaga ni matanitu o Perisia’​—e dua na timoni kaukaua​—me 21 na siga. (Taniela 10:13) A laurai vua na agilosi qori na vosota. E kaya o Brother Lett ni o keda tale ga na lotu vaKarisito “eda veivala [tiko] . . . kei ira na yalo ca tawarairai.” (Efeso 6:​12) E kaya vei ira na lewenikalasi, “Moni vala gona vakaukaua moni dei kina ena nomuni ilesilesi.”

Ni taroga o Manoa na tamai Samisoni vua na agilosi se o cei na yacana, a sega ni via tukuna. A vakaraitaka na agilosi qori na yalomalumalumu. (Dauveilewai 13:​17, 18) E kaya vei ira na lewenikalasi o Brother Lett: “Ni dua e via vakacaucautaki kemuni se qoroya na nomuni taledi, na yalomalumalumu ena uqeti kemuni moni vagolea ga na veivakacaucautaki vei Jiova kei na nona isoqosoqo.”​—1 Korinica 4:7.

Ni tiko voli o Jisu ena were o Kecisemani ni bera ni mate, a “rairai mai lomalagi e dua na agilosi me vakaukauataki koya.” (Luke 22:43) E dauveivuke na agilosi qori. E kaya o Brother Lett, “Moni masulaka moni kila na veika era gadreva ena yalava oni lesi kina, ena veivuke i Jiova oni na kila na ka moni cakava moni vukei ira kina.”

Eda rawa ni kaya ni dua na iwase levu ni agilosi e lomalagi era ivakaraitaki vinaka ni yalodina, ia e dua ga na iwase lailai era muri Setani ena nona talaidredre.​—Vakatakila 12:4.

A vakauqeti ira na gonevuli o Brother Lett, “Moni vorata na Tevoro me vakataki ira na agilosi yalodina.” Ke oni “vorata na Tevoro, ena qai dro tani vei kemuni.”​—Jemesa 4:7.

E Tolu Tale na Ka Talei ena Porokaramu

“Na Kalou na kaukauwa [vatu, NW] ni lomaqu.” Na ulutaga veivakauqeti qo e yavutaki ena Same 73:​26, a vakamacala kina o Gary Breaux, e lewe ni Komiti ni Valenivolavola ni Tabana ni iVakadinadina i Jiova mai Merika. A vakauqeti ira na gonevuli mera dau nuitaki Jiova. Ena vakasama cava e vaka kina na vatu o Jiova? E kaya o Brother Breaux, “ni kaukaua na cagi ena sega ni cagina na pepa e danui ena vatu. Ena vakasama vata qori, eda nuidei tale ga ni na vakataudeitaka na lomada o Jiova.” E macala ni dauveivakaisini na lomada qai rawa ni vakacalai keda nida vakatovolei. (Jeremaia 17:9) Na veisau ni draki, kakana, itokani vou ena vale ni daukaulotu​—qori eso na ituvaki e rawa ni nanuma kina e dua me cegu ena nona cakacaka vakaulotu. “Ena so na ituvaki e yaco ena gadrevi mo vakasamataka vinaka na ka mo cakava ni bera ni o vakatulewa,” e kaya o Brother Breaux. “Ena marautaka beka o Jiova na nomu digidigi se vakatulewa? Ke vakakina, o Jiova ena vaka na ‘vatu e lomamu.’ Ena dusimaka nomu ilakolako.”

“E Tiko Vei Iko na Vakabauta me Suasua na Yavamu?” Na usutu ni vunau i Sam Roberson e dua na qasenivuli e Kiliati e yavutaki ena Josua wase 3. Era takosova vakacava na le milioni na Isireli na dave ni Uciwai o Joritani? A tukuna vei Josua o Jiova me vakaroti ira na bete mera “tu vakadua e na Joritani.” Qai yalataka: “Ni sa tu e na wai ni Joritani na qeteqete ni yavadra na bete . . . ena qai mudu ni drodro na wai ni Joritani, . . . [e]na bini ki cake sara me vaka e dua na suva levu.” (Josua 3:​8, 13) E kaya o Brother Roberson vei ira na gonevuli: “Na Uciwai na Joritani e vaka na ilati ni nodra vakalougatataki na Isireli, eso tale ga na ituvaki ena nomuni bula ena vaka na ilati ni nomuni vakalougatataki ke oni vakalaiva.” Me kena ivakaraitaki, ena rairai dredre moni veimaliwai kei ira na nomuni itokani daukaulotu. Oni na walia vakacava? “Moni kauaitaka ga na cakacaka oni cakava tiko, sega ni o ira na tamata cakacaka.” A vakadreti ira na lewenikalasi o Brother Roberson: “Ke tiko vei kemuni na vakabauta me vakataki ira na bete a suasua na yavadra ena Joritani, ena vukei kemuni tale ga o Jiova moni vosota na ituvaki drakidrakita ena nomuni ilesilesi vakaulotu.”

“Vakataudeitaka na Lomamu.” Qo na ulutaga e vakamacala kina e dua tale na qasenivuli e Kiliati o William Samuelson. E yavutaki ena Vosa Vakaibalebale 16:​3, e kaya: “Mo vakalaiva vei Jiova na nomu cakacaka, ena vakataudeitaki kina na nanuma ni lomamu.” A tarogi ira na gonevuli o Brother Samuelson: “E vakaibalebaletaka beka na tikina qo mo sa na vakasavuliga qai ‘vakalaiva me cakava na nomu cakacaka’ o Jiova?” Sega. Na Vosa Vakaibalebale 16:1 e kaya: “Sa nei koya na tamata me vakarautaka na lomana.” E tomana o Brother Samuelson: “Ena sega ni vakarautaka vakacakamana o Jiova na lomamu. Ena vinakati mo vakadeitaka sara ga ni sa donu tiko na nomu ilakolako. Ni o vuli vakataki iko, masu, qai veitaratara wasoma kei na valenivolavola ni tabana, ena vinaka na nanuma ni lomamu, qai vakataudeitaka tale ga o Jiova.”

iRogo kei na Veivakatarogi

E oka tale ga ena ka era vulica na gonevuli mera cakacaka vakavunau vata kei na ivavakoso era lesi kina. A vakatarogi ira eso na gonevuli o Mark Noumair e dua tale ga na qasenivuli e Kiliati, mera vakamacalataka na ka era sotava. O ira na vakatarogi era vakabibitaka na yaga ni masu ena nodra kunei na yalomalumalumu ena yalava.

Kena ivakaraitaki, e dua na veiwatini erau a kana tiko ena valenikana. A raici rau sara e dua na tamata cakacaka ni valenikana oya ni rau masu tiko. E torovi rau qai taroga se rau iVakadinadina i Jiova. Ni rau tukuna ni vaka kina, a vakamacalataka sara ni a tuberi mai na vuvale iVakadinadina i Jiova, ia sa tagutuva na nona dau veimaliwai kei ira. A basulawa qai bala i valeniveivesu. E vinakata me vulici Jiova tale. E tukuna tale ga vei rau ni bera ni rau lako yani, a kerei Jiova ena masu me vakadodonutaka tale na nona ivakarau ni bula. A sauma o Jiova na nona masu!

O Rudi Hartl mai na tabana e sauma na taro vakaivolatabu kei na nodra taro na dauwiliwili (Writing Correspondence Department), a vosa ena usutu, “Dou Tovolea Mada Ka Raica ni sa Yalovinaka o Jiova,” qai vakatarogi Wayne Wridgway mai Mozambique, Jason Reed mai Chile, kei Kenji Chichii mai Nepal. Eratou sa vuli oti kece e Kiliati. Eratou vakamacalataka eso na ka dredre eratou vakila ena imatai ni gauna ratou lako kina ena nodratou cakacaka vakaulotu​—na vulici ni dua na vosa vou, itovo vakavanua, se na vakanananu i vale. “Keirau valuta vakaveiwatini na ituvaki qori ni keirau veimaliwai kei ira ena ivavakoso ena gauna ga keirau yaco yani kina,” e kaya o Brother Chichii. “Ni keirau cakava qori e vakalailaitaka na neirau dau vakanananu i vale.”

Nira sa taura na nodra ilesilesi na 56 na gonevuli, e dua vei ira a wilika na ivola ni vakavinavinaka vakaciriloloma. E dua na iwase ni vola qori e vakamuai vei ratou na iLawalawa Dauvakatulewa: “Keimami sa mai vakadinadinataka na lewenikalasi na nomudou yalololoma, gugumatua ena kena vakarautaki na ituvatuva ni vuli, dau veisikovi kei na nomudou veidusimaki vakayalo. Na loloma dou vakaraitaka, vosota, yalomalumalumu kei na veikauaitaki, e veivakauqeti dina me keimami na vakatotomuria ena vanua keimami lesi kina.”

[Tikina bibi ena tabana e 28]

“Ni dua e via vakacaucautaki kemuni . . . , moni vagolea ga na veivakacaucautaki vei Jiova”

[Tikina bibi ena tabana e 29]

“Eso tale ga na ituvaki ena nomuni bula ena vaka na ilati ni nomuni vakalougatataki ke oni vakalaiva”

[Chart/Mape ena tabana e 31]

VEIKA ME BALETA NA KALASI

9 vanua era cavutu mai kina

56 gonevuli

28 veiwatini

33.0 ivakatautauvata ni yabaki

17.9 ivakatautauvata ni yabaki mai na gauna e papitaiso kina

13.3 ivakatautauvata ni yabaki ena cakacaka vakaitalatala vakatabakidua

[Mape]

(Raica tale na ivola)

Era lesi na lewenikalasi ina 25 na vanua e volai toka e ra:

NODRA ILESILESI NA DAUKAULOTU

BOLIVIA

BOTSWANA

BULGARIA

CONGO (KINSHASA)

CÔTE D’IVOIRE

GAMBIA

JAMANI

IDIA

IDONISIA

KENYA

LIBERIA

MASITONIA

MADAGASCAR

MALESIA

MOZAMBIQUE

PANAMA

PERU

POLADI

ROMANIA

SERBIA

SIERRA LEONE

SWAZILAND

TANZANIA

UGANDA

ZIMBABWE

[iYaloyalo ena tabana e 30]

E vakatasuasuataka tiko na gonevuli e Kiliati na ka a yaco ena cakacaka vakavunau

[iYaloyalo ena tabana e 31]

Nodra Tuvaitutu na Kalasi 129 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.

(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.

(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.

(4) Fitzpatrick, M.; Najdzion, B.; Skallerud, L.; Harris, A; Harris, S.; Budden, R.; Paramo, Y; Skallerud, K.

(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.

(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.

(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.