Me Savasava Nomuni iValavala Kece

1, 2. (a) Na cava e namaki ena nodra ivalavala na dauveiqaravi ni Kalou? (b) Na taro cava ena saumi ena ulutaga qo?

O JIOVA e uqeta na yapositolo o Pita me semata na savasava e vakabibitaki tiko ena ivola na Vunau ni Soro kei na kena bibi me savasava na noda ivalavala na lotu vaKarisito. (Wilika 1 Pita 1:14-16.) E namaka na “Kalou Savasava” o Jiova mera saga ena nodra vinaka kece na lumuti kei na ‘so tale na sipi’ me savasava na nodra ivalavala kece, sega ni vica ga.—Joni 10:16.

² Ena yaga vakalevu nida dikeva tale e levu na iyau vakayalo ena Vunau ni Soro. Nida bulataka tale ga na ka eda vulica kina, ena savasava na noda ivalavala kece. Qo eso na taro eda na veivosakitaka: Na cava meda kua kina ni soro? Na cava eda vulica ena Vunau ni Soro me baleta noda tokona na veiliutaki cecere i Jiova? Na cava eda vulica ena vakacaboisoro?

KUA NI SORO

3, 4. (a) Na cava meda kua kina ni soro ni muria na lawa kei na ivakavuvuli ena iVolatabu? (b) Na cava meda kua kina ni veisausaumi se katona na ca?

³ Ke da via vakamarautaki Jiova, e bibi meda muria dei nona lawa kei na ivakavuvuli, meda kua ni raica vakamamada, se da soro. Eda sega ni vauci ena Lawa e soli vei Mosese, ia na kena ivakavuvuli e vakayalomatuataki keda meda kila na ka e donu se cala ena mata ni Kalou. Kena ivakaraitaki, era vakaroti na Isireli: “Mo kakua ni cudruva, se naki ca me saumi ira na luvedra na kai nomu, mo lomani koya ga na kai nomu me vaka ko sa lomani iko: Koi au ko Jiova.”—Vunau 19:18.

⁴ E sega ni vinakata o Jiova meda veisausaumi, e sega tale ga ni vinakata meda katona na ca. (Roma 12:19) Nida beca na lawa kei na ivakavuvuli ni Kalou, ena rawa ni beci kina o Jiova qai marau na Tevoro. Ke nakita e dua me vakacudrui keda, meda kua ni vaka na saqa e katona na ca. E dokai keda o Jiova ni buli keda meda “saqa qele,” e tiko kina na iyau talei ni cakacaka vakaitalatala. (2 Kor. 4:1, 7) E sega ni lewe ni saqa qori na ca e vaka na waikama!

5. Na cava eda vulica vei Eroni kei na nodrau mate na luvena tagane? (Raica na imatai ni iyaloyalo.)

⁵ E volatukutukutaki ena Vunau ni Soro 10:1-11 na veika rarawa e sotava na vuvale nei Eroni. De ratou rarawataka ni kani rau o Netapi kei Epaiu na bukawaqa mai lomalagi ena valeniveitavaki. E vakatovolei sara ga kina na vakabauta nei Eroni kei na nona vuvale me ratou kua ni lolositaki rau na sa mate! Vakacava o iko, o savasava tiko ga ni o sega ni maliwai ira na lewe ni nomu vuvale, se so tale era vakasivoi?—Wilika 1 Korinica 5:11.

6, 7. (a) Nida vakatulewataka meda vakaitavi ena lotu ni vakamau, na tikina bibi cava e vinakati meda vakasamataka? (Raica na ivakamacala e ra.) (b) Eda na rawa ni vakamacalataka vakacava vei ira na wekada era sega ni tiko ena dina nida na sega ni vakaitavi ena lotu ni vakamau?

⁶ Ena rairai sega ni ca sara na ka eda sotava ni vakatauvatani kei Eroni kei na nona vuvale. Ia vakacava ke da sureti meda tiko se vakaitavi ena lotu ni vakamau ni wekada e sega ni tiko ena dina? Sega ni dua na ivakaro matata vakaivolatabu e vakatabuya meda tiko kina. Vakacava, e tiko eso na ivakavuvuli vakaivolatabu ena yaga ena noda vakatulewa?a

⁷ Era na lomatarotarotaka na wekada era sega ni tiko ena dina na noda saga meda savasava vei Jiova ena tikina qori. (1 Pita 4:3, 4) E macala nida na saga meda kua ni vakacudrui ira, ia ena vinaka meda vosa vakayalovinaka da qai vosa vakadodonu. Rawa ni caka qori ni bera ni vakayacori na soqo. Meda vakavinavinakataki ira da qai kaya nida marautaka nira sureti keda meda vakaitavi ena vakamau. Oti eda rawa ni kaya, nida vakaitavi ena ka vakalotu ena rawa ni vakaleqa na kena marautaki na soqo, ena rawa ni vakamaduataki ira, se o ira na tiko kina. Nida cakava qori eda na sega ni soro ena noda vakabauta.

TOKONA NA VEILIUTAKI CECERE I JIOVA

8. E vakabibitaki vakacava ena Vunau ni Soro na veiliutaki cecere i Jiova?

⁸ E vakabibitaki ena ivola na Vunau ni Soro na veiliutaki cecere i Jiova. Na lawa e tiko ena ivola qori e vakacerecerei kina vakatolusagavulu vakacaca o Jiova. E kila qori o Mosese qai vakayacora na ka e vakaroti koya kina o Jiova. (Vunau 8:4, 5) O keda tale ga, meda vakayacora tiko ga na ka e vinakata vei keda na noda Turaga Cecere Duadua o Jiova. E tokoni keda kina na nona isoqosoqo. Ia ena rawa ni vakatovolei na noda vakabauta nida tiko duadua me vakataki Jisu ni vakatovolei ena vanua talasiga. (Luke 4:1-13) Ke da vakasamataka na veiliutaki cecere ni Kalou da qai vakararavi vua, ena sega ni dua ena vakasoroi keda se vakarerei keda.—Vkai. 29:25.

9. Na cava era cati kina na dauveiqaravi ni Kalou ena veimatanitu?

⁹ Eda vakacacani ena veimatanitu e veiyasa i vuravura nida imuri i Karisito da qai iVakadinadina i Jiova. Meda namaka qo ni tukuna o Jisu vei ratou nona tisaipeli: “Era na vakacacani kemudou na tamata ra qai vakamatei kemudou, era na cati kemudou na veimatanitu ena vuku ni yacaqu.” (Maciu 24:9) Nida cati, eda vosota meda vunautaka na itukutuku vinaka ni Matanitu ni Kalou, da qai savasava tiko ga ena mata i Jiova. Eda dau dina, eda savasava da qai muria na lawa. Ia na cava eda cati kina vakalevu? (Roma 13:1-7) Ni noda Turaga Cecere Duadua o Jiova! Eda qaravi “koya duadua ga” da qai sega ni soro ni muria na nona lawa kei na ivakavuvuli dodonu.—Maciu 4:10.

10. Na cava e yaco ni soro koso e dua na tacida?

¹⁰ Eda ‘sega tale ga ni vakavuravura,’ nida tawaveitovaki ena ivalu kei na veika vakapolitiki. (Wilika Joni 15:18-21; Aisea 2:4.) Eso era yalataki ira vua na Kalou era soro. Levu era veivutuni ra qai veiwekani vinaka tale kei na Tamada vakalomalagi dauloloma. (Same 51:17) E vica era sega ni veivutuni. Kena ivakaraitaki, ena iKarua ni iValu Levu era soqona e 160 na tacida na vakailesilesi. O ira qo era yabaki 45 lako sobu era vesu vakatawadodonu ena valeniveivesu kece mai Hungary ra qai kau ena dua na tauni. Era vakaroti ira mera curu ena mataivalu. Era dei na tacida yalodina nira na sega ni curu, ia e ciwa era bubului mera curu ra qai vakadonuya mera dara na kena isulu. Oti tale e rua na yabaki, e lesi e dua vei ratou na soro me dua vei ira na sotia ena vanai ira na tacida yalodina. E maliwai ira e dua na tacina dina! Ia e sega ni vakayacori na veivakamatei.

CABORA VEI JIOVA NA KA VINAKA DUADUA

11, 12. E yaga vakacava vei keda na lotu vaKarisito nikua na ka e tukuna o Jiova vei ira na Isireli me baleta na vakacaboisoro?

¹¹ E vakamacalataki ena Lawa e soli vei Mosese na mataqali isoro mera cabora na Isireli. (Vunau 9:1-4, 15-21) Me kua ni ca na isoro, ni dusia na isoro uasivi i Jisu. E tiko tale ga na ka me vakayacori ena mataqali isoro e cabori. Kena ivakaraitaki, raica mada na ka e vinakati vua e dua na tinanigone se qai vakasucu. E tukuni ena Vunau ni Soro 12:6: “Ni sa oti na nona siga sa vakasavasavataki kina, e na vuku ni gonetagane, se goneyalewa, me qai kauta mai ko koya e dua na lami sa yabaki dua ga mei soro kama, ka dua na ruve sa gone se na soqe, mei soro ni valavala ca, ki na katuba ni vale ni veitavaki, vua na bete.” E matata na ivakaro ni Kalou, ia e laurai ena Lawa na nona loloma kei na yalorawarawa. Ke sega ni rawata na tinanigone e dua na sipi, e rawa ni cabora e rua na soqe se rua na ruve gone. (Vunau 12:8) E dina ni dravudravua, ia e lomani qai taleitaki me vakataki koya ga e kauta na isoro saulevu. Na cava eda vulica kina?

¹² E uqeti ira nona itokani vakabauta na yapositolo o Paula mera cabora vua na Kalou “na isoro ni veivakacaucautaki.” (Iper. 13:15) Me tukuna raraba na tebenigusuda na yaca tabu i Jiova. Era veivosaki vagalu na tacida didivara mera vakacaucautaka kina na Kalou. O ira na tauvimate kei ira na malumalumu era vakacaucautaki koya nira volavola, vunau ena talevoni, vunau vei ira na veiqaravi, kei ira na veisiko yani. Noda isoro ni veivakacaucautaki, oya noda vakacaucautaki Jiova nida tukuna na yacana kei na itukutuku vinaka, me veiganiti kei na keda ituvaki kei na ka eda rawata. Io, e bibi me ka vinaka duadua.—Roma 12:1; 2 Tim. 2:15.

13. Na cava meda ripotetaka kina noda cakacaka vakaitalatala?

¹³ Noda isoro ni veivakacaucautaki oya na ka eda cabora mai vu ni lomada vua na Kalou nida lomani koya. (Maciu 22:37, 38) Ia eda kerei meda ripotetaka na noda cakacaka vakaitalatala. Meda raica gona vakacava na ituvatuva qo? Na ripote eda solia e veivula e veisemati kei na noda qarava na Kalou. (2 Pita 1:7) Sega ni dodonu me dua e vakaitavi ena voraki ena cakacaka vakaitalatala ena nona nanuma me levu wale ga kina na aua e vola ena nona ripote. Na dautukutuku mada ga e vakaitikotiko ena valenimalumalumu se na dautukutuku e sa sega ni rawata na veitosoyaki, e rawa ni ripotetaka na caca ni aua, e rawa sara mada ga ni ripotetaka e 15 na miniti ena dua na vula. E taleitaka o Jiova na vica na miniti qori me nona isoro vinaka duadua na dautukutuku me vakaraitaka nona lomani koya qai vakavinavinakataka ni dua na nona iVakadinadina, na itavi marautaki duadua. Me vakataki ira na Isireli era sega ni cabora rawa eso na isoro saulevu, se rawa tiko ga nira ripotetaka nodra cakacaka na dauveiqaravi talei i Jiova e lailai na ka era rawata. Noda ripote yadua ni cakacaka ena wili vata kei na ripote kece mai na veiyasa i vuravura me vukea na isoqosoqo me tuvanaka na cakacaka vakavunau ena veigauna se bera mai. Vakacava sa rui sivia na ka e namaki vei keda nida ripotetaka noda cakacaka vakavunau?

NODA IVAKARAU NI VULI KEI NA ISORO NI VEIVAKACAUCAUTAKI

14. Vakamacalataka na vuna meda dikeva tale kina na ivakarau ni noda vuli.

¹⁴ Nida veivosakitaka na iyau vakayalo ena Vunau ni Soro, o na rairai vakasamataka, ‘Au sa qai kila na vuna e okati kina na ivola qo ena Vosa e vakavuna na Kalou.’ (2 Tim. 3:16) O rawa ni saga ena gauna qo mo savasava, ia e sega wale ga ni vinakata qori o Jiova, ni dodonu ga meda solia vua noda vinaka kece meda vakamarautaki koya. De dua na ka o vulica ena rua na ulutaga qo mai na Vunau ni Soro ena vakalevutaka nomu via vakekeli vakatitobu ena iVolatabu. (Wilika Vosa Vakaibalebale 2:1-5.) Mo dikeva tale mada na ivakarau ni nomu vuli qai masulaka. O vinakata dina me vakadonuya o Jiova na nomu isoro ni veivakacaucautaki. Vakacava, e dau tarova se vakaleqa nomu toso vakayalo na porokaramu ni iyaloyalo, qito ena vidio, qito, se ka o taleitaka? Ke vaka kina, ena yaga dina mo vakasamataka vakatitobu na veika e tukuna na yapositolo o Paula e volai ena ivola na Iperiu.

15, 16. Na cava e vosa vakadodonu kina o Paula ni volavola vei ira na lotu vaKarisito Iperiu?

¹⁵ E vosa vakadodonu o Paula ena gauna e volavola kina vei ira nona itokani lotu vaKarisito Iperiu. (Wilika Iperiu 5:7, 11-14.) E sega ni wereubiubi! E tukuna vei ira nira sa via “didivara mai.” Na cava e vosa kina vakadodonu o Paula? E vakaraitaka ni lomani ira o Jiova qai kauaitaki ira na lotu vaKarisito era viagunu sucu tiko ga mera bula kina. E bibi na yavu ni ivakavuvuli vaKarisito. Ia e yaga na “kakana dina” me tubu kina vakayalo e dua na lotu vaKarisito me matua.

¹⁶ Sa dodonu mera toso na Iperiu mera veivakavulici, ia era vinakata me dua tale e vakavulici ira. Na vuna? Era sega ni via kania na “kakana dina.” Mo taroga gona: ‘Dau donu noqu rai me baleta na kakana dina vakayalo? Au dau vakayagataka? Seu sega ni dau masu qai vakekeli vakatitobu ena iVolatabu? Ke dina qori, e rawa ni vu ni leqa na ivakarau ni noqu vuli?’ Eda sega wale ga ni vunau vei ira na lewenivanua, eda vakavulici ira mera tisaipeli.—Maciu 28:19, 20.

17, 18. (a) Na cava meda kania tiko ga kina na kakana dina vakayalo? (b) Eda na raica vakacava na gunu nida vakarau lako ina soqoni vaKarisito?

¹⁷ Levu vei keda e sega ni rawarawa noda vulica na iVolatabu. Eda kila ni sega ni dau vakavuna o Jiova me ora na lomadra na nona tamata me rawa nira vulica kina na iVolatabu. Ia ke mani vica vata sara na yabaki na noda qaravi Jiova se wale tiko ga qo, e bibi meda vakayagataka tiko ga na kakana dina vakayalo. E yaga dina qori nida saga tiko meda savasava.

¹⁸ Me rawa nida savasava, e dodonu meda vakasamataka vinaka na ka e tukuni ena iVolatabu da qai muria na ka e tukuna vei keda na Kalou. Vakasamataki rau na luvei Eroni o Netapi kei Epaiu, rau vakamatei ni rau cabora na “buka waqa tani,” de dua rau cakava qori ni rau mateni tu. (Vunau 10:1, 2) Rogoca na ka e qai tukuna na Kalou vei Eroni. (Wilika Vunau ni Soro 10:8-11.) Kena ibalebale ya ni sega ni dodonu meda gunu da qai lako ina soqoni vaKarisito? Vakasamataka mada qo: Eda sega ni vauci ena Lawa. (Roma 10:4) Ena so na vanua, era dau gunu vakalailai na tacida ena gauna ni kana ra qai lako ina soqoni. E gunuvi e va na bilo waini ena Lakosivia. Ni tauyavutaka o Jisu na iVakananumi, e tukuna vei ratou nona yapositolo me ratou gunuva na waini e vakatakarakarataka nona dra. (Maciu 26:27) Ia e vakacala na iVolatabu na gunu vakasivia kei na mateni. (1 Kor. 6:10; 1 Tim. 3:8) Levu na lotu vaKarisito era sega sara ga ni gunu nira vakarau vakaitavi ena dua na veiqaravi tabu, ni sega ni vakadonuya nodra lewaeloma. Duidui na ka e dau caka ena veivanua, ia e bibi vei keda na lotu vaKarisito meda “vakatakilakilataka na ka e tabu kei na ka e sega ni tabu,” meda vakamarautaka na Kalou nida savasava tiko ga.

19. (a) Na cava meda nanuma tiko nida sokalou vakavuvale se vuli vakataki keda? (b) Na cava o na cakava mo savasava tiko ga kina?

¹⁹ Ena kune e levu na iyau vakayalo ke o vakekeli ena Vosa ni Kalou. Vakayagataka na iyaya ni vakekeli mo vakavinakataka kina nomu sokalou vakavuvale kei na vuli vakataki iko. Vakalevutaka nomu kilai Jiova kei na nona inaki. Toro volekati koya. (Jeme. 4:8) Masuta na Kalou me vaka e lagata na daunisame: “Mo ni vakamataraitaki au, me’u kunea na ka e veivakurabuitaki e na nomuni vunau.” (Same 119:18) Kua ni soro ni muria na lawa kei na ivakavuvuli ena iVolatabu. Yalorawarawa mo muria na lawa ni “Kalou Savasava” o Jiova, qai gumatuataka na “cakacaka bibi ni kena tukuni na itukutuku vinaka ni Kalou.” (1 Pita 1:15; Roma 15:16) Vakaraitaka ni o savasava tiko ga ena iotioti ni veisiga dredre qo. Me savasava mada ga na noda ivalavala kece da qai tokona na veiliutaki cecere ni noda Kalou savasava o Jiova.