‘Qo e Salavata kei na Nomuni iNaki’

1. Na cava e ‘marau kina vakalevu’ o Jisu? (Raica na iyaloyalo i cake.)

RAITAYALOYALOTAKA mada ni o raici Jisu Karisito ni ‘marau vakalevu qai sobuti koya na yalo tabu.’ De dua e matadredredre. Na cava e matadredredre kina? E tala e 70 na nona tisaipeli mera vunautaka na itukutuku vinaka ni Matanitu ni Kalou. E vinakata sara ga me kila se ra qarava vakacava na nodra itavi. Levu sara na meca kaukaua ni itukutuku vinaka, me vakataki ira na vunivola kei na Farisi era qaseqase qai vuli vinaka. Era uqeta e levu mera beci Jisu ni dua ga na matai kei ira na nona tisaipeli nira ‘sega ni vuli vinaka sara ra qai tauvanua ga.’ (Caka. 4:13; Mari. 6:3) Ia dua na ka na nodra marau nira lesu mai na cakacaka vakavunau. E tusaqati ira mada ga na timoni, ia era vunau tiko ga! Na cava na vuna era marau ra qai yaloqaqa kina?—Wilika Luke 10:1, 17-21.

2. (a) Sala cava era vaka kina na gone lalai na tisaipeli i Jisu? (b) E rawa vakacava mera kila na ka dina vakayalo na imuri i Karisito?

² Dikeva na ka e tukuna o Jisu vei Jiova: “Au vakavinavinaka vei kemuni, Tamaqu, na Turaga ni lomalagi kei na vuravura ni oni vunia na veika qo vei ira na vuku kei ira na vuli vinaka, oni qai vakatakila ga vei ira na gone lalai. Io Tamaqu, ya e salavata kei na nomuni inaki.” (Maciu 11:25, 26) E sega ni tukuna tiko o Jisu nira gone lalai na nona tisaipeli. E kila o koya nira vaka na gone ni vakatauvatani kei ira na tamata vuku ra qai vuli vinaka ena vanua oya, era okati ira ga mera tamata vuku. O koya e bibi sara ni vakavulici ira na nona imuri o Jisu mera vaka na gone, oya mera yalomalumalumu qai vakavulici rawarawa. (Maciu 18:1-4) E yaga vakacava na nodra yalomalumalumu? Ena veidusimaki ni yalo tabu e vukei ira o Jiova mera kila na vakasama titobu ena iVolatabu, ia era sega ni taura rawa qori na tamata vuku, era dau veibeci. O ira qo e vakamatabokotaki ira o Setani kei na nodra dokadoka.

3. Na cava ena veivosakitaki ena ulutaga qo?

³ Sa rauta me marau o Jisu! E vakamarautaki koya me raica ni vakatakila o Jiova na vakasama titobu ena iVolatabu vei ira na yalomalumalumu, e duidui na nodra ivakatagedegede ni vuli se kilaka. E matalau ni vakadonuya o Tamana na ivakarau ni veivakavulici oya. Vakacava sa veisau o Jiova, na cava e dusia ni se tokona tiko na ivakarau ni veivakavulici qo? Nida dikeva na kena isau, eda na marautaka me vaka ga nona marautaka o Jisu.

KILAI RAWARAWA NA VAKASAMA TITOBU ENA IVOLATABU

4. Sala cava e vaka kina na iloloma na itabataba ni Vale ni Vakatawa e vakarawarawataki?

⁴ Ena vica tiko ga na yabaki qo, na veidusimaki vakayalo e vakarautaka na isoqosoqo i Jiova e vakabibitaki na veivakavulici e rawarawa qai matata. Dikeva e tolu na ivakaraitaki. iMatai, sa tiko na itabataba ni Vale ni Vakatawa e vakarawarawataki.a Na itabataba qo e vaka e dua na iloloma vei ira e dredre mera wiliwili se kila vinaka e dua na vosa. Era raica na ulunivuvale nira vakaitavi vakalevu na luvedra ena vuli nira vakayagataka na itabataba qo. Qo na sala levu e vakadewataki kina na kakana vakayalo. Levu era vakaraitaka na nodra vakavinavinaka. E vola e dua na tacida yalewa ni sega ni dau saumitaro ena Vuli Vale ni Vakatawa. E kaya, “Au dau mamadua.” Qo sa sega! Ni vakayagataka na itabataba e vakarawarawataki, e vola: “Au sa saumitaro vakalevu ena gauna qo, au sega ni rere! Au vakavinavinakataki Jiova kei kemudou.”

5. Na cava eso na ka e laurai ena itabataba vou ni New World Translation of the Holy Scriptures ena vosa vakavalagi?

⁵ Kena ikarua, sa tiko na itabataba vakavoutaki ni New World Translation of the Holy Scriptures ena vosa vakavalagi, e sevutaki ena bose vakayabaki ena ika5 ni Okotova, 2013.b Levu na tikinivolatabu sa lailai na kena vosa, ia se tiko ga na kena ibalebale se sa matata sara. Me kena ivakaraitaki, na Jope 10:1 e 27 na kena vosa, qo sa 19; na Vosa Vakaibalebale 8:6 e 20 na kena vosa, qo sa 13. E matata na rua na tikinivolatabu qo ena itabataba vou. E kaya mada ga e dua na tacida lumuti sa vicasagavulu na yabaki nona yalodina tu mai: “Au wilika na Jope ena itabataba vou, e vaka ga au wilika ena imatai ni gauna!” Levu e tautauvata na ka era tukuna.

6. Na cava na nomu rai ena kena vakamatatataki na Maciu 24:45-47?

⁶ Kena ikatolu, vakasamataka mada eso na ka se qai vakamatatataki tiko ga qo. Kena ivakaraitaki, eda marautaka na kena vakamatatataki na noda kila na “dauveiqaravi e yalodina e vuku,” e tabaki ena Vale ni Vakatawa ni 15 Julai, 2013. (Maciu 24:45-47) E vakamacalataka ni dauveiqaravi yalodina e dusia na iLawalawa Dauvakatulewa, na “tamata” se lewenivuvale e dusi ira kece era vakani vakayalo, era lumuti se ‘so tale na sipi.’ (Joni 10:16) Sa totoka sara noda vulica na ka dina qo da qai vakavulici ira kina na vou ena dina! Sala cava tale e vakaraitaka kina o Jiova ni tokona na veivakavulici e rawarawa qai matata?

RAWARAWA QAI MATATA NA KENA VAKAMACALATAKI NA ITUKUTUKU VAKAIVOLATABU

7, 8. Na cava eso na ivakaraitaki ni itukutuku vakaparofisai ena iVolatabu?

⁷ Ke sa vicasagavulu na yabaki na nomu qaravi Jiova tiko mai, o na rairai dikeva na kena veisau na sala e vakamacalataki kina e levu na itukutuku vakaivolatabu ena noda ivola. Ena sala cava? Ena veigauna sa oti, dau matau me volai ena noda ivola ni wase rua na kena kilai na itukutuku vakaivolatabu. iMatai, e vakaibalebaletaka ga na itukutuku ni iVolatabu, na ikarua e vakaibalebaletaka na kena vakayacori vakaparofisai na itukutuku qori. E tiko na yavu vakaivolatabu ni kena vakayacori vakaparofisai na itukutuku vakaivolatabu? Io. Kena ivakaraitaki, e tukuna o Jisu na ‘ivakatakilakila i Jona na parofita.’ (Wilika Maciu 12:39, 40.) E kaya o Jisu nona tu o Jona ena kete ni ika e dusia vakaparofisai na dede ni nona bulu. Kena irairai ni nona ibulubulu o Jona na kete ni ika ke sega ni vakabulai koya o Jiova.

⁸ E tiko eso tale na itukutuku vakaparofisai ena iVolatabu. E vakamacalataka e vica na yapositolo o Paula. Kena ivakaraitaki, na nona veiwekani o Eparama kei Eka, kei nona veiwekani kei Sera e dusia vakaparofisai na veiwekani i Jiova kei na matanitu o Isireli, kei na nona veiwekani kei na isoqosoqo vakalomalagi ni Kalou. (Kala. 4:22-26) Ena sala vata qori, e “iyaloyalo ga ni ka vinaka ena yaco mai” na valeniveitavaki kei na valenisoro, na Siga ni Veibuluti, na bete levu kei na so tale na ka me baleta na Lawa e soli vei Mosese. (Iper. 9:23-25; 10:1) Eda qoroqoro qai dei noda vakabauta nida vulica na kena vakaibalebaletaki vakaparofisai na veika qo. Ia vakacava, eda rawa ni kaya ni tamata, ituvaki se ka kece e vakamacalataki ena iVolatabu e vakaibalebale vakaparofisai vua e dua, se dua na ka?

9. E vakamacalataki vakacava e liu na itukutuku kei Nepoci?

⁹ E dau dikevi va qori na itukutuku vakaivolatabu ena veigauna sa oti. Kena ivakaraitaki na itukutuku kei Nepoci, e beitaki koya vakailasu na Ranadi ca o Jesepeli qai vakamatei koya me rawa ni taukena o Eapi na watina na nona werenivaini. (1 Tui 21:1-16) Ena 1932, e vakamacalataki ni itukutuku qori me dua na drama vakaparofisai. Rau dusi Setani kei na nona isoqosoqo o Eapi kei Jesepeli; o Nepoci e dusi Jisu; na nona mate o Nepoci e dusia vakaparofisai nona vakamatei o Jisu. Ia ni oti tale e vicasagavulu na yabaki, e vakamacalataki ena ivola “Me Dokai na Yacamuni” (Let Your Name Be Sanctified) e tabaki ena 1961, ni dusi ira na lumuti o Nepoci, e dusi Lotu ni Veivanua vaKarisito o Jesepeli. O koya gona, nona vakacacani Nepoci o Jesepeli e dusia nodra vakacacani na lumuti ena iotioti ni veisiga. Ena dua na gauna balavu, e vakadeitaka na nodra vakabauta na tamata ni Kalou na kena dau dikevi va qo na itukutuku vakaivolatabu. Na cava ga sa veisau kina?

10. (a) Yaga vakacava na vuku ena kena qarauni na vakamacalataki eso na itukutuku vakaivolatabu? (b) Na cava e dau vakabibitaki ena noda ivola ena gauna qo?

¹⁰ Ni toso tiko na gauna, eda sega ni kurabuitaka nona vukea tiko o Jiova me vuku vakalevu na “dauveiqaravi e yalodina e vuku.” Qo e vakavuna me qarauni matua na kena vakatokai e dua na itukutuku vakaivolatabu me drama vakaparofisai, vakavo ke dusia vakamatata na iVolatabu. Kena ikuri, e levu e dredre mera taura rawa na ivakamacala e liu me baleta na itukutuku vakaparofisai. Na kena ivakamacala matailalai, oya o cei e dusi cei kei na vuna, e dredre me kilai na kena veisemati, e dredre me nanumi, e dredre tale ga meda kila na kena yaga. Koya e bibi sara, ni vakamacalataki vakamatailalai na ka e vakaibalebaletaka vakaparofisai, e buawa kina se sega sara ga ni kilai na ka e vulici ena itukutuku vakaivolatabu e veivosakitaki tiko. Koya gona, eda raica ena noda ivola ena gauna qo na lesoni rawarawa me baleta na vakabauta, na vosota, na sokalou kei na so tale na itovo bibi ena itukutuku vakaivolatabu.c

11. (a) Meda kila vakacava qo na ibalebale ni itukutuku kei Nepoci? Na cava e yaga kina vei keda kece na nona ivakaraitaki? (b) Na cava sa sega ni vakamacalataki kina vakalevu na ibalebale vakaparofisai ni itukutuku vakaivolatabu ena noda ivola ena vica na yabaki qo? (Raica na “Taro na Dauwiliwili” ena itabataba qo.)

¹¹ O koya gona, meda kila vakacava qo na ibalebale ni itukutuku kei Nepoci? Sa na matata qai rawarawa sara. E mate na turaga yalododonu qo ni yalodina, e sega ni mate me vakaibalebaletaki vakaparofisai vei Jisu se o ira na lumuti. E dei tiko ga o Nepoci ena Lawa i Jiova ena gauna era vakatanitaka kina na nodra lewa o ira na veiliutaki. (Tiko 36:7; 1 Tui 21:3) Na nona ivakaraitaki e dusia nida rawa ni tusaqati kece ena yavu vata ga qori. (Wilika 2 Timoci 3:12.) Se mani vakacava na noda isususu, e rawarawa meda kila, meda nanuma, da qai bulataka na ka eda vulica kina.

12. (a) Na cava meda kua ni nanuma me baleta na itukutuku vakaivolatabu? (b) Na cava e matata kina vei keda na veika titobu? (Raica na ivakamacala e ra.)

¹² Kena ibalebale ni itukutuku vakaivolatabu e tiko ga kina na ka eda vulica, e sega tale ni dua na ka e vakaibalebaletaka? Sega. Ena gauna qo e sega ni vakamacalataki ena noda ivola na kena vakayacori vakaparofisai na itukutuku vakaivolatabu, e vakabibitaka ga na kena veisemati na itukutuku vakaivolatabu kei na dua tale. Me kena ivakaraitaki, na nona yalodina o Nepoci ena gauna e tusaqati kina kei na nona mate eda vakasamataka kina nona yalodina o Karisito kei ira na lumuti. Ia eda vakasamataka tale ga na nodra yalodina e levu na ‘so tale na sipi’ ni Turaga. E matata gona ni vakavulici keda o Jiova ena sala rawarawa.d

RAWARAWA NA KENA VAKAMACALATAKI NA VOSA VAKATAUTAUVATA I JISU

13. Tukuna eso na ivakaraitaki ni vosa vakatautauvata i Jisu sa rawarawa qai matata na noda vakamacalataka.

¹³ O Jisu Karisito na Qasenivuli levu e bula e vuravura qo. Dua na iwalewale ni nona veivakavulici taleitaki oya na vosa vakatautauvata. (Maciu 13:34) Na vosa vakatautauvata e bulabula ni uqeta noda vakasama kei na lomada. Vakacava na noda ivola, sa rawarawa qai matata na kena vakamacalataka na vosa vakatautauvata i Jisu? Io! Eda marautaka dina na kena vakamatatataki na vosa vakatautauvata i Jisu me baleta na leveni, na sore ni musita, kei na lawa ni yavi ena Vale ni Vakatawa 15 Julai, 2008. E matata vei keda ni tolu na vosa vakatautauvata qo e dusia na Matanitu ni Kalou, na matanitu e vukei ira e levu mera vakanadakuya na ituvaki ca ni vuravura qo mera mai tisaipeli i Karisito.

14. (a) Eda vakamacalataka vakacava e liu na italanoa ni kai Samaria dauloloma? (b) Sa veisau vakacava noda kila na italanoa i Jisu?

¹⁴ Vakacava eso na italanoa e vakamacalataka vakamatailalai o Jisu? Eso era vakaibalebale, era parofisai, eso tale e tiko kina na lesoni meda vuli kina. Ia eda na vakaduiduitaka vakacava? Ni toso na gauna, sa qai matata na isaunitaro. Kena ivakaraitaki, vakasamataka na noda vakamacalataka e liu na italanoa ni kai Samaria dauloloma. (Luke 10:30-37) Ena 1924 e kaya na Vale ni Vakatawa vakavalagi ni dusi Jisu na kai Samaria, na gaunisala mai Jerusalemi e gole sobu i Jeriko e dusia ni torosobu tiko ga na bula ni kawatamata me tekivu mai na veivorati e Iteni, o ratou na daubutako e dusi ira na kabani lelevu kei ira na dau rawatubu, o koya na bete kei na Livai e dusia na Lotu ni Veivanua vaKarisito. Nikua, e tabaki ena noda ivola ni italanoa qori e uqeti keda kece na lotu vaKarisito meda kua ni dau veivakaduiduitaki nida vukei ira tale eso, vakauasivi nida veivuke vakayalo. Eda marautaka dina nona vakamatatataka vei keda o Jiova na nona ivakavuvuli.

15. Na cava eda na dikeva ena ulutaga tarava?

¹⁵ Eda na dikeva ena ulutaga tarava e dua tale na vosa vakatautauvata i Jisu, me baleta na tini na goneyalewa. (Maciu 25:1-13) Sala cava e vinakata kina o Jisu meda kila na nona imuri ena iotioti ni veisiga na vosa vakatautauvata qori? Me itukutuku vakaparofisai, meda kaya ni tamata, ituvaki se ka kece e vakamacalataki kina e tiko na kedra ibalebale? Se, e vinakata meda vuli kina na nona imuri me dusimaki keda ena iotioti ni veisiga? Meda dikeva mada.