O na Yalodina Tiko Ga?

“Au na sega ni biuta tani vei au na noqu yalododonu [“yalodina,” NW], ka yacova na siga ka’u na mate kina.”—JOPE 27:5.

1, 2. Na cava meda na sasagataka tiko, kei na taro cava eda na veivosakitaka?

RAITAYALOYALOTAKA mada ni o vakaraica tiko na peleni ni vale. O qoroya na kena droinitaki vakamatau. O na marau ni o vakasamataka na yaga ni vale qo ena nomu vuvale. Ia, ena tawayaga na peleni qori kei na ka o nanuma tiko mo cakava ke o sega ni tara na vale, toki kina, qai maroroya vinaka.

² E vaka kina noda qoroya na itovo ni yalodina, eda raica ni bibi baleta ni na yaga vakalevu sara vei keda kei ira eda lomana. Ia, ena tawayaga noda vakananuma wale tu ga ke da sega ni taracake qai saga meda yalodina tiko ga. Ena gauna qo, e isau levu dina na tara vale. (Luke 14:28, 29) E vaka kina na noda saga meda na yalodina tiko ga, e taura na gauna kei na sasaga vagumatua, ia ena sega ni matewale noda cakava qori. Meda veivosakitaka mada e tolu na taro qo: Ena kilai vakacava ni o tamata yalodina? Ia, o na yalodina tiko ga vakacava ni o lotu vaKarisito? Na cava ena rawa ni caka ke tawayalodina e dua ena dua na gauna?

Rawa Vakacava Nida Yalodina Tiko Ga?

3, 4. (a) E vakavulici keda vakacava o Jiova meda dau yalodina? (b) Eda na vakavinakataka vakacava na noda yalodina, me vaka a vakaraitaka o Jisu?

³ Eda vulica mai na ulutaga sa oti, ni o Jiova e dokai keda ni laiva meda vakatulewa ga vakataki keda se da vinakata meda dau yalodina se sega. Ia, ka ni marau ni na dusimaki keda ena ituvaki qo. E vakavulici keda meda vakavinakataka na itovo talei qo, qai sega ni burogotaka nona yalo tabu, ni uqeti keda nona kaukaua qori meda muria nona ivakavuvuli. (Luke 11:13) E taqomaki ira sara mada ga vakayalo o ira na gumatua mera yalodina tiko ga.—Vkai. 2:7.

⁴ E vakavulici keda vakacava o Jiova meda yalodina tiko ga? Kena imatai sara ga, na nona talai Luvena mai e vuravura. Laurai ena ivakarau ni bula i Jisu ni sega ni vakamelei rawa nona talairawarawa. A “talairawarawa me yacova sara na mate.” (Fpai. 2:8, VV) A talairawarawa o Jisu vei Tamana vakalomalagi ena veika kece e cakava, ena gauna mada ga e donuya kina na ituvaki dredre. “Me kakua ni yaco na noqu lewa, me yaco ga na nomuni lewa,” a kaya vei Jiova. (Luke 22:42) Ena vinaka meda dui taroga, ‘Au dau talairawarawa tale ga va qori?’ Nida dau talairawarawa ena inaki donu, eda na vakaraitaka kina nida dau yalodina. Vakadeuca mada e so na ituvaki e bibi sara ga kina na talairawarawa.

5, 6. (a) E vakabibitaka vakacava o Tevita na bibi ni yalodina ena gauna mada ga eda tiko taudua kina? (b) Ka ni bolebole vakacava vei ira na lotu vaKarisito nikua mera yalodina tiko ga nira tiko taudua?

⁵ Bibi meda dau talairawarawa vei Jiova ena gauna mada ga eda tiko taudua kina. A raica o Tevita ni se gadrevi tiko ga vua me yalodina ena gauna e dau tiko taudua kina. (Wilika Same 101:2.) Ni veiliutaki vakatui, e dau veimaliwai vakalevu o Tevita kei ira na lewenivanua. Sega ni vakabekataki nira dau raici koya e drau vakacaca, se udolu vakacaca na lewenivanua. (Vakatauvatana Same 26:12.) Nona dau yalodina ena gauna va qori a bibi dina, ni dodonu me ivakaraitaki vinaka na tui vei ira na nona tamata. (Vkru. 17:18, 19) Ia, a vulica o Tevita ni bibi tiko ga me dau yalodina ena gauna mada ga e tiko taudua kina ‘ena nona vale.’ Vakacava o keda?

⁶ E kaya o Tevita ena Same 101:3: “Au na sega ni viritura e mataqu e dua na ka ca.” Levu tu na ituvaki nikua eda rawa ni raica kina na ka ca, vakauasivi nida tiko taudua. Kena ivakaraitaki, na rawarawa ni kena vakayagataki na Internet. Rawarawa sara meda bacani meda sarava na iyaloyalo tawakilikili, se iyaloyalo vakasisila mada ga. Ia, noda rawai ena veibacani qo, e sa vakaraitaka tiko beka na talairawarawa ena nona ivakaro na Kalou a vola o Tevita? E veivakaleqai sara ga na iyaloyalo vakasisila baleta ni vakabulabulataka na kocokoco kei na gagadre ca, vakaleqa na lewaeloma, vakaleqa na bula vakawati, qai beci kina o ira kece na vakaitavi kina.—Vkai. 4:23; 2 Kor. 7:1; 1 Ces. 4:3-5.

7. Na ivakavuvuli cava ena uqeti keda meda yalodina tiko ga nida tiko taudua?

⁷ Eda sega ni dau tiko taudua na dauveiqaravi i Jiova. E raici keda tiko na Tamada dauloloma. (Wilika Same 11:4.) Ena marau dina o Jiova ni raica nomu vorata na veitemaki! Ni o cakava qo, o sa muria sara tiko ga na veivakadreti i Jisu ena Maciu 5:28. Koya gona, gumatua sara mo kua ni raica na iyaloyalo ena uqeti iko mo caka cala. Me kua mada ga ni maumau nomu yalodina ni o sarava se wilika na iyaloyalo vakasisila!

8, 9. (a) A vakatovolei vakacava na nodratou yalodina o Taniela kei na nona itokani? (b) Na cava era cakava na itabagone lotu vaKarisito nikua me marau kina o Jiova kei ira era vakabauta vata?

⁸ Ena rawa tale ga nida yalodina tiko ga ena noda talairawarawa vei Jiova ena gauna eda maliwai ira tiko kina eda sega ni vakabauta vata. Vakasamataki Taniela kei na tolu na nona itokani. Ratou a kau vakavesu i Papiloni ni ratou se gonetagane. Eratou maliwai ira era kila ga vakalailai se ra sega sara ga ni kilai Jiova, ra qai uqeti ratou na gonetagane ni Iperiu qo me ratou kania na kakana e vakatabui ena Lawa ni Kalou. A rawarawa sara ni ratou vaqara iulubale. A sega ni tu e kea na nodratou itubutubu, ira na itabaqase, kei ira na bete mera raica na ka ratou cakava tiko. O cei me na kila? Ena kila ga o Jiova. Ratou a tu dei qai talairawarawa vua na Kalou ena ituvaki dredre oya.—Tani. 1:3-9.

⁹ E veiyasa i vuravura, era muria na ivakaraitaki qo o ira na itabagone iVakadinadina i Jiova, era muria na ivakatagedegede ni Kalou me baleti ira na lotu vaKarisito, ra qai sega ni vakamalumalumu ina idre ni nodra icaba. Ni oni sega ni vakaitavi na itabagone ena kena vakayagataki na wainimate gaga, ivalavala kaukaua, vosavosa ca, ivalavala tawakilikili, se so tale na cala, oni sa talairawarawa sara tiko ga vei Jiova. Nomuni cakava qo, oni sa yalodina sara tiko ga kina. Oni na kalougata kina, ni vakamarautaki Jiova tale ga kei ira oni vakabauta vata!—Same 110:3.

10. (a) Na rai cala cava e vakavuna mera tawayalodina kina e so na itabagone? (b) E yaga vakacava na yalodina ena noda taqomaki keda mai na veidauci?

¹⁰ Mo talairawarawa tale ga ni o veimaliwai tiko kei na yalewa ke o tagane, se kei na tagane ke o yalewa. Eda kila ni vakacala na Vosa ni Kalou na veidauci. Dina ga nida dau talairawarawa, ia se rawa tiko ga meda sikalutu. Kena ivakaraitaki, e so na itabagone era vakayacora na ivalavala vakasisila ena nodra vakayagataka na gusudra ena yago tabu, se vakayagataka na sala ni valelailai ena veiyacovi, se na nodrau veiyamoci yago tabu e rua, era nanuma ni sega ni ca qo, e sega tale ga ni okati me veiyacovi. Era sega ni bau via vakasamataka se mera kauaitaka ni vosa e vakayagataka na iVolatabu me veidauci e vauci kina na ivalavala kece qori, na ivalavala ca ena rawa ni vakasivoi kina e dua.a O koya e ca sara, nira sa sega ni kauaitaka mera yalodina. Nida vinakata meda yalodina, eda na sega ni vaqara iulubale meda caka ca kina. Eda na sega ni saga meda cakava na ivalavala ca, da qai nanuma nida na sega ni totogitaki kina. Meda kua ni vakasamataka ga noda na lewai ena vuku ni caka ca eda cakava. Ia, eda na vakadeitaka meda dau vakamarautaki Jiova da qai sega ni cakava na ka me rarawa kina. Meda saga meda kua sara ga ni sikalutu ina caka ca, ia meda yawaka sara da qai “dro tani mai na daudara [“veidauci,” NW].” (1 Kor. 6:18) Nida cakava qori eda vakaraitaka kina ni sega ni vakarairai noda yalodina.

Eda na Yalodina Tiko ga Vakacava?

11. Na cava e bibi kina noda talairawarawa ena veigauna? Tukuna e dua na kena ivakaraitaki.

¹¹ Eda na yalodina tiko ga ke da dau talairawarawa, bibi gona meda dau talairawarawa ena ituvaki kece. Eda na sega beka ni kauaitaka sara vakabibi na noda talairawarawa ga vakadua. Ia ni toso na gauna ena rawa ni kilai kina na noda dau yalodina. Kena ivakaraitaki: Ena rairai sega ni yaga e dua ga na biriki, ia ni tuvani vakamaqosa e vica vata, sa rawa ni tara kina e dua na vale totoka. Koya gona, noda vakamatauna na talairawarawa, eda na yalodina tiko ga kina .—Luke 16:10.

12. E ivakaraitaki ni yalodina vakacava o Tevita ena gauna a vakacacani kina qai vakayacori vua na ivalavala tawadodonu?

¹² Ena laurai noda yalodina nida vosota na ituvaki dredre, se ni caka vei keda na ivalavala tawadodonu. Dikeva mada na ivakaraitaki nei Tevita ena iVolatabu. Ni se cauravou, a vosota voli na veivakacacani ni dua na tui a matataka tiko na lewa i Jiova. Ia, a sega ni vakadonui Tui Saula o Jiova. A vuvutaki Tevita vakalevu o Saula ni vakadonui koya na Kalou. A veiliutaki tiko vakalailai o Saula, qai vakayagataka na mataivalu ni Isireli me vakasasataki Tevita. A laiva o Jiova me yaco tiko ga na veika tawadodonu qo me vica na yabaki. Ena cati Jiova beka kina o Tevita? A nanuma beka ni tawayaga nona vosota voli mai? Sega. A doka vakalevu o Tevita nona itutu o Saula ni nona digitaki na Kalou, e sega kina ni via sauma na ca i Saula ni basika na gauna veiganiti me cakava kina.—1 Sam. 24:2-7.

13. Eda na yalodina tiko ga vakacava ke vakacudrui keda se vakayalolailaitaki keda e dua?

¹³ E vakaibalebale dina vei keda ena gauna qo na ivakaraitaki i Tevita! Eda lewe ni dua na ivavakoso e vuravura raraba, ia eda tamata ivalavala ca, koya gona e rawa ga ni dua na tacida e ivalavala tawadodonu tale se me tawayalodina vei keda. Eda kalougata dina nida bula tu qo ena gauna ena sega ni vakadukadukalitaki kina vakailawalawa na tamata i Jiova. (Aisea 54:17) Ia, na cava eda na cakava ke dua e vakacudrui keda se vakayalolailaitaki keda? Ke da cata tiko ga e dua eda vakabauta vata qai sega ni cakava kina e dua na ka, ena vakaleqai kina na noda yalodina. Na nodra ivalavala e so e sega ni ulubale meda cata kina na Kalou se meda tagutuva noda yalodina voli mai. (Same 119:165) Noda vosota voli mai ena gauna mada ga eda vakatovolei kina, ena vaqaqacotaka noda yalodina.

14. Era raica vakacava o ira na yalodina na veiveisau e dau caka ena loma ni isoqosoqo, kei na vakadodonutaki ni ivakamacala ni tikinivolatabu?

¹⁴ Eda na yalodina tiko ga nida sega ni dau vaqara cala. Kena ibalebale oya meda yalodina vei Jiova. Sa vakalougatataki ira tiko vakalevu na nona tamata ena gauna qo. Ni vakatauvatani kei na veigauna sa oti, sa vakacerecerei tiko na sokalou savasava ena gauna qo e vuravura raraba. (Aisea 2:2-4) Ni vakadodonutaki na ivakamacala ni so na tikinivolatabu se me veisau na icakacaka ni so na ka, eda na tu vakarau meda muria. Eda marau nida raica na ivakadinadina ni serau tiko ga na rarama vakayalo. (Vkai. 4:18) Ke da sega ni kila na vu ni dua na veisau, meda kerei Jiova me vakamatatataka vei keda. Meda yalodina tiko ga nida talairawarawa voli.

Vakacava ke Tawayalodina e Dua?

15. O cei ena rawa ni vakavuna meda tawayalodina?

¹⁵ Eda na vakasamataka sara ga vakabibi na taro qori. Me vaka eda vulica ena ulutaga sa oti, e bibi dina meda dau yalodina. Ke sega vei keda na itovo qo, eda na sega ni volekata na Kalou qai sega tale ga noda inuinui. Meda kua ni guilecava: Ni o keda yadudua ga, eda rawa ni vakavuna na noda tawayalodina. A kila vinaka na tikina qo o Jope. E kaya: “Au na sega ni biuta tani vei au na noqu yalododonu [“yalodina,” NW], ka yacova na siga ka’u na mate kina.” (Jope 27:5) Ke o gumatua me vakataki Jope qai dau volekati Jiova, o na uqeti mo yalodina tiko ga.—Jeme. 4:8.

16, 17. Ni valavala ca bibi e dua (a) na cava me kua ni cakava? (b) na cava me cakava?

¹⁶ Ia, era sa tawayalodina e so. Me vaka ga a yaco ena nodratou gauna na yapositolo, e so tale ga na lotu vaKarisito nikua era dau ivalavala ca bibi. Ke yacovi iko qori, o na rawa beka ni veisau? Io, e rawa. Na cava ena rawa ni caka? Meda dikeva mada e liu na ka meda kua ni cakava. Na ivalavala matau oya meda vunitaka na cala vei ira na noda itubutubu, itokani lotu vaKarisito, se qase ni ivavakoso. Ia, e vakasalataki keda na iVolatabu: “O koya sa ubia na nonai valavala ca ena sega ni tamata yaco: ia ko koya sa vakatusa ka biuta ena lomani.” (Vkai. 28:13) O ira na vunitaka nodra cala era guilecava tiko e dua na ka, oya ni sega ni dua na ka e vunitaki vua na Kalou. (Wilika Iperiu 4:13.) E so e rua tu na nodra ivakarau ni bula, era vakaraitaka nira qaravi Jiova tiko, ra qai cakava tale tiko ga na valavala ca bibi. Na ivakarau ni bula qori e sega sara ga kina na yalodina—e kena veibasai ga. E sega ni marautaka o Jiova nodra sokalou o ira na vunitaka nodra ivalavala ca bibi. Kena veibasai ga, e vakacudrui koya na veivakaisini va qori.—Vkai. 21:27; Aisea 1:11-16.

¹⁷ Ni cakava e dua na cala bibi e dua na lotu vaKarisito, e sa matata tu na ka me cakava. E kena gauna qori me kerea kina nodratou veidusimaki na qase. Sa tiko na ituvatuva i Jiova mera qaravi kina o ira na tauvimate bibi vakayalo. (Wilika James 5:14.) Kua ni leqataka ke o na vunauci se vakadodonutaki, e bibi ga mo vakabulabulataki tale vakayalo. O koya na tamata yalomatua, ena sega ni drovaka na cula se veisele me vakabulai kina mai na mate rerevaki baleta ga na kena mosi, se vaka e vei?—Iper. 12:11.

18, 19. (a) E vakaraitaka vakacava o Tevita nida rawa ni yalodina tale? (b) Na cava o na gumatua kina mo dau yalodina tiko ga?

¹⁸ Ena rawa beka nida bulabula vinaka tale vakayalo? Rawa beka nida vakaraitaka tale na yalodina? Dikeva tale mada na ivakaraitaki i Tevita. A cakava e dua na ivalavala ca bibi. A wanonova qai vinakata e dua na marama vakawati, a veidauci, qai lawakitaka nona labati na watina na marama ya. Sa bau dredre dina meda vakabauta ni o Tevita e turaga yalodina ena gauna sara ga ya, se vaka e vei? Ena rawa beka ni veisau? A dodonu me vunauci vakaukaua o Tevita, mani caka kina vua qori. Ena vuku ni nona veivutuni dina, a vosoti koya kina o Jiova. A vuli mai na veivunauci ya o Tevita qai vakaraitaka tale nona yalodina ena nona talairawarawa vua na Kalou qai vosota voli. E vakaraitaki vinaka na bula i Tevita ena ka e tukuna na Vosa Vakaibalebale 24:16: “Ni sa bale vakavitu na tamata yalododonu, ia sa na tu cake tale.” Cava na kena itinitini? Dikeva na vosa i Jiova vei Solomoni me baleti Tevita ena gauna sa mate kina. (Wilika 1 Tui 9:4.) A nanumi Tevita na Kalou me turaga yalodina. E rawa vei Jiova me vakasavasavataki ira na veivutunitaka nodra ivalavala ca bibi.—Aisea 1:18.

¹⁹ Io, o na dau yalodina ni o talairawarawa vei Jiova mai vu ni lomamu. Meda dau vosota tiko ga, ke da mani sikalutu ina ivalavala ca bibi, meda veivutuni dina. E itovo vakasakiti na yalodina! Meda gumatua mada ga me vakataki Tevita, ni a kaya: “Koi au, ka’u na muria lako na noqu yalododonu [“yalodina,” NW].”—Same 26:11.

[iVakamacala e ra]

O na Sauma Vakacava?

• Eda na rawa ni yalodina vakacava?

• Na cava e so na ka mo cakava mo yalodina tiko ga kina?

• Eda na rawa ni yalodina tale vakacava?

[Kato ena tabana e 8]

“DUA DINA NA KA TOTOKA”

A cavuta na vosa qori e dua na marama sa bukete vula lima tiko, me baleta na nona yalololoma kei na nona yalodina e dua erau sega ni veikilai. A gole ina sitoa ni volitaki kofi, ni oti e vica na aua nona curu mai tuba qai liaca ni a guilecava tu kina na nona baosi. A tawa tu kina e $2,000, a sega ni matau vua me tawana na ilavo levu va ya. “Dua na ka noqu lomaleqa,” e tukuna vua e dua na dauvolaitukutuku ena niusipepa. Ia, a kunea na baosi e dua na goneyalewa qai totolo sara nona vaqara na kena itaukei. Ni sega ni yaco nona inaki, a gole ina siteseni ni ovisa, ratou mani kunea na marama ya na ovisa. “E vakayacora e dua dina na ka totoka,” e kaya ena vakavinavinaka. Na cava e vakaogai koya kina vakalevu na goneyalewa ya me vaqara na itaukei ni baosi? E qai volai ena niusipepa, ni dua na iVakadinadina i Jiova, e kaya na goneyalewa ni “a yalodina baleta na ivakavuvuli ni lotu a susugi kina.”

[iYaloyalo ena tabana e 9]

Rawa nira yalodina na itabagone nira vakatovolei

[iYaloyalo ena tabana e 10]

A tawayalodina ena dua na gauna o Tevita, ia a qai vakabulabulataki tale