Na Cava Mo Yalodina Tiko Ga Kina?

“Mo ni lewai au, Jiova, me vaka . . . na noqu lomadina [“yalodina,” NW] ka tu vei au.”—SAME 7:8.

1, 2. Na cava e so na ituvaki ena vakatovolei kina nona yalodina e dua na lotu vaKarisito?

VAKASAMATAKA mada e tolu na ituvaki qo: Era vakalialia tiko e dua na gonetagane na nona icaba e koronivuli. Ra vinakata me cudru, me rawa ni vosa ca se me veivala. Ena sauma lesu beka, se lewai koya vinaka qai lako laivi mai na ituvaki ya? E tiko taudua e vale e dua na tagane vakawati qai vakekeli tiko ena Internet. Basika sara ena nona kompiuta na itukutuku me baleta e dua na Web site ni iyaloyalo vakasisila. Ena temaki beka me na raica na iyaloyalo qori, se na vakadeitaka me kua? Dua na yalewa lotu vaKarisito e veitalanoa tiko kei na le vica tale na tacina vakayalo, ia sa tekivu vuki na veitalanoa me kakase, e kaseti kina vakaca e dua na tacida yalewa ena ivavakoso. Ena tomana tiko ga na veitalanoa qori, se na saga me veisautaka na ulutaga ni veitalanoa?

² E dina ni ratou duidui na tolu na ituvaki qori, ia e dua na ka ratou tautauvata kina. E vauci kina noda saga vagumatua meda yalodina tiko ga nida lotu vaKarisito. O dau vakasamataka beka nomu yalodina ena veika o kauai kina, ka o gadreva, kei na nomu isausau? Eda kauaitaka e veisiga na keda irairai, noda bulabula vakayago, kena sasagataki na bula, na ituvaki vinaka se ca ni noda veiwekani kei na noda itokani, se na veika e vauca na veidomoni. Eda na rairai vakasamataka sara vakalevu na veika qo. Ia, na cava mada ena kauaitaka o Jiova ni vakadikeva na lomada? (Same 139:23, 24) Ena kauaitaka na noda yalodina.

3. Na vakatulewa cava e laiva o Jiova meda cakava, na cava eda na vakadeuca ena ulutaga qo?

³ O Jiova e dau solia na “solisoli vinaka kecega kei nai solisoli kecega e yaga sara,” qai vakalougatataki keda ena so na taledi. (Jeme. 1:17) Eda vakavinavinakataka gona na isolisoli e vakarautaka mai, me vaka na yagoda, noda vakasama, daumaka noda bula vakayago kei na so tale. (1 Kor. 4:7) Ia, e sega ni vakasaurarataki keda o Jiova meda vakaraitaka na noda yalodina. E laiva meda vakatulewataka sara ga na kena bulataki na itovo qori. (Vkru. 30:19) Bibi gona meda vakadeuca na itovo qo na yalodina. Eda na dikeva tale ga e tolu na vuna e bibi kina meda vakaitovotaka.

Na iBalebale ni Yalodina

4. Na cava e vauci ena yalodina, na cava eda vulica ena lawa i Jiova me baleta na manumanu era cabori me isoro?

⁴ E sega ni matata vei ira e levu na ibalebale ni yalodina. Me kena ivakaraitaki, nira sakitaka na daunipolitiki na nodra yalodina, era vakaibalebaletaka ina nodra dau dina. E bibi na itovo qori, ia e tiki ga ni yalodina. Na yalodina ena iVolatabu e vauci kina na itovo kilikili, e savasava. Na vosa vakaIperiu era veiwekani kei na “yalodina” e yavutaki ena vosa e kena ibalebale na vinaka, taucoko, se tawacala. Dua vei ratou na vosa qo e dau vakayagataki ena isoro e cabori vei Jiova. Ena vakadonuya ga o Jiova na isoro manumanu e vinaka, se taucoko. (Wilika Vunau ni Soro 22:19, 20.) E lewai ira vakaukaua era nakita mera kua ni muria na idusidusi qo o Jiova baleta nira cabora na manumanu lokiloki, tauvimate, se mataboko.—Mala. 1:6-8.

5, 6. (a) Na ivakaraitaki cava e dusia nida dau taleitaka na ka e vinaka, se taucoko? (b) Ni tukuni meda yalodina na tamata ivalavala ca, e kena ibalebale beka oya meda vinaka vakaoti? Vakamacalataka.

⁵ E sega ni ka vou na kena qarai qai vakamareqeti e dua na ka e taucoko. Vakasamataka mada e dua na dau kumuni ivola, e kunea e dua na ivola vakamareqeti ni vaqaqara toka mai vakabalavu, ia e qai raica ni yali tu e so na tabana e yaga vakalevu. E tuburi koya na rarawa, ena rairai biuta tale ena vatanivola. Se, dua na marama e taubale tiko e baravi qai tomi qanivivili tiko. Nona qoroya na kena veimataqali kei na kena totoka, e tomika qai vakadikeva. Na qanivivili cava ena maroroya? O koya e taucoko, e sega ni tatiki. E vaka kina na Kalou, e vakasaqarai ira na dodonu na lomadra vua se ra taucoko.—2 Vei. 16:9.

⁶ O na rairai nanuma ni yalodina ena gadrevi kina na vinaka vakaoti. Nida vakaleqai tu ena ivalavala ca kei na noda sega ni uasivi, eda na rairai vakasamataka nida vaka na ivola e yali toka e vica na tabana, se na qanivivili e tatiki tu. Sega li nida vakila qori ena so na gauna? Meda kua ni leqataka qori baleta ni sega ni namaka o Jiova meda vinaka vakaoti. E sega ni namaka vakasivia vei keda na ka.a (Same 103:14; Jeme. 3:2) Ia, e vinakata meda yalodina tiko ga. Tiko beka na kedrau duidui na vinaka vakaoti kei na yalodina? Io. Kena ivakaraitaki: Sa domona tiko e dua na cauravou e dua na goneyalewa qai lomana me vakawatitaka. Ena ka vakalialia me namaka ni na vinaka vakaoti o goneyalewa. Ia, ena ka vakayalomatua me namaka ni na taucoko nona lomani koya o goneyalewa, oya me domoni koya duadua ga. Ena salavata ga qori, “na Kalou [o Jiova] e vinakata na sokalou vakatabakidua.” (Lako 20:5, NW) E sega ni namaka meda vinaka vakaoti, ia e vinakata me vu mai lomada na noda lomani koya, meda sokaloutaki koya duadua ga.

7, 8. (a) Na ivakaraitaki cava ni yalodina a bulataka o Jisu? (b) Na vakasama bibi cava ni yalodina e tiko ena iVolatabu?

⁷ Eda nanuma lesu na isaunitaro i Jisu ni tarogi vua na vunau bibi duadua. (Wilika Marika 12:28-30.) A sega wale ga ni sauma, ia e bulataka sara ga. E ivakaraitaki uasivi ni dua e lomani Jiova ena nona nanuma kece ga, lomana kece ga, yalona kece ga, kei na nona kaukaua kece ga. Vakaraitaka o koya ni yalodina e sega ni tukuni wale ga, ia e vauci kina na caka vinaka e yavutaki ena inakinaki vinaka. E uqeti keda noda yalodina meda muria na we ni yavai Jisu.—1 Pita 2:21.

⁸ E votu e ke na vakasama bibi me baleta na yalodina e tukuni tiko ena iVolatabu: na noda qarava duadua ga na Kalou o Jiova mai vu ni lomada, kei na noda muria na lomana kei na nona inaki. Noda yalodina tiko ga e kena ibalebale ni na bibi vei keda meda vakamarautaka na Kalou o Jiova ena veika eda cakava e veisiga. Eda na vakabibitaka na veika e vakabibitaka na Kalou. Meda vakadeuca mada e tolu na vuna e bibi kina qo.

1. Noda Yalodina kei na Vakalewai ni Veiliutaki Cecere i Jiova

9. Rau veisemati vakacava na noda yalodina kei na kena vakalewai na veiliutaki cecere ni Kalou?

⁹ Na dodonu ni veiliutaki i Jiova e sega ni vakatau tiko ena noda yalodina. Nona veiliutaki e dodonu, e tawamudu, qai lewa na ka kece. Ena sega ni vakacalai na tikina qo, se cava era mani cakava se kaya na nona ibulibuli. Ia, sa vakarogorogocataki na veiliutaki cecere ni Kalou e lomalagi kei vuravura. Gadrevi gona me vakadodonutaki na ile qo vei ira kece nona ibulibuli—me vakadeitaki ni dodonu ga me veiliutaki, e dodonu na nona veiliutaki, qai yavutaki ena loloma. Eda taleitaka gona na iVakadinadina i Jiova meda vakamacalataka na veiliutaki cecere ni Kalou e lomalagi kei vuravura vei ira na tu vakarau mera rogoca. Ia, na cava eda na cakava ena vuku ni veivakalewai qori? Eda na vakaraitaka vakacava nida tokoni Jiova? Nida yalodina tiko ga.

10. Na cava na veibeitaki i Setani me baleta na noda yalodina? O na sauma vakacava na veibeitaki qori?

¹⁰ Vakasamataka mada na bibi ni nomu yalodina. Na veibeitaki i Setani ni na sega sara ga ni dua na tamata me tokona na veiliutaki ni Kalou, ni na sega tale ga ni dua e qaravi koya mai vu ni lomana. Nira vakarorogo tu e dua na iwase levu ni agilosi e qai kaya na Tevoro vei Jiova: “Nai sau ni kulina na kulina, ia na nona ka kecega ena solia na tamata me bula kina.” (Jope 2:4) Dikeva ni sega ni yalani nona veibeitaki o Setani vua na turaga yalododonu o Jope, ia e beitaki keda raraba na kawatamata. E vakatokai Setani kina na iVolatabu me “daubeitaki ira na wekada.” (Vkta. 12:10) E vakalialiai Jiova ena nona kaya ni o ira na lotu vaKarisito—okati kina o iko—era na sega ni yalodina tiko ga. E kaya o Setani ni o na cakitaki Jiova mo rawa ni bula kina. Na cava o nanuma ena veibeitaki qo? Sega li ni o na vinakata mo vakalasui Setani? O na rawa ke o yalodina tiko ga.

11, 12. (a) Na ivakaraitaki cava e dusia ni veisemati na noda vakatulewa e veisiga kei na noda yalodina? (b) Na cava e ka dokai kina meda dau yalodina?

¹¹ E bibi gona meda yalodina ena noda ivalavala kei na noda vakatulewa e veisiga. Vakasamataka tale na tolu na ituvaki ena itekitekivu ni ulutaga qo. Eratou na yalodina tiko ga vakacava? Na gonetagane a vakalialiai tiko mai koronivuli ena temaki sara ga me sauma lesu ena cudru, ia e qai nanuma na veivakadreti: “Oi kemudou sa lomani dou kakua ni sauma na ca sa caka vei kemudou, ia mo dou laiva vua na Kalou me sauma; ni sa volai. A noqui tavi me’u cudruvaka; au na sauma koi au, sa kaya na Turaga [“Jiova,” NW].” (Roma 12:19) E gole tani ga mai na ituvaki ya. Na tagane vakawati e vakayagataka tiko na Internet a rawa sara ga ni raica na iyaloyalo vakasisila, ia e qai nanuma na ivakavuvuli ena ka e tukuna o Jope: “Au sa ia oti na veiyalayalati kei na mataqu; me’u qai via nanuma vakacava e dua na goneyalewa?” (Jope 31:1) O koya gona, ena sega ni via raica na iyaloyalo vakasisila, ni vaka ga na poisoni. Na marama a veitalanoa tiko kei na so tale ena sega ni via tomana na kakase, e nanuma na veidusimaki: “Me da kitaka yadua na ka e vinaka vua na kai noda, na ka e yaga me vakatavulici [“vakauqeti,” NW] kina ko koya.” (Roma 15:2) E sega ni veivakauqeti na nona vakatetea na kakase qori. Ena sega ni rogorogo vinaka kina na tacina vakayalo ya; ena sega tale ga ni marau na Tamana vakalomalagi. E lewa vinaka na gusuna qai veisautaka na ulutaga ni veivosaki.

¹² Ena ituvaki tolutolu qori, ratou vakatulewa vakayalomatua na lotu vaKarisito. Vaka ga me ratou kaya tiko: ‘O Jiova na noqu iLiuliu. Au na tovolea meu cakava na ka me vakamarautaki koya.’ Nida vakatulewataka na veika e baleti keda, eda dau saga beka meda vakamarautaki Jiova? Ke vaka kina, o sa bulataka sara tiko ga na veiuqeti ena Vosa Vakaibalebale 27:11: “Mo vuku, na luvequ, ka vakamarautaka na lomaqu, me dua na vosa me’u tauca vua sa beitaki au.” E ka dokai dina meda vakamarautaka na Kalou! Sega li ni dodonu meda cakava na ka ena noda vinaka kece meda yalodina tiko ga?

2. Na Yavu ni Nona Veilewai na Kalou

13. E vakaraitaka vakacava na vosa i Jope kei Tevita ni na lewai keda o Jiova ena vuku ni noda yalodina?

¹³ Eda raica ni noda yalodina e vakaraitaka noda tokona na veiliutaki cecere i Jiova. Qo na yavu ena lewai keda kina na Kalou. A kila vinaka na tikina qo o Jope. (Wilika Jope 31:6.) Kila o Jope ni na lewai ira na kawatamata na Kalou ena “[i]vakarau dodonu,” e yavutaki ena nona ivakatagedegede dodonu me raica kina noda yalodina. E tautauvata tale ga na ka e tukuna o Tevita: “Ena lewai ira na tamata ko Jiova: mo ni lewai au, Jiova, me vaka na noqu yalododonu, kei na noqu lomadina ka tu vei au. . . . Ni sa vakatovolea na yalo [“uto,” NW] kei na ivi ni tamata na Kalou yalododonu.” (Same 7:8, 9) Eda kila ni rawa ni dikeva na Kalou na lomada, na “uto kei na ivi” vakaivakatakarakara. Ia meda vakasamataka na ka e vakadikeva tiko. Me vaka ga a kaya o Tevita, ena lewai keda o Jiova ena vuku ni noda yalodina.

14. Na cava meda kua ni nanuma kina nida na sega ni rawa ni yalodina baleta ga nida kawa ivalavala ca?

¹⁴ Raitayaloyalotaka mada nona vakadikeva o Jiova na lomadra na bilioni na tamata era bula tiko ena gauna qo. (1 Vei. 28:9) Ena kunea beka e levu era yalodina tiko ena nodra bulataka na ivakavuvuli ena iVolatabu? Sa bau dredre dina! Ia, meda kua ni nanuma nida sega ni rawa ni yalodina baleta nida tamata ivalavala ca. Na kena veibasai ga, e tiko na vuna vinaka meda vakabauta kina—me vakataki Tevita kei Jope—ni na raica o Jiova noda yalodina, dina nida tamata ivalavala ca. Meda kua ni nanuma nida na yalodina tiko ga kevaka eda tamata uasivi. E tolu ga na tamata uasivi ratou a bau bula e vuravura, ia rau a sega ni yalodina e rua—o Atama kei Ivi. Ia, e vica vata na milioni na tamata ivalavala ca era sa yalodina tiko. O na rawa tale ga.

3. Bibi ina Noda iNuinui

15. E vakaraitaka vakacava o Tevita ni bibi na yalodina ina noda inuinui ena veisiga se bera mai?

¹⁵ Na noda yalodina e yavu sara ga ni nona lewai keda o Jiova, e bibi gona ena noda inuinui ena veisiga se bera mai. A kila vinaka na tikina qo o Tevita. (Wilika Same 41:12.) A nuitaka tu ni na vakalougatataki koya na Kalou me tawamudu. Me vakataki ira ga na lotu vaKarisito ena gauna qo, a nuitaka o Tevita me na bula tawamudu, me vaqaqacotaka tiko ga nona veiwekani kei na Kalou o Jiova ena nona sokalou. E raica o Tevita na bibi ni nona yalodina tiko ga me rawa kina ni vakavatukana na inuinui qori. O Jiova tale ga ena tokoni keda, vakavulici keda, dusimaki keda, qai vakalougatataki keda nida yalodina tiko ga.

16, 17. (a) Na cava o nakita dei kina mo na yalodina tiko ga? (b) Na taro cava ena veivosakitaki ena ulutaga tarava?

¹⁶ E bibi na inuinui meda marau tiko kina ena gauna qo. Ena vakamarautaki keda ena gauna mada ga e dredre kina na bula. Ena taqomaka tale ga noda ivakarau ni vakasama. Nanuma ni iVolatabu e vakatauvatana na inuinui me vaka na ivakaruru ni uluda se na isala kaukaua. (1 Ces. 5:8) Me vaka ga ni taqomaka na ulu ni sotia na isala kaukaua ena ivalu, na inuinui ena taqomaka tale ga na noda vakasama mai na ivakarau ni vakanananu ca, se rai cala e takalevu tu ena vuravura i Setani e sa takali tiko yani. E dravudravua dina na bula ni sega na inuinui. Meda dau dikevi keda vinaka, meda vakasamataka na noda yalodina kei na inuinui ena lai tini kina. Kua ni guilecava ni noda yalodina tiko ga e sa vakaraitaka nida tabea cake na veiliutaki cecere i Jiova qai vakadeitaka na noda inuinui totoka ena veisiga se bera mai. Meda yalodina tiko mada ga!

¹⁷ Ni itovo bibi na yalodina, ena vinaka meda vakadeuca mada e so tale na taro. Eda na taracake vakacava na noda yalodina? Eda na dei vakacava ena noda yalodina? Na cava e rawa ni caka ke sega ni yalodina e dua ena loma ni dua na gauna? Ena saumi na taro qori ena ulutaga e tarava.

[iVakamacala e ra]

O na Sauma Vakacava?

• Na cava na ibalebale ni yalodina?

• E veisemati vakacava na yalodina kei na kena vakalewai na veiliutaki e lomalagi kei vuravura?

• E bibi vakacava na yalodina ina noda inuinui?

[iYaloyalo ena tabana e 5]

Noda bula e veisiga ena vakatovolei kina noda yalodina