Na Cava e Vakalaiva Tiko Kina na Daurogo Masu na Rarawa?

ESO era vakatitiqataka ni bula dina tiko na Kalou, dina ga nira dau masu. Na cava era dau vakatitiqa kina? De dua era raica na levu ni rarawa ena vuravura qo. O bau vakasamataka na vuna e vakalaiva kina na Kalou na rarawa?

Vakacava eda rawa ni tukuna ni a nakita na Kalou na nona buli keda meda sega ni uasivi da qai sotava na veika rarawa? E macala ga nida na sega ni via doka e dua na kalou e nona inaki meda sotava na rarawa. Ia vakasamataka mada qo: Kaya mada ni o vakaraica tiko e dua na motoka vou ni o taleitaka na kena irairai, ia o qai raica ni kabibi tu e dua na yasana, vakacava o na kaya ni ratou nakita qori na dau buli motoka? Sega! O na tukuna ga ni ratou bulia vakavinaka, ia e dua tale na ka a vakacacana.

E vakatale ga kina noda qoroya na totoka ni veikabula, da qai raica ena gauna vata qori na tikoyavavala kei na veidabui eda sotava tu na kawatamata, na cava eda rawa ni tukuna kina? E tukuna na iVolatabu ni a buli rau na imatai ni veiwatini na Kalou me rau uasivi, ia e muri rau qai vakavuna ga na nodrau leqa. (Vakarua 32:4, 5) E itukutuku marautaki dina ni yalataka na Kalou me vakavinakataka na leqa—me vakalesuya tale na bula uasivi vei ira na kawatamata talairawarawa. Ia na cava e sa rui berabera tale kina ni cakava qori?

Cava e sa Rui Balavu Tale Kina?

Ena saumi na taro qori nida raica se o cei e dodonu me liutaka na kawatamata. E sega ni inaki i Jiova me liutaki koya vakataki koya na tamata. O koya ga e dodonu me nodra iLiuliu. E tukuna sara ga na iVolatabu: “Sa sega ni vu mai vua na tamata sa lako tu me lewa na nonai lakolako.” (Jeremaia 10:23) Ka ni rarawa, ni rau vakatulewataka na imatai ni veiwatini me rau talaidredre ena veiliutaki ni Kalou. Nodrau beca na lawa rau sa okati kina me rau ivalavala ca. (1 Joni 3:4) Qori e vakavuna me rau sega ni uasivi, e vakavuna tale ga na nodrau leqa kei na nodra leqa na nodrau kawa.

Sa vica vata na udolu na yabaki e vakatara tiko kina o Jiova mera liutaki ira ga na tamata, ia e laurai ena veigauna sa oti ni sega ni rawa vei keda na tamata meda liutaki keda ga. E macala eke ni matanitu vakatamata e vakavuna tiko ga na noda rarawa. E se sega ni dua e se bau vakaotia na ivalu, basulawa, veika tawadodonu kei na tauvimate.

Ena Vakaotia Vakacava na Kalou na Rarawa?

E yalataka na iVolatabu ni sa voleka ni kauta mai na Kalou e dua na vuravura vou ni yalododonu. (2 Pita 3:13) Ena vakatarai mera bula ga kina o ira era vakayagataka nodra galala ni vakatulewa mera lomani ira eso tale kei na Kalou.—Vakarua 30:15, 16, 19, 20.

Ena “siga ni lewa” sa roro voleka tiko mai, e tukuna na iVolatabu ni na vakaotia na rarawa na Kalou qai vakarusai ira era vakavuna tiko. (2 Pita 3:7) Oti qori sa na qai liutaki ira na kawatamata talairawarawa o Jisu Karisito, na iLiuliu digitaki ni Kalou. (Taniela 7:13, 14) Na cava ena rawati ena veiliutaki i Jisu? E tukuna na iVolatabu: “Ko ira na yalomalumalumu era na taukena na vanua; ka na daumarau tiko e na veivakacegui vakaidina.”—Same 37:11.

Ni tui vakalomalagi o Jisu, ena vakaotia na rarawa—wili kina na tauvimate, qase kei na mate—e vu mai na nodra talaidredre na tamata vei Jiova, na “waivure ni bula.” (Same 36:9) O Jisu ena vakabulai ira kece era ciqoma nona veiliutaki vakayalololoma. Ena nona veiliutaki, qo e rua na ka e yalataka na iVolatabu ni na yaco dina:

◼ “Na lewe ni koro ena sega ni kaya, Ka’u sa tauvi mate: o ira na tamata era sa tiko kina ena sa bokoci na nodrai valavala ca.”—Aisea 33:24.

◼ “[Na Kalou] ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.”—Vakatakila 21:4.

E macala ga ni veivakacegui noda kila ni sa voleka ni vakayacora na Kalou nona yalayala me vakaotia na rarawa. Ena gauna mada qo, meda nuidei ni na rogoca na noda masu, dina ni se vakalaiva tiko vakalekaleka me yaco na rarawa.

E bula dina tiko na Kalou, e rawa ni rogoci iko ni o talaucaka vua na nomu rarawa kei na nomu lomabibi. Dua na ka nona vinakata mo marautaka na gauna e sa na oti kina vakadua na lomaleqa kei na rarawa.