Taro na Dauwiliwili

E tukuni tiko beka ena Maciu 19:10-12 ni o ira era vakatulewataka mera dawai tu ga era rawata vakacakamana na isolisoli ni bula vakadawai?

▪ Vakasamataka mada na gauna a vakamacalataka kina o Jisu na ka e baleta na bula vakadawai. Era gole vua na Farisi ra qai tarogi koya ena ka e vauca na veisere, a vakamacalataka vakavinaka vei ira o Jisu na ivakatagedegede i Jiova me baleta na vakawati. A vakadonui ena Lawa me vola na ivola ni veisere e dua na tagane ke raica “e dua na ka sa sega ni savasava” vei watina, ia a sega ni va qori mai na ivakatekivu. (Vkru. 24:1, 2) Sa qai tukuna o Jisu: “Na tagane e sereka na watina qai vakawati tale e sa wili me veibutakoci ke sega ni veidauci o watina.”​—Maciu 19:3-9.

Nira rogoca qori na tisaipeli, era kaya: “Ke va qori na vakawati, sa vinaka cake ga me kua na vakawati.” E sauma o Jisu: “E sega ni tamata kece era muria na vosa qo, o ira ga e soli vei ira. Eso na tagane era sega ni vakawati ni vakaleqai na yagodra nira se qai sucu mai, so era sega ni vakawati nira sele, eso tale era sega ni vakawati ena vuku ni matanitu vakalomalagi. Vei ira era rawata qo, mera cakava sara.”​—Maciu 19:10-12.

Eso era dawai tu ga ni vakaleqai na nodra gacagaca ni vakatubukawa nira se qai sucu, se yaco qori nira sotava e dua na vakacalaka, se ra sele. Ia eso tale e sega ni va qori na kedra ituvaki, ia era sa vakatulewataka ga mera dawai. E rawa nira vakawati, ia era lewai ira vinaka ra qai dawai tiko ga “ena vuku ni matanitu vakalomalagi.” Me vakataki Jisu ga, era digia na bula vakadawai me levu kina na gauna era vakayagataka ena veika e vauca na Matanitu ni Kalou. Era sega ni sucukaya mai na isolisoli qori, e sega tale ga ni soli vei ira. Ia era rawata ga na isolisoli qori nira vakatulewataka sara ga mera dawai.

A tomana na yapositolo o Paula na ka e tukuna o Jisu ena nona kaya ni o ira kece na lotu vaKarisito​—dawai se vakawati​—e rawa nira qarava vinaka na Kalou, ia era “kalougata vakalevu” o ira e ‘dei na lomadra’ mera kua ni vakawati. Ena sala cava? O ira na vakawati e dodonu mera wasea na nodra gauna kei na nodra igu vei ira na watidra, mera qaravi ira, mera vakamarautaki ira tale ga. Ia nira galala mai na icolacola qori na lotu vaKarisito dawai, era rawa kina ni vakaogai ira ena cakacaka ni Turaga. Era raica ni “isolisoli” ni Kalou na nodra bula vakadawai.​—1 Kor. 7:7, 32-38.

Koya gona, e kaya na iVolatabu ni sega ni rawata vakacakamana e dua na lotu vaKarisito na isolisoli ni bula vakadawai. Ia e rawata na isolisoli qori ni vakatulewataka me dawai tu ga me kua kina ni vakalatilati e dua na ka ena nona cakava na veika e vauca na Matanitu ni Kalou. E levu nikua era vakadeitaka e lomadra mera dawai tu ga ena inaki qori, e dodonu gona meda dau vakayaloqaqataki ira.