“O Koya sa Rawata”
1 Nona vakamacalataka tiko o Jisu na bula vakawati vei ira nona tisaipeli, a kaya kina ni bula vakadawai e ‘isolisoli.’ A qai kaya: “O koya sa rawata me muria oqori, me muria ga.” (Maciu 19:10-12, VV) Ena vica na yabaki ni oti oya, a vola na yapositolo o Paula na yaga ni bula vakadawai, qai uqeti ira mera muria nona ivakaraitaki mera kua ni vakawati. (1 Kor. 7:7, 38) E vuqa nikua era “rawata” na bula vakadawai ra qai marautaka na kena yaga. Na cava e so na ka era marautaka?
2 “Sega ni Lomaocaoca” ena Veiqaravi: E kila o Paula ni nona bula vakadawai e rawa ni qaravi Jiova kina qai sega ni lomaocaoca. E vaka kina nikua, ni rawa vua e dua na tacida tagane dawai me lai vuli ena Koronivuli ni Vuli Veiqaravi Vakaitalatala, e rawa ni cakacaka vakapainia, vulica e dua tale na vosa, toki ena vanua e gadrevi kina vakalevu na cakacaka, veiqaravi e Peceli, se cakava e so tale na itavi dokai. Ena rairai levu nona gauna me vulica kina vakatitobu qai vakasamataka na iVolatabu, ena rawa tale ga vua me veitaratara kei Jiova ena masu e vu mai lomana. Ena levu tale ga nona gauna me na tu vakarau me veivuke ke gadrevi vaka kina. Ena “yaga” sara ga vua.—1 Kor. 7:32-35; Caka. 20:35.
3 E veivakalougatataki dina na qaravi Kalou e sega ni lomaocaocataki. Ni oti e 27 na yabaki e Kenya, a vola e dua na tacida yalewa dawai: “E levu na noqu itokani, e levu tale ga na cakacaka! Keimami dau cakacaka vata, keimami veigadivi tale ga. . . . E rawa kina meu vakayagataka na noqu galala meu vakaogai au kina ena cakacaka vakaitalatala, qo e solia vei au na marau levu.” E kuria: “Sa qai titobu tiko ga na noqu veiwekani kei Jiova ena veiyabaki.”
4 Vakayagataka Vinaka: E kaya o Jisu ni dodonu me inaki ni bula vakadawai oya na cakacaka ena “vuku ni matanitu vakalomalagi.” (Maciu 19:12) Se mani isolisoli cava ga, na vakayagataki vinaka ni bula vakadawai ena yaga qai rawati kina na marau. Era vakila e vuqa na dawai na talei ni bula nira vakayagataka vakavinaka, ra qai vakararavitaka vei Jiova na nodra vuku kei na kaukaua.