O Bau Kila?

Vakacava e donu na nodra vakatokai mera “daubutako” na dauveivoli era volitaka na manumanu ena valenisoro e Jerusalemi?

E TUKUNI ena Kosipeli i Maciu, ni “curu ina valenisoro o Jisu qai vakasavi ira kece na veivoli tiko e loma, e vukica nodra teveli na veisau ilavo kei na nodra idabedabe na volitaki ruve. E kaya vei ira: ‘E volai, “Ena vakatokai na noqu vale me vale ni masu,” ia dou sa vukica me nodra qara na daubutako.’”—Maciu 21:12, 13.

Ena ivolatukutuku makawa vakaJiu e tukuni ni o ira na dauveivoli era dabui ira na dauvolivoli nira vakatubura na kena isau. Kena ivakaraitaki, e tukuni ena Mishnah (Keritot 1:7) ni donuya na imatai ni senitiuri G.V. e tubu na isau ni ruve me dua na dinari koula. Qori e tautauvata kei na nona isau e dua ena loma ni 25 na siga ni cakacaka. E vakatarai vei ira na dravudravua mera vakayagataka na ruve me nodra isoro, ia na kena saulevu e dredre kina me voli. (Vunau 1:14; 5:7; 12:6-8) E rarawataka dina o Rapai Simeon ben Gamaliel na ka sa mai yaco, e mani vakalailaitaka na iwiliwili ni vakacaboisoro e dau lavaki, qai vakaduanadrautaki kina na lutu ni isau ni rua na ruve.

Kena ibalebale, e donu vinaka nona tukuna o Jisu nira “daubutako” o ira na dauveivoli ena valenisoro nira veivakalolomataki qai kocokoco.